Esther 2

Quechuan QXO (Biblia en Quechua del sur de Conchucos)

← Chapter 1 Jump to: Chapter 3 →

1Rabyanaynin päsaskiptinnam rey Asueruqa shonqunpis nanayparä warmin Vastipä yarpakurkurqan. Tsaynöllam yarpaskirqan puntanman mana kutinanpä juk leyta ruranqanta.

2Tsaynö llakikunqanta musyaykurmi mandar yanapaqninkuna niyarqan: «Vastipa trokin akranaykipä maytsaypitapis qoritsimushun kuyayllapä doncëlla jipashkunata.

3Cada mandanqayki provinciakunachö runakunata churashun tsay jipashkunata akraykur pushayämunanpä. Susaman chaykatsimur podernikichö kaq warmikuna täyanqan palaciuman pushayätsun. Tsaychö täyaptinnam yärakunqayki eunucu Hegaipa poderninman churashun wakin warmikikunata cuidanqannölla paykunatapis cuidananpä. Tsay jipashkuna mas kuyayllapä kayänanpä imata nisitäyanqantapis Hegai alistapätsun.

4Paykunapitam mayqan jipashtapis kuyayllapä kaqta akranki Vastipa rantin reina kananpä». Tsaynö niyaptinmi rey Asuero kushikur yätsiyanqannölla jipashkunata qoriyämunanpä nirqan.

5Susa markachömi Israel runa Jairpa tsurin Mardoqueo täkurqan. Jairpa papäninmi Simei karqan. Simeipa papäninmi Cis karqan. Paykunaqa Benjamín trïbu runakunam kayarqan.

6Mardoqueutam rey Nabucodonosor Jerusalénpita atska runakunatawan Babilonia nacionman prësu aparqan. Paykunatawanmi Judá nacionpa mandaqnin rey Coníastapis prësu apayarqan.

7Mardoqueupam prïma panin Hadasa jutiyuq jipash karqan. Paypa jukaq jutinmi Ester karqan. Payqa kuyayllapä alli jipashmi karqan. Esterpa maman y papänin wanuskiptinmi Mardoqueuqa legitimakurnin tsurintanö wätakurqan.

8Rey Asuero ninqannömi Susa markaman jipashkunata qoriskir reypa palaciunman apayarqan. Tsaypitam tsay jipashkunatawan Estertapis Hegaipa poderninman cuidananpä churayarqan.

9Esterwan yachanänakurmi Hegaiqa mas kuyayllapä kananpä ima nisitanqankunatapis y alli mikuykunatapis alistaparqan. Tsaypitanam Esterta shumaq atiendiyänanpä mas yärakunqan qanchis warmikunata ordenarqan. Tsay qanchis warmikunatawanmi Esterta pusharqan palaciuchö kaykaq mas allin kaq cuartukunaman tsaychö täyänanpä. Tsay cuartukunaqa reypa warminkuna y concubïnankuna täyanqan palaciuchömi karqan.

10Mardoqueo yätsinqannömi Israel warmi kanqanta Ester willakurqantsu.

11Ester imanö kaykanqantapis musyananpämi warmikuna täyanqan palaciu patiu punkuman Mardoqueo aywaq.

12Tsay palaciuchömi llapan jipashkunata kuyayllapä kayänanpä juk wata shumaq atiendiyarqan. Tsaymi joqta killa mïrrawan tallushqa aceitiwan shupakuyaq. Tsaypitanam joqta killa mas crëmakunawan y perfümikunawanpis shupakuyaq. Tsaypita turnun töcaptinnam rey Asueruman aywayaq.

13Täyanqan wayipita reypa palaciunman aywaptinmi mas shumaq kayänanpä röpatapis y alhäjakunatapis alistapaq.

14Rey Asueruwan pununqanpita waraynin wäraynam reypa concubïnankuna täyanqan kaq cuartukunamanna jipash aywaq. Tsaychömi Saasgaz jutiyuq eunucu runana paykunata cuidaq. Payqa rey yärakunqan runam karqan. Rey Asuero mana qayatsiptinqa tsaypita manam mayqan jipashpis kutiqtsu. Kuyanqan kaqllatam mayqan jipashtapis qayatsiq.

15Tsaypitanam Mardoqueupa prïma panin Esterta töcarqan rey Asuerupa lädunman aywananpä. Esterqa Abihailpa tsurinmi karqan. Tsaynö töcaptinmi mas shumaq kananpä Esterqa jatikurqan eunucu Hegai yätsinqan kaqkunallata. Estertaqa alli jipash kaptinmi llapanpis kuyayaq.

16Tsaymi qanchis watana rey kaykaptin chunka kaq killachö rey Asuero kaqman Esterta apayarqan. Tsay killapa jutinmi Tebet.

17Esterta rikaykurmi rey Asueruqa pasaypa kuyakurkurqan. Paytanöqa manam mayqan jipashtapis kuyarqantsu. Tsaymi Estertana Vastipa rantin reina kananpä corönata jatitsirqan.

18Reina kananpä Esterta churarmi rey Asueruqa fiestata rurarqan. Tsay fiestamanmi mandar yanapaqninkunatapis qayatsirqan. Tsaynöllam mandanqan provinciakunachö impuestuta bäjatsirqan y atska qaraykunata runakunata aypurqan.

19Concubïnankuna täkuyänan cuartukunachö täyänanpä jipashkunata pushaykanqan witsanmi reypa mandar yanapaqninkuna jamaräyanqan punkuchö Mardoqueo jamaraykarqan.

20Mardoqueo yachatsinqannöllam Israel warmi kanqanta Ester willakurqantsu. Mardoqueupa poderninchö kaykar cäsunqannöllam imaypis Esterqa payta cäsuq.

21Juk junaqmi reypa mandar yanapaqninkuna jamaräyanqan punkuchö jamaraykar Mardoqueo wiyarqan rey Asueruta wanutsiyänanpä ishkay runakuna pasaypa rabyashqa willanakuykäyanqanta. Tsay runakunaqa Bigtawan Teresmi kayarqan. Paykunaqa tsay punkuta cuidaq soldädukunapa capitanninkunam kayarqan.

22Tsaynö willanakuyanqanta wiyaykurmi Mardoqueuqa Esterta willarqan. Tsaytanam Esterqa rey Asueruta willar nirqan: «Wanutsiyäshunaykipä willanakuykäyanqantam Mardoqueo willamashqa».

23Tsaynö willanakuyanqanta shumaq musyaskirnam rey Asuero tsay ishkay runakunata wanuskatsir ayankunata qeruman tuyritsirqan. Tsaypitam Mardoqueo tsaynö willanqanta acta libruman qellqatsirqan.

← Chapter 1 Jump to: Chapter 3 →