Esther 9

Quechuan QXO (Biblia en Quechua del sur de Conchucos)

← Chapter 8 Jump to: Chapter 10 →

1Rey Asuero apatsinqan ordinta cumpliyänanpä junaqmi Israel runakunata wanutsiyänanpä contrankuna alistakushqa shuyäyarqan. Tsaynö shuyäyaptinpis manam paykuna yarpäyanqannötsu karqan, sinöqa Israel runakuna tikrapurninmi vinciyarqan. Tsay junaqmi karqan chunka ishkay kaq killa chunka kimsa kaq junaq. Tsay killapa jutinmi karqan Adar.

2Contran shäriqkunata tsay junaq atacayänanpämi rey Asuero mandanqan llapan provinciakunachö Israel runakuna qorikäyarqan. Tsayta rikaykurmi contrankunaqa pasaypa mantsarirnin atacaytapis valurayarqantsu.

3Rey Asuero mandanqan kaq llapan provinciakunachö Mardoqueo mas poderyuq kaptinmi maytsaychöpis pay ninqanta rurayaq. Tsaymi Mardoqueupita mantsapakurnin llapan provinciakunapa mandaqninkuna, reyta mandar yanapaqninkuna y markakunapa autoridäninkunapis Israel runakunapa janan shäriyarqan.

4Reypa palaciunchö wakinpita mas respitashqa kaptinmi Mardoqueuta mantsayarqan. Poderyuq kanqanqa maytsay provinciakunachömi musyakarqan. Tsaymi Mardoqueutaqa pïmaypis respitayarqan.

5Jitapanqan junaqnam Israel runakuna contran shäriqkunata espädawan wanutsiyarqan.

6Susa markallachömi wanutsiyarqan pitsqa pachak (500) runakunata.

7Tsaynöllam wanutsiyarqan Parsandatata, Dalfónta, Aspatata,

8Poratata, Adalíata, Aridatata,

9Parmastata, Arisaita, Aridaita y Vaizatata.

10Paykunaqa Amánpa chunka tsurinkunam kayarqan. Wanutsirpis paykunapataqa manam imankunatapis apayarqantsu.

11Susa markachö aykaqta wanutsiyanqanta musyaykurmi tsay junaqlla rey Asuero

12reina Esterta nirqan: «Susa markachömi Israel runakuna wanutsiyashqa pitsqa pachak (500) runakunata y Amánpa chunka tsurinkunatapis. Juk markallachö tsaytsika contran runakunata wanuykätsirqa wakin provinciakunachöqa aykaqtarä wanutsiyashqapis. Kananqa ¿imatä mas mañakamänaykipä kaykan? Imata mañakamanqaykitapis awnishaykim».

13Esternam nirqan: «Tayta rey, allim kanman kanan junaq Israel runakuna contran shäriqkunata wanutsiyanqannölla waray junaqpis kay Susa markachö wanutsiyaptin. Tsaynöllam rugashayki Amánpa chunka tsurinkunapa ayankunata qeruman tuyritsinaykipä».

14Ester ruganqannöllam Susa markachö Israel runakuna contrankunata waraynin junaqpis wanutsiyänanpä rey Asuero willakatsirqan. Ester ruganqannöllam Amánpa chunka tsurinkunapa ayankunata qeruman tuyritsirqan.

15Tsaymi Adar killa chunka chusku junaqchö Israel runakuna Susa markachö yapay qorikäyarqan. Tsay junaqnam kimsa pachak (300) runakunata wanutsiyarqan. Peru paykunata wanutsirpis manam imankunatapis apayarqantsu.

16Rey mandanqan provinciakunachöpis contrankunapita defiendikuyänanpämi Israel runakuna qorikäyarqan. Tsaymi tikrapar wanutsiyarqan qanchis chunka pitsqa waranqa (75,000) runakunata. Peru tsaynö wanutsirpis manam imankunatapis apayarqantsu.

17Provinciakunachö tsaynö rurayarqan Adar killa chunka kimsa kaq junaqmi. Chunka chusku kaq junaqnam Israel runakuna kushikurnin mikur upur fiestata rurayarqan.

18Susa markachö täraq Israel runakunanam sïqa chunka kimsa junaqchö y chunka chusku junaqchö defiendikuyarqan. Tsaynöpam paykunaqa chunka pitsqa junaqchörä kushikurnin mikur upur fiestata rurayarqan.

19Tsaynöllam murallanni taksha markakunachö täraq y jallqachö täraq Israel runakunapis Adar killa chunka chusku junaqchö kushikurnin fiestata rurar juknin jukninpis mikuyta qaranakuyan.

20Tsay päsanqankunatam Mardoqueo llapanta qellqarqan. Tsaypitanam rey Asuero mandanqan provinciakunachö täraq Israel runakunaman karuchö taptinpis cercachö taptinpis cartata apatsirqan.

21Tsay cartachömi mandarqan cada wata Adar killa chunka chusku junaqchö y chunka pitsqa junaqchö mana qonqaypa fiestata rurayänanpä.

22Fiestata rurayänanpä tsaynö nirqan Israel runakuna contrankunata vincir kushikuyanqanta imaypis mana qonqayänanpämi. Tsaynöllam nirqan fiestata rurarnin kushishqalla mikur upur juknin jukninpis mikuyta yawatsinakuyänanpä y pobrikunata qarayänanpämi.

23Tsaymi Mardoqueo llapan ninqankunata Israel runakuna mana qonqaypa kananyaqpis rurayan.

24Israel runakunapa contran shärirmi Agagpa castan Hamedatapa tsurin Amánqa suertiyarqan Israel runakunata wanutsiyänanpä.

25Rey Asuero kaqman aywaykur Ester rugaptinnam juk ordinta qellqaskatsir apatsirqan Amánta ushakätsinanpä. Tsay ordinchömi nirqan: «Amánqa Israel runakunata ushakätsiyta munanqanpita kikin wanutsishqa katsun». Tsaynöpam Amántawan tsurinkunata wanurkatsir qeruman tuyritsirqan.

26Tsaykunata yarparmi Israel runakuna imaypis fiestata rurayan. Suerti jitaypa jutin Purim kaptinmi tsay fiestata Purim niyan. Pasaypa ñakayanqanta yarpar y imanö päsayanqanta yarparmi Mardoqueo cartakunqannölla

27tsay fiestata rurayan. Cartachö ninqannöllam Israel runakunapita miraqkunapis y Israel runa kayman yaykuqkunapis cada wata mana qonqaypa ishkay junaq tsay fiestata rurayan.

28Tsay cartachömi nirqan llapan Israel runakuna may provinciachöpis may markachöpis fiestata cada wata rurayänanpä. Tsaynöpam Israel runakuna imaypis qonqayantsu contrankunata tikrapar ushakätsiyanqanta.

29Tsaymi tsay cartachö ninqannö Abihailpa tsurin reina Esterwan Mardoqueo mas juk cartatapis Purim fiestata rurayänanpä qellqayarqan.

30Tsaypitam tsay cartata apatsiyarqan rey Asuero mandanqan pachak ishkay chunka qanchis (127) provinciakunaman. Tsay cartachö animatsirmi

31punta kaq cartachö niyanqannölla Mardoqueuwan reina Ester mandayarqan Israel runakuna y paykunapita miraqkunapis tsay ninqan junaqkunachö Purim fiestata rurayänanpä. Tsaynöllam tsay cartachö niyarqan Israel runakuna ayünuta rurayänanpäpis.

32Purim fiestata rurayänanpä Ester apatsinqan cartaqa punta kaq cartachö Mardoqueo ninqannöllam karqan. Fiestata rurayänanpä mandanqantaqa llapantam libruman qellqayarqan.

← Chapter 8 Jump to: Chapter 10 →