Esther 4

Quechuan QXO (Biblia en Quechua del sur de Conchucos)

← Chapter 3 Jump to: Chapter 5 →

1Tsay ordinta maytsaymanpis apayanqanta musyaykurmi Mardoqueuqa pasaypa llakikurnin röpantapis rachiskirqan. Tsaymi lütu röpata jatikurkur uchpata umanman wiñakur cällikunapa waqar purirqan.

2Tsaynö waqaraykarmi reypa palaciun punkuyaq charqan. Tsaynö röpashqa palaciuman pipis mana yaykuptinmi ruriyaqqa yaykurqantsu.

3Mardoqueo llakikunqannöllam maytsay provinciakunachöpis rey Asuero apatsinqan ordinta musyaykur Israel runakuna pasaypa llakikuyarqan. Tsaynö llakikur waqarmi lütu röpankuna jatishqa uchpa jananman jitakaykur ayunayarqan.

4Esterpa sirviqnin warmikuna y payta cuidaq eunucukunam Mardoqueuta rikayarqan lütu röpan jatishqa puriykaqta. Tsayta willayaptinmi reina Ester pasaypa llakikurnin röpata apatsirqan Mardoqueo jatikunanpä. Tsaynö apaykätsiptinpis manam jatikuyta munarqantsu.

5Tsaymi Atacta qayaykatsir Ester mandarqan Mardoqueo imanir tsaynö puriykanqanta tapunanpä. Hatacqa Esterta cuidaq wardiakunapa capitanninmi karqan.

6Tsaymi reypa palaciu frentin kaq pläzaman Mardoqueuwan parlananpä Hatac aywarqan.

7Hatac tapuptinmi Mardoqueo willarqan Israel runakunata maytsaychöpis ushakätsiyänanpä ordinta Amán apatsinqanta. Tsaynöllam willarqan gastukunapä ayka qellayta Amán alistananpä ninqanta.

8Tsaypitanam Israel runakunata ushakätsiyänanpä kaq ordinta Hatacta Mardoqueo apatsirqan Ester liyinanpä. Entregaykurmi Hatacta nirqan: «Esterta niykullay Israel runakunata mana ushakätsiyänanpä rey Asueruman rugaq aywananpä».

9Tsaypitanam Hatac kutiykur Esterta willarqan Mardoqueo ninqanta.

10Tsaynö willaptinmi Hatacta Ester yapay mandarqan Mardoqueuta ninanpä:

11«Rey Asuero mana qayatsiptinqa manam pipis palaciu rurichö kaq patiuman yaykuntsu paywan parlananpä. Mana qayaykätsiptin yaykuqtaqa warmitapis ollqutapis wanutsinmi. Tsaytaqa reypa yanapaqninkuna y provinciachö täraq runakunapis musyayanmi. Wanunanta mana munar qori väranwan rey toqrinqan kaqtam sïqa pitapis wanutsintsu. Estertaqa juk killanash qayatsishqatsu».

12Hatac tsaynö willaptinmi Mardoqueo

13yätsirqan Esterta ninanpä: «Qampis Israel casta kaykarqa ama yarpaytsu reina kanqaykipita japallayki salvakunaykipä kanqanta.

14Rey Asueruta mana rugaptikiqa Israel runakunata salvananpä jukläpitam shamunqa. Peru noqantsiktam sïqa llapantsikta ushakätsimäshun. Capazchi Israel runakunapa favornin ruganaykipäpis reina kayman charquyki».

15Tsaynö willaptinmi Esterqa Hatacta yapay mandarqan Mardoqueuta willananpä:

16«Susa markachö täraq llapan Israel runakunata qoriy kimsa junaq y kimsa paqas ayunayänaykipä. Tsaynöllam noqapis sirvimaqnïkunawan ayunayäshä. Tsaypitanam mana aywanäpä ley niptinpis rey Asueruman aywashä. Wanutsimaptinqa jina wanutsishqam kashä».

17Tsaymi Mardoqueuqa Ester ninqannölla llapanta rurarqan.

← Chapter 3 Jump to: Chapter 5 →