Nehemiah 10

Quechuan QXO (Biblia en Quechua del sur de Conchucos)

← Chapter 9 Jump to: Chapter 11 →

1Tsay qellqanqantam firmayarqan Hacalíaspa tsurin gobernador Nehemías y Sedequías.

2Tsaynöllam firmayarqan Seraías, Azarías, Jeremías,

3Pasur, Amarías, Malquías,

4Hatús, Sebanías, Maluc,

5Harim, Meremot, Obadías,

6Daniel, Ginetón, Baruc,

7Mesulam, Abías, Mijamín,

8Maazías, Bilgai y Semaías. Paykunaqa llapanpis sacerdötikunam kayarqan.

9Tsaynöllam firmaq levitakuna kayarqan Azaníaspa tsurin Josué, Henadadpita miraq Binúi, Cadmiel

10y levita mayinkuna Sebanías, Hodías, Kelita, Pelaía, Hanán,

11Micaía, Rehob, Hasabías,

12Zacur, Serebías, Sebanías,

13Hodías, Bani y Beninu.

14Qellqanqanta firmaq mandaqkunanam kayarqan Paros, Pahat-moab, Elam, Zatu, Bani,

15Buni, Azgad, Bebai,

16Adonías, Bigvai, Adín,

17Ater, Ezequías, Azur,

18Hodías, Hasum, Bezai,

19Harif, Anatot, Nebai,

20Magpías, Mesulam, Hezir,

21Mesezabeel, Sadoc, Jadúa,

22Pelatías, Hanán, Anaías,

23Oseas, Hananías, Hasub,

24Halohes, Pilha, Sobec,

25Rehum, Hasabna, Maasías,

26Ahías, Hanán, Anán,

27Maluc, Harim y Baana.

28Wakin firmaq runakunanam kayarqan sacerdötikuna, levitakuna, punku cuidaqkuna, cantaqkuna, templuchö aruqkuna y Tayta Diospa leyninkunata cumpliyänanpä jäpa runakunapita witikuqkuna. Paykunawanmi warminkuna, ollqu tsurinkuna y warmi tsurinkuna kayarqan. Tsay tsurinkunaqa llapanpis tantiyakuqnam kayarqan.

29Castankunawan y mandaqninkunawan qorikarmi jurar awniyarqan Moisés chaskinqan leykunata imaypis cäsuyänanpä. Tsaynöllam awniyarqan Tayta Diosnintsikpa llapan mandamientunkunata, ordenanqankunata y estatütunkunata cäsukuyänanpä.

30Tsaymi niyarqan: «Kananmi awnintsik mana Israel jövinkunawan jipash tsurintsikkunata mana tätsinantsikpä y mana Israel jipashkunawan ollqu tsurintsikkunata mana tätsinantsikpä.

31«Tsaynöllam awnintsik jamay junaqchö o mayqan fiesta junaqchöpis imatapis mana rantinantsikpä. Manam rantishuntsu kaychö täraq mana Israel runakuna negociunta rantikuq apayämuptinpis o chakranpita mikuykunata rantikuq apayämuptinpis. «Tsaynöllam awnintsik qanchis kaq watachö chakrantsikkunata mana murunantsikpä y jaqantsikkunatapis mana cobranantsikpä.

32«Tsay jananmanmi awnintsik cada wata chusku grämu qellayta Tayta Diosnintsikpa templunchö gastukunapä ofrendata churanantsikpä.

33Tsay qellaymi kanqa sagrädu tantapä, qoyay qoyay rupatsina tsaki mikuy ofrendapä, qoyay qoyay rupatsina sacrificiukunapä, jamay junaq sacrificiukunapä, llullu killachö y wakin fiestakunachöpis sacrificiukunapä, sagrädu ofrendakunapä, jutsata rurayanqanpita purificatsina sacrificiukunapä y Tayta Diosnintsikta adorashqa templuchö ima gastupäpis.

34«Tsaynöllam awnintsik Tayta Diosnintsikpa templunman yantata apanantsikpä. Tsay yantawanmi Diosnintsikpa leyninkunachö qellqashqa kaykanqannö altarchö sacrificiuta rupatsiyanqa. Castantsikta imay töcanqanta musyanantsikpämi suertiyarquntsik. Según suertim sacerdöti karpis, levita o común runa karpis töcamashqaqa yantata cada wata apashun.

35«Tsaynöllam awnintsik Tayta Diospa templunman cada wata primiciantsikta apanantsikpä. Tsaynö apashun murunqantsikpita cosecharpis o frütakunata cosecharpis.

36Diosnintsikpa leyninkunachö qellqashqa kanqannömi mayor tsurintsikkunatapis templuchö sirviq sacerdötikunata entregashun. Tsaynöllam wäkantsikkunapa, üshantsikkunapa y cabrantsikkunapa punta yuriq orqu wawankunatapis entregashun.

37Tsaynöllam primiciata apar Tayta Diosnintsikpa templunchö kaykaq almacén cuartukunaman allin kaqkunata qorishun. Tsaynö qorishun aqatsikuy primiciata, frütakunapa primicianta, vïnu primiciata y aceiti primiciatapis. Tsaykuna kanqa sacerdötikunapämi. «Tsaynöllam cosëchantsikpita diezmuta levitakunapä qorishun. Paykunam markantsikkunachö diezmuta qoriyan.

38Levitakuna diezmuta qoriyaptin Aarón casta juk sacerdöti compañatsun. Levitakunapis diezmupita diezmuta rakiskir almacén cuartukunaman churayänanpä Tayta Diosnintsikpa templunman apayätsun.

39«Levita o mana levita karpis trïgu ofrendata, mushuq vïnu ofrendata y aceiti ofrendata apashun. Tsaykunata templuchö kaykaq almacén cuartukunaman qorishun. Tsaychömi sagrädu manëjukuna kaykan. Tsaynöllam turnun töcaptin sacerdötikuna, punku cuidaqkuna y cantaqkuna kaykäyan. «Tayta Diosnintsikta templunchö imaypis sirviyänanpä llapan nisitanqanta awninqantsiknölla alistapäshun».

← Chapter 9 Jump to: Chapter 11 →