Nehemiah 8

Quechuan QXO (Biblia en Quechua del sur de Conchucos)

← Chapter 7 Jump to: Chapter 9 →

1Tsaypita juk junaqchönam llapan Israel runakuna Yaku jutiyuq pläzaman qorikäyarqan. Tsaychömi yachatsikuq Esdrasta mañakuyarqan Moisés qellqanqan leykunata apamunanpä. Tsay leykunatam Israel runakunata Tayta Dios entregashqa karqan.

2Tsaynö mañakuyaptinmi sacerdöti Esdrasqa leykuna qellqashqa kanqan rölluta aparqan llapan runakuna, warmikuna y tantiyayta puëdiq wamrakunapis juntaraykäyanqan kaqman. Tsay junaq qanchis kaq killa punta kaq junaqmi karqan.

3Yaku jutiyuq punkuchö kaykaq pläzachömi tsay runakunata wäraypita pullan junaqyaq röllupita liyiparqan. Liyipaptinmi llapan runakuna shumaq wiyaräyarqan.

4Parlamunanpä armayanqan escenariuchömi yachatsikuq Esdrasqa runakuna rikayänanpä ichiraykarqan. Tsay escenariuqa tsay junaqpä rurashqam karqan. Derëcha kaq lädunchömi ichiräyarqan Matatías, Sema, Anías, Urías, Hilcías y Maasías. Itsuq kaq lädunchönam ichiräyarqan Pedaías, Misael, Malquías, Hasum, Hasbadana, Zacarías y Mesulam.

5Runakuna rikaykaptinmi rölluta Esdras kichaptin runakuna ichïyarqan.

6Tsaymi Esdrasqa poderyuq Tayta Diosta alabarqan. Runakunapis makinkunata joqarirkurmi niyarqan: «¡Amén! ¡Tsaynö kaykullätsun!» Tsaypitam Tayta Diosta adorar qonqurikuyarqan urkunkunapis patsaman töpanqanyaq.

7Levitakunam Esdras imata liyinqantapis runakunata shumaq tantiyatsiyarqan. Tantiyatsiyaptinmi runakunaqa mana kuyukuypa atentu wiyayarqan. Tsay levitakunam kayarqan Josué, Bani, Serebías, Jamín, Acub, Sabetai, Hodías, Maasías, Kelita, Azarías, Jozabed, Hanán y Pelaía.

8Tayta Diospa leyninkunata röllupita jinchipa liyipaskirmi shumaq tantiyatsiyarqan.

9Liyipäyanqanta wiyaykurmi llakikurnin llapan runakuna waqayarqan. Tsaymi gobernador Nehemías, yachatsikuq sacerdöti Esdras y leykunata tantiyatsiq levitakunapis niyarqan: «Kanan junaqqa Tayta Diosnintsikta adorana sagrädu junaqmi. Ama llakikuyaytsu ni waqayaytsu».

10Mastam Esdras nirqan: «Alli allillata kusinaskir mikuyay. Mishkiq vïnutapis llapaykikuna upuyay. Mikuyniynaq kaqkunatapis qarayay. Kanan junaq Tayta Diosnintsikta adorana sagrädu junaqmi. Ama llakikuyaytsu. Tayta Dios kushikuyta qaramashqam kallpayuqpis kantsik».

11Tsaynöllam levitakunapis runakunata shoqar niyarqan: «Sagrädu junaq kaykaptinqa ama waqayaytsu».

12Tsaymi llapan runakuna mikuq y upuq aywayarqan. Liyipäyanqanta tantiyarninmi kushikuypita juknin jukninpis mikuyta rakipunakur jatun fiestata rurayarqan.

13Waraynin junaqnam leykuna ima ninqantapis shumaq musyayänanpä mayor runakuna, sacerdötikuna y levitakuna yachatsikuq Esdraswan yapay qorikäyarqan.

14Liyirninmi tantiyayarqan qanchis kaq killachö fiestata rurar Israel runakuna ramädallachö täyänanpä Tayta Dios Moiséswan willakatsir mandanqanta.

15Tsaymi jinan höra willakatsiyarqan Jerusalénchö y llapan markakunachö runakuna jirkapa aywar olïvuspa, arrayanpa, palma jachapa y wakin jachakunapa rämankunatapis qorimur leykuna ninqannö ramädata rurayänanpä.

16Tsaymi jirkapa aywar rämakunata apayämurqan. Tsaykunawanmi ramädata rurayarqan wayin janankunachö, patiunkunachö Tayta Diospa templun patiuchö, Yaku jutiyuq punku pläzachö y Efraín jutiyuq punku pläzachöpis.

17Juklä nacionchö taykäyanqanpita chämuq llapan Israel runakunapis ramädata ruraskirmi tsaychö patsakuyarqan. Nunpa tsurin Josué kawanqan witsanpita fiestata rurar ramädachö punuyashqatsu kayarqan. Tayta Dios mandanqannö fiestata rurarmi runakuna pasaypa kushikuyarqan.

18Tsay fiestataqa qanchis junaqmi rurayarqan. Qallanqan junaqpita ushanqanyaqmi Tayta Diospa leyninkunata qoyay qoyay Esdras liyiparqan. Puwaq kaq junaqchönam leychö ninqannölla Tayta Diosta adorayänanpä llapan qorikäyarqan.

← Chapter 7 Jump to: Chapter 9 →