Nehemiah 6

Quechuan QXO (Biblia en Quechua del sur de Conchucos)

← Chapter 5 Jump to: Chapter 7 →

1Sanbalat, Tobías, Arabia runa Gesem y wakin chikimaqnï runakunam Jerusalén markapa murällan juk uchkullatapis mana dëjaypa allitsatsinqäta musyayarqan. Peru punkukunatam sïqa manarä churatsirqärätsu.

2Ushaykäyanqäta musyaskirmi Sanbalatwan Gesem willakatsimurqan: «Ono pampachö kaykaq mayqan markamanpis qorikäshun». Tsaynö niyaptinmi maliciaskirqä niq tumpalla atacayämänanpä tsaynö qayaykätsiyämanqanta.

3Tsaymi mandayämunqan runakunata nirqä: «Mas väliq aruychö aruptïmi tiempü kantsu shamunäpä. Shamuptïqa aruynïmi jitapakanqa».

4Tsaynö nikaptïpis chusku kutim willakuqta mandayämurqan ñöpata niyämanqannölla niyämänanpä. Noqapis puntata ninqänöllam nirqä.

5Pitsqa kutichönam yanapaqninwan cartata apatsimurqan. Tsay cartachöpis punta kaq cartakunachö ninqannöllam nirqan. Llapanpis liyiyänanpämi kichayllata apatsimurqan.

6Tsay cartachömi nirqan: «Reypa contran shärir murällata shäriykätsinqaykitam maytsaychöpis runakuna parlaykäyan. Tsaynöllam nikäyan Jerusalén runakunapa mandaqnin rey kanaykipä yarpaykanqaykita. Gesempis tsaynöllam nikan.

7Tsaynöllash Jerusalénchö rey kanqaykita willakuyänanpä profëtakunatapis churarquyki. Paykunash niyanqa: «¡Judáchö mandamaqnintsik rey kaykannam!» Tsaykunata rey Artajerjes manarä musyanqanyaq ras shamuy parlanantsikpä».

8Tsaymi Sanbalatta willananpä willakuqninta noqapis nirqä: «Tsay ninqaykiqa manam rasunpatsu. Tsaytaqa yarpayllaykipitam nikanki».

9Paykunaqa aruykäyanqäta dëjanäta munarmi imaykanöpapis mantsaritsiyämayta munayarqan. Peru noqaqa Tayta Diostam mañakurqä aruyanqächö mana dëjaypa yanapayämänanpä.

10Tsaypitanam Dalaíaspa tsurin y Mehetabelpa willkan Semaíasta watukaq aywarqä. Payqa wayinchömi pakaraykarqan. Chaykuptïmi nimarqan: «Wanutsishunaykipämi juraykäyan. Mana wanutsishunaykipä Tayta Diospa templunchö kaykaq mas ruri kaq cuartuman yaykuskir punkuta siguramushun. Mana pakakuptikiqa kanan paqasmi wanutsiyäshunki».

11Niptinmi nirqä: «Noqaqa manam wanuyta mantsätsu. Tayta Diosman yärakuq runakunaqa manam ni templumanpis pakakuyantsu. Imata nimaptikipis manam pakakushätsu».

12Tsaymi tantiyarqä Semaías Tayta Diospa profëtan mana kanqanta. Payqa profëta tukurqan Sanbalatwan Tobías pägashqa kaptillanmi.

13Payta tsaynö pägayarqan mantsaritsimänanpä y yätsimanqanta rurar jutsata ruranäpämi. Tsaynö ruraptïqa conträ parlar pasaypa penqakuymanmi churayämanman karqan.

14«¡Tayta Dios, Sanbalatwan Tobías tsaynö rurayämanqanpita castigaykullay! ¡Tsaynölla profetïsa tukuq Noadíastapis castigaykullay! ¡Wakin profëta tukuqkunatapis mantsaritsiyämanqanpita castigaykullay!»

15Elul killachö ishkay chunka pitsqa (25) junaqchömi murälla pirqayta ushayarqä. Pitsqa chunka ishkay (52) junaqmi tsay aruychö kayarqä.

16Llapan chikimaqkunam musyayarqan wallka junaqllachö aruyta ushayanqäta. Cerca nacionkunachö täraq runakunapis pasaypa mantsakäyaptin runa tukuyanqanpis mayparä awarqan. Paykunam tantiyayarqan Tayta Diosnintsik yanapayämaptin aruyta ushayanqäta.

17Tsay witsanmi respitashqa Judá runakunawan Tobías atska kuti cartanakuyarqan.

18Judáchö täraq atskaq runakunam Tobíaswan alli rikanakuyarqan. Tsaynö rikanakuyarqan Arapa tsurin Secaníaspa mashan Tobías kaptinmi. Tsaynöllam Tobíaspa tsurin Johanánmi Mesulampa mashan karqan. Mesulam Berequíaspa tsurinmi karqan.

19Tobíaspäqa pïmaypis alli runa kanqantam niyämaq. Tsaynöllam ima ninqallätapis payta ras willayaq. Tobíasqa mantsaritsimänan raykurmi cartata noqapä cada vezlla apatsimuq.

← Chapter 5 Jump to: Chapter 7 →