Nehemiah 13

Quechuan QXO (Biblia en Quechua del sur de Conchucos)

← Chapter 12 Jump to:

1Tsay junaqmi llapan juntaraykäyaptin Moisés qellqanqan rölluta liyiyarqan. Tsaychö liyiptinmi tantiyayarqan amonita runakuna ni moabita runakuna Tayta Diosta adorayänanpä qorikäyanqanman imaypis mana yaykuyänanpä ninqanta.

2Israel runakuna Canaánman chaykäyaptinmi tsay runakunaqa mikuyta alistapäyarqantsu ni yakuta upuyänantapis dëjayarqantsu. Tsaypa rantinqa Balaamtam pägayarqan Israel runakunata maldicionananpä. Tsaynö maldicionananta munaptinpis Tayta Diosnintsik mana dëjaptinmi maldicionananpa rantin bendisarqan.

3Tsay ley ninqanta wiyarmi Israel runapa jäpa warminchö yuriq tsurinkunataqa consientiyarqantsu templuman yaykuyänanta.

4Puntatanam sacerdöti Eliasib compädrita rurarqan Tobíaswan. Eliasibqa Tayta Diosnintsikpa templunchö almacén cuartukunata cuidaqmi karqan.

5Tsaychö tänanpämi Tobíasta jatun almacén cuartuta rikatsirqan. Tsaymanmi ñöpata churayarqan tsaki mikuy ofrendakunata, inciensiukunata, manëjukunata, trïgupita diezmukunata, vïnupita diezmukunata y aceitipita diezmukunata. Moisés qellqanqan leykunachömi nin tsay diezmukuna levitakunapä, cantaqkunapä y punku cuidaqkunapä kanqanta. Tsaynöllam tsay almacén cuartuman churayarqan sacerdötikunapä ofrendakunata.

6Tsay witsan manam Jerusalénchötsu kaykarqä, sinöqa Babilonia nacionpa mandaqnin rey Artajerjesta watukaq aywarmi illashqa karqä. Tsayqa kimsa chunka ishkay (32) wata Artajerjes mandaykanqan witsanmi karqan. Tsaypita unayllatanam Jerusalénman reypa permïsunwan yapay kutirqä.

7Jerusalénman chaykurmi musyarqä Tayta Diospa templun patiuchö Tobías tänanpä cuartuta Eliasib rikatsir llutanta ruranqanta.

8Tsaymi pasaypa rabyar Tobías taykanqan cuartupita llapan imaykankunatapis waqtaman jitaskirqä.

9Tsaypitanam ordenarqä tsay cuartukunata limpiar purificananpä. Tsaynöllam ordenarqä Tayta Diospa templunchö manijayanqan sagrädu manëjukunata, ofrendakunata y inciensiukunata cuartuman kutitsiyänanpä.

10Tsaynöllam willayämarqan levitakunapä mikuykunata templuman manana apayanqanta. Tsaynö mana apayaptinshi faltäpakur levitakuna y cantaqkuna cada ünunkuna chakrankunaman kutikuyänä.

11Tsaymi autoridäkunata ollqutupar nirqä: «¡Imanirtä Tayta Diospa templunman apayämunaykipä kaqkunata apayämunkinatsu!» Tsaypitanam sacerdötikunata y levitakunata qayaykatsir templuchö kaykaq aruyninkunaman kutitsirqä.

12Tsaymi llapan Judá runakuna templu almacén cuartukunaman trïguta, vïnuta y aceititapis diezmuta apayarqan.

13Tsaypitanam almacén cuartuta cuidayänanpä sacerdöti Selemíasta, secretariu Sadocta y levita Pedaíasta churarqä. Paykunata yanapananpämi Hanánta churarqä. Payqa Zacurpa tsurin y Mataníaspa willkanmi karqan. Tsay chuskunkunatam yärakuypä kayaptin churarqä. Paykunanam sacerdöti mayinkunata y levita mayinkunata mikuykunata aypuyarqan.

14«Tayta Diosllä, templuykichö shumaq sirviyäshunaykipä sacerdötikunata y levitakunata kutitsinqäta ama qonqaykullaytsu».

15Tsay witsanmi Judáchö wakin runakunata rikarqä jamay junaqchö vïnupä üvata jaruykäyaqta. Wakintanam trïguta qoriskir ashnunkunawan chaqnaykäyaqta rikarqä. Tsaynöllam rikarqä vïnuta, üvata, hïgusta y imaykatapis jamay junaqchö Jerusalénman apaykäyaqta. Tsaymi tsay junaqchö apayanqankunata rantikuyaptin ollqutuparqä.

16Tsaynöllam Tiro runakuna pescäduta y imaykatapis apatsiyämurqan jamay junaqchö Judá runakunata Jerusalénchö rantikuyänanpä.

17Tsaymi Judá autoridäkunata ollqutupar nirqä: «Qamkunaqa jamay junaqta mana respitar mana allitam ruraykäyanki.

18Unay castantsikkunapis jamay junaqchö rantikuyaptinmi Tayta Diosnintsik castigarqan. Tsaymi markantsikta ushakätsiptin pasaypa ñakarquntsik. Qamkunapis ¡imanirtä jamay junaqta respitaykäyankitsu! Mana respitayaptikiqa yapaymi castigamäshun».

19Tsaypitanam ordenarqä jamay junaq qallaykunan tardi Jerusalén punkuta wichqayänanpä y jamay junaq päsarkuptinrä kichayänanpä. Tsaypita marka yaykuna punkukunamanmi sirvimaqnïkunata churarqä jamay junaqchö runakuna imatapis yaykutsiyta munayaptin mana dëjayänanpä.

20Tsaymi jamay junaqchö rantikuqkuna waräyarqan Jerusalén punkuchö. Tsaynö waräyarqan juk ishkay jamay junaqkunam.

21Tsaymi nirqä: «Murälla ñöpanman ama patsakuyaytsu. Yapay tsaychö patsakuyaptikiqa carcelmanmi wichqatsiyäshayki». Tsaynö niptïmi jamay junaqchö shayämurqannatsu.

22Tsaypitam levitakunata ordenarqä bäñakur purificakuyänanpä. Tsaynöllam nirqä jamay junaqta respitatsir markaman yaykuna punkukunata cuidayänanpä. «Tayta Dios, tsaynö ruranqäta yarpar kuyapaykallämay».

23Tsay witsanmi cuentata qokurqä wakin Israel runakuna Asdod warmikunawan, amonita warmikunawan y moabita warmikunawan churakashqa kayanqanta.

24Wakin tsurinkunaqa Israel runakunapa idiömanta parlayta mana yachar Asdod runakunapa o juklä runakunapa idiömantam parlayarqan.

25Tsaymi ollqutupar paykunata maldicionarqä. Wakintam maqarqä. Wakintanam aqtsanta llukirqä. Tsaypitam Tayta Diospa jutinchö promititsirqä warmi tsurinkunata ni ollqu tsurinkunata jäpa runakunapa tsurinkunawan mana tätsiyänanpä ni kikinkunapis tsay runakunapa warmi tsurinkunawan mana täyänanpä.

26Tsaynöllam nirqä: «¿Manaku yarpäyanki Israel runakunapa mandaqnin rey Salomónpis jäpa warmikunawan churakarnin jutsata ruranqanta? Payqa maytsay nacionchö reykunapita mas yachaqmi karqan. Tayta Diosmi payta kuyar Israel runakunapa mandaqnin rey kananpä churarqan. Tsaynö kaykarpis jäpa warminkuna animatsiptinmi juk dioskunata adorarqan.

27¿Qamkuna rurayanqaykinötsurä wakinnïkunapis jäpa warmikunawan täyäman? Qamkunaqa Diosnintsikta mana cäsur pasaypa mana allitam rurayarqayki».

28Mandaq sacerdöti Eliasibpa tsurin Joiadapa juk tsurinmi horeo runa Sanbalatpa tsurinwan tarqan. Tsaymi tsay runata Jerusalénpita qarqurqä.

29«Tayta Diosllä, paykunaqa sacerdöti kaykarmi llutanta rurayashqa. Tsaynöllam sacerdöti kayänanpä levitakunawan pactu ruranqaykita manakaqman churayashqa. Tsaynö rurayanqanpita mana qonqaypa castigaykullay».

30Tsaynömi paykunata tantiyatsirqä jäpa warmikunawan mana churakäyänanpä. Tsaynöllam sacerdötikunata y levitakunata Tayta Diosta templuchö trocanakuypa sirviyänanpä churarqä.

31Tsaynöllam runakunata ordenarqä imay junaq yantata churayämunanpä y imay junaq primiciata qoriyanqanta apayämunanpä. «Tayta Diosllä, yanapamänaykipä imaypis yarpaykullay».

← Chapter 12 Jump to: