Nehemiah 4

Quechuan QXO (Biblia en Quechua del sur de Conchucos)

← Chapter 3 Jump to: Chapter 5 →

1Juchushqa kaykaq murällata allitsaykäyanqäta musyaykurmi Sanbalatqa pasaypa rabyakur manakaqman churayämarqan.

2Tsaymi mandaq mayinkunapa y Samaria soldädukunapa puntanchö niyämarqan: «¡Imatatä ruraykäyan mana väliq Israel runakuna! ¿Allitsayta ushaskir sacrificiuta rupatsiyänanpä kanqantatsurä yarpäyan? ¿Juk junaqlla ushayänanpä kanqantatsurä yarpäyan? ¿Pasaypa rupashqa qoturaykaq rumikunawantsurä pirqayta yarpäyan?»

3Tsaynöllam Sambalatpa ñöpachö amonita Tobíaspis nirqan: «Paykuna pirqayanqantaqa atuqllam lanqur juchuratsinqa».

4Tsaynö niyaptinmi Tayta Diosta mañakur nirqä: «Tayta Diosllä, wiyaykullay paykuna manakaqman churayämanqanta. Maldicionayämanqan kikinkunaman chaykullatsun. Chikiqninkunapa poderninman entregaykullay juklä nacionman prësu apayänanpä.

5Jutsankunatapis ama perdonaytsu. Paykunaqa marka murällata shäritsiyaptïmi ashlliyäman».

6Tsaynö mañakuskirmi mana qelanaypa arur murällata pullanyaqna shäritsiyarqä.

7Jerusalén murällata altutana shäriykätsiyanqäta y llapan juchushqa kaqkunata allitsaykäyanqäta musyaskirmi Sanbalat, Tobías, Arabia runakuna, amonita runakuna y Asdod runakuna pasaypa rabyakuyarqan.

8Tsaymi willanakuyarqan Jerusalénman shamuykur atacayämänanpä.

9Tsaynö willanakuyaptinpis Tayta Diosnintsikta mañakuskirmi churanakuyarqä paqaspapis o junaqpapis atacayämaptin defiendikuyänäpä.

10Tsaypitanam Judá runakuna desanimarnin niyarqan: «Murälla juchunqan rumikuna alläpam muntunaraykan. Ashtamuqkunapa kallpanpis manam kannatsu. Murällata shäritsiyta manam puëdishunnatsu».

11Chikimaqnïkunapis willanakurshi niyänä: «Aruyta dëjayänanpä illaqpita yaykuykur chipyaq wanutsishun».

12Tsaynöllam chikimaqnïkuna täyanqan läduchö täraq Israel mayïkuna kutin kutin willayämarqan wakpita kaypita atacayämänanpä willanakuyanqanta.

13Tsaymi runakunata castanpa castanpa churarqä espädankunawan, lanzankunawan y flëchankunawan cuidayänanpä. Paykunatam churarqä murälla waqtankunaman, fácil yaykuyänanpä kaqkunaman y pipis mana cuidanqan kaqkunaman.

14Runakuna mantsariyanqanta rikarmi mayor runakunata, mandaqkunata y llapan runakunatapis nirqä: «Paykunata ama mantsashuntsu. Llapanpä poderösu Tayta Diosman yärakur castaykikunata, tsurikikunata, warmikikunata y wayikikunata defiendiyay».

15Pelyayänäpä shuyaraykäyanqäta musyaykur y Tayta Dios tsapata churapunqanta tantiyaskirmi conträkuna atacayämarqannatsu. Tsaymi murälla allitsayta cada ünükuna sïguiyarqä.

16Tsaypitanam podernïchö kaykaq pullan soldädukuna aruyarqan y pullan kaqkunanam bronci chalëcun jatishqa pelyayänanpä shuyaraykäyarqan lanzankunawan, escüdunkunawan y flëchankunawanpis. Capitankunapis Judá runakunata yanapayänanpä listum kayarqan.

17Murällata allitsaqkuna y rumi ashtaqkunapis jukaq makinwanmi aruyaq y jukaq makinwannam armankunata aptaräyaq.

18Paykunaqa llapanmi espädanta tseqllanchö tsararäyarqan. Imapis kaptin ras töcananpä cornëta töcaqpis ñöpächömi kaykarqan.

19Mayor runakunata, mandaqkunata y wakin runakunatapis kaynömi nirqä: «Arunantsikpäqa atskam kaykan. Noqantsikqa murällata pirqar alläpa karu karum kaykantsik.

20Tsaymi atacamaptintsik cornëtata töcamunqanta wiyar defiendikunantsikpä tsayman llapantsik jinan höra qorikäshun. Tayta Diosnintsikmi noqantsikpa favornintsik pelyanqa».

21Tsaynöpam patsa waranqanpita tsakanqanyaq aruyaptï pullan kaq runakuna lanzan aptashqa kaykäyarqan.

22Mastam runakunata nirqä: «Sirviqnikikunawan Jerusalénllachö quëdayay. Tsaynöpam paqaspa cuidayanki y junaqpana aruyanki».

23Noqapis, castäkunapis, yanapamaqnïkunapis y compañaykämaq soldädukunapis röpäkunata manam jipikuyarqätsu. Tsaynöpam atacayämaptin pelyayänäpäpis cada ünükuna listu kaykäyarqä.

← Chapter 3 Jump to: Chapter 5 →