Nehemiah 2

Quechuan QXO (Biblia en Quechua del sur de Conchucos)

← Chapter 1 Jump to: Chapter 3 →

1Ishkay chunka (20) watana Artajerjes rey kaykaptinmi Nisán killachö vïnuta sirvirqä. Sirviykaptïmi rey tantiyarqan llakishqa kaykanqäta.

2Tsaymi tapumar nimarqan: «¿Imanirtä llakishqa kaykanki? Manam qeshyaykaqnötsu kanki. Tsaynö kanaykipä capaz imallapis päsaykäshunki». Tsaynö nimaptinmi pasaypa mantsakarqä.

3Tsaynöllam reyta nirqä: «¡Tayta rey, imayyaqpis kawaykullay! Unay awilükuna täkuyanqan markam pasaypa raqällana kaykan. Punkunkunapis pasaypa rupashqam kaykan. Tsaynö kaykaptinqa ¿imanirrä llakikümantsu?»

4Tsaymi rey nimarqan: «¿Imanö yanapanätatä munanki?» Tsaynö nimaptinmi ciëluchö kaykaq Tayta Dios yanapamänanpä shonqullächö jinan höra mañakuskir

5nirqä: «Tayta rey, Judáman mandamänaykipämi rugä. Awnimaptikiqa unay castäkuna täkuyanqan marka juchushqa kaykaqkunata allitsatsinäpämi aywashä».

6Ruganqä höram reypa puntanchö reina jamaraykarqan. Tsaynö rugaptïmi rey tapumar nimarqan: «¿Imayyaqtä tsaychö kamunki? ¿Imaytä tsaypita kutimunki?» Imay kutimunäpä kanqanta willaptïmi Judáman aywanäpä awnimarqan.

7Mastam rugar nirqä: «Mana rabyakuyllapa Éufrates mayu wak tsimpanchö kaykaq gobernadorkunapä cartata rurapaykallämay. Tsaynöpam Judáman chanqäyaq pipis tsapämanqatsu.

8Tsaynöllam muntikita cuidaq Asafpä cartata rurapaykallämay qeruta alistapämänanpä. Tsay qeruta nisitashä templu punkukunapä, marka murälla punkukunapä y tänäpä kaq wayita ruratsinäpämi». Tsaynö mañakuptïmi kuyapäkuq Tayta Dios yanapamarqan rey awnimänanpä.

9Susapita yarquptïnam compañayämänanpä rey mandamurqan caballun muntashqa soldädukunata y capitanninkunata. Éufrates mayu wak tsimpanchö kaykaq gobernadorkunaman chaykurnam rey apatsimanqan cartakunata entregarqä.

10Israel runakunata yanapanäpä Jerusalénman chanqäta musyaykurmi horonita casta Sambalat y amonita casta autoridä Tobíaspis rabyakuyarqan.

11Jerusalénman chanqäpita kimsa junaqtanam

12juk ishkay runakunawan paqaspa rikapakuq yarquyarqä. Pitapis manam willarqätsu Jerusalénchö imata ruranäpä Tayta Dios yarpayta qomanqanta. Rikapakuq aywar noqallam caballü muntashqa aywarqä.

13Tsay paqasmi Raqra jutiyuq punkupa yarqur Dragón jutiyuq pözuläpa tumayarqä. Tsaypitanam Basüra Jitakuna jutiyuq punku kaqman chäyarqä. Tsaypa purirmi rikayarqä Jerusalénpa murällan juchushqa kaykaqta y punkunkunapis rupashqa kaykaqta.

14Tsaypitam päsayarqä Pukyu jutiyuq punku lädupa y Rey Bäñakunan Pözu kaq lädupapis. Tsaypitaqa caballü päsananpä näni manam karqannatsu.

15Tsaymi ukrullapana witsar pirqa murälla imanö kanqantapis rikapakuyarqä. Patsa manarä waraptin rikapakur ushaskirmi Raqra jutiyuq punkupa kutiyarqä.

16Tsaychö kaykaq autoridäkunaqa manam musyayarqantsu rikapakur puriykanqäta. Tsayyaqqa manarämi willarqärätsu Israel runakunata, sacerdötikunata, mayor runakunata, autoridäkunata, ni murällata allitsayänanpä kaqkunatapis.

17Tsaypitam paykunata nirqä: «Musyayanqaykinöpis raqällanam Jerusalén kaykan y punkunkunapis rupashqallanam. Pipis mana asipaykämänantsikpä llapantsik Jerusalénpa murällanta yapay shäritsishun».

18Tsaychömi paykunata willarqä Tayta Dios kuyapämar yanapamanqanta y rey imata nimanqantapis. Tsaynö willaptïmi niyämarqan yapay shäritsiyänäpä. Tsaymi aruyänäpä llapäkuna mas animatsinakuyarqä.

19Tsayta musyaykurmi horonita casta Sanbalat, amonita casta autoridä Tobías y Arabiapita Gesem asipäyämar niyämarqan: «¿Ima ruraytatä yarpaykäyanki? ¿Reypa contran shäriytaku munaykäyanki?»

20Tsaymi nirqä: «Ciëluchö kaykaq Tayta Diosmi noqakunata yanapayämanqa marka murällata allitsayänäpä. Paypa sirviqnin karmi murällata yapay allitsar qallaykuyäshä. Jerusalén murällata allitsaykätsiyanqäman manam mëtikayämunkimantsu».

← Chapter 1 Jump to: Chapter 3 →