Nehemiah 5

Quechuan QXO (Biblia en Quechua del sur de Conchucos)

← Chapter 4 Jump to: Chapter 6 →

1Tsay witsanmi Israel mayinkuna pobriyätsiyaptin warmipis ollqupis quejakur llakishqa niyarqan:

2«Noqakunapaqa atskam wamräkuna warmipis ollqupis. Tsaymi mikuyänäpä gränükunapis kantsu».

3Tsaynöllam wakinpis niyarqan: «Mikuyänäpä imäkunapis mana kaptinmi chakräkunata, üva chakräkunata y wayïkunatapis prenda churayarqü».

4Wakinkunanam niyarqan: «Reyta impuestuta pägayänäpämi üva chakräkunata y wakin chakräkunata prenda churaykur qellaytapis prestakuyarqü.

5Noqakunapis y jaqa tukunqä runakunapis tsay castanöllam kayä. Tsurïkunapis y paykunapa tsurinkunapis tsay castallam kaykäyan. Tsaynö kaptinmi impuestuta pägayänäpä warmi tsurïkunata y ollqu tsurïkunatapis esclävu kayänanpä rantikuykäyä. Wakin warmi tsurïkunata maynam rantikuyarqü. Üva chakräkuna y wakin chakräkunapis prenda kaptinmi imäkunapis kantsu tsurïkunata esclävu kayanqanpita jipiyänäpä».

6Tsaynö parlaykäyanqanta wiyarmi pasaypa rabyakurqä.

7Tsaypita shumaq yarpachakuskirmi mayor runakunata y mandaqkunata ollqutupar nirqä: «¡Imanirtä tsay castanölla kaykarqa prestayanqayki qellaynikipa wachayninta cobraykäyanki!» Tsaypitanam llapan runakunata qayatsirqä shumaq willanakuyänäpä.

8Qorikaskiyaptinnam nirqä: «Israel mayintsikkunata juklä nación runakunaman rantikuyanqantam päga pägaykur jipimurquntsik. ¿Tsaynö jipiykämushqaku qamkunaqa tsurinkunata rantikuyänanpä pobriyaykätsiyanki?» Tsaynö niptïmi paykunaqa ima niytapis mana puëdir upällakuyarqan.

9Tsaymi mastapis nirqä: «Tsaynö rurayanqaykiqa pasaypa penqakuypämi kaykan. Tayta Diosnintsikta mantsapakurqa runa mayintsikta ama pobriyätsishuntsu. Tsaynöpam chikimaqnintsik jäpa runakunapis asipämarnintsik burlakamäshunnatsu.

10Qamkunanömi castäkunapis, mandar yanapaqnïkunapis y hasta kikïpis trïguta y qellayta prestayarqü. ¡Prestanqantsikta ama cobrashunnatsu!

11Tsaynö kaykaptinqa chakrankunata, üva chakrankunata, olïvus chakrankunata y wayinkunata ras kutitsiyay. Qellayta, trïguta, vïnuta y aceitita prestayanqaykipita wachaynintapis ama cobrayaynatsu».

12Tsaynö niptïmi niyämarqan: «Taytay, niyämanqaykinömi llapantapis kutitsiyäshä. Prestayanqäpa wachaynintapis mananam cobrayäshänatsu». Tsaynö awniyaptinmi sacerdötikunata qayaskatsir puntanchö runakunata juratsirqä awniyanqanta cumpliyänanpä.

13Tsaypitam röpäta tapsir nirqä: «Awninqanta mana cumpliq kaqtaqa röpäta tapsinqänö wayinpita Tayta Dios qarqutsun. Imaykankunatapis Tayta Dios qechutsun». Tsaynö niptïmi llapan runakuna «tsaynö kaykullätsun» niyarqan. Tsaypitanam Tayta Diosta alabarnin awniyanqanta llapan cumpliyarqan.

14Judá partichö gobernador karqä rey Artajerjes ishkay chunka (20) wata rey kanqanpita hasta kimsa chunka ishkay (32) wata rey kanqanyaqmi. Tsay chunka ishkay wata päsanqanyaq noqapis ni mandar yanapamaqnïkunapis manam cobrayarqätsu gobernador cobrananpä kaq impuestuta.

15Peru noqapita punta kaq gobernadorkunam sïqa impuestuta cobrayarqan. Mikuyta y vïnuta rantiyänanpämi chusku chunka (40) qellayta qoyay qoyay alistapäyänanpä obligayarqan. Tsay gobernadorkunapa mandar yanapaqninkunapis runakunata ñakatsiyarqanmi. Noqaqa Tayta Diosta mantsapakurmi tsaykunata rurarqätsu.

16Tsaypa rantinqa noqapis y mandar yanapamaqnïkunapis murälla aruyman churakashqa karmi chakralläkunapis rantiyarqütsu.

17Wayïchöqa pachak pitsqa chunka (150) runakunam mikuyaq. Paykunaqa Israel runakuna y soldädukunapa capitanninkunam kayarqan. Juklä nacionpita watukamaq shamuq runakunataqa manam yuparqänatsu.

18Paykunata qaranäpämi cada junaq pishtatsiq kä juk töruta, allin joqta üshata y wallpakunatapis. Cada chunka junaqmi atska vïnuta apayämuq. Tsaynö qaraykarpis runakuna faltapakuptinmi gobernador kay derëchütapis cobrarqätsu.

19¡Tayta Dios, kay runakuna alli kawayänanpä yanapanqäta yarpaykullay! ¡Noqatapis yanapaykallämay!

← Chapter 4 Jump to: Chapter 6 →