Nehemiah 12

Quechuan QXO (Biblia en Quechua del sur de Conchucos)

← Chapter 11 Jump to: Chapter 13 →

1Babiloniapita Jerusalénman aywarmi Salatielpa tsurin Zorobabelwan mandaq sacerdöti Josué sacerdötikunata y levitakunata pushayarqan. Pushayanqan sacerdötikunam kayarqan Seraías, Jeremías, Esdras,

2Amarías, Maluc, Hatús,

3Secanías, Rehum, Meremot,

4Iddo, Gineto, Abías,

5Mijamín, Maadías, Bilga

6y Semaías. Tsaynöllam paykunawan kayarqan Joiarib, Jedaías,

7Salú, Amoc, Hilcías y Jedaías. Wakin sacerdötikunapa mandaqnin y wakinnam kayarqan sacerdötikunalla. Paykuna sacerdöti kayarqan Josué mandaq sacerdöti kanqan witsanmi.

8Pushayanqan levitakunam kayarqan Josué, Binúi, Cadmiel, Serebías, Judá y Matanías. Paykunam levita mayinkunawan Tayta Diosta alabayaq.

9Tayta Diosta alabayaptinmi puntanman Bacbuquíaswan Unipis Diosta alabayänanpä ichïyarqan. Bacbuquíaswan Unipis levitam kayarqan.

10Josuéqa Joiacimpa papäninmi karqan. Joiacimqa Eliasibpa papäninmi karqan. Eliasibqa Joiadapa papäninmi karqan.

11Joiadaqa Jonatánpa papäninmi karqan. Jonatánqa Jadúapa papäninmi karqan.

12Kaychömi qellqashqa kaykan sacerdöti castakunapa mandaqninkuna mayqan mayqan kanqanpis. Paykunaqa Joiacim mandaq sacerdöti kaykanqan witsanmi mandaq kayarqan: Seraías castachömi Meraías mandaq karqan. Jeremías castachömi Hananías mandaq karqan.

13Esdras castachömi Mesulam mandaq karqan. Amarías castachömi Johanán mandaq karqan.

14Melicú castachömi Jonatán mandaq karqan. Sebanías castachömi José mandaq karqan.

15Harim castachömi Adna mandaq karqan. Meraiot castachömi Helcai mandaq karqan.

16Iddo castachömi Zacarías mandaq karqan. Ginetón castachömi Mesulam mandaq karqan.

17Abías castachömi Zicri mandaq karqan. Miniamín castachömi mandaq karqan.... Moadías castachömi Piltai mandaq karqan.

18Bilga castachömi Samúa mandaq karqan. Semaías castachömi Jonatán mandaq karqan.

19Joiarib castachömi Matenai mandaq karqan. Jedaías castachömi Uzi mandaq karqan.

20Salai castachömi Calai mandaq karqan. Amoc castachömi Heber mandaq karqan.

21Hilcías castachömi Hasabías mandaq karqan. Jedaías castachömi Natanael mandaq karqan.

22Levitakunapa mandaqninkuna mayqan mayqan kanqanta y sacerdöti castakunapa mandaqninkuna mayqan mayqan kanqanta qellqayarqan Eliasib mandaq sacerdöti kaykanqan witsan, Joiada mandaq sacerdöti kaykanqan witsan, Johanán mandaq sacerdöti kaykanqan witsan y Jadúa mandaq sacerdöti kaykanqan witsanmi. Tsaynö qellqayarqan hasta Persia nacionchö rey Darío mandanqan witsanyaqmi.

23Levitakunapa mandaqninkuna acta libruman jutinkunata tsaynö qellqayarqan hasta Eliasibpa tsurin Johanán wanunqanyaqmi.

24Levitakunapa mandaqninkunam kayarqan Hasabías, Serebías y Cadmielpa tsurin Josué. Paykunapa puntanmanmi levita mayinkuna ichïyarqan Tayta Diosta agradëcikur alabar yanapayänanpä. Turnun töcaptin tsaynö rurayänanpämi Tayta Diosta sirviq David unay mandarqan.

25Almacén cuartukunata täpaqkunam kayarqan Matanías, Bacbuquías, Obadías, Mesulam, Talmón y Acub. Tsay cuartukunaqa templupa patiunman yaykuna punkukuna ñöpanchömi karqan.

26Paykunaqa kawayarqan Josuépa tsurin Joiacim mandaq sacerdöti kaykanqan witsanmi. Joiacimqa Josadacpa willkanmi karqan. Tsaynöllam paykuna kawayarqan Nehemías gobernador kaykanqan witsan y sacerdöti Esdras leyta yachatsiq kaykanqan witsan.

27Jerusalénchö shäritsiyanqan murällata inagurayänanpämi levitakunata maytsaychö täyaptinpis qayatsiyämurqan. Tsaynö qayatsiyämurqan platïllukunata, salteriukunata y arpakunata tukar Tayta Diosta agradëcikur kushikuypita cantayänanpämi.

28Tsaymi cantayänanpä levitakuna qorikäyarqan Jerusalénpa cercan markakunapita y Netofapa cercan markakunapita.

29Tsaynöllam qorikäyarqan Gilgal, Geba y Azmavet cercankunapita. Tsay cercankunachömi levitakuna wayinkunata shärikatsishqa kayarqan.

30Fiestata rurayänanpämi puntata sacerdötikuna y levitakuna bäñakur purificakuyarqan. Purificakuskirnam runakunata, marka murällata y murällapa punkunkunata purificayarqan.

31Tsaypitanam Judá provinciapa mandaqninkunata witsätsirqä murälla jananman. Tsaychömi ishkay grüpu cantaqkunata churarqä. Punta kaq grüpum derëcha kaq läduman Basüra Jitakuna jutiyuq punku jananpa aywarqan.

32Paykunapa qepantanam aywarqan Osaías pullan Judá mandaqkunata pushashqa.

33Tsaynöllam aywayarqan Azarías, Esdras, Mesulam,

34Judá, Benjamín, Semaías y Jeremías.

35Paykunaqa sacerdöti kaqllam kayarqan. Tsay sacerdötikunam cornëtata tukaraykar aywayarqan. Paykunawanmi aywayarqan Zacarías y castankuna Semaías, Azarael, Milalai, Gilalai, Maai, Natanael, Judá y Hanani. (Zacaríasqa karqan Jonatánpa tsurin, Jonatán karqan Semaíaspa tsurin, Semaías karqan Mataníaspa tsurin, Matanías karqan Micaíaspa tsurin, Micaías karqan Zacurpa tsurin y Zacur karqan Asafpa tsurin.) Llapanpis tsay sacerdötikunam instrumentukunata tukaraykar aywayarqan. Tsay instrumentukunaqa Tayta Diosta sirviq David tukanqan instrumentunömi karqan. Paykunapa puntantam leykunata yachatsiq Esdras aywarqan.

37Pukyu jutiyuq punkuman chaykurmi grädapa witsäyarqan Davidpa Markan niyanqan partiyaq. Tsaypa aywarmi Davidpa palaciunpa päsayarqan. Tsaypitanam rupay yarqamunan kaq lädupa päsar Yaku jutiyuq punkuyaq chäyarqan.

38Ishkay kaq grüpu cantaqkunanam itsuq kaq läduman murälla janallanpa aywayarqan. Qepankunatam wakin runakunawan juntu noqapis aywarqä. Päsayarqä Jornu törripa, Anchu Pirqa ninqanpa,

39Efraín punku jananpa, Jesana punku jananpa, Pescädu punku jananpa, Hananeel törripa, Pachak jutiyuq törripa y Üshakuna punku jananpa. Wardiakuna jutiyuq punku jananman chaykurmi ichiskiyarqä.

40Tsaypitanam ishkan grüpu cantaqkuna Tayta Diospa templunman chaykur sitiunkunaman kamakäyarqan. Noqapis tsaynöllam yanapamaq mandaqkunawan churanakuyarqä.

41Cornëtan aptashqa sacerdötikunapis noqawanmi kaykäyarqan. Tsay sacerdötikunam kayarqan Eliacim, Maaseías, Miniamín, Micaías, Elioenai, Zacarías y Hananías.

42Paykunapa qepankunatam aywayarqan Maasías, Semaías, Eleazar, Uzi, Johanán, Malquías, Elam y Ezer. Cantukunata cantaqkunam fuertipa cantayarqan. Paykunapa directorninmi Izrahías karqan.

43Tsay junaqmi Tayta Diospä tsaytsika ashmakunata pishtar sacrificiuta rupatsiyarqan. Tayta Dios yanapayämaptinmi pasaypa kushikur fiestata rurayarqä. Warmikunapis wamrakunapis kushishqam tsaychö kayarqan. Jerusalénchö fiestata kushishqa rurayanqä karuyaqmi wiyakarqan.

44Tsay junaqmi churayarqan almacén cuartu täpaqkunata. Ofrendakunata, primiciakunata y diezmukunata markakunapita y chakrakunapita Judá runakuna apayämuptinmi tsay täpaqkuna chaskiskir almacén cuartukunaman churayarqan. Leykuna ninqannömi sacerdötikunapä y levitakunapä tsay qoriyanqan karqan. Judá runakuna tsaynö qoriyarqan sacerdötikuna y levitakuna Tayta Diospa templunchö sirviyanqanpita kushikurmi.

45Sacerdötikunawan levitakunam purificación ruraykunata rurarnin Tayta Diosta shumaq sirviyarqan. Tsaynöllam cantaqkuna y punku cuidaqkunapis David y tsurin Salomón ordenayanqannölla llapanta cumpliyarqan.

46Tayta Diosta tsaynö sirviyarqan rey David y cantaqkunapa directornin Asaf kawanqan witsan Tayta Diosta sirviyanqannömi. Tsay witsanmi cantaqkunapa directornin dirigiptin Tayta Diosta agradëcikur templuchö alabayarqan.

47Zorobabel mandanqan witsan y Nehemías mandanqan witsanpis qoyay qoyaymi Israel runakuna tsaki mikuy ofrendakunata cantaqkunapä y punku cuidaqkunapä apayämuq. Tsaynöllam levitakunapäpis apayämuq. Levitakunanam chaskiyanqankunata Aarónpita miraqkunata entregayaq.

← Chapter 11 Jump to: Chapter 13 →