bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
Romans 1
Romans 1
Quechuan QXO (Biblia en Quechua del sur de Conchucos)
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 2 →
1
Noqa Pablum Jesucristupa sirviqnin kä. Apostolnin kanäpä Tayta Dios churamashqa kaptinmi paypa alli willakuyninta willakur puriykä.
2
Tayta Dios awninqan alli willakuy willakushqa kananpäqa unay profëtakunam qellqayarqan. Tsay qellqayanqanmi Tayta Diospa sagrädu palabran.
3
Tsay alli willakuyqa Tayta Diospa Tsurin [Señornintsik Jesucristupam]. Payqa rey Davidpa castanpitam yurirqan.
4
Wanutsiyaptinpis Espíritu Santum poderninwan kawatsimushqa. Tsaynöpam Señornintsik Jesucristo Tayta Diospa Tsurin kanqanta musyantsik.
5
Jesucristo noqantsik raykur wanushqa kaptinmi Tayta Dios kuyapämar apostolnin kanäpä churamashqa. Tsaymi maytsay nacionkunachö pïmaytapis willä Jesucristuman yärakur y Tayta Dios munanqannö kawar payta alabayänanpä.
6
Qamkunatapis Tayta Diosmi akrayäshurquyki Jesucristupa poderninchö kawayänaykipä.
7
Romachö criyikuq mayikuna, Tayta Dios kuyashurnikim wamrankuna kayänaykipä qayayäshurqayki. Papänintsik Tayta Dios y Señor Jesucristo kuyapäyäshurniki alli kawayänaykipä yanapaykuyälläshuy.
8
Wawqikuna y panikuna, Jesucristuman criyikuyanqaykita maytsaychöpis parlayaptinmi Jesucristupa jutinchö Tayta Diosta qamkunapä agradëcikü.
9
Qoyay qoyay qamkunapä mañakunqäta Tayta Diosmi musyan. Paytam sirvï Tsurin Jesucristupa alli willakuyninta llapan shonqüwan willakur.
10
Tsaymi mañakü Tayta Dios munaptinqa imanöpapis qamkunaman watukaq shamunäpä.
11
Qamkunawan juntu kaytam munaykä. Espíritu Santu tantiyatsimanqannömi Jesucristuman shumaq criyikuyänaykipä tantiyatsiyäshayki.
12
Tsaynölla juknintsik juknintsikpis tantiyatsinakushun Jesucristuman shumaq criyikunantsikpä.
13
Wawqikuna y panikuna, atska kutim qamkunaman watukaq shamuyta munarqü. Peru tsapa kaptinmi puëdimurqütsu. Juk markakunachö willakuptï mana Israel runakuna Jesucristuman criyikuyanqannö qamkuna kaqchöpis Jesucristuman criyikuyänanpämi willakuyta munaykä.
14
Griego o mana griego kayaptinpis, yachaq o mana yachaq kayaptinpis llapantam Jesucristupa willakuyninta willakunä.
15
Tsaymi Jesucristupa alli willakuyninta qamkunatapis willanäpä imaykanöpa Romaman shamuyta munaykä.
16
Noqa manam penqakütsu Tayta Diospa alli willakuyninta willakur. Tsay willakuyqa Tayta Diospa poderninmi llapan criyikuqkunata salvananpä. Puntataqa Israel runakunatam musyatsirqan y tsaypitanam mana Israel runakunatapis musyatsirqan.
17
Alli willakuyninchömi Tayta Dios tantiyatsimantsik jutsa ruranqantsikpita perdonamanqantsikta. Tsaynö perdonamantsik payman yärakushqam. Palabranmi nin: «Munanqänö kawaq runaqa noqaman yärakamurmi kawanqa».
18
Ciëlupitam Tayta Dios rabyakur llapan jutsa ruraqkunata castiganqa. Tsay runakunaqa jutsata rurarmi tsapata churapäyan wakin runakunapis Tayta Diospa willakuyninman mana criyiyänanpä.
19
Peru jutsata rurarpis runakuna musyayanmi Tayta Dios kanqanta. Pay kanqanta kikin Tayta Diosmi musyatsin.
20
Kamanqankunata rikarmi runakuna unaypita musyayan Tayta Dios kanqanta y llapanpä poderyuq kanqanta. Tsaymi Tayta Diospa puntanchö pipis tsapakur ninqatsu: «Noqa manam musyallarqütsu Tayta Dios kanqanta».
21
Tayta Dios kanqanta musyaykarpis runakuna manam payta cäsuyantsu ni agradëcikuyantsu. Tsaypa rantinqa manakaqkunapä yarpachakuyaptinmi yarpayninkunapis kantsu.
22
Kikinkuna yachaq kayanqanta yarparpis manam imatapis musyayantsu.
23
Tsaymi imaypis kawaq Tayta Diosta adorayänanpa rantin ïdulukunata adorayan. Tsay ïdulukunatam rurayan runatanö, päriqkunatanö, ashmakunatanö y lätaypa puriqkunatanö.
24
Ïdulukunata adorayaptinmi Tayta Dios rabyar paykunata jaqishqa shonqunkuna munanqannö melanaypä kaqkunata rurayänanpä y jukwan jukwan penqakuypä kaqkunata rurayänanpä.
25
Tsay runakunaqa kamamaqnintsik Tayta Diosllata adoranantsikpä kanqanta musyaykarmi pay kamanqankunata adorayan. Tsaymi rasun kaqman criyiyänanpa rantin manakaqkunaman criyiyan. Tayta Dios imayyaqpis adorashqa kaykullätsun. Amén.
26
Tsaymi tsay runakunata Tayta Dios dëjashqa shäripakur penqakuypä mana allikunata rurayänanpä. Dëjaskiptinmi warmikunapis runawan täyänanpa rantin kikinkunapura ollquwannöpis kakuyan.
27
Tsaynöllam ollqukunapis warmiwan kayänanpa rantin ollqupura warmiwannöpis penqakuypä kakuyan. Jutsata rurayanqanmanmi paykunata Tayta Dios castigaykan.
28
Tayta Dios munanqannö kawayta mana munayaptinmi mana penqakuypa jutsata rurar kawayänanpä Tayta Dios dëjashqa.
29
Tsaynö kawarmi imayka jutsa ruraykunatapis rurar [ fornicación jutsata rurayan,] mana alli kayan, kikillanpä imatapis munayan, chikinakuyan, envidiösu kayan, runa mayinta wanutsiyan, achäquita ashiyan, engañanakuyan, mana allikunata rurayan y wasarima kayan.
30
Tsaynöllam pitapis despreciayan, [runa mayinta tumpayan,] Tayta Diospa contran kayan, pïmaywanpis rimanakuyan, runa tukuyan, alabakuyan, llutankunata rurayänanpä yarpachakuyan y mamanta papänintapis respitayantsu.
31
Imata yätsiptinpis cäsukuyantsu, awninqanta cumpliyantsu, kuyapäkuyantsu y runa mayinta perdonaytapis yachayantsu.
32
Paykunaqa musyayanmi tsaynö kawaqkuna wanutsishqa kayänanpä Tayta Dios ninqanta. Tsayta musyaykarpis mana mantsaypam jutsata rurayan. Tsaynöllam wakinkuna jutsata rurayaptinpis kushikuyan.
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 2 →
All chapters:
1
2
3
4
5
6
7
8
9
10
11
12
13
14
15
16