Romans 11

Quechuan QXO (Biblia en Quechua del sur de Conchucos)

← Chapter 10 Jump to: Chapter 12 →

1Israel runakunata ¿Tayta Dios dëjashqatsurä? ¡Manam! Noqapis Abraham casta karmi Benjamín trïbupita Israel runa kä.

2Israel runakunata Tayta Dios manam dëjashqatsu. Paykunatam kuyanqan runakuna kayänanpä unaypitana akrashqa. ¿Manaku musyayanki Tayta Diospa palabran Elíaspä imata ninqantapis? Israel mayinkunata acusarmi Tayta Diosta mañakurnin Elías nirqan:

3«Tayta Dios, llapan profëtaykikunatam wanutsiyashqa. Altarnikikunatapis juchutsirmi ushayashqa. Japallänam kawaykar quëdarqü. Kananqa noqatapis wanutsiyämänanpänam ashiykäyäman».

4Elías tsaynö niptinmi Tayta Dios nirqan: «Manam yarpanqaykinötsu. Qanchis waranqa (7,000) runakunatam Baalta imaypis mana adorayänanpä akrarqü».

5Elías kawanqan witsannöllam kananpis wakin Israel runakuna Tayta Diosta sirviykäyan. Tsaynö sirviykäyan Tayta Dios paykunata kuyapar akranqanpitam.

6Manam imatapis allita rurayanqanpitatsu akrarqan, sinöqa jutsayuq kaptinpis kuyakuq karmi akrarqan. Imatapis allita rurayanqanpita akrarqa manam kuyakuq kartsu akranman karqan.

7Tsaymi akranqan kaq Israel runakunalla salvacionta tariyan. Wakin Israel runakunaqa salvacionta ashirpis manam tariyantsu. Paykunapa shonqunkunatam Tayta Dios chukruyätsirqan willakuyninta mana cäsuyänanpä.

8Tayta Diospa palabranmi nin: «Pasaypa mana tantiyakuq kayänanpämi Tayta Dios upayätsishqa. Tsaymi kananyaqpis paykunaqa rikaykarpis mana rikaqnö kaykäyan y wiyaykarpis mana wiyaqnö kaykäyan».

9Tsaynö kaqkunapämi rey Davidpis Tayta Diosta mañakur nirqan: «Banquëtichö mikuyanqanpis paykunapä trampanö kaykullätsun. Bendicionnikita churamunaykipa rantin castigaykullay.

10Paykunapa ñawinkunapis qaprayätsun. Imaypis mana derechakäyänanpä waqtankunapis kurkuyätsun».

11Israel runakunaqa ¿manatsurä imaypis Jesucristuman criyikuyanqa? ¡Awmi, criyikuyanqam! Mana Israel runakunata Tayta Dios salvaykaqta rikarmi Israel runakunapis Jesucristuman criyikuyänanpä tantiyakuyanqa.

12Tsaynö kaptinpis Jesucristuman mana criyikuyaptinmi mana Israel runakunana Jesucristuman criyikur salvakuyan. Paykuna salvakuyanqan kushikuypä kaptinpis Israel runakuna salvakuyaptinqa masrämi kushikuypä kanqa.

13Mana Israel runakuna, shumaq tantiyakuyay. Tayta Diosmi churamashqa apostolnin kar mana Israel runakunaman imaykanöpapis alli willakuyninta apanäpä.

14Tsaynömi willakü mana Israel runakuna salvakuqta rikar Israel mayïkuna wakillanpis Jesucristuman criyikur salvakuyänanpä.

15Israel runakuna Jesucristuman mana criyikuyaptinpis mana Israel runakunaqa maytsaychömi criyikuykäyan. Paykunapis salvashqa karmi wanushqanö kayanqanpita kawamushqanöna kaykäyan.

16Mäsapita rakiskir primiciata Tayta Diospä apaptinmi llapan mäsapis sagrädu kaykan. Tsaynöllam jachapa matsun sagrädu kaptinqa rämankunapis sagrädu kaykan.

17Israel runakunapis sagrädu kaykarmi Jesucristuman mana criyikur olïvuspita mutushqanö kaykäyan. Qamkunaqa olïvusman injertashqanönam kaykäyanki. Tsaymi icha olïvuspa rämankunanö kaykarpis tsay alli olïvuspa matsunpita salvacionta chaskiykäyanki.

18Olïvusman injertashqanö kaykarqa ama alabakuyaytsu Israel runakunapita mas väliq kayanqaykita. Manam rämatsu plantata kawayta qon, sinöqa matsunmi.

19Capazmi qamkuna niyanki: «Israel runakunaqa mutushqa rämakunanöllam kaykäyan. Paykunata salvananpa rantinqa noqakunatanam Tayta Dios salvayäman».

20Awmi, niyanqaykinöllam kaykan. Peru tsaynö kaptinpis mutushqa rämanö kaykäyan Jesucristuman mana criyikuyanqanpitam. Qamkunaqa Jesucristuman yärakuyanqaykipitam injertashqanö kaykäyanki. Qamkunapis Tayta Diosta mana cäsurqa cuidädu mutushqa rämanö tikrayankiman.

21Legïtimu olïvuspa rämannö kayaptinpis mana cäsukuq Israel runakunata Tayta Dios manam salvantsu. Paykunatapis mana salvaykarqa qamkunatapis mana cäsuyaptikiqa manam salvayäshunkitsu.

22Tayta Dios kuyapäkuq y castigakuq kanqanta tantiyakuyay. Mana cäsukuqkunataqa castiganmi. Peru cäsukuqkunatam sïqa kuyaparnin salvan. Kuyapäyäshurnikipis mana cäsuyaptikiqa qamkunatapis rämatanömi muturiyäshunki.

23Tsaynöllam Israel runakuna Jesucristuman criyikuyaptinqa jachaman injertashqa rämanö kayänanpä Tayta Dios kuyapar salvanqa. Payqa jachaman yapay injertananpäpis poderyuqmi kaykan.

24Mana Israel runa karmi qamkunaqa icha olïvuspa rämannö kaykäyanki. Tsaynö kayaptikipis Jesucristuman criyikuyaptikim Tayta Dios salvayäshurquyki. Israel runakuna legïtimu olïvuspa rämannö kaykäyaptinqa Jesucristuman criyikuyaptinmi paykunatapis salvanqa.

25Wawqikuna y panikuna, mana alabakuyänaykipämi runakuna mana musyayanqanta kanan willashayki. Wakin Israel runakuna kanan chukru shonqu karpis manam tsaynöllatsu kayanqa. Paykuna tsaynö kayanqa mana Israel runakunapita Tayta Dios akranqankunata salvanqanyaqllam.

26Tsaypitanam llapan Israel runakunapis salvakuyanqa. Tayta Diospa palabranmi nin: «Salvakuqmi Siónpita shamunqa. Jacobpita miraqkunatam jutsankunata dëjayänanpä tantiyatsinqa.

27Jutsankunata perdonarmi paykunawan pactuta rurashä».

28Tsaynö kaptinpis kananqa Israel runakuna Jesucristupa alli willakuyninta manam chaskikuyta munayantsu. Tayta Diospa contran kayaptinmi paykunapa rantin qamkunatana salvayäshunki. Tayta Diospa contran kanan kayaptinpis Abrahamta, Isaacta y Jacobta promitinqanta cumplirmi Israel runakunata imaypis kuyan.

29Tayta Dios imatapis awnirqa cumplinmi. Pitapis salvananpä akrarqa imaypis salvanmi.

30Ñöpataqa manam Tayta Diosta cäsuyarqaykitsu. Kananqa Israel runakunanam cäsuyantsu. Tsaymi paykunapa rantin Tayta Dios qamkunatana kuyapäyäshunki.

31Tsaynöllam kuyapäyäshunki Israel runakuna tantiyakuyaptin Tayta Dios kuyapar salvananpä.

32Tsaymi juk tiempuchö Israel runakuna mana cäsukuq kayänanpä yarpayninkunata Tayta Dios pantatsirqan y juk tiempuchönam mana Israel runakunapis mana cäsukuq kayänanpä yarpayninkunata pantatsirqan. Tsaymi Israel runakunatapis y mana Israel runakunatapis kuyapäkuq kayninwanrä salvan.

33¡Tayta Dios pasaypa yachaq y tantiyaqmi kaykan! ¡Pay yarpanqankunata y ruranqankunata manam pipis tantiyayta puëdintsu!

34Tayta Dios yarpanqankunata ¿pillaqa musyantsurä? Yachaq kananpä ¿pillaqa payta yachatsintsurä?

35Diosta mandananpä ¿pirä poderyuq kanman?

36Llapantapis Tayta Diosmi kamashqa. Pay munaptinmi llapan imaykapis kaykan. Llapanpis payllapam kaykan. ¡Imayyaqpis Tayta Dios alabashqa kaykullätsun! Amén.

← Chapter 10 Jump to: Chapter 12 →