Nehemiah 1

Romani Baltic Latin (Biblija - Pe Baltitko Romani čib (Romanes) 2019)

Jump to: Chapter 2 →

1Lavá Nijemijaskire, Ahaliinoskire čhavéskire. Dro čhon Kisliev, dro bišto berš, sómas me ke Suzy, dro šerutno fóro [kralískiri felatin-ju.o.].

2I javdiá o Xanani, jekh miré pšaléndyr, jov i vari-kicý manušá Judejátyr. I phucjompe me léndyr pal Judénde, savé jačnépe džidé plienóstyr, i pal Jerusalimo.

3I phendlé jone mánge: “Jačade manušá, savé jačné džidé plienóstyr, isyn odój, dro léngiro them, dre bari bída i dre napatyv; vánta Jerusalimóskiri isyn phagirdy, i pórty léskire isyn xačkirdé jagása.

4Syr me šundjom, me bescjom i zarondjom, i sómas me dre túga adákicy dyvesá, rikirdjom me bokhalo posto i mangdjompe angíl bolybnáskire Devléste,

5i rakiravas me: “Rajo Dévla, bolybnáskiro, Dévla baró i trašado, Savó rakhéla zavieto i láska ke saré, savénge Tu san drógo, i savé rikirna Tyré priphenybená!

6Te javén Tyré kaná i jakhá Tyré otkerde, sob (kaj) te šunés pátieri (molítva) Tyré pishariskiri, savjása me mangavpe angíl Túte akaná rat i dyvés pal Izrailjoskire čhavénde, Tyré pishar'jende, i priĥaljovavpe me dre gréhi Izrailjoskire čhavéngire, savénca kerdiám ame grého angíl Túte, griešyndiam – i me i miré-dadéskiro kher.

7Ame jaciám došalé angíl Túte, i na zrakhciam priphenybená i statúty (ustavy) i sykliakiribén, savé Tu priphendian o Mojzáske, Tyré pisharíske.

8Ne rípir lav, savó Tu dyján dro priphenybén Mojzáske, Tyré pisharíske, rakirí: “Kóli tumé te kerenpe prahar'jenca, to Me rosčhurdava te dživén tumen pir manušénde;

9a kóli risjona tumé ke Me, i léna te rakhén Miré priphenybená, i te kerén pir lénde, tén'či, mek te javén vytyrdyne ke bolybnytko jagóro (krajo), i odothýr Me skedáva tumen i lydžáva pe štéto, savó Me vykedyjom, sob (kaj) te čhuvén odój Miro lav.

10Jone isyn Tyré pishárja i narodo Tyró, savó Tu vykindian Tyré baria zorjása i Tyré zoralé vastésa.

11Me mangáva zoralés Tut, Rajo Dévla! Te javél Tyró kan otkerdo te šunél pátieri (molítva) Tyré pishariskiro i pátieri Tyré pishar'jengiro, savé kaména te len šukaripén angíl Tyró Lav. I te des Tu lačhypen Tyré pisharíske akaná, i te des léske láska kadasavé manušéste. Me sómas moliákiro dyibnári (kučikári) kralíste.

Jump to: Chapter 2 →