Nehemiah 2

Romani Baltic Latin (Biblija - Pe Baltitko Romani čib (Romanes) 2019)

← Chapter 1 Jump to: Chapter 3 →

1Dro čhon Nisano, dro bišto berš, syr kralindia Artaksierkso, sys angíl léste mol (vino). I me lyjom mol, i podyjom e kralíske, i, sykadyjá, so me na sómas smentno (skučno) angíl léste.

2Ne o králi phendiá mánge: “Palsó túte isyn smentno muj; na san tu nasvaló, davá nane, aj, ĥaljov, túga isyn pe iló?” Me drieván darandyjom,

3i phendjom kralíske: “Mek te dživél o králi dro viéko! Syr te na javél túga mre moske, kóli fóro, kher, kaj isyn dadengíre koplicy, dro čhučipen (zapustienijo), i pórty léskire xačkirdé jagása!”

4I phendiá mánge o králi: “So že tu kamesas?” Me pomangdjompe e Devléske bolybnaskireske,

5i phendjom me kralíske: “Kóli kralíske isyn mištó pe iló mándyr, i, kóli dro lačhipén isyn o pishári tyró angíl tyró muj, to bičháv man dre Judéia, dro fóro, kaj isyn koplicy miré dadengíre, sob (kaj) me te keráv riemónto lénge.”

6I phendiá mánge o králi i e králica, saví sys bešty pašýl léste: “Kicý dyvesá tyrdelape tyró drom, kiéli tu risjosa?” I lačhé voliatyr sys kralíske te bičhavel man paló davá, syr me dyjom léske časo.

7Me phendjom kralíske: “Kóli králi adiáke šukár kaméla, mek te del mánge lylá ke palé-rekítka barydyrá okrugéngire, sob (kaj) jone te den mánge otmekibnytko (propusko), paka me dodžava ke Judéia;

8i lyl ke Asafo, kralískiro vešytko rakhibnari, sob (kaj) jov te del mánge kaštá vaš pórta tvardymakiri (dizákiri), saví isyn pašýl Devléskiro Kher, i vaš vánta foritko, i vaš kher, dro savó me láva te dživáv.” I dyjá mánge králi adiáke, syr bahtiakirdó vast miré Devléskiro sys uprál mánde.

9I javdjom me ke pale-rekitka barydyrá pe okrugi, i otdyjom lénge kralískire lylá. Bičhadiá o králi mánca o xaladytkone barydyrén uklistenca.

10Kiéli šundiá davá o Sanavalato, o Xoronito i o Tovija, Amonytko pishári, to sys lénge drieván pharó, so javdiá o manúš, i isyn nasvaló paló lačhipén Izrailitkone čhavéngiro.

11I javdjom me dro Jerusalimo. I sómas me odothe trin dyvesá,

12i uštyjom me ratiákiro nabute manušénca, kaj sys pašýl mánde, i nikonéske na phendjom, so Miro Devél čhudiá mánge pe iló te keráv vaš Jerusalimo; murdales nisaves na sys mánca, féni kodová, pe savéste tradyjom me.

13I tradyjom peske me ratiákiro pirdál pórty Dolinakire angíl Drakonoskiri ĥanýng ke pórta Gnejoskiri, i obdykhcjom me, so Jerusalimóskire vánty sys phagirdé, i léskire pórty shačkirdé jagása.

14I podtradyjom me ke pórty Fontanoskire, i ke kralískiri kolban' (vodojomo), ne odój na sys štéto te prodžal o murdaleske, savó sys tel mánde.

15I me ĥazdyjompe palál piró teluny félda ratiákiro, i obdykhtjom vánta, i tradyí anglé iščo (inké), kaj sys Dolinakiri pórta, risijom pale.

16I e barydyrá na ĥalyné, karik me psiravas, ni so na odkeravas: ani Judénge, ani rašange, ani slavutnonenge, ani barydyrénge, ani javire butiar'jenge me ke časo ničí na odkeravas.

17I phendjom me lénge: “Tumé dykhéna bída, dre saví ame-da sam; Jerusalimo isyn čhučó i pórta léskiri xačkirdy jagása; javén, i kerasam vánta Jerusalimóskiri, i ame na javása dro anglypén dro dasavo obrakiriben.”

18I me rosphendjom lénge paló lačhó vast vaš mánge miré Devléskiro, i iščo (inké) lavá kralitka, savé jov rakirdiá mánge. I phendlé jone mánge: “Lasam ame te kerás”, – i zorjakirde léngire vastá pe davá lačhó réndo.

19Šuný davá, o Sanavalato, o Xoronito i o Tovija, Amonytko pishári, i o Giešemo, Aravitiano, sandlepe améndyr, i phutibnasa rakirénas: “Savó davá isyn réndo tumaró, savó tumé keréna? Xabis', tumé duminéna te buntuinen proti kralíste?”

20Me dyjom lénge otphenybén, i rakirdjom lénge: “O Devél bolybnáskiro, Jov šukár déla aménge, i ame, Léskire pishárja, lasam te kerás butý, tuménge nane ni kotér, ni pravo, ni ripiribén dro Jerusalimo.

← Chapter 1 Jump to: Chapter 3 →