Nehemiah 4

Romani Baltic Latin (Biblija - Pe Baltitko Romani čib (Romanes) 2019)

← Chapter 3 Jump to: Chapter 5 →

1Kiéli šundiá o Sanavalato, so ame kerasas vánta, to xoliásyja jov i but túgi lyjá, i jov salaspe Judendyr;

2i rakirlas pašýl péskire pšalénde i pašýl Samaritka xaladénde, i phendiá: “So keréna adalé čororé Judei? Naúšto (nieuž) lénge dová domekena? Naúšto léna jone te janén svénto dyibén? Naúšto jone vari-kiéli skerna saró? Naúšto jone ĥazdéna prahostyr, otdžidiakirena xačkirdé bará?”

3O Tovija Amonitianino, kon sys pašýl léste, phendiá: “Mek te kerén lénge, džála lokhny (lisa), i phagiréla léngiri baruny vánta.

4Šun, amaró Dévla, dre saví napatyv ame sam, obriskir košybén léngiro pe léngiro šeró, otdé lénge dre napatyv pe plienytko phuv;

5i na učhakir léngire bizakonytka réndy, i, mek grého léngiro te na vykhoselape angíl Tyró muj, pal-dová so jone kerdé kirkipen butiar'jenge!

6Ake, adiáke ame kerdiám vánta, i sys sarí vánta ke paš vučipén lákiro. I e manušá kamenas te kerén butý mištés.

7Kiéli šundiá i Sanavalato, i o Tovija, i Aravitiani, i Amonitiani, i Azotiani, so Jerusalimóskire vánty (sciany) ĥazdyné isyn upredyr, so phagirdé štéty zakernape, to vaš lénge sys bari túga.

8Dorakirdepe jone saré khetané te džán maribnása pe Jerusalimo, i te phagiren telé les.

9I ame mangdiampe Devléske amareske, i čhudián proti lénde e stréga dyvesýtko i ratítko, sob (kaj) te zrakhaspe aménge léndyr.

10Ne Judei phendlé: “Tyknyja zor lydžaibnar'jengirende i šuma (musoro) isyn but; aménde nane zor te kerás vánta.

11Amaré vérgi rakirénas: “Na uĥaljona i na dykhéna, syr ame jekhátyr (srázu) zadžasam maškír lénde, i pirimarasam len, i terdiakirasam butý.

12Kiéli javénas Judejákire, savé dživdé pašýl lénde, i rakirénas aménge dešvar saré šteténdyr, so kodolé perna pe aménde:

13Tén'ci pe telutune štéty pašýl fóro, pale vánta, pe šuké štéty čhuvavas me o narodo pir dadéskiri-seménca (pliémi) kurtalenca lengirenca, e čhurdyibnytkone bustienca, i lukenca lengirenca.

14I obdykhcjom me, i uštyjom, i me phendjom e slavutnenge, i barydyrénge, i javire manušénge: “Na daran léndyr; ripirén Ras-Devlés bares i trašades i marénpe pale péskire pšalénde, pal péskire čhavénde, i pale čhajende, pal péskire džuvliende i pal péskire kherá.”

15Syr davá šundlé amaré vérgi (vrogi), so aménge sys džindlé léngire plany, to tén'či o Devél phagirdiá léngiro godypén, i saré ame risijam ke vánta, kažno ke péskiri butý.

16Kodolé dyveséstyr paš terné muršendyr mánde kerdé butý, i javír paš léndyr rikirenas čhurdyibnytka bustiá (kop'i), ščýty i luki i pancyri (laty); i barydyrá sys palál pal saró Judáskiro kher.

17Kon kerdiá vánta i kon janelas pharipena pe péste, savé čhudé pe lénde, jekhe vastésa jone kerdé butý, i javiresa rikirde o čhurdyibnytko bust (droto).

18Kažno butiar'jendyr rikirelas kurtála pe kustýk pašýl péste, i adiáke jone kerdé butý. Pašýl mánde sys o rogoskiro (trubačo).

19I me phendjom slavutnenge i barydyrénge i javire manušénge: butý isyn bari i buĥly, ame sam dur jekh javirestyr pir vánta;

20paldavá, katýr tumé šunéna zniko (zvuko) rogoskiro, dro dová štéto kedenpe ke ame; o Devél amaró javéla te marélpe pal aménde.

21Adiáke ame kerdiám butý; i paš améndyr rikirdia čhurdyibnytka bustiá (druty) zoricakire ĥazdypnastyr ke čergenengiro javiben.

22Uprál daléstyr, dro dová časo me phendjom manušénge, sob (kaj) jone te rat'kiren dro Jerusalimo saré péskire pishar'jénca, i te javén jone aménde ratiákiro pe stréga, a dyvesé pe butý.

23Ni-da me, ni-da miré pšála, ni-da dynárja miré, ni-da stregarja, savé sys mánca, na zlenas péstyr uribén léngiro, každoneste sys telo vast kurtála i paní.

← Chapter 3 Jump to: Chapter 5 →