Nehemiah 6

Romani Baltic Latin (Biblija - Pe Baltitko Romani čib (Romanes) 2019)

← Chapter 5 Jump to: Chapter 7 →

1Syr dogijá ke Sanavalatoskire kaná i ke Tovija i ke Giešemo Aravitianino, i ke saré javír amaré vérgi, so me neviakirdjom vánta, i so na jaciápe dre láte doša – ake, mek ke/žýko dová časo me iščo (inké) na čhudjom vudará dre pórta i,

2tén'či bičhadiá o Sanavalato i o Giešemo ke me te phenén: “Jav adarík, zdžasape dro jekh gav pe Onoskiro štéto.” Jone zadumindle te kerén mánge fuipén.

3Ne me bičhadjom ke jone e poslen te phenén: “Me som zalyno baré rendosa, me na mogináva te džav; i terdjolas by réndo, kóli me mekavas o réndo i džavas ke tumé.”

4Štar móly bičhavenas jone ke me kadasavé-pac' kharibnasa, i me odphenavas lénge adiáke-pac'.

5Tedy bičhadiá ke me o Sanavalato dro pándžto mólo péskire pisharís, savéste dro vast sys odkerdo lyl.

6Dro léste sys čhindló: “Vurniala malva narodende, i o Giešemo rakírla, so, xači, tu, i e Judejákire zadumindle te otperen, vaš kodová tu kerésa vánta, so kamésa te javes lénde kralísa, pir kodoia-pac' málva;

7o prorokén tu čhudián upré, sob (kaj) jone te godliakiren pal túte dro Jerusalimo i te rakirén: ‘Judejákiro králi!’ I dasavé lavá dodžana ke králi. Adiáke jav, obrakirasa khetané.”

8Ne me bičhadjom léske te phenén: “Niči na sys, pal so tu rakirésa – tu pridumindian saró péskire godiása.”

9Pal-dová saré jone trašavenas amen, dumini: “Obmekenape telé vastá léngire dalé rendostyr, i na vydžála jov”; ne me-dalésa butedýr zoraliakirdjom miré vastá.

10Javdjom me dro Šemaijáskiro kher, ke Delaijaskiro čhavó, Miegietavieloskiro čhavó, i jov phandia vudará i phendiá: “Javén dro Devléskiro Kher, andré Khangirí, phandasa pal péste saré Khangirjákire vudará, pal-dová so javéna te muliakirén tut, i javéna te muliakirén tut ratý.”

11Ne me phendjom: “Saštý (moginéla) te našél adasavó manúš, syr me som?” Saštý adasavó te javél, so, syr dasavo syr me som, te džal andré Khangirí (Svento-sventonengiro), sob (kaj) te jačél džidesa? Na džáva.”

12Me džindjom, so na Devél bičhadiá les, na dykhí, so jov rakirélas mánge syr o proróko, ne so les podkindle o Tovija, i o Sanavalato.

13Jov vaš dová sys podkindlo, sob (kaj) me te strahadjovav, i te keráv adiáke, i te perav dro grého, i sob (kaj) jone mogindlé te duminen fuipén pal mánde i te obrakiren man.

14Rípir, miro Dévla, Tovijas i o Sanavalatos pir dasavé léngire réndy, i iščo (inké) e proročica Noadija i javire prorokén, savé kamlé te trašaven man!

15Vánta sys kerdy dre biš te pándžto dyvés, dro čhon Jelulo, pal pandždešaduj dyvesá.

16Kiéli šunenas pal davá saré amaré vérgi, i dykhné davá saré narody, savé sys trusciál aménde, to jone but pyné dre léngire jakhá, i ĥalyné, so davá réndo sys kerdó amaresa Devlésa.

17Apríč dová dre dolé dyvesá slavutna Judei čhinenas but lylá, savé bičhavenas ke Tovija; lylá Tovijaskire džánas ke jone.

18Pal-dová so butdžine pe Judeitko them sys dre sovlahá lésa, pal dová so jov sys Šehanijaskiro ziatjo (džamutro), Arahoskiro čhavó, i léskiro čhavó Iohanano lyl pal péste čhajorja Miešulamoskirja, Vieriehiiaskire-čhaveskiri.

19Angíl mánde jone až šarenas léskiro lačhipén dieskiro, i miré lavá jone lydžánas ke jov. I o Tovija bičhavelas lylá, sob (kaj) te trašavel man.

← Chapter 5 Jump to: Chapter 7 →