Nehemiah 8

Romani Baltic Latin (Biblija - Pe Baltitko Romani čib (Romanes) 2019)

← Chapter 7 Jump to: Chapter 9 →

1Kiéli jaciá eftáto čhon, i dživdé Izrailjoskire čhavé pir péskire fórja, tedy skedynépe saré manušá, so ke jekh manúš, pe foruný (plošča), savó sys angíl Panitko pórta, i phendlé lylvaritkoneske (knižnikoske) Jezdraske, sob (kaj) jov te janel Mojzáskire-Zakonoskiri lylvarí, saví priphendiá Raj Devél Izrailjoske.

2I jandiá rašáj Jézdra Zakóno angíl skedyibén muršengiro i džuvliengiro i saré manušéngiro, savé mogindlé te ĥaljon, dro pérvo (anglatunó) dyvés eftatone-čhonéskiro;

3i gindia léstyr pe foruný (plošča), savó sys angíl Panitko pórta, zlokóstyr ke pašdyves, angíl muršende i džuvliende i sarénde, savé mogindlé te ĥaljon: i saré manušéngire kaná šundlé Zakonoskiri lylvarí.

4Lylvaritko Jézdra terdijá pe kaštuno vučipén, savó vaš dová manušá kerdé: pašýl léste, pir léskiro pravo (čačó) vast, terdiné Matifija, i Šema, i Anaija, i Urija, i Xielkija, i Maaseja, a pir léskiro liévo (zérvo) vast Fiedaija, i Masailo, i Malhiia, i Xašumo i Xašbadano, i Zahárija, i Miešulamo.

5I otčhakirdiá lylvarí Jézdra angíl saré-manušéngire jakhá, pal-dová so jov sys terdó vučedýr saré manušéndyr. I kóli jov otčhakirdiá la, saré manušá uštyné.

6I Jézdra bahtiakirdiá Ras-Devlés, Devlés vučés. I saré manušá otphendlé: “Amín', amín'”, ĥazdyi upré péskire vastá, – mangnepe i dyné paklono angíl Raste-Devléste mósa ke phuv.

7Isúso (Johošuá), Vanaija, Šerievija, Iamino, Akuvo, Šavtajo, Godija, Maseja, Klito, Azárija, Jozavalo, Xanano, Fielaija i Lievíty piriphenenas manušénge Zakóno, maškír dová, syr manušá sys terdé pe péskiro štéto.

8I gindlé (dyne upre) lylvarjatyr, Devléskire Zakonóstyr, jasnes, i pričhuvenas smyslo, i manušá ĥaljonas, so sys progindlo.

9Tedy Nijemíia, jov že Tiršafo, i lylvarítko Jézdra, rašái, i Lievíty, savé sykliakirdé manušén, phendlé saré manušénge: “Dyvés davá isyn svénto Ráske-Devléske, tumaré Devléske; na piridživen i na rovén”; pal-dová so saré manušá rondlé, šuny Zakonóskire lavá.

10I phendiá lénge: “Džán, xan thulo, i p'jen gudló, i bičhaven xabnytka koterá (kuski) odolénge, konéste ničý nane zagotovindlo; pal-dová so dyvés davá isyn svénto amaré Ráske-Devléske. I na piridživen, pal-dová so rádyma Raskiri-Devléskiri déla zor tuménge.

11Lievíty štyliakirde saré manušén, rakirí: “Pirijačen, pal-dová so davá dyvés isyn svénto, na piridživen.”

12I giné saré manušá te xan, i te p'jen, i te bičhaven xabnytka pašá (koterá), i te svenkinen baré radymása; pal-dová so jone ĥalyné lavá, savé phendlé lénge.

13Pe javír dyvés skedynépe strečengire (rodoskire) barydyrá saré manušéndyr, rašaja i Lievíty ke lylvarítko Jézdra, sob (kaj) jov te piriphenel lénge Zakonóskire lavá.

14I lathné začhindló dro Zakóno, savó dyjá Raj-Devél pir Mojzaste, sob Izrailjoskiro čhavé pe eftáto bitrinéngiro déšto čhon, pe svénko, dživdé dre šátry (kuščy).

15I paldavá dyné te džinén pir saré péskire fórja dro Jerusalimo, rakirí: “Džán pe bérga i lydžán kheritkoné maslinakire randiá, i lydžán dikone (busoné) maslinakire randiá, i mirtakire randiá, i pal'makire randiá, i javire randiá buĥle-listiengire vešendyr, sob (kaj) te kerén kuščy (šátry), syr isyn začhindló.”

16I giné manušá, i jandlé, i kerdé péske šátry, kažno pe péskiri stréha (čhakín), i pe gredy (dvory) péskire, i pe Devléskire-Khereskire gredy (dvory), i pe foruný (plóšča), pašýl Panitko pórta, i pe markplaco pašýl Jefriemóskiri pórta.

17Saré manušá, savé risiné plienóstyr kerdé šátry, i dživdé dre šátry. Dyveséstyr Isusoskirestyr (Johošuaskirestyr), Navinoskire čhaveskirestyr, na kerdé adiáke Izrailjoskire čhavé. Rádyma sys drieván bari.

18I gindlé Devléskire-Zakonóskire lylvarjatyr kažno dyvés, anglatuné dyveséstyr ke palatunó (posliednjo) dyvés. I svenkindle svénko eftá dyvesá, a ohtóto dyvés svenkindle pir statúto (ustavo).

← Chapter 7 Jump to: Chapter 9 →