Leviticus 13 — Sindhi Bible

1۽ خداوند موسيٰ ۽ هارون کي فرمايو ۽ چيائين تہ

2جڏهن ڪنهن ماڻهوءَ جي بت جي کل تي سوڄ يا ڏڍ يا ڪو چمڪندڙ داغ ٿئي، ۽ اُهو سندس بت جي کل تي ڪوڙهہ جو مرض ٿي پوي، تہ انهي کي هارون ڪاهن وٽ يا سندس پٽن، جي ڪاهن آهن، تن مان هڪڙي وٽ آندو وڃي:

3۽ اهو ڪاهن هن جي بت جي کل تي ٿيل مرض کي چڪاسي: ۽ جيڪڏهن انهي مرض واري هنڌ جا وار اڇا ٿي ويا هجن، ۽ جيڪڏهن اهو مرض هن جي بت جي کل کان اونهو ڏسڻ ۾ اچي، تہ اهو ڪوڙهہ جو مرض آهي: ۽ ڪاهن انهي کي ڏسي کيس ناپاڪ ٺهرائي.

4۽ جيڪڏهن هن جي بت جي کل تي اهو چمڪندڙ داغ اڇو هجي، پر اهو مرض هن جي بت جي کل کان اونهو ڏسڻ ۾ نہ اچي، ۽ انهي جا وار بہ اڇا نہ ٿيا هجن، تہ پوءِ ڪاهن اهڙي مرض واري ماڻهوءَ کي ست ڏينهن بند ڪري ويهاري:

5۽ ستين ڏينهن ڪاهن هن کي چڪاسي؛ ۽ ڏسو، جيڪڏهن سندس نظر ۾ اهو مرض هڪڙي ئي هنڌ بيٺل هجي، ۽ مرض کل تي پکڙيو نہ هجي، تہ پوءِ ڪاهن انهي کي وري ٻيا بہ ست ڏينهن بند ڪري وهاري:

6۽ وري ستين ڏينهن ڪاهن هن کي چڪاسي؛ ۽ ڏسو، جيڪڏهن اهو مرض جو داغ ٿورو جهڪو ٿيو هجي، ۽ مرض کل تي پکڙيو نہ هجي، تہ پوءِ ڪاهن انهي ماڻهوءَ کي پاڪ ٺهرائي: اها ڏڍ آهي: ۽ هو پنهنجا ڪپڙا ڌوئي پاڪ ٿئي.

7پر جي ڪاهن جي ڏسڻ ۽ پاڪ ٺهرائڻ کان پوءِ اها ڏڍ کل تي گهڻي وڌي وڃي، تہ پوءِ هو وري بہ ڪاهن وٽ وڃي پاڻ ڏيکاري:

8۽ ڪاهن انهي کي چڪاسي، ۽ ڏسو، جي ڏڍ کل تي پکڙجي ويئي هجي، تہ پوءِ ڪاهن هن کي ناپاڪ ٺهرائي: اهو ڪوڙهہ آهي.

9جڏهن ڪنهن ماڻهوءَ کي ڪوڙهہ جو مرض ٿئي، تہ انهي کي ڪاهن وٽ آندو وڃي؛

10۽ ڪاهن هن کي چڪاسي، ۽ ڏسو، جيڪڏهن کل تي اڇي سوڄ هجي، ۽ انهي جا وار اڇا ٿي ويا هجن، ۽ سوڄ واري هنڌ جو ماس نرم ۽ جيئرو هجي،

11تہ اهو هن جي بت جي کل ۾ جهونو ڪوڙهہ آهي، ۽ ڪاهن هن کي ناپاڪ ٺهرائي: هو انهي کي بند نہ ڪري؛ ڇالاءِ جو هو ناپاڪ آهي.

12پر جيڪڏهن ڪوڙهہ هن جي کل تي پورو پکڙجي ويو هجي، ۽ مريض جي سڄي بت جي کل تي مٿي کان پيرن تائين جيڪو هنڌ ڪاهن ڏسي سگهي، تنهن تي ڪوڙهہ پکڙجي ويو هجي؛

13تہ پوءِ ڪاهن هن کي چڪاسي: ۽ ڏسو، جيڪڏهن ڪوڙهہ هن جي سڄي بت تي پکڙجي ويو هجي، تہ هو انهيءَ مريض کي پاڪ ٺهرائي؛ ڇالاءِ جو هو سڄو ئي اڇو ٿي ويو آهي: ۽ هو پاڪ آهي.

14پر جنهن وقت هن ۾ نرم ماس ظاهر ٿئي، تنهن وقت هو ناپاڪ ٿيندو.

15ڪاهن انهي ماس کي چڪاسي، ۽ هن کي ناپاڪ ٺهرائي: نرم ماس ناپاڪ آهي: اهو ڪوڙهہ آهي.

16پر جي اهو نرم ماس بدلجي اڇو ٿي پوي، تہ هو وري ڪاهن وٽ اچي،

17۽ ڪاهن هن کي چڪاسي: ۽ ڏسو، جي اهو مرض وارو هنڌ بدلجي اڇو ٿي ويو هجي، تہ پوءِ ڪاهن انهي مريض کي پاڪ ٺهرائي: ڇو تہ هو پاڪ آهي.

18۽ جيڪڏهن ڪنهن جي بت جي کل تي ڪا ڦرڙي هجي، ۽ اها ڇٽي ويئي هجي،

19۽ ڦرڙي واري جاءِ تي ڪا اڇي سوڄ هجي، يا ڪو اڇو ڳاڙهيرو چمڪندڙ داغ هجي، تہ اهو ڪاهن کي ڏيکاريو وڃي؛

20۽ ڪاهن هن کي چڪاسي، ۽ ڏسو، جيڪڏهن اهو هنڌ کل کان اونهو ڏسڻ ۾ اچي، ۽ انهي هنڌ جا وار بہ اڇا ٿي ويا هجن تہ ڪاهن انهي کي ناپاڪ ٺهرائي: اهو ڪوڙهہ جو مرض آهي، جو ڦرڙيءَ مان پيدا ٿيو آهي.

21پر جيڪڏهن ڪاهن هن کي چڪاسي، ۽ ڏسو، جي انهي هنڌ جا وار اڇا نہ ٿيا هجن، ۽ اهو هنڌ کل کان اونهو بہ نہ هجي، تہ پوءِ ڪاهن هن کي ست ڏينهن بند ڪري ويهاري؛

22۽ جيڪڏهن اهو کل تي پکڙجي پوي، تہ پوءِ ڪاهن انهي کي ناپاڪ ٺهرائي: اهو مرض آهي.

23پر جيڪڏهن اهو چمڪندڙ داغ پنهنجيءَ جاءِ تي بيٺو هجي، ۽ پکڙيو نہ هجي، تہ اهو ڦرڙيءَ جو داغ آهي؛ ۽ ڪاهن انهي کي پاڪ ٺهرائي.

24يا جڏهن ڪنهن جي بت جي کل تي باهہ ۾ سڙڻ جي ڪري داغ ٿيو هجي، ۽ سڙيل هنڌ جو جيئرو ماس ڳاڙهيرو اڇو، يا صفا اڇو ٿي پوي؛

25تہ پوءِ ڪاهن هن کي چڪاسي: ۽ ڏسو، جي انهي چمڪندڙ داغ جا وار اڇا ٿي ويا هجن، ۽ اهو مرض کل کان اونهو ڏسڻ ۾ اچي، تہ اهو ڪوڙهہ آهي، جو سڙڻ جي ڪري پيدا ٿيو آهي: ۽ ڪاهن انهي کي ناپاڪ ٺهرائي: اهو ڪوڙهہ جو مرض آهي.

26پر جيڪڏهن ڪاهن هن کي چڪاسي، ۽ ڏسو، جي انهي چمڪندڙ داغ جا وار اڇا نہ ٿيا هجن، ۽ اهو هنڌ کل کان اونهو نہ هجي، ۽ جهڪو هجي؛ تہ پوءِ ڪاهن هن کي ست ڏينهن بند ڪري ويهاري:

27۽ ستين ڏينهن ڪاهن هن کي چڪاسي: جي اهو کل تي وڌيڪ پکڙيو هجي، تہ ڪاهن انهي کي ناپاڪ ٺهرائي: اهو ڪوڙهہ جو مرض آهي.

28پر جيڪڏهن چمڪندڙ داغ پنهنجيءَ جاءِ تي بيٺو هجي، ۽ کل تي پکڙيو نہ هجي، پر ٿورو جهڪو ٿيو هجي؛ تہ اهو سڙڻ جو نشان آهي، ۽ ڪاهن انهي کي پاڪ ٺهرائي؛ ڇالاءِ جو اهو فقط سڙڻ جو داغ آهي.

29جيڪڏهن ڪنهن مرد يا زال کي مٿي ۾ يا ڏاڙهي تي مرض هجي،

30تہ ڪاهن انهي مرض کي چڪاسي: ۽ ڏسو جي اهو مرض کل کان اونهو ڏسڻ ۾ اچي، ۽ انهي ۾ پيلا سنها وار هجن، تہ پوءِ ڪاهن انهي کي ناپاڪ ٺهرائي: اهو پت آهي: اهو مٿي جو يا ڏاڙهيءَ جو ڪوڙهہ آهي.

31پر جيڪڏهن ڪاهن انهي پت جي مرض کي چڪاسي، ۽ ڏسو، جي اهو مرض کل کان اونهو ڏسڻ ۾ نہ اچي، ۽ انهي ۾ ڪارا وار نہ هجن، تہ ڪاهن انهي پت جي مرض واري کي ست ڏينهن بند ڪري ويهاري:

32۽ ستين ڏينهن ڪاهن انهي مرض کي چڪاسي: ۽ ڏسو، جيڪڏهن اهو پت پکڙيو نہ هجي، ۽ انهي ۾ پيلا وار بہ نہ هجن، ۽ پت کل کان اونهو بہ نہ هجي،

33تہ هن جا وار ڪوڙائجن، مگر پت وارو هنڌ نہ ڪوڙائجي؛ ۽ ڪاهن اهڙي پت واري ماڻهوءَ کي ٻيا بہ ست ڏينهن بند ڪري ويهاري:

34۽ ستين ڏينهن ڪاهن انهي پت کي چڪاسي: ۽ ڏسو، جيڪڏهن پت کل تي پکڙيو نہ هجي ۽ اهو کل کان اونهو ڏسڻ ۾ نہ اچي، تہ پوءِ ڪاهن انهي کي پاڪ ٺهرائي: ۽ هو پنهنجا ڪپڙا ڌوئي پاڪ ٿئي.

35پر جي هن جي پاڪ ٿيڻ کان پوءِ پت کل تي پکڙجي وڃي؛

36تہ پوءِ ڪاهن هن کي چڪاسي: ۽ ڏسو، جيڪڏهن پت کل تي پکڙجي ويو هجي، تہ پوءِ ڪاهن پيلن وارن جي ڳولا نہ ڪري؛ اهو ناپاڪ آهي.

37پر جيڪڏهن هو ڏسي تہ پت اتي جو اتي بيٺو آهي، ۽ منجهس ڪارا وار ڄمي ويا آهن: تہ پت ڇٽي ويو آهي، ۽ هو پاڪ آهي: پوءِ ڪاهن انهي کي پاڪ ٺهرائي.

38۽ جڏهن ڪنهن مرد يا زال کي سندس بت جي کل تي چمڪندڙ داغ هجن، يعني اڇا چمڪندڙ داغ هجن؛

39تہ ڪاهن اهي چڪاسي: ۽ ڏسو، جيڪڏهن هن جي بت جي کل وارا داغ جهڪا اڇا هجن؛ تہ اهو لسڻ آهي؛ جو کل ۾ نڪتو آهي؛ اهو پاڪ آهي.

40۽ جيڪڏهن ڪنهن ماڻهوءَ جي مٿي جا وار کُسي ويا هجن، تہ هو گنجو آهي؛ پر هو پاڪ آهي.

41۽ جيڪڏهن هن جا وار سندس مٿي جي اڳئين پاسي تان کسي ويا هجن، تہ اهو گنجي پيشانيءَ وارو آهي؛ تہ بہ هو پاڪ آهي؛

42پر جيڪڏهن انهي گنجي مٿي تي، يا گنجيءَ پيشانيءَ تي، ڳاڙهيرو اڇو مرض هجي؛ تہ اهو ڪوڙهہ آهي، جو هن جي گنجي مٿي تي، يا گنجي پيشانيءَ تي نڪتو آهي.

43پوءِ ڪاهن هن کي چڪاسي: ۽ ڏسو، جيڪڏهن اهو مرض وارو داغ هن جي گنجي مٿي تي يا گنجي پيشانيءَ تي ڳاڙهيرو اڇو هجي، جيئن ڪوڙهہ بت جي کل تي ڏسڻ ۾ ايندو آهي:

44تہ اهو ماڻهو ڪوڙهيو آهي، ۽ ناپاڪ آهي، ۽ ڪاهن ضرور انهي کي ناپاڪ ٺهرائي؛ هن جو مرض سندس مٿي ۾ آهي.

45جنهن ڪوڙهئي کي اهڙو مرض هجي، سو ڦاٽل ڪپڙا پائي، ۽ مٿي اُگهاڙو گهمي، ۽ پنهنجو مٿيون چپ ڍڪي ڇڏي، ۽ وڏي سڏ چوي، تہ ناپاڪ، ناپاڪ.

46جيترا ڏينهن هن کي مرض هوندو، اوترا ڏينهن هو ناپاڪ رهندو؛ اهو ناپاڪ آهي: هو اڪيلو رهي؛ ۽ هن جي رهڻ جي جاءِ منزلگاهہ کان ٻاهر هجي.

47جنهن ڪپڙي تي ڪوڙهہ جي مرض جو داغ هجي، اهو پشم جو هجي يا سڻيءَ جو هجي؛

48۽ داغ ڪپڙي جي تاڃيءَ ۾ هجي توڙي پيٽي ۾ هجي؛ سڻيءَ جي ڪپڙي ۾ هجي، يا پشم جي ڪپڙي ۾ هجي؛ چم ۾ هجي يا چم مان ٺهيل ڪنهن شيءِ ۾ هجي؛

49جيڪڏهن مرض جو داغ ڪپڙي ۾، يا چم ۾، يا تاڃيءَ ۾، يا پيٽي ۾، يا چم جي ڪنهن شيءِ ۾، سائيرو يا ڳاڙهيرو هجي؛ تہ اهو ڪوڙهہ جو مرض آهي، ۽ ڪاهن کي ڏيکاريو وڃي؛

50۽ ڪاهن انهي مرض جي داغ کي چڪاسي ۽ جنهن شيءِ تي اهو مرض جو داغ هجي، تنهن کي ست ڏينهن بند ڪري رکي:

51۽ ستين ڏينهن هو وري داغ کي چڪاسي، جيڪڏهن اهو مرض جو داغ ڪپڙي ۾، يا تاڃيءَ ۾، يا پيٽي ۾، يا چم جي ڪنهن شيءِ تي پکڙيو هجي، تہ اهو مرض خراب قسم جو ڪوڙهہ آهي؛ اهو ناپاڪ آهي.

52۽ اهو ڪپڙو، تاڃي هجي يا پيٽو، پشم جو هجي يا سڻيءَ جو، يا چم مان جڙيل ڪا شيءِ هجي، جنهن تي بہ اهو مرض جو داغ هجي، تنهن کي هو باهہ ۾ ساڙي ڇڏي: ڇالاءِ جو اهو خراب قسم جو ڪوڙهہ آهي.

53پر جيڪڏهن ڪاهن چڪاسي، ۽ ڏسو، جي اهو مرض ڪپڙي ۾، يا تاڃيءَ ۾، يا پيٽي ۾، يا چم جي ڪنهن شيءِ ۾ پکڙيو نہ هجي؛

54تہ پوءِ ڪاهن حڪم ڪري تہ جنهن شيءِ ۾ اهو مرض آهي، تنهن کي ڌوئن ۽ پوءِ هو انهي کي ٻيا بہ ست ڏينهن بند ڪري رکي:

55۽ ڌوئڻ کان پوءِ ڪاهن انهي مرض کي چڪاسي: ۽ ڏسو، جي مرض پنهنجو رنگ مٽايو نہ هجي، ۽ پکڙيو نہ هجي، تہ اهو ناپاڪ آهي؛ تون انهي کي باهہ ۾ ساڙي ڇڏ: انهي جو داغ اندر هجي توڙي ٻاهر هجي، پر اهو خراب قسم جو ڪوڙهہ آهي.

56پر جيڪڏهن ڪاهن چڪاسي، ۽ ڏسو، جي انهي جي ڌوئڻ کان پوءِ داغ جهڪو ٿي پوي، تہ پوءِ اهو ڪپڙي مان، يا چم مان، يا تاڃيءَ مان، ڦاڙي ڪڍي وٺي:

57۽ جي اڃا بہ اهو ڪپڙي ۾ ڏسڻ ۾ اچي، پوءِ اهو تاڃيءَ ۾ هجي يا پيٽي ۾، يا چم جي ڪنهن شيءِ ۾ هجي، تہ اهو پکڙجڻ وارو آهي: پوءِ جنهن شيءِ ۾ اهو مرض جو داغ هجي، تنهن کي تون باهہ سان ساڙي ڇڏج.

58۽ اهو ڪپڙو، تاڃي هجي يا پيٽو، يا ڪابہ چم جي شيءِ هجي، ۽ جيڪڏهن انهي کي ڌوئڻ سان مرض جو داغ منجهانئس نڪري وڃي، تہ انهي کي ٻيو ڀيرو ڌوئجي، پوءِ اهو پاڪ ٿيندو.

59اهو آهي قاعدو ڪوڙهہ جي مرض بابت، جو پشم، يا سڻيءَ جي ڪپڙي تي، تاڃيءَ ۾ هجي توڙي پيٽي ۾، يا چم جي ڪنهن شيءِ تي هجي، تہ انهيءَ کي پاڪ ٺهرائجي يا ناپاڪ.