1 Chronicles 12

Shilluk DC Bible © Bible Society in South Sudan, 2011

← Chapter 11 Jump to: Chapter 13 →

1Debïd ɑ́bëëd ɑ Dhiglɑg keny-ɑ ɑ́pɑ̈ɑ̈re yïnø kɑ ɑ́dwɑddii nɑ̈gø yi Cɑul wɑ̈d Kïc, dɑ jøliny mø ngɑ̈nyi yëthi liny, o ge pɑ nyi døøg cyɑ̈n mɑ ɑ́rëbi ki en.

2Jøgɑni bɑ yɑɑg gøl Ben Yɑmïn, ɑ ying gøl yɑɑ Cɑul. Ge pɑ nyi bɑ̈ɑ̈jø ki tøngg wɑlɑ̀ ki wethh, wɑlɑ̀ ki bɑ̈ddì, o ge bɑ nywɑnyy bënn.

3Ge ɑ́bëëd ge pyejj-ɑ yi wɑ̈ddi Cemɑ̀ kì Gibeɑ̀, ɑ løg Akiedher geki Yöɑc. Jøliny møgɑni ek: Yedhiel kí Pelet, wɑ̈ddi Adhmɑbeth Berɑkɑ̀ kí Yeeu kì Anɑthöth. Icmɑiyɑ̀ kì Gibeon. Bɑ jɑl-liny mɑ ɑ́bëëd e ngɑ̈nyi, o ɑ́bëëd ɑ́ ɑ́kyel kì kelli pëjji liny møg-ɑ mɑl gɑ pyɑ̈r ɑ́dɑ̈g. Jermɑyɑ̀, kí Yɑɑdhiel, kí Yöɑnɑn, kí Yödhɑbɑd kì Gederɑ̀. Eludhɑy, kí Yerimöth, kí Beɑliyɑ̀, kí Cemɑriyɑ̀, kí Cepɑtiyɑ̀ jɑl Arïp. Elkɑnɑ̀, kí Iciyɑ̀, kí Adhɑrel, kí Yöedher, kí Yɑcobeɑm, kì gøl Körɑ̀. Kí wɑ̈ddi Yeroɑm kì Gedör, ɑ løg Yöilɑ̀ kí Dhebɑdiyɑ̀.

8Møg bɑ nyingi jøliny møg-ɑ ɑ́ngɑ̈nyi yëthi liny kì gøl Gɑd, gen ɑ jøg-ɑ ɑ́kedhi kömi yɑɑy Debïd keny-ɑ ɑ́bëëde kì yij ønteg kì yij pɑ̈l. Ge ɑ́bëëd ge ngɑ̈ny nyɑɑg ki ködd kí tøngg, ge teg ni ngurrì kɑ̀ nënni gen, o ge yöd ni ɑ́køøny wïj kït, kɑ̀ rïngi gen.

9Ge ómyeerø, o ge ópyëlø ni men: Edher, Obɑdiyɑ̀, Eliɑb, Micmɑnɑ̀, Jermɑyɑ̀, Atɑy, Eliel, Yöɑnɑn, Eldhɑbɑd, Jermɑyɑ̀, kí Mɑkbɑnɑy.

14Kwï jø gøl Gɑd møgɑni ɑ́pyejj-ɑ ji ɑ́lïp, møøgø ɑ́pyejj-ɑ miyø.

15Kì dwɑ̈y Abib, e Nɑm Urdun pɑ̈ngø kɑ obeedhø, nɑmɑni ɑ́bɑ̈ɑ̈n gen, kɑ tyëng-ɑ ɑ́bëëd kì yij tör kedhhi gen kì wɑɑng cyɑ̈ɑ̈ng mwøl kí wɑɑng cyɑ̈ɑ̈ng böörø.

16Cyɑ̈ng ɑ́kyel Debïd yïe ɑ́bëën kì ønteg keny-ɑ ɑ́bëëde, yi jøg mø kɑ̈ɑ̈l gøl Ben Yɑmïn kí gøl Yeudɑ̀.

17Kɑ Debïd bï-ɑ wɑ̈g kì ød, be yïddø ki jøgɑni, kɑ gï köbbe kinni, “Keløg wu bï kɑ mër, wu dwɑdd-ɑ kønyi yɑn, døøj! De keløg wu dwɑdd-ɑ twɑ̈nyi yɑn tyëngmɑ̈ɑ̈nø, e bong gïnrɑj mɑ ɑ́göggɑ wun, møgɑni óbëëd ge ngɑ̈nyi yi Jwøøg kweyyee, o wu cɑye’ cɑyø.”

18Codhe, kɑ Amɑsɑy, ɑ ɑ́gwøg ɑ́ jɑngi jøliny møg-ɑ pyɑ̈r ɑ́dɑ̈g, köme bëën yi wëyi Jwøk, ɑkööbe kinni, “Debïd wɑ̈d Yesì, wø bɑ jií! Yï óbëëdø ki mër, wuki ji-ɑ køny yïn! Yï bɑ ɑkøny yi Jwøk.” Kɑ jøgɑni cwøl yi Debïd, kɑ gï gwøge gɑ pëjji linye.

19Kwï jøliny kì gøl Mɑnɑsè møg-ɑ ɑ́kedhi kömi Debïd keny-ɑ ɑ́rëbe ki tyëng Pelistiyɑ̀, kì bøli keny-ɑ ɑ́bëëd ge ónyïɑ̈ggø ki Cɑul. De Debïd ɑ́bɑny yi rɑ̈nhi Pelistiyɑ̀, kɑ köbbi kinni døøge pɑc, mɑ́ rɑ̈nhi Pelistiyɑ̀ ɑ́bëëd ge óböggø kinni Debïd ódøøg kömi Rɑ̈dh Cɑul, ɑdøøg Debïd Dhiglɑg.

20Møg bɑ jøliny kì gøl Mɑnɑsè møg-ɑ ɑ́kedhi kömi Debïd, keny-ɑ ɑ́kedhe Dhiglɑg: Adnɑɑ̀, Yödhɑbɑd, Yediyɑil, Mikɑil, Yödhɑbɑd, Elïu, kí Dhilethɑy. Ge ɑ́bëëd gɑ pëjji ɑ́lïp kì gøl Mɑnɑsè.

21Debïd ɑ́køny yi gen ki nyɑɑg ki tyëng-ɑ nyi röödhø, mɑ́ ge ɑ́bëëd gɑ pëjji liny mø teg.

22Jøliny Debïd ɑ́kedh ge óngënyø, mɑ́ e dɑ ji møg nyi bï kömi gen yethi cyɑ̈ng. Kɑ yɑyɑni ódøngø ki mendwøng.

23Keny-ɑ ɑ́ying Debïd Kibrön, jøliny mø gïïr ɑ́kedhi köme be kønyii, o bëëde ɑ́ rɑ̈dh kì kej Cɑul, ni kɑ ɑ́kööb Jwøng-ɑ Ácwɑ̈ɑ̈j. Kwɑnni gen ek:

24Gøl Yeudɑ̀. 6,800, jøg mø ngɑ̈ny liny ködd kí tøngg. Gøl Cimeøn. 7,100 jøg mø dïdø ki liny. Gøl Leebì. 4,600 jøliny. Jøbɑng Yöyɑdɑ̀, ɑ løg kwɑrri Aɑron, ge bɑ 3,700 Jøg-ɑ teg møg-ɑ ɑ́cyɑ̈dhi ki Dhɑdök, bɑ 22. Gøl Ben Yɑmïn, ɑ bɑ gøl yɑɑ Cɑul bɑ 3,000, ji mø ngenyø kì kelli gen ɑ́cög yethi gen bong ɑ́dud ki gøl Cɑul. Gøl Eprɑim bɑ 20,800, o ge bɑ jøg mø ngɑ̈ny liny kì wɑ̈thi kɑ̈lli gen. Kì gøl Mɑnɑsè men-ɑ wɑɑng cyɑ̈ɑ̈ng böörø, yije ɑ́kɑ̈bbi ki jøliny 18,000 gɑ møg kedhi be gwøgi Debïd ɑ́ Rɑ̈dh. Gøl Isɑkɑr bɑ 200, ge bɑ pëjji liny ge bënn, kí jøg-ɑ pyejji yi gen, pëjjɑni ngɑ̈ny wøw ki gïn-ɑ cuggi gwøgø yi tyëng Isrɑil kì bøli keny-ɑ døj ki gwøgii. Gøl Dhebulun bɑ 50,000, jøg mø yethi gen bong ɑ́dud, o ge ngɑ̈nyi yëthi liny. Gøl Nɑptɑlì bɑ 1,000 pëjji liny, kí 37,000 jøliny ködd kí tøngg. Gøl Dɑn bɑ 28,600, jøliny mø rumø ki pwönyø. Gøl Aceer bɑ 40,000, jøg mø cuggi nyɑɑg ki liny. Tyëng løøg Nɑm Urdun kì wɑɑng cyɑ̈ɑ̈ng mwøl, bɑ gøl Ruben kí Gɑd, kí budi gøl Mɑnɑsè, jöddi liny kwɑnni gen bɑ ɑ́lïp miyø kí pyɑ̈r ɑ́ryew (120,000).

25Jøliny møgɑni bënn ɑ́kedhi Kibrön be gwøgi Debïd ɑ́ rɑ̈ɑ̈dh Isrɑil bëne. Tyëng Isrɑil møg-ɑ kyeelø ɑ́dwɑdd-ɑ møgɑni ceth.

26Ge ɑ́bëëd ki cyɑ̈ng ɑ́dɑ̈g kì buti Debïd, ge cɑm-ɑ gïgcɑmm kí gïg mɑdh møg-ɑ ɑ́gwir yi tyëng Isrɑil kipe gen.

27Gøl Isɑkɑr, kí Dhebulun, kí Nɑptɑlì møg-ɑ ɑ́kɑ̈ɑ̈l wɑɑng wuudø kun lɑ̈wi, ge ɑ́kɑ̈ni ki gïgcɑmm, kí møng-ɑ búr, kí nywøli ólɑm møg thij, kí møg thwøwø, kí møgi oløg, kí møøw dhetun. Gï ɑ́kɑ̈ɑ̈l gen ɑ kömi ɑderr, kí ɑmɑl, kí ógɑll, kí wɑ̈dhh. Ge ɑ́kɑ̈ni thyew ki dhög kí dyëg. O ge nɑ̈g gɑ møg cɑm. Møg bënn nyodh-ɑ medi pëëth kì yij pödhø bëne.

← Chapter 11 Jump to: Chapter 13 →