1 Chronicles 15

Shilluk DC Bible © Bible Society in South Sudan, 2011

← Chapter 14 Jump to: Chapter 16 →

1Debïd ree ɑ́gëdde ki ød kì Yerusɑlem, kɑɑl-ɑ ɑ́mɑge kì yï tyëng Yebus, ɑ løg tyëngpinyɑni, ɑtyenye kej Sɑnduug Ciggi Jwøk thyew, kɑ gudd-ɑ piny ki kemɑ̀.

2Codhe, ɑkööbe kinni, “Sɑnduug Cigg óbyell-ɑ yi Kwɑrri Leebì keti gen, mɑ́ gen ɑ ɑ́yieny yi Jwøng-ɑ Ácwɑ̈ɑ̈j, o gø nyi byelli gen, o keje nyi tyeny yi gen, gïti ɑtheer.”

3Kɑ Debïd tyëng Isrɑil bënn cwøøle Yerusɑlem, o Sɑnduug Cigg kɑ̈ɑ̈l gen keny-ɑ ɑ́rum keje ki tyenyø yi en, kipere.

4Codhe, ɑöde yï Kwɑrri Aɑron geki Kwɑrri Leebì.

5Ji miyø kí pyɑ̈r ɑ́ryew ɑ ɑ́bï kì gøl Kɑ̈ɑ̈th, ge pyejj-ɑ yi Uriel.

6Ji miy ɑ́ryew kí pyɑ̈r ɑ́ryew ɑ ɑ́bï kì gøl Merɑrì, ge pyejj-ɑ yi Asɑiyɑ̀.

7Ji miyø kí pyɑ̈r ɑ́dɑ̈g ɑ ɑ́bï kì gøl Gercön, ge pyejj-ɑ yi Yöiil.

8Gøl Elidhɑpɑn ɑ́bï gɑ miy ɑ́ryew, ge pyejj-ɑ yi Cemɑiyɑ̀.

9Gøl Kibrön ɑ́bï gɑ pyɑ̈r ɑ́bïdɑ̈g, ge pyejj-ɑ yi Eliel.

10Gøl Udhiel ɑ́bï gɑ miyø kí pyɑ̈rø wïdɑ́ryew, ge pyejj-ɑ yi Aminɑdɑb.

11Kɑ ókwër ryeet, Dhɑdök kí Abiyɑthɑr cwøl yi Debïd, geki Kwɑrri Leebì ɑ́bïkyel, ɑ løg Uriel, Asɑiyɑ̀, Yöiil, Cemɑiyɑ̀, Eliel kí Aminɑdɑb.

12Aköbbe pëjji Kwɑrri Leebì kinni, “Wun ɑ bɑ jɑggi gøl Leebì. Kwëru ri wun, wuki Kwɑrri Leebì møg-ɑ kyeelø, o Sɑnduug Ciggi Jwøng-ɑ Ácwɑ̈ɑ̈j, Jwøøg Isrɑil kɑ̈ɑ̈l yi wun, o cïb keny-ɑ ɑ́gwir yi yɑn kipere.

13Wɑ ɑ́cɑy yi Jwøng-ɑ Ácwɑ̈ɑ̈j kɑ per kɑ ɑ́bëëd e pɑth ki wun ɑ ɑ́kɑ̈ɑ̈lii, o nuti kwërø kidøøj.”

14Codhe, kɑ ókwër geki Kwɑrri Leebì ri gen kwër gen kipe kɑ̈ɑ̈li Sɑnduug Ciggi Jwøng-ɑ Ácwɑ̈ɑ̈j, Jwøøg Isrɑil.

15Kɑ byëël yi Kwɑrri Leebì ki lødh, ni kɑ ɑ́ceg Mosɑ̀ yi Jwøng-ɑ Ácwɑ̈ɑ̈j.

16Kɑ jɑggi gøl Leebì köbbi yi Debïd kinni kɑ̈bbi gen ki Kwɑrri Leebì møg wör ki thøm, ki medi pëëth.

17Kì kelli tyëng gøl Merɑrì, ge ɑ́kwɑny-ɑ Ëmɑn wɑ̈d Yöiil, kí Asɑp wɑ̈d Berekiyɑ̀, kí Ethɑn wɑ̈d Kucɑiyɑ̀. O kì kelli jøg-ɑ thom thøm-ɑ cwɑggi gen ying mɑl, ge ɑ́kwɑny-ɑ Dhekɑriyɑ̀, Yɑɑdhiel, Cemirɑmöth, Yekiel, Unì, Eliɑb, Mɑɑseiyɑ̀ kí Benɑiyɑ̀. O kì kelli jøg-ɑ thom thøm-ɑ cwɑggi gen ying piny, ge ɑ́kwɑny-ɑ Mɑtithiyɑ̀, Elipeleu, Mikneiyɑ̀, Adhɑdhiyɑ̀. O kì kelli jøg-ɑ nyi kor Kengø, ge ɑ́kwɑny-ɑ Obed Edöm kí Yeiel.

22Kɑ Kenɑniyɑ̀ kwɑny ɑ́ jɑngi jø gøl Leebì møg-ɑ bɑ bödhhi thøm, mɑ́ en ɑ luudø kì kelli gen.

23Berekiyɑ̀, kí Elkɑnɑ̀, kí Obed Edöm, kí Yekiyɑ̀, bɑ gen ɑ ɑ́kwɑny o ge kor gen Sɑnduug Cigg. Cebɑniyɑ̀, Yöcɑpɑt, Nethɑnel, Amɑsɑy, Dhekɑriyɑ̀, Benɑiyɑ̀, kí Eliedher, bene gen ókwërr-ɑ ɑ́kwɑny o ge nyi kodh gen kɑ̈ngì kì bøli Sɑnduug Cigg.

25Adhwödh Rɑ̈dh Debïd geki jɑggi Isrɑil, kí pëjji liny, kɑ ge kedh-ɑ gøl Obed Edöm be kɑ̈ɑ̈li Sɑnduug Cigg, kɑ ge otugø ki mendwøng.

26Kɑ ge ongɑ̈dø ki wɑ̈dhh ɑ́bïryew kí órömm ɑ́bïryew gɑ gëdhhì, kipe kinni o Kwɑrri Leebì møg-ɑ byelli Sɑnduug Cigg ókøny yi Jwøk.

27Debïd ɑ́bëëd e rug-ɑ ógødh men-ɑ ócwɑ̈jø ki kor-ɑ yöm geki bödhhi thøm, kí Kenɑniyɑ̀ jɑngi gen, geki Kwɑrri Leebì møg-ɑ byelli Sɑnduug Cigg. Debïd ɑ́bëëd e orugø thyew ki pɑri kwër men-ɑ ócwɑ̈jø ki kor-ɑ yöm.

28Akɑ̈ɑ̈l Sɑnduug Ciggi Jwøng-ɑ Ácwɑ̈ɑ̈j Yerusɑlem yi tyëng Isrɑil, ge óryeerø ki medi pëthi gen, kɑ̈ngì okodhø, bullì opwödø, o thøm othomø.

29Keny-ɑ ɑ́wɑ̈nhi Sɑnduug Jwøng-ɑ Ácwɑ̈ɑ̈j kɑɑl, kɑ Mikɑl nyɑɑr Cɑul ómëddø kì ɑwɑj, ɑlidhe Rɑ̈dh Debïd, e óyëggø pyëwe omedø, kɑ gø byenye ki pyëwe.

← Chapter 14 Jump to: Chapter 16 →