Ezra 1

Shan

Jump to: Chapter 2 →

1ၼႂ်းပီႊဢၼ် ၵူႉရူႉ ၶုၼ်ႁေႃၶမ်း ပေႇရသီႉ ၸၢမ်ႇႁၢင်ႈၸၢမ်ႇႁေႃပီႊပထမႃႉၼၼ်ႉ လွင်ႈၼင်ႇႁိုဝ်ဢမိင်ႉၸဝ်ႈထႃႇဝရႃႉၽြႃး ဢၼ် ယေႇရမီႉ သင်ႇလၢတ်ႈဝႆႉၼၼ်ႉ တၵ်းပျေႉၸုမ်ႇၸိုင်၊ ထႃႇဝရႃႉၽြႃးတိုၵ်းယူင်းၸူဝ်းဢဝ်ႁူဝ်ၸႂ် ၵူႉရူႉ ၶုၼ်ႁေႃၶမ်း ပေႇရသီႉ ႁႂ်ႈမၼ်းၼၼ်ႉ ပူင်ဢမိင်ႉၵျေႃႇၺႃႇၵႃႈၼႂ်းသိုင်ႇၸိုင်ႈဝၢၼ်ႈမိူင်းမၼ်း ၵူႈတီႈၵူႈလႅၼ်သေလႄႈ တႅမ်ႈသႂ်ႇၵႃႈၼႂ်းလိၵ်ႈၼႂ်းလၢႆးလႄႈဝႃႈ၊-

2ၵူႉရူႉ ၶုၼ်ႁေႃၶမ်း ပေႇရသီႉ မီးဢမိင်ႉလႄႈဝႃႈၸမ်ႉ၊ ထႃႇဝရႃႉၽြႃး ၽြႃးပဵၼ်ၸဝ်ႈ ၸဝ်ႈၽုင်ႇၵၢင်ႁၢဝ်ၼၼ်ႉ ဢဝ်သိုင်ႇၸိုင်ႈဝၢၼ်ႈမိူင်းၵႃႈဢၼ်မီးၵႃႈၼိူဝ်လိၼ်မိူင်းၼႆႉပၼ်တီႈၵဝ်လႄႈ သင်ႇလၢတ်ႈဝႆႉလွင်ႈဢၼ်ၵဝ်တၵ်းလႆႈတႄႇႁဵတ်းႁိူၼ်းၸဝ်ႈ ပုၼ်ႈမၼ်းၸဝ်ႈ ၵႃႈၼႂ်းဝဵင်း ယေႇရူႉသလႅမ်ႇ မိူင်း ယူႉတႃႉ ၼၼ်ႉယဝ်ႉ။-

3ၼႂ်းၵူၼ်းမၼ်းၸဝ်ႈတင်းသဵင်ႈတင်းလူင်ၼၼ်ႉ ၽူႈလႂ်မီးယူႇၵႃႈၼႂ်းသူၼႆႉ ႁႂ်ႈၽြႃးပဵၼ်ၸဝ်ႈမၼ်းၼၼ်ႉ မီးယူႇလူၺ်ႈၵၼ်တင်းမၼ်းၼၼ်ႉသေၵမ်းလူၺ်ႈ။ ႁႂ်ႈမၼ်းၼၼ်ႉၵႂႃႇၵႃႈတီႈဝဵင်း ယေႇရူႉသလႅမ်ႇ မိူင်း ယူႉတႃႉ လႄႈ တႄႇႁဵတ်းႁိူၼ်းထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ သေၵမ်း။ ၽြႃးဢၼ်မီးယူႇၵႃႈတီႈဝဵင်း ယေႇရူႉသလႅမ်ႇ ၼၼ်ႉ ပဵၼ်ၽြႃးပဵၼ်ၸဝ်ႈဢေႃႈ။-

4ပဵၼ်ၽူႈလႂ်သေဢမ်ႇဝႃႈ၊ ၵေႃႉဢၼ်ၵိုတ်းၵျၢၼ်ႇဝႆႉသေတီႈသေလႅၼ် တီႈဢၼ်မၼ်းသွၼ်ႈပိုင်ႈယူႇၼၼ်ႉၸမ်ႉ၊ ႁႂ်ႈၶဝ်ၸိူဝ်းဢၼ်ယူႇၵႃႈတီႈဢၼ်မၼ်းယူႇမၼ်းသဝ်းၼၼ်ႉၸိူဝ်းၼၼ်ႉ၊ ၼွၵ်ႈသေတၢင်းလူႇတၢင်းတၢၼ်းဢၼ်မီးၸႂ်ၸေႇတၼႃႇသေလႄႈလူႇတၢၼ်းပုၼ်ႈႁိူၼ်းၽြႃးပဵၼ်ၸဝ်ႈ ဢၼ်မီးယူႇၵႃႈတီႈဝဵင်း ယေႇရူႉသလႅမ်ႇ ၼၼ်ႉ၊ ဢဝ်ငိုၼ်းၶမ်းဢုၵ်ႉၸႃႇတရိၵ်ႈသၢၼ်ႇၸွႆႈထႅမ်မႃႉၸႃႉမၼ်းသေၵမ်း၊ ဝႃႈၼင်ႇၼႆဢေႃႈ။

5မိူဝ်ႈၼၼ်ႉၶဝ်ၸိူဝ်းဢၼ် ပဵၼ်ငဝ်ႈပဵၼ်ႁူဝ် မဵဝ်းပူႇမဵဝ်းပေႃႈၼႂ်းမဵဝ်း ယူႉတႃႉ တင်းမဵဝ်း ပိၼ်ႇယႃႇမိၼ်ႇ ၊ ယိတ်ႈပရေႃးႁဵၵ်ႈ တင်းၵူၼ်းမဵဝ်း လေႇဝီႉ တင်းလၢႆ ဢၼ်ဝႃႈၶဝ်ၵႃႈဢၼ်ၽြႃးပဵၼ်ၸဝ်ႈတိုၵ်းယူင်းၸူဝ်းဢဝ်ၸိူဝ်းၼၼ်ႉ ဢွၼ်ၵၼ်လုၵ်ႉႁႂ်ႈလႆႈၵႂႃႇလႄႈ တႄႇႁဵတ်းႁိူၼ်းထႃႇဝရႃႉၽြႃး ဢၼ်မီးၵႃႈတီႈဝဵင်း ယေႇရူႉသလႅမ်ႇ ၼၼ်ႉဢေႃႈ။-

6ၵူၼ်းႁိူၼ်းၸမ်ၵၼ်ၵႃႈမီးၼၼ်ႉ၊ ၼွၵ်ႈသေတၢင်းလူႇတၢင်းတၢၼ်းဢၼ်မီးၸႂ်ၸေႇတၼႃႇသေလႄႈလူႇတၢၼ်းၼၼ်ႉ ဢွၼ်ၵၼ်ဢဝ်တင်းၶိူင်ႈငိုၼ်း၊ ၶိူင်ႈၶမ်း၊ ဢုၵ်ႉၸႃႇတရိၵ်ႈသၢၼ်ႇ တင်းၶိူင်ႈပိူင်ဢၼ်ထိူၵ်ႈၵႃႈထိူၵ်ႈၶၼ် တင်းလၢႆၸွႆႈထႅမ်မႃႉၸႃႉၶဝ်ဢေႃႈ။

7လိူဝ်သေၼၼ်ႉ၊ ၶုၼ်လူင် ၵူႉရူႉ ဢဝ်ၶိူင်ႈပိူင်ပိၵ်ႈမၢၼ်ႇ ထႃႇဝရႃႉၽြႃး ဢၼ် ၼေႇပူႉၶတ်ႉၼေႇၸႃႇ သိမ်းဢဝ်ဢွၵ်ႇသေၵႃႈတီႈဝဵင်း ယေႇရူႉသလႅမ်ႇ ၵႂႃႇလႄႈ သႂၢင်းသႂ်ႇဝႆႉၵႃႈၼႂ်းပိၵ်ႈမၢၼ်ႇၽြႃးမၼ်းၸိူဝ်းၼၼ်ႉဢွၵ်ႇလႄႈ၊-

8ၵူႉရူႉ ၶုၼ်ႁေႃၶမ်း ပေႇရသီႉ ၼၼ်ႉ ဢဝ်တင်းမိုဝ်း မီႉသရေႇတတ်ႉ ၵေႃႉဢၼ်ပႂ်ႉတိူၵ်ႈၶမ်းၸဝ်ႈၼၼ်ႉ ဢဝ်ၶိူင်ႈပိူင်ၸိူဝ်းၼၼ်ႉဢွၵ်ႇလႄႈၼပ်ႉဢၢၼ်ႇသေလႄႈ ဢၢပ်ႈပၼ်တီႈ သေႇသႃႉပႃႇၸႃႇ ၶုၼ် ယူႉတႃႉ ၼၼ်ႉဢေႃႈ။

9ၸရၢင်းၶိူင်ႈပိူင်ၸိူဝ်းၼၼ်ႉၸမ်ႉ၊ မီးၵွၵ်းၶမ်းသၢမ်သိပ်း၊ ၵွၵ်းငိုၼ်းႁဵင်ၼိုင်ႈ၊ လၢပ်ႇ သၢဝ်းၵဝ်ႈမၢၵ်ႈ၊-

10မေႃႈၶမ်း သၢမ်သိပ်း၊ မေႃႈငိုၼ်းဢၼ်လၢၵ်ႇပိူင်ႈ သီႇပၢၵ်ႇပၢႆသိပ်း၊ ၶိူင်ႈပိူင်တၢင်ႇၸိူဝ်ႉတၢင်ႇဢၼ် ႁဵင်ၼိုင်ႈဢေႃႈ။-

11တၢင်းဢၼ်ၼပ်ႉဢၼ်ဢၢၼ်ႇ ၶိူင်ႈၶမ်းၶိူင်ႈငိုၼ်းပွင်းၵၼ်ၸမ်ႉ၊ မီးႁႃႈႁဵင်ပၢႆသီႇပၢၵ်ႇဢေႃႈ။ ၶိူင်ႈပိူင်တင်းသဵင်ႈတင်းလူင်ၼၼ်ႉၸိုင်၊ သေႇသႃႉပႃႇၸႃႇ ၼၼ်ႉ ဢဝ်မႃးၼႂ်းမိူဝ်ႈဢၼ် ၶဝ်ၸိူဝ်းဢၼ်ၶဝ်ႈပႃးၼႂ်းၶဝ်ၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉ လႆႈဢွၵ်ႇသေၵႃႈတီႈဝဵင်း ပႃႇပူႉလုၼ်ႇ ၶိုၼ်ႈၸူးၵႃႈတီႈဝဵင်း ယေႇရူႉသလႅမ်ႇ ၼၼ်ႉဢေႃႈ။

Jump to: Chapter 2 →