Ezra 9

Shan

← Chapter 8 Jump to: Chapter 10 →

1ဢမူႉလွင်ႈတၢင်းၸိူဝ်းၼၼ်ႉယဝ်ႉတူဝ်ႈသေယဝ်ႉ၊ ၶုၼ်တင်းလၢႆဢွၼ်ၵၼ်မႃးတီႈၵဝ်လႄႈ မွၵ်ႇလၢတ်ႈလႄႈဝႃႈ၊ ၵူၼ်းမဵဝ်း ဢီႉသရေႇလႃႉ တင်းလၢႆ ဢိၵ်ႇတင်းယိတ်ႈပရေႃးႁဵၵ်ႈ တင်းၵူၼ်းမဵဝ်း လေႇဝီႉ ၸိူဝ်းၼၼ်ႉ ယင်းဢမ်ႇၽၢတ်ႇၽႄၵၼ်တင်းၵူၼ်းဢၼ်ယူႇၵဝ်ႇၵဝ်ႇ ၵႃႈတီႈမိူင်းၼႆႉၸိူဝ်းၼၼ်ႉလႄႈ ဢွၼ်ၵၼ်ၵမ်ၵျၢင်ႉတၢင်းၵမ်တၢင်းၵျၢင်ႉ ၵူၼ်း ၶႃႇၼၼီႉ ၊ ၵူၼ်း ႁိတ်ႉတီႉ ၊ ၵူၼ်း ၽေႇရသီႉ ၊ ၵူၼ်း ယေႇပူႉသီႉ ၊ ၵူၼ်း ဢမ်ႇမုၼ်ႇ ၊ ၵူၼ်း မေႃႇၽႃႉ ၊ ၵူၼ်း ဢေႇၵိပ်ႉတူႉ ၊ ၵူၼ်း ဢႃႇမေႃးရီႉ ဢၼ်လီႁင်ႈဢဵတ်ႇသဵတ်ႇၸိူဝ်းၼၼ်ႉယူႇ ဢေႃႈ။-

2လွင်ႈမၼ်းၸမ်ႉ ၶဝ်ဢဝ်လုၵ်ႈယိင်းၶဝ်ၼၼ်ႉၸိူဝ်းၼၼ်ႉ ပုၼ်ႈတူဝ်ၸဝ်ႈၵဝ်ႇ ဢိၵ်ႇတင်းပုၼ်ႈလုၵ်ႈၸၢႆးတူဝ်ၸဝ်ႈၵဝ်ႇသေလႄႈ မဵဝ်းဢၼ်မူတ်းၸၢင်ႇၼၼ်ႉ မီးတၢင်းဢၼ်လေႃးလႄးလူၺ်ႈၵၼ်တင်း ၵူၼ်းဢၼ်ယူႇၵဝ်ႇၵဝ်ႇၵႃႈတီႈမိူင်းၼႆႉၸိူဝ်းၼၼ်ႉယူႇလႄႈ ၶုၼ်တင်းလၢႆ ဢိၵ်ႇတင်းၶဝ်ၸိူဝ်းဢၼ်မီးဢရႃႇၼၼ်ႉ ဢွၼ်ၵၼ်ႁဵတ်းဢမူႉတူႉၸရိူၵ်ႈၼႆႉ ၼႃႇသေပိူၼ်ႈယဝ်ႉလူင်ပႄႇ၊ ဝႃႈၼင်ႇၼႆဢေႃႈ။-

3မိူဝ်ႈဢၼ်ၵဝ်ငိၼ်းၵႂၢမ်းၼၼ်ႉၸိုင်၊ ၵဝ်ၸၵ်ႉသိၵ်ႇၶူဝ်းၼုင်ႈၵဝ်၊ တင်းၶူဝ်းမႆၵဝ်လႄႈ ထူၺ်ႈၶူၼ်ႁူဝ်ၵဝ် တင်းၼူတ်ႇၵၢင်းၵဝ်ပႅတ်ႈသေလႄႈ ငိူဝ်ႈငဝ်ၵႂင်ၸႂ်လႄႈၼင်ႈယူႇဢေႃႈ။-

4မိူဝ်ႈၼၼ်ႉ ၶဝ်ၸိူဝ်းဢၼ်ၵူဝ်ႁႄဢမိင်ႉၽြႃးပဵၼ်ၸဝ်ႈ မဵဝ်း ဢီႉသရေႇလႃႉ ထၼ်ႈပေႃးသၼ်ႇပေႃးဝႆယူႇၸိူဝ်းၼၼ်ႉ ၸူႉၵၼ်တုမ်ၵၼ်ၵႃႈတီႈၵဝ် ၵွပ်ႈပိူဝ်ႈဢပႅတ်ႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၸိူဝ်းၼၼ်ႉလႄႈ ၵဝ်ငိူဝ်ႈငဝ်ၵႂင်ၸႂ်လႄႈၼင်ႈယူႇ တေႃႇထိုင်ႁွတ်ႈၶိင်ႇဢၼ် ပုၵ်ႈၸေႃႇယိတ်ႈၶိင်ႇႁူဝ်ၶမ်ႈၼၼ်ႉဢေႃႈ။

5ၶိင်ႇဢၼ်ပုၵ်ႈၸေႃႇယိတ်ႈၶိင်ႇႁူဝ်ၶမ်ႈၼၼ်ႉ၊ ၵဝ်လုၵ်ႉသေၵႃႈတီႈတၢင်းဢၼ် ၵဝ်တမ်ႇၼွႆႉမွင်ၸႂ်ၼၼ်ႉလႄႈ ပႃးဢဝ်ၶူဝ်းၼုင်ႈၵဝ်ဢိၵ်ႇတင်း ၶူဝ်းမႆၵဝ်ဢၼ်ၸၵ်ႉသိၵ်ႇယဝ်ႉၼၼ်ႉသေလႄႈ ၶုပ်ႉၶဝ်ႇၵၢဝ်ႈတဝ်ႉလႄႈ ၵီႈၽႃႇမိုဝ်းၸူးထႃႇဝရႃႉၽြႃး ၽြႃးပဵၼ်ၸဝ်ႈၵဝ်သေလႄႈ သူးတွင်းလႄႈဝႃႈ၊-

6ၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ ၶႃႈၸဝ်ႈဢူၵ်းဢၢႆလႄႈ ၼႃႈလႅင်ယူႇသေလႄႈ ဢမ်ႇႁတ်းမုင်ႈတူၺ်းၸဝ်ႈႁဝ်းတီႈၶႃႈဢေႃႈ။ ၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ တူႉၸရိူၵ်ႈဢၼ်ၶႃႈၸဝ်ႈႁဝ်းၶဝ်ႁဵတ်းမႅၼ်ႈၸိူဝ်းၼႆႉ ယႂ်ႇမႃးၽႄႈမႃးထူမ်ႈႁူမ်ႇၵႃႈၼိူဝ်ႁူဝ်ၶႃႈၸဝ်ႈႁဝ်းၶဝ်လႄႈ ဢပႅတ်ႈၶႃႈၸဝ်ႈႁဝ်းၶဝ် ဢၼ်ယႂ်ႇၼႃႇၼၼ်ႉယႂ်ႇၽႄႈတူဝ်းတွၼ်း ၶိုတ်းထိုင်ၽႃႉၵၢင်ႁၢဝ်တီႈၶႃႈဢေႃႈ။-

7ၶႃႈၸဝ်ႈႁဝ်းၶဝ်ၽိတ်းပိူင်ႈၼႃႇလူင်လၢင် ၸႃႉၸဵမ်ၸူဝ်ႈပူႇၸူဝ်ႈမွၼ်ႇလႄႈ တေႃႇထိုင်ႁွတ်ႈဝၼ်းမိူဝ်ႈၼႆႉတီႈၶႃႈယဝ်ႉ။ ၵွပ်ႈပိူဝ်ႈဢပႅတ်ႈတူဝ်ၸဝ်ႈၵဝ်ႇတင်းလၢႆလႄႈ ၶႃႈၸဝ်ႈႁဝ်းၶဝ် ဢိၵ်ႇတင်းၶုၼ်ႁေႃၶမ်းၶႃႈၸဝ်ႈႁဝ်းၶဝ်တင်းလၢႆ တင်းယိတ်ႈပရေႃးႁဵၵ်ႈၶႃႈၸဝ်ႈႁဝ်းၶဝ်ၸိူဝ်းၼၼ်ႉ လႆႈဢွၼ်ၵၼ်ၶၢမ်ႇတၢင်းဢၼ် ဢဝ်ဢၢပ်ႈၵႃႈၼႂ်းမိုဝ်းၶုၼ်ႁေႃၶမ်း တၢင်ႇသိုင်ႇတၢင်ႇမိူင်း၊ တၢင်းဢၼ်ဢဝ်တၢႆလူၺ်ႈလၢပ်ႇလူၺ်ႈလႅဝ်း၊ တၢင်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇ၊ တၢင်းဢၼ်လႆႈၶၢမ်ႇတၢင်းဢၼ်ႁိမ်ႁူင်ႇ၊ တၢင်းဢၼ်ၼႃႈလူႉမိူၼ်ၸိူဝ်ႉၼင်ႇဢၼ်ပဵၼ်ဝၼ်းမိူဝ်ႈၼႆႉၼၼ်ႉတီႈၶႃႈဢေႃႈ။-

8မိူဝ်ႈလဵဝ်ၼႆႉၵႅပ်ႉဢွၼ်ႇၵမ်းဢွၼ်ႇၼိုင်ႈၼႆႉၵေႃႈ၊ ၵျေးၸူးၸဝ်ႈဢၼ် ႁႂ်ႈၶႃႈၸဝ်ႈႁဝ်းၶဝ် ဢၼ်ယင်းၵိုတ်းယင်းၵျၢၼ်ႇၸိူဝ်းၼႆႉ ၵၢင်းလွတ်ႈတင်းၽေးသေလႄႈ ပၼ်တႅမ်ဢၼ်တွၵ်ႇၸပ်းဝႆႉ ၵႃႈတီႈထႃႇၼႃႉဢၼ်မူတ်းၸၢင်ႇၸဝ်ႈၼႆႉၼၼ်ႉသေလႄႈ ၽြႃးပဵၼ်ၸဝ်ႈႁဝ်းၶႃႈ တၵ်းႁႂ်ႈမၢၵ်ႇတႃၶႃႈၸဝ်ႈႁဝ်းၶဝ်လႅင်းလႄႈ ပၼ်ဢၶႂၢင်ႉဢၼ်လႆႈသမ်ႉၶိုၼ်းထူၺ်ႈၸႂ်ၵႃႈၼႂ်းတၢင်းဢၼ်ၶႃႈၸဝ်ႈႁဝ်းၶဝ်ၶၢမ်ႇႁဵတ်းၶႃႈယူႇၼၼ်ႉၸိူဝ်းၼႆႉၸိုင် ပဵၼ်ဢွၵ်ႇသေၵႃႈတီႈထႃႇဝရႃႉၽြႃး ၽြႃးပဵၼ်ၸဝ်ႈတီႈၶႃႈယဝ်ႉ။-

9ၶႃႈၸဝ်ႈႁဝ်းၶဝ်ၸိူဝ်းၼႆႉ လႆႈဢွၼ်ၵၼ်ၶၢမ်ႇႁဵတ်းၶႃႈယူႇတီႈၶႃႈဢေႃႈ။ ပိၵ်ႉသမ်ႉလႆႈၶၢမ်ႇႁဵတ်းၶႃႈယူႇသေၵေႃႈ၊ ၽြႃးပဵၼ်ၸဝ်ႈႁဝ်းၶႃႈ ဢမ်ႇၸုၼ်ႉဢမ်ႇပႅတ်ႈလႄႈ ဢဵတ်းလူပၼ်ၸႂ်ၸေႇတၼႃႇ ဢၼ်ၶႂ်ႈႁဵတ်းၵျေးၸူးတီႈၶႃႈၸဝ်ႈႁဝ်းၶဝ်ၼၼ်ႉ တီႈၶုၼ်ႁေႃၶမ်း ပေႇရသီႉ ႁႂ်ႈမၼ်းပၼ်ၶႃႈၸဝ်ႈႁဝ်းၶဝ် လႆႈသမ်ႉၶိုၼ်းထူၺ်ႈၸႂ် ဢိၵ်ႇတင်းႁႂ်ႈလႆႈသမ်ႉၶိုၼ်းပူၵ်းၶိုၼ်းတင်ႈႁိူၼ်းၽြႃးပဵၼ်ၸဝ်ႈႁဝ်းၶႃႈလႄႈ မႄးၵုမ်းမႄးႁဵတ်းတီႈဢၼ်ၵိူၼ်ႇပင်းလူႉလႅဝ်ၼၼ်ႉ ဢိၵ်ႇတင်းႁႂ်ႈလႆႈပၼ်လမ်းဢုတ်ႇလမ်းႁိၼ် ၵႃႈတီႈဝဵင်း ယေႇရူႉသလႅမ်ႇ မိူင်း ယူႉတႃႉ ပုၼ်ႈၶႃႈၸဝ်ႈႁဝ်းၶဝ်တီႈၶႃႈယဝ်ႉ။-

10မိူဝ်ႈလဵဝ်ၼႆႉၵေႃႈ၊ ၽြႃးပဵၼ်ၸဝ်ႈႁဝ်းၶႃႈတီႈၶႃႈ၊ ႁဵတ်းမႅၼ်ႈၸိူဝ်ႉၼင်ႇၼႆယဝ်ႉလႄႈ တၵ်းလႆႈလဝ်ႊလၢတ်ႈၸိူဝ်ႉၼင်ႇႁိုဝ်တီႈၶႃႈ။ ၶႃႈၸဝ်ႈႁဝ်းၶဝ်ဢွၼ်ၵၼ်ၸုၼ်ႉပႅတ်ႈၵႂၢမ်းပိင်းၺၢပ်ႈၸဝ်ႈႁဝ်း၊-

11ဢၼ်ၸဝ်ႈႁဝ်းဢဝ်ၶႃႈၸဝ်ႈႁဝ်း ပရေႃးၽႅတ်ႈတင်းလၢႆ သင်ႇလၢတ်ႈဝႆႉလႄႈဝႃႈ၊ မိူင်းဢၼ်သူတၵ်းၵႂႃႇသိမ်းဢဝ်ၼၼ်ႉ ပဵၼ်မိူင်းဢၼ်ၵူဝ်ႈၵိူၵ်ႇလူၺ်ႈတၢင်းဢၼ်ဝူၺ်ႇဢၼ်ႁင်ႈ ၵူၼ်းဝၢၼ်ႈၵူၼ်းမိူင်းဢိၵ်ႇတင်း လူၺ်ႈလွင်ႈတၢင်းဢၼ်လီႁင်ႈဢဵတ်ႇသဵတ်ႇ ဢၼ်တဵမ်ဝႆႉၵႃႈၼႂ်းမိူင်း ၸႃႉၸဵမ်ၽၢႆႇၼိုင်ႈတေႃႇထိုင်ႁွတ်ႈၽၢႆႇၼိုင်ႈလႄႈ ၵူဝ်ႈၵိူၵ်ႇဝႆႉဢေႃႈ။-

12ပိူဝ်ႈၼႆလႄႈ ယႃႇပေဢွၼ်ၵၼ်ဢဝ်လုၵ်ႈယိင်းသူပၼ်ၵၼ်တင်းလုၵ်ႈၸၢႆးၶဝ်။ ယႃႇပေႁႂ်ႈလုၵ်ႈယိင်းၶဝ်ႁူမ်ႈပွင်းပဵၼ်ၵူပ်ႉပဵၼ်ၵူႈလူၺ်ႈၵၼ်တင်းလုၵ်ႈၸၢႆးသူ။ ယႃႇပေဢွၼ်ၵၼ်လုမ်းလႃးၵတ်းယဵၼ်ၶျၢမ်းသႃႇၶဝ်တင်းၸေးၸိမ်ႇၶဝ်လႃးလႃး။ လွင်ႈၼင်ႇႁိုဝ် သူတၵ်းမီးဢၶႂၢင်ႉဢၼ်ႁႅင်းယႂ်ႇလႄႈ လႆႈၵိၼ်မၢၵ်ႇလိၼ်ႁူင်းလိၼ်၊ ဢၶႂၢင်ႉဢၼ်လႆႈ ႁႂ်ႈလိၼ်ၼၼ်ႉၵိုတ်းၵျၢၼ်ႇဝႆႉလႄႈ ပဵၼ်ဢမူၺ်ႇၼိၵ်ႈၸႃႉ တီႈလုၵ်ႈလၢၼ်သူၸိုင် ၵမ်ၵျၢင်ႉၸိူဝ်ႉၼင်ႇၼၼ်လႄႈယူႇတႃႉ၊ ဝႃႈၼင်ႇၼႆၼၼ်ႉတီႈၶႃႈလူင်ပႄႇ။-

13ပိၵ်ႉသမ်ႉၸဝ်ႈႁဝ်းဢၼ်ဝႃႈ ၽြႃးပဵၼ်ၸဝ်ႈႁဝ်းၶႃႈ ပၼ်တၢမ်ႇဢၼ်လဵၵ်ႉဢၼ်ဢွၼ်ႇသေတၢင်းဢၼ်ၵိုင်ႇတၢၼ်ႇၵၼ်တင်း တၢင်းဢၼ်ဢပႅတ်ႈၶႃႈၸဝ်ႈႁဝ်းၶဝ် ထိူၵ်ႈၶၢမ်ႇၼၼ်ႉလႄႈ ပၼ်ပဵၼ်မုၵ်ႉဢွၼ်ႇၸိူဝ်းဢွၼ်ႇ ၵိုတ်းၵျၢၼ်ႇဝႆႉထၢၼ်ႇၼႆႉၵူၺ်းသေၵေႃႈ၊ ၶႃႈၸဝ်ႈႁဝ်းၶဝ်လႆႈၶၢမ်ႇ ၵႃႈဢၼ်တူၵ်းႁွတ်ႈၵႃႈၼိူဝ်ၶႃႈၸဝ်ႈႁဝ်းၶဝ် ၵွပ်ႈပိူဝ်ႈတၢင်းဢၼ်ၶႃႈၸဝ်ႈႁဝ်းၶဝ် ၵမ်ၵျၢင်ႉဢၼ်ႁၢႆႉဢၼ်မိူၵ်ႈ၊ ဢိၵ်ႇတင်း ဢပႅတ်ႈတၢင်းဢၼ်ပူၼ်ႉလိူဝ် ဢၼ်ယႂ်ႇၼႃႇၼၼ်ႉယဝ်ႉလႄႈ၊-

14ပေႃးၶႃႈၸဝ်ႈႁဝ်းၶဝ်သမ်ႉၶိုၼ်းပူၼ်ႉလိူဝ်ပိင်းၺၢပ်ႈတြႃးၸဝ်ႈထႅင်ႈလႄႈ ႁူမ်ႈပွင်းလူၺ်ႈၵၼ်တင်း ၵူၼ်းမဵဝ်းဢၼ်ၸၢင်ႈႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇၸိူဝ်းၼႆႉၸိုင် တၢင်းၸႂ်မႆႈၶႆႈၸႃႉၸဝ်ႈႁဝ်း တၵ်းဢွၵ်ႇလႄႈယႃႉၽဵဝ်ႈၶႃႈၸဝ်ႈႁဝ်းၶဝ်ပႅတ်ႈ တေႃႇထိုင်ႁွတ်ႈထၼ်ႈပေႃး ဢမ်ႇႁႂ်ႈသေၵေႃႉသေၵူၼ်း လႆႈၵိုတ်းလႆႈၵျၢၼ်ႇ လႆႈၵၢင်းလႆႈလွတ်ႈ၊ ဢမ်ႇၸႂ်ႈတီႈၶႃႈႁိုဝ်။-

15ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ တီႈၶႃႈ၊ ၸဝ်ႈႁဝ်းသိုဝ်ႈတေႃႇတီႈၶႃႈဢေႃႈ။ ၶႃႈၸဝ်ႈႁဝ်းၶဝ် ပဵၼ်ၵေႃႉဢၼ်ၵိုတ်းဢၼ်ၵျၢၼ်ႇလႄႈ လွတ်ႈဝႆႉမိူၼ်ၸိူဝ်ႉၼင်ႇဢၼ်ပဵၼ်ဝၼ်းမိူဝ်ႈၼႆႉတီႈၶႃႈဢေႃႈ။ တူၺ်းတီႈၶႃႈလူး။ ၶႃႈၸဝ်ႈႁဝ်းၶဝ် ပႃးတင်းဢပႅတ်ႈတူဝ်ၸဝ်ႈၵဝ်ႇတင်းလၢႆသေလႄႈ မီးယူႇၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈဢေႃႈ။ ၵွပ်ႈပိူဝ်ႈဢပႅတ်ႈၸိူဝ်းၼၼ်ႉလႄႈ ၽူႈလႂ်ဢမ်ႇလႆႈၼႃႈတႃလီ ၵႃႈတီႈၽၢႆႇၼႃႈၸဝ်ႈႁဝ်းသေၵေႃႉသေၵူၼ်းတီႈၶႃႈ၊ ဝႃႈၼင်ႇၼႆဢေႃႈ။

← Chapter 8 Jump to: Chapter 10 →

Recommended Reading

Commentary Ezra Commentaries → Devotional Ezra Devotional Guide → Get This Bible Shan Study Bible →