Ezra 6 — Shan

1မိူဝ်ႈၼၼ်ႉၶုၼ်လူင် တႃႇရီႉ မီးဢမိင်ႉလႄႈ ၶဝ်ဢွၼ်ၵၼ်ႁႃၵႃႈၼႂ်းတိူၵ်ႈလိၵ်ႈဢၼ်ဝႆႉၽၼ်ႇတႃႇၸဝ်ႈၵႃႈၼႂ်းဝဵင်း ပႃႇပူႉလုၼ်ႇ ၼၼ်ႉဢေႃႈ။-

2ၶဝ်ထူပ်းႁၼ်ၵဵၼ်ႁမ်းလိၵ်ႈ ၵႃႈတီႈႁေႃၸဝ်ႈ ၼႂ်းဝဵင်း ဢႃႇၶႃႇမေႇသႃႉ မိူင်း မေႇတီႉ လႄႈ ၵႂၢမ်းဢၼ်ပႃးၼႂ်းလိၵ်ႈၼၼ်ႉဝႃႈၸမ်ႉ၊-

3ၼႂ်းပီႊဢၼ်ၶုၼ်လူင် ၵူႉရူႉ ၸၢမ်ႇႁၢင်ႈၸၢမ်ႇႁေႃပီႊပထမႃႉၼၼ်ႉ ၶုၼ်လူင် ၵူႉရူႉ မီးဢမိင်ႉလူၺ်ႈလွင်ႈဢမူႉႁိူၼ်းၽြႃးပဵၼ်ၸဝ်ႈ ဢၼ်မီးၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉလႄႈဝႃႈ၊ ႁႂ်ႈတႄႇႁဵတ်းႁိူၼ်းၸဝ်ႈ တီႈဢၼ်ပုၵ်ႈၸေႃႇယိတ်ႈၼၼ်ႉသေလႄႈ ႁႂ်ႈၶျႃးငဝ်ႈႁၢၵ်ႈတိူၵ်ႈမၼ်းဝႆႉမၼ်ႈမၼ်ႈၶိူင်ႇၶိူင်ႇသေ။ ႁႂ်ႈတၢင်းသုင်မၼ်းမီးႁူၵ်းသိပ်းသွၵ်ႇလႄႈ ၼႃႈၼွႆႉမၼ်းၵႂၢင်ႈႁူၵ်းသိပ်းသွၵ်ႇသေ။-

4ႁႂ်ႈဢဝ်တင်းမၢၵ်ႇႁိၼ်ဢၼ်ယႂ်ႇဢၼ်လူင်သၢမ်ႁၢၼ်ႉ၊ မႆႉႁၢၼ်ႉၼိုင်ႈ၊ တႄႇႁဵတ်းပဵၼ်ၸၼ်ႉပဵၼ်ထၢပ်ႈလႄႈ ႁႂ်ႈဢဝ်ၸရိပ်ႈမၼ်းဢွၵ်ႇသေၵႃႈၼႂ်းၽၼ်ႇတႃႇႁေႃၸဝ်ႈပၼ်သေ။-

5ႁႂ်ႈဢဝ်ၶိူင်ႈငိုၼ်းၶိူင်ႈၶမ်းဢၼ်ၸၢပ်ႈသႅင်ႇၵၼ်တင်းႁိူၼ်းၽြႃးပဵၼ်ၸဝ်ႈ ဢၼ် ၼေႇပူႉၶတ်ႉၼေႇၸႃႇ ဢဝ်ဢွၵ်ႇသေၵႃႈၼႂ်းပိၵ်ႈမၢၼ်ႇဢၼ်မီးၵႃႈၼႂ်းဝဵင်း ယေႇရူႉသလႅမ်ႇ လႄႈ ဢဝ်မႃးၵႃႈတီႈဝဵင်း ပႃႇပူႉလုၼ်ႇ ၸိူဝ်းၼၼ်ႉ ၶိုၼ်းပၼ်လႄႈ ႁႂ်ႈဢဝ်ၵႂႃႇသူင်ႇၵႃႈတီႈပိၵ်ႈမၢၼ်ႇၸဝ်ႈ ဢၼ်မီးၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉလႄႈ ဢဝ်တင်းသဵင်ႈတင်းလူင်ၶိုၼ်းဝႆႉတီႈၽႂ်တီႈမၼ်းသေ၊ ဝႃႈၼင်ႇၼႆဢေႃႈ။

6ပိူဝ်ႈဢၼ်ပဵၼ်ၼင်ႇၼႆလႄႈ ၶုၼ်လူင်ၼၼ်ႉၶိုၼ်းပူင်ဢမိင်ႉလႄႈဝႃႈ၊ တႃႇတၼေး မဵဝ်ႉဝုၼ်ႇၽၢႆႇဝၼ်းတူၵ်းၼမ်ႉႁွင်ႈ တင်း သေးသႃႇပေႃးၸၼေး ဢိၵ်ႇတင်းၵေႃႉသေႈဢၼ်ႁူမ်ႈပွင်းၵၼ်တင်းသူဢၼ်ဝႃႈ ၵူၼ်း ဢၽႃႇသသၢၵ်ႉ ဢၼ်ယူႇၽၢႆႇဝၼ်းတူၵ်းၼမ်ႉႁွင်ႈၶဝ်ဢိူၺ်း၊ ဢွၼ်ၵၼ်ယူႇၵႆၵႆတီႈၼၼ်ႈတႃႉ။-

7ယႃႇပေဢွၼ်ၵၼ်ႁၢမ်ႈတၢပ်ႈႁႄႉၶႅၼ် ဢမူႉတၢင်းဢၼ်တႄႇႁဵတ်းႁိူၼ်းၽြႃးပဵၼ်ၸဝ်ႈၼၼ်ႉ။ ႁႂ်ႈမဵဝ်ႉဝုၼ်ႇ ယူႉတႃႉ ဢိၵ်ႇတင်းၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ် ယူႉတႃႉ ၸိူဝ်းၼၼ်ႉ လႆႈတႄႇႁဵတ်းႁိူၼ်းၽြႃးပဵၼ်ၸဝ်ႈၼၼ်ႉ ၵႃႈၼႂ်းတီႈမၼ်းၼၼ်ႉသေ။-

8လိူဝ်သေၼၼ်ႉ ၵဝ်မီးဢမိင်ႉလွင်ႈဢၼ်သူတၵ်းလႆႈႁဵတ်းၸိူဝ်ႉၼင်ႇႁိုဝ်သေလႄႈ ၸွႆႈထႅမ်ၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ် ယူႉတႃႉ ၼၼ်ႉ ၼႂ်းဢမူႉတၢင်းဢၼ်တႄႇႁဵတ်းႁိူၼ်းၽြႃးပဵၼ်ၸဝ်ႈၼၼ်ႉ ဢိၵ်ႇတင်းလွင်ႈဢၼ်သူတၵ်းလႆႈထုတ်ႇဢဝ်ၵႃႈၼႂ်းၽၼ်ႇတႃႇၶုၼ်ႁေႃၶမ်းဢၼ်ဝႃႈ ၶွၼ်ႇဢၼ်လႆႈၶၢမ်ႇဢဝ်ၵႃႈတီႈၽၢႆႇဝၼ်းတူၵ်းၼမ်ႉႁွင်ႈၼၼ်ႉပုၼ်ႈၸရိပ်ႈမၼ်းလႄႈ ဢဝ်ပၼ်တီႈၶဝ်ၼၼ်ႉၵမ်းလဵဝ် ၶၼ်ၶၼ်ၽႂ်းၽႂ်း ႁႂ်ႈၶဝ်ဢမ်ႇလႆႈမီးတၢင်းဢၼ် ႁၢမ်ႈတၢပ်ႈႁႄႉၶႅၼ်ဢေႃႈ။-

9ၼွၵ်ႈသေၼၼ်ႉ ႁႂ်ႈဢဝ်ၵႃႈဢၼ်ၶဝ်မီးဢလူဝ်ႇၶႂ်ႈလႆႈတင်းသဵင်ႈတင်းလူင်ဢၼ်ဝႃႈ ဝူဝ်းလႂ်၊ သူဝ်းပေႃႈလႂ်၊ သူဝ်းဢွၼ်ႇလႂ် ပုၼ်ႈဢၼ်တၵ်းပုၵ်ႈၸေႃႇယိတ်ႈဢၼ်တုတ်ႇၽႆး တီႈၽြႃးပဵၼ်ၸဝ်ႈ ၸဝ်ႈၽုင်ႇၵၢင်ႁၢဝ်ၼၼ်ႉ ဢိၵ်ႇတင်းၶဝ်ႈၵျုင်ႇ၊ ၵိူဝ်၊ ၼမ်ႉၸပိတ်ႈ၊ ၼမ်ႉမၼ်း ပၼ်ၵူႈဝၼ်းၸွမ်းၵႃႈၼင်ႇဢၼ် ယိတ်ႈပရေႃးႁဵၵ်ႈဝဵင်း ယေႇရူႉသလႅမ်ႇ ၸိူဝ်းၼၼ်ႉၸီႇယၢင်ႇၼၼ်ႉ၊-

10ႁႂ်ႈၶဝ်လႆႈပုၵ်ႈၸေႃႇယိတ်ႈဢၼ်ႁွမ်ဢၼ်ႁူၺ်းတီႈၽြႃးပဵၼ်ၸဝ်ႈ ၸဝ်ႈၽုင်ႇၵၢင်ႁၢဝ်လႄႈသူးတွင်းပုၼ်ႈဢသၢၵ်ႈၶုၼ်ႁေႃၶမ်း ဢိၵ်ႇတင်းလုၵ်ႈလၢၼ်မဵဝ်းၸိူဝ်ႉၶိူဝ်းၸဝ်ႈသေ။-

11လိူဝ်သေၼၼ်ႉ ၵဝ်မီးဢမိင်ႉလႄႈဝႃႈၸမ်ႉ၊ ၵေႃႉလႂ်သေဢမ်ႇဝႃႈ၊ ပေႃးဝႄႈပိူင်ႈသေၵႂၢမ်းၸဝ်ႈၼႆႉၵႂႃႇၸိုင်၊ ႁႂ်ႈထွတ်ႇထူၺ်ႈဢဝ်သဝ်မႆႉသေၵႃႈၼႂ်းႁိူၼ်းၵေႃႉၼၼ်ႉသေလႄႈပၵ်းသေယဝ်ႉ၊ ဢဝ်မၼ်းမတ်ႉႁွႆႈၵႅၼ်ၶေႃးတူၵ်းသေ။ ႁိူၼ်းမၼ်းၵေႃႈ၊ ႁႂ်ႈပဵၼ်ၵွင်ၶီႈဝူဝ်းသေ၊ ဝႃႈၼင်ႇၼႆဢေႃႈ။-

12ႁႂ်ႈၽြႃးပဵၼ်ၸဝ်ႈ ဢၼ်ႁႂ်ႈၼႃႇမႃႉၸိုဝ်ႈသဵင်မၼ်းၸဝ်ႈ တႄႇယူႇၵႃႈတီႈၼၼ်ႈၼၼ်ႉ ယႃႉၽဵဝ်ႈၶုၼ်ႁေႃၶမ်း ဢိၵ်ႇတင်းၶႃႈဝၢၼ်ႈၵူၼ်းမိူင်း ၵႃႈဢၼ်ယဵတ်ႇမိုဝ်းၶဝ်သေလႄႈ ဝႄႈပိူင်ႈၵႂၢမ်းၸဝ်ႈၼႆႉလႄႈ ႁဵတ်းႁိူၼ်းၽြႃးပဵၼ်ၸဝ်ႈ ဢၼ်မီးၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉ လူႉလႅဝ်ၼၼ်ႉပႅတ်ႈသေၵမ်းလူၺ်ႈ။ ၵဝ် တႃႇရီႉ ၼႆႉ ပူင်ဢမိင်ႉၸဝ်ႈဢေႃႈ။ ႁႂ်ႈဢွၼ်ၵၼ်ႁဵတ်းၸွမ်းဢမိင်ႉၸဝ်ႈၼႆႉ ၶၼ်ၶၼ်ၽႂ်းၽႂ်းသေ၊ ဝႃႈၼင်ႇၼႆဢေႃႈ။

13မိူဝ်ႈၼၼ်ႉ တႃႇတၼေး မဵဝ်ႉဝုၼ်ႇၽၢႆႇဝၼ်းတူၵ်းၼမ်ႉႁွင်ႈ တင်း သေးသႃႇပေႃးၸၼေး ဢိၵ်ႇတင်းၵေႃႉသေႈဢၼ်ႁူမ်ႈပွင်းၵၼ်တင်းၶဝ်ၼၼ်ႉ ဢွၼ်ၵၼ်ႁဵတ်းၶၼ်ၶၼ်ၽႂ်းၽႂ်း ၸွမ်းၵႃႈၼင်ႇဢမိင်ႉၸဝ်ႈ ဢၼ်ၶုၼ်လူင် တႃႇရီႉ ပၼ်ၵႂႃႇၼၼ်ႉဢေႃႈ။-

14ၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၵူၼ်း ယူႉတႃႉ ၸိူဝ်းၼၼ်ႉ ဢွၼ်ၵၼ်တႄႇႁဵတ်းလႄႈ တၢင်းၵျၢမ်ႇတၢင်းပွင်ၶဝ်ပဵၼ်ၵွပ်ႈပိူဝ်ႈဢၼ်ပရေႃးၽႅတ်ႈ ႁၵ်ႉၵႄး တင်း ၸႃႇၶရီႉ လုၵ်ႈၸၢႆး ဢီႉတေႃႇ ႁေႃးလၢတ်ႈၼၼ်ႉဢေႃႈ။-

15ၶဝ်ဢွၼ်ၵၼ်တႄႇႁဵတ်းလႄႈ ၵွႆႈမိုဝ်းယဝ်ႉတူဝ်ႈၸွမ်းၵႃႈၼင်ႇဢၼ်ဢမိင်ႉၽြႃးပဵၼ်ၸဝ်ႈမဵဝ်း ဢီႉသရေႇလႃႉ ဢိၵ်ႇတင်း ဢမိင်ႉၶုၼ် ၵူႉရူႉ ၊ ၶုၼ် တႃႇရီႉ ၊ ၶုၼ် ဢႃႇတၸေႇရိတ်ႉ ၶုၼ်ႁေႃၶမ်း ပေႇရသီႉ ၼၼ်ႉ ၸိူဝ်းၼၼ်ႉမီးၼၼ်ႉဢေႃႈ။-

16ၼႂ်းပီႊဢၼ်ၶုၼ်လူင် တႃႇရီႉ ၸၢမ်ႇႁၢင်ႈၸၢမ်ႇႁေႃႁူၵ်းပီႊ လိူၼ် ဢႃႇတႃႇ သၢမ်ဝၼ်းၼၼ်ႉ ႁိူၼ်းၸဝ်ႈယဝ်ႉတူဝ်ႈလီငၢမ်းဢေႃႈ။-

17ၵူၼ်းမဵဝ်း ဢီႉသရေႇလႃႉ ၊ ယိတ်ႈပရေႃးႁဵၵ်ႈၵူၼ်းမဵဝ်း လေႇဝီႉ ဢိၵ်ႇတင်းၶဝ်ၸိူဝ်းဢၼ်ၶဝ်ႈပႃးၼႂ်းမုၵ်ႉၼႂ်းၸိူဝ်း ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇလႄႈ ယင်းၵိုတ်းယင်းၵျၢၼ်ႇၸိူဝ်းၼၼ်ႉ ဢွၼ်ၵၼ်မီးတၢင်းၸႂ်ဢၼ်ၸူမ်းသိူဝ်းသေလႄႈ ၶၢမ်ႇပွႆးဢၼူႉမေႃးတၼႃႇႁိူၼ်းၽြႃးပဵၼ်ၸဝ်ႈဢေႃႈ။-

18ၼႂ်းပွႆးဢၼူႉမေႃးတၼႃႇႁိူၼ်းၽြႃးပဵၼ်ၸဝ်ႈၼၼ်ႉ၊ ၶဝ်ဢွၼ်ၵၼ်ပုၵ်ႈၸေႃႇယိတ်ႈဢၼ်ဝႃႈ ဝူဝ်းပၢၵ်ႇၼိုင်ႈ၊ သူဝ်းပေႃႈသွင်ပၢၵ်ႇ၊ သူဝ်းဢွၼ်ႇသီႇပၢၵ်ႇ ဢိၵ်ႇတင်းပႄႉပေႃႈသိပ်းပၢႆသွင်တူဝ် ဢၼ်ပဵၼ်ယိတ်ႈတီႈဢၼ်ၽေႇဢပႅတ်ႈမဵဝ်း ဢီႉသရေႇလႃႉ တင်းသဵင်ႈတင်းလူင် ၸွမ်းလူၺ်ႈတၢင်းဢၼ်ၼပ်ႉဢၢၼ်ႇ မဵဝ်း ဢီႉသရေႇလႃႉ သိပ်းပၢႆသွင်မဵဝ်းၼၼ်ႉဢေႃႈ။

19ၶဝ်ဢွၼ်ၵၼ်ၶၢၼ်းယိတ်ႈပရေႃးႁဵၵ်ႈတင်းလၢႆ ဝႆႉတီႈၽႂ်တီႈမၼ်း ဢိၵ်ႇတင်းၵူၼ်းမဵဝ်း လေႇဝီႉ တင်းလၢႆဝႆႉ တီႈမုၵ်ႉၸိူဝ်းၽႂ်မုၵ်ႉၸိူဝ်းမၼ်း ႁႂ်ႈလႆႈႁဵတ်းဝၢတ်ႈၽြႃး ၵႃႈၼႂ်းဝဵင်း ယေႇရူႉသလႅမ်ႇ ၸွမ်းၵႃႈၼင်ႇဢၼ်တႅမ်ႈဝႆႉ မီးယူႇၵႃႈၼႂ်းၵျၢမ်းလိၵ်ႈ မူဝ်းသေႇ ၼၼ်ႉဢေႃႈ။-

20မုၵ်ႉၸိူဝ်းၶဝ်ၸိူဝ်း ဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၸိူဝ်းၼၼ်ႉ ဢွၼ်ၵၼ်ၶၢမ်ႇပွႆး ပႃႉသၶႃႇ ၼႂ်းလိူၼ်ပထမႃႉသိပ်းသီႇဝၼ်းၼၼ်ႉဢေႃႈ။-

21ယိတ်ႈပရေႃးႁဵၵ်ႈ ဢိၵ်ႇတင်းၵူၼ်းမဵဝ်း လေႇဝီႉ တင်းလၢႆၸိူဝ်းၼၼ်ႉ ႁႂ်ႈတူဝ်ၸဝ်ႈၵဝ်ႇမူတ်းသႂ်ၽွမ်ႉၽွမ်ႉၵၼ်လႄႈ ၶဝ်တင်းသဵင်ႈတင်းလူင် မူတ်းသႂ်ယူႇသေလႄႈ ဢွၼ်ၵၼ်ဢဝ်သူဝ်းဢွၼ်ႇ ပႃႉသၶႃႇ တၢႆ ပုၼ်ႈမုၵ်ႉၸိူဝ်းပုၼ်ႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၵႃႈမီး ဢိၵ်ႇတင်းပုၼ်ႈယိတ်ႈပရေႃးႁဵၵ်ႈ ဢၼ်ပဵၼ်ပီႈၼွင်ႉၸိူဝ်ႉၶိူဝ်းၶဝ်တင်းပုၼ်ႈတူဝ်ၸဝ်ႈၵဝ်ႇဢေႃႈ။-

22ၵူၼ်းမဵဝ်း ဢီႉသရေႇလႃႉ ဢၼ်ဢွၵ်ႇသေၵႃႈၼႂ်းမုၵ်ႉၼႂ်းၸိူဝ်းၶဝ်ၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉလႄႈ မႃးၸိူဝ်းၼၼ်ႉ ဢိၵ်ႇတင်းၶဝ်ၵႃႈဢၼ်ၸုၼ်ႉပႅတ်ႈတၢင်းဢၼ်ၵူဝ်ႈၵိူၵ်ႇၶႆးတင်ၵူၼ်းတၢင်ႇၸိူဝ်ႉတၢင်ႇမဵဝ်းသေလႄႈမႃးတီႈၶဝ် ႁႂ်ႈလႆႈႁႃ ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ ၼၼ်ႉၸိူဝ်းၼၼ်ႉ ဢွၼ်ၵၼ်ၵိၼ်လႄႈ၊- မီးတင်းၸႂ်ဢၼ်ၸူမ်းသိူဝ်းသေလႄႈ ၶၢမ်ႇပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈ ၸဵတ်းဝၼ်းတဵမ်တဵမ်ဢေႃႈ။ လွင်ႈမၼ်းၸမ်ႉ ထႃႇဝရႃႉၽြႃးပၼ်ဢၶႂၢင်ႉ ဢၼ်ၶဝ်လႆႈၸူမ်းသိူဝ်းလႄႈ ႁႂ်ႈႁူဝ်ၸႂ်ၶုၼ်ႁေႃၶမ်း ဢႃႇသူႉရီႉ ၶၢႆႉပုတ်ႈမႃးယူႇၽၢႆႇၶဝ် ႁႂ်ႈလႆႈၸွႆႈထႅမ်မႃႉၸႃႉၶဝ် ၼႂ်းလွင်ႈတၢင်းဢၼ် တႄႇႁဵတ်းႁိူၼ်းၽြႃးပဵၼ်ၸဝ်ႈ၊ ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ၼၼ်ႉဢေႃႈ။