Ezra 10

Shan

← Chapter 9 Jump to:

1ၼႂ်းမိူဝ်ႈဢၼ် ဢေးၸရႃႉ ၼၼ်ႉၼမ်ႉတႃတူၵ်းယူႇ ၶုပ်ႉမူပ်ႇၵႃႈတီႈၽၢႆႇၼႃႈႁိူၼ်းၸဝ်ႈယူႇသေလႄႈ တွင်းပၢၼ်ႇလႄႈႁဵတ်းပထၼႃႇၼၼ်ႉၸိုင် ပရဵၵ်ႈသၢတ်ႈဢၼ်ၼမ်ၼႃႇလူင်လၢင်၊ ၵူၼ်းၸၢႆး၊ ၵူၼ်းယိင်း၊ လုၵ်ႈဢွၼ်ႇမဵဝ်း ဢီႉသရေႇလႃႉ ၸိူဝ်းၼၼ်ႉ ဢွၼ်ၵၼ်ၸူႉၵၼ်တုမ်ၵၼ် ၵႃႈတီႈမၼ်းလႄႈ ၵူၼ်းတင်းလၢႆဢွၼ်ၵၼ်ႁႆႈႁွင်ႉၼႃႇလူင်လၢင်ဢေႃႈ။-

2သေႇၶၼီႉ လုၵ်ႈၸၢႆး ယေႇႁေႇလႃႉ မဵဝ်း ဢေႇလမ်ႇ ၼၼ်ႉ ၶိုၼ်းလၢတ်ႈတီႈ ဢေးၸရႃႉ လႄႈဝႃႈ၊ ႁဝ်းၼႆႉဢွၼ်ၵၼ်ၽိတ်းပိူင်ႈၽြႃးပဵၼ်ၸဝ်ႈႁဝ်းလႄႈ ႁူမ်ႈပွင်းလူၺ်ႈၵၼ်တင်းမႄႈယိင်းၵူၼ်းတၢင်ႇၸိူဝ်ႉတၢင်ႇမဵဝ်း ဢၼ်ယူႇၵႃႈတီႈမိူင်းၼႆႉၸိူဝ်းၼၼ်ႉယဝ်ႉ။ ၼႂ်းဝႃႈၼၼ်သေၵေႃႈ ၼႂ်းဢမူႉၼႆႉ တီႈဢၼ်မဵဝ်း ဢီႉသရေႇလႃႉ လီမုင်ႈမွင်းၼၼ်ႉယင်းမီးယူႇဢေႃႈ။-

3ပိူဝ်ႈၼႆလႄႈ ဢွၼ်ၵၼ်ႁဵတ်းပတီႉၺိၺ်ႇလူၺ်ႈၵၼ်တင်း ၽြႃးပဵၼ်ၸဝ်ႈႁဝ်း လူၺ်ႈလွင်ႈဢၼ်ႁဝ်းတၵ်းၸုၼ်ႉပႅတ်ႈမႄႈယိင်းၸိူဝ်းၼၼ်ႉတင်းသဵင်ႈတင်းလူင် ဢိၵ်ႇတင်းလုၵ်ႈၶဝ်လၢၼ်ၶဝ်ၸိူဝ်းၼၼ်ႉ ၸွမ်းၵႃႈဢၼ်ၸဝ်ႈႁဝ်း တင်းၶဝ်ၸိူဝ်းဢၼ်ၵူဝ်ႁႄပိင်းၺၢပ်ႈၽြႃးပဵၼ်ၸဝ်ႈႁဝ်းထၼ်ႈပေႃးသၼ်ႇပေႃးဝႆၸိူဝ်းၼၼ်ႉ ပၼ်သတီႉၼၼ်ႉတႃႉႁဝ်း။ ဢွၼ်ၵၼ်ၸီႇယၢင်ႇဢမူႉၼႆႉ ၸွမ်းၵႃႈၼင်ႇဢၼ်တြႃးမီးၼၼ်ႉတႃႉႁဝ်း။-

4လုၵ်ႉသေၵမ်းၶႃႈ။ ဢမူႉၼႆႉၸၢပ်ႈသႅင်ႇၵၼ်တင်းၸဝ်ႈႁဝ်းလႄႈ ႁဝ်းၶႃႈၵေႃႈ ဢွၼ်ၵၼ်မီးယူႇၽၢႆႇၸဝ်ႈႁဝ်းၶႃႈဢေႃႈ။ မီးၸႂ်ဢၼ်ႁတ်းႁၢၼ်သေလႄႈ ႁဵတ်းသေၵမ်းၶႃႈ၊ ဝႃႈၼင်ႇၼႆသေယဝ်ႉ၊-

5ဢေးၸရႃႉ လုၵ်ႉလႄႈ ႁႂ်ႈၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ် ၼႂ်းယိတ်ႈပရေႃးႁဵၵ်ႈ ဢိၵ်ႇတင်းၵူၼ်းမဵဝ်း လေႇဝီႉ တင်းလၢႆ တင်းၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၼၼ်ႉ ၵိၼ်ႇဝႃႈလူၺ်ႈလွင်ႈဢၼ်ၶဝ်တၵ်းလႆႈႁဵတ်းၸွမ်းၵႃႈၼင်ႇၵႂၢမ်းၼၼ်ႉလႄႈ ၶဝ်ၼၼ်ႉၵေႃႈဢွၼ်ၵၼ်ၵိၼ်ႇဝႃႈဢေႃႈ။

6မိူဝ်ႈၼၼ်ႉ ဢေးၸရႃႉ လုၵ်ႉသေၵႃႈတီႈၽၢႆႇၼႃႈႁိူၼ်းၽြႃးပဵၼ်ၸဝ်ႈလႄႈ ၶဝ်ႈၵႂႃႇၵႃႈၼႂ်းလုၵ်း ယေႃးႁၼၼ်ႇ လုၵ်ႈၸၢႆး ဢေးလျႃႇသိပ်ႉ ၼၼ်ႉသေလႄႈ ႁွတ်ႈထိုင်သေယဝ်ႉ၊ ယင်းဢမ်ႇၵိၼ်ၶဝ်ႈမုၼ်း၊ ယင်းဢမ်ႇၵိၼ်ၼမ်ႉလႄႈယူႇဢေႃႈ။ လွင်ႈမၼ်းၸမ်ႉ မၼ်းၶၢင်းၶီၶၢင်းၽၢၼ်ပွင်ႉမိူၼ်ႇ ၵွပ်ႈပိူဝ်ႈဢပႅတ်ႈၶဝ်ၸိူဝ်းဢၼ် လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉလႄႈယူႇဢေႃႈ။-

7ၶဝ်ဢွၼ်ၵၼ်ပၢဝ်ႇသေႃႇၵႃႈၼႂ်းမိူင်း ယူႉတႃႉ တင်းဝဵင်း ယေႇရူႉသလႅမ်ႇ တင်းႁူတ်ႈ ႁႂ်ႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉ ၸူႉၵၼ်တုမ်ၵၼ် ၵႃႈတီႈဝဵင်း ယေႇရူႉသလႅမ်ႇ ၊-

8ဢိၵ်ႇတင်းႁႂ်ႈၶဝ်ၸိူဝ်းဢၼ်ဢမ်ႇမႃးႁွတ်ႈမႃးထိုင်သၢမ်ဝၼ်း ၸွမ်းၵႃႈၼင်ႇဢၼ်ၶုၼ်တင်းလၢႆ တင်းၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၼၼ်ႉ ၸီႇယၢင်ႇၼၼ်ႉၸိူဝ်းၼၼ်ႉ လႆႈၶၢမ်ႇတၢင်းဢၼ်ဢုၵ်ႉၸႃႇၶဝ်ၵႃႈမီးပဵၼ်ဢၼ်ထုၵ်ႇၵိၼ်ႇထုၵ်ႇဝႃႈလႄႈ တူဝ်ၶဝ်လႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈသေၵႃႈၼႂ်းပရဵၵ်ႈသၢတ်ႈ ၶဝ်ၸိူဝ်းဢၼ်ၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉဢေႃႈ။

9မိူဝ်ႈၼၼ်ႉၵူၼ်းၸၢႆးမဵဝ်း ယူႉတႃႉ တင်းမဵဝ်း ပိၼ်ႇယႃႇမိၼ်ႇ တင်းသဵင်ႈတင်းလူင်ၼၼ်ႉ ၼႂ်းသၢမ်ဝၼ်းၵူၺ်း ၸူႉၵၼ်တုမ်ၵၼ်ၵႃႈတီႈဝဵင်း ယေႇရူႉသလႅမ်ႇ လႄႈ ၼႂ်းလိူၼ်ၼဝမႃႉ သၢဝ်းဝၼ်းၼၼ်ႉ ၵူၼ်းတင်းသဵင်ႈတင်းလူင်ၼၼ်ႉသၼ်ႇသၼ်ႇဝႆဝႆ ၵွပ်ႈပိူဝ်ႈဢမူႉၼၼ်ႉ ဢိၵ်ႇတင်းၵွပ်ႈပိူဝ်ႈဢၼ် ၽူၼ်တူၵ်းၽူၼ်သိင်းၼႃႇလူင်လၢင်ၼၼ်ႉလႄႈ ဢွၼ်ၵၼ်ၼင်ႈယူႇၵႃႈတီႈၼႂ်းၵၢင်ပၢင်ႇ ၵႃႈတီႈၼႃႈႁိူၼ်းၽြႃးပဵၼ်ၸဝ်ႈဢေႃႈ။-

10မိူဝ်ႈၼၼ်ႉယိတ်ႈပရေႃးႁဵၵ်ႈ ဢေးၸရႃႉ လုၵ်ႉလႄႈလၢတ်ႈတီႈၶဝ်လႄႈဝႃႈ၊ သူၼႆႉၽိတ်းပိူင်ႈယဝ်ႉ။ သူဢွၼ်ၵၼ်ႁူမ်ႈပွင်းလူၺ်ႈၵၼ်တင်းမႄႈယိင်းၵူၼ်းတၢင်ႇၸိူဝ်ႉတၢင်ႇမဵဝ်း ႁႂ်ႈဢပႅတ်ႈမဵဝ်း ဢီႉသရေႇလႃႉ လႆႈယႂ်ႇၽႄႈတူဝ်းတွၼ်းမႃးယဝ်ႉလူင်ပႄႇ။-

11ပိူဝ်ႈၼႆလႄႈဢွၼ်ၵၼ်တွင်းပၢၼ်ႇတီႈ ထႃႇဝရႃႉၽြႃး ၽြႃးပဵၼ်ၸဝ်ႈပူႇသူမွၼ်ႇသူတႃႉ။ ဢွၼ်ၵၼ်ႁဵတ်းၸွမ်းဢလူဝ်ႇ မၼ်းၸဝ်ႈယူႇသေလႄႈ ၽၢတ်ႇယၢၼ်ၵၼ်တင်းၵူၼ်းမိူင်းၼႆႉ ဢိၵ်ႇတင်းမႄႈယိင်းၵူၼ်းတၢင်ႇၸိူဝ်ႉတၢင်ႇမဵဝ်းၸိူဝ်းၼၼ်ႉသေတႃႉ၊ ဝႃႈၼင်ႇၼႆဢေႃႈ။-

12ပရဵၵ်ႈသၢတ်ႈတင်းသဵင်ႈတင်းလူင်ၵေႃႈ ဢွၼ်ၵၼ်ႁဵတ်းတင်းသဵင်ဢၼ်ယႂ်ႇၼႃႇလူင်လၢင်သေလႄႈ ၶိုၼ်းလၢတ်ႈလႄႈဝႃႈ၊ ႁဝ်းၶႃႈတၵ်းႁဵတ်းၸွမ်းၵႃႈၼင်ႇဢၼ်ၸဝ်ႈႁဝ်းမီးဢမိင်ႉၼၼ်ႉၶႃႈဢေႃႈ။-

13ၵူၺ်းၵႃႈ ၵူၼ်းၼမ်ၼႃႇၶႃႈဢေႃႈ။ ပဵၼ်ၶိင်ႇဢၼ်ၽူၼ်တူၵ်းၽူၼ်သိင်းၼႃႇလူင်လၢင်လႄႈ ႁဝ်းၶႃႈဢမ်ႇၸုၵ်းဢမ်ႇယူႇၵႃႈတီႈၼွၵ်ႈႁိူၼ်းလႆႈၶႃႈ။ ဢမူႉၼႆႉပဵၼ်ဢမူႉဢၼ်ယဝ်ႉတူဝ်ႈၼႂ်းဝၼ်းၼိုင်ႈ သွင်ဝၼ်းၵူၺ်းလႆႈဢမ်ႇၸႂ်ႈၶႃႈ။ ႁဝ်းၶႃႈၽိတ်းပိူင်ႈၼႃႇလူင်လၢင်ၶႃႈယဝ်ႉ။-

14ႁႂ်ႈၶုၼ်ႁဝ်းၶႃႈတင်းလၢႆ ၸုၵ်းယူႇပုၼ်ႈပရဵၵ်ႈသၢတ်ႈတင်းသဵင်ႈတင်းလူင်လႄႈ ႁႂ်ႈၶဝ်ၵႃႈဢၼ်ႁူမ်ႈပွင်းလူၺ်ႈၵၼ်တင်းမႄႈယိင်းၵူၼ်းတၢင်ႇၸိူဝ်ႉတၢင်ႇမဵဝ်း ဢၼ်မီးၵႃႈၼႂ်းဝၢၼ်ႈဝဵင်းႁဝ်းၶႃႈၸိူဝ်းၼၼ်ႉ ၸွမ်းႁူမ်ႈလူၺ်ႈၵၼ်တင်း ၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ် ဢိၵ်ႇတင်းၵူၼ်းယႂ်ႇၵူၼ်းလူင်တြႃးဝဵင်းႁင်းၽႂ်ႁင်းမၼ်းၼၼ်ႉ ဢွၼ်ၵၼ်မႃးၼႂ်းၶိင်ႇဢၼ်မၵ်းၶိၼ်းဝႆႉၼၼ်ႉလႄႈ ၽေႇတၢင်းၸႂ်မႆႈၶႆႈၸႃႉၽြႃးပဵၼ်ၸဝ်ႈႁဝ်းၶႃႈဢၼ်ဢွၵ်ႇ ၵွပ်ႈပိူဝ်ႈဢမူႉၼႆႉၼၼ်ႉသေၵမ်းၶႃႈ၊ ဝႃႈၼင်ႇၼႆဢေႃႈ။

15ယေႃးၼသၼ်ႇ လုၵ်ႈၸၢႆး ဢႃႇသႃႇႁေးလႃႉ ဢိၵ်ႇတင်း ယႁႃႇၸီႉ လုၵ်ႈၸၢႆး တီႉၵဝႃႉ ၼၼ်ႉၵူၺ်း ဢွၼ်ၵၼ်ၸုၵ်းယူႇၽၢႆႇၼိုင်ႈတင်းဢမူႉၼၼ်ႉဢေႃႈ။ မေႇသူႉလမ်ႇ ဢိၵ်ႇတင်း သပ်ႉပႃႉသေး ၵူၼ်းမဵဝ်း လေႇဝီႉ ၼၼ်ႉ ၽွမ်ႉႁူမ်ႈၸွႆႈထႅမ်သွင်ၶႃၼၼ်ႉဢေႃႈ။-

16ၵႃႈၼင်ႇဢၼ်ၶဝ်ၸိူဝ်းဢၼ် လႆႈၶၢမ်ႇတၢင်းဢၼ်သိမ်းဢဝ်ၵႂႃႇ ႁပ်ႉတုင်းဢဝ်ၼၼ်ႉ၊ ယိတ်ႈပရေႃးႁဵၵ်ႈ ဢေးၸရႃႉ ဢိၵ်ႇတင်း ၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ် ၼႂ်းမဵဝ်းပူႇမဵဝ်းပေႃႈၶဝ် ၸွမ်းလူၺ်ႈမဵဝ်းပူႇမဵဝ်းပေႃႈၶဝ် ဢၼ်လႆႈၶၢမ်ႇတၢင်းဢၼ်မၢတ်ႈမၢႆၸိုဝ်ႈသဵင်ၶဝ်ၵႃႈမီးၼၼ်ႉ လႆႈၶၢမ်ႇတၢင်းဢၼ်ၽႄဢွၵ်ႇဝႆႉလႄႈ ၼႂ်းလိူၼ်တႃႉသမႃႉ ဝၼ်းၼိုင်ႈၼၼ်ႉ၊ ဢွၼ်ၵၼ်ၼင်ႈ ႁႂ်ႈလႆႈၸႅတ်ႈထၢမ်ၸႅတ်ႈတူၺ်းဢမူႉၼၼ်ႉဢေႃႈ။-

17ၶဝ်ဢွၼ်ၵၼ်ၵွႆဢမူႉ ၶဝ်ၸိူဝ်းဢၼ်ႁူမ်ႈပွင်းပဵၼ်ၵူပ်ႉပဵၼ်ၵူႈ လူၺ်ႈၵၼ်တင်းမႄႈယိင်းၵူၼ်းတၢင်ႇၸိူဝ်ႉတင်းမဵဝ်းၵႃႈမီးၼၼ်ႉ ၼႂ်းလိူၼ်ပထမႃႉ ဝၼ်းၼိုင်ႈၼၼ်ႉဢေႃႈ။

18ၵူၼ်းမဵဝ်းယိတ်ႈပရေႃးႁဵၵ်ႈဢၼ်ႁူမ်ႈပွင်းပဵၼ်ၵူပ်ႉပဵၼ်ၵူႈ လူၺ်ႈၵၼ်တင်းမႄႈယိင်းၵူၼ်းတၢင်ႇၸိူဝ်ႉတၢင်ႇမဵဝ်းၸမ်ႉ၊ ပဵၼ်လုၵ်ႈၸၢႆး ယေႃးၸတၵ်ႉ မဵဝ်း ယေႃးသူႉ ဢိၵ်ႇတင်းၼွင်ႉၸၢႆးမၼ်း မႃႇသေႇယႃႉ၊ ဢေးလျႃႇၸႃႇ၊ ယႃႇရိပ်ႉ၊ ၵေႇတလီႉ ဢေႃႈ။-

19ၶဝ်ၼၼ်ႉ ဢွၼ်ၵၼ်ယိုၼ်ႈမိုဝ်းပၼ်ဝႆႉၵတီႉ လွင်ႈဢၼ်ၶဝ်တၵ်းပႅတ်ႈမေးၶဝ်ၼၼ်ႉသေလႄႈ ဢဝ်သူဝ်းပေႃႈပုၵ်ႈၸေႃႇပုၼ်ႈဢပႅတ်ႈၶဝ် ၵွပ်ႈပိူဝ်ႈဢၼ်ၶဝ်ႁဵတ်းဢပႅတ်ႈမႅၼ်ႈၼၼ်ႉဢေႃႈ။-

20ၼွၵ်ႈသေၼၼ်ႉ ႁႃႇၼၼီႉ တင်း ၸေႇပတီႉ မဵဝ်း ဢီႉမေႇရႃႉ ၊-

21မႃႇသေႇယႃႉ၊ ဢေးလီႉယႃႉ၊ သေႇမႃႇယႃႉ၊ ယေႇႁေႇလႃႉ၊ ဢေႃးၸီႉ ၊ မဵဝ်း ႁႃႇရိမ်း ၊-

22ဢေးလီႉဢေႃးၼေႇ၊ မေႇသေႇယႃႉ၊ ဢီႉသမေႇလႃႉ၊ ၼႃႇသၼေႇလႃႉ၊ ယေႃးၸပတ်ႉ၊ ဢေးလႃႇသႃႉ မဵဝ်း ပႃႇသူႉရႃႉ ၊-

23ယေႃးၸပတ်ႉ၊ သီႉမီႉ၊ ၵေႇလႃႇယႃႉ ဢၼ်ဝႃႈ ၵေႇလီႉတႃႉ၊ ပေႇသႁီႉ၊ ယူႉတႃႉ၊ ဢေးလျႃႇၸႃႇ ၵူၼ်းမဵဝ်း လေႇဝီႉ ၊-

24ဢေးလျႃႇသိပ်ႉ ဢၼ်ပဵၼ်မေႃႁဵတ်းၵႂၢမ်း တင်း သႃႇလုမ်ႇ၊ တေႇလိမ်ႇ၊ ဢူႉရီႉ ဢၼ်ပဵၼ်ၵူၼ်းပႂ်ႉၽၵ်းတူ၊-

25ရႃႇမီႉ၊ ယေႇၸီႉ၊ မႃႇလၶီႉ၊ မျႃႇမိၼ်ႇ၊ ဢေးလျႃႇၸႃႇ၊ မႃႇလၵီႉယႃႉ၊ ပေႇၼႃႇယႃႉ မဵဝ်း ပႃႇရုတ်ႉ ၼႂ်းမဵဝ်း ဢီႉသရေႇလႃႉ ၊-

26မတ်ႉတၼီႉ၊ ၸႃႇၶရီႉ၊ ယေႇႁေႇလႃႉ၊ ဢႃႇပတီႉ၊ ယေႇရမုတ်ႉ၊ ဢေးလျႃႇ မဵဝ်း ဢေႇလမ်ႇ ၊-

27ဢေးလီႉဢေႃးၼေႇ၊ ဢေးလျႃႇသိပ်ႉ၊ မတ်ႉတၼီႉ၊ ယေႇရမုတ်ႉ၊ ၸႃႇပတ်ႉ၊ ဢၸီႉၸႃႉ မဵဝ်း ၸတ်ႉတူႉ ၊-

28ယေႃးႁၼၼ်ႇ၊ ႁႃႇၼၼီႉ၊ ၸပ်ႉပေႇ၊ ဢႃႇသလေႇ မဵဝ်း ပေႇပေႇ ၊-

29မေႇသူႉလမ်ႇ၊ မႃႇလုတ်ႉ၊ ဢတႃႇယႃႉ၊ ယႃႇသုပ်ႉ၊ သႃႇလႃႉ၊ ရႃႇမုတ်ႉ မဵဝ်း ပႃႇၼီႇ ၊-

30ဢႃႇတၼႃႉ၊ ၶေႇလႃႇယႃႉ၊ ပေႇၼႃႇယႃႉ၊ မႃႇသေႇယႃႉ၊ မတ်ႉတၼီႉ၊ ပေႇၸလေႇလႃႉ၊ ပီႉၼုၺ်ႇ၊ မၼႃႇသေႇ မဵဝ်း ပႃႇႁတ်ႉမေႃႇၽႃႉ ၊-

31ဢေးလႃႇၸႃႇ၊ ဢီႉသီႉယႃႉ၊ မႃႇလၶီႉ၊ သေႇမႃႇယႃႉ၊ သီႉမွင်ႇ ၊-

32ပိၼ်ႇယႃႇမိၼ်ႇ၊ မႃႇလုတ်ႉ၊ သေႇမရီႉ မဵဝ်း ႁႃႇရိမ်း ၊-

33မတ်ႉတၼေႇ၊ မတ်ႉတထႃႉ၊ ၸႃႇပတ်ႉ၊ ဢေးလီႉၽလႅတ်ႉ၊ ယေႇရမေႇ၊ မၼႃႇသေႇ၊ သီႉမီႉ မဵဝ်း ႁႃႇသုမ်ႇ ၊-

34မႃႇတေႇ၊ ဢႃႇမရမ်ႇ၊ ဝေႇလႃႉ ၊-

35ပေႇၼႃႇယႃႉ၊ ပေႇတီႉ၊ ၶေႇလူႉႁီႉ ၊-

36ဝႃႇၼီႉ၊ မေႇရမုတ်ႉ၊ ဢေးလျႃႇသိပ်ႉ ၊-

37မတ်ႉတၼီႉ၊ မတ်ႉတၼေႇ၊ ယႃႇသေႃႇ ၊-

38ပႃႇၼီႇ၊ ပီႉၼုၺ်ႇ၊ သီႉမီႉ ၊-

39သေႇလမီႉ၊ ၼႃႇသၼ်ႇ၊ ဢတႃႇယႃႉ ၊-

40မႃႇၶၼႃႉတေႇပေႇ၊ သႃႇသေႇ၊ သႃႇရေႇ ၊-

41ဢႃႇၸရေႇလႃႉ၊ သေႇလမီႉ၊ သေႇမရီႉ ၊-

42သႃႇလုမ်ႇ၊ ဢႃႇမရီႉ၊ ယူဝ်းသႅပ်ႈ မဵဝ်း ပႃႇၼီႇ ၊-

43ယေႇယေႇလႃႉ၊ မတ်ႉတီႉသီႉ၊ ၸႃႇပတ်ႉ၊ ၸေးပီႉၼႃႉ၊ ယႃႇတေႃႇ၊ ယူဝ်းဢေးလႃႉ၊ ပေႇၼႃႇယႃႉ မဵဝ်း ၼေႇပေႃႇ ဢေႃႈ။-

44ၵူၼ်းတင်းသဵင်ႈတင်းလူင်ၸိူဝ်းၼႆႉ လႆႈႁူမ်ႈပွင်းပဵၼ်ၵူပ်ႉပဵၼ်ၵူႈ လူၺ်ႈၵၼ်တင်းမႄႈယိင်းၵူၼ်းတၢင်ႇၸိူဝ်ႉတၢင်ႇမဵဝ်းလႄႈ မႄႈယိင်းၸိူဝ်းၼၼ်ႉၵမ်ႈၽွင်ႈ ၵိူတ်ႇလဵင်ႉလုၵ်ႈလဵင်ႉလၢင်းဝႆႉယဝ်ႉ။ လိၵ်ႈမၢတ်ႈလွင်ႈဢေးၸရႃႉယဝ်ႉယဝ်ႉဢေႃႈ။

← Chapter 9 Jump to:

Recommended Reading

Commentary Ezra Commentaries → Devotional Ezra Devotional Guide → Get This Bible Shan Study Bible →