Ezra 3

Shan

← Chapter 2 Jump to: Chapter 4 →

1မိူဝ်ႈဢၼ်ႁွတ်ႈထိုင်လိူၼ်သတ်ႉတမႃႉလႄႈ၊ ၵူၼ်းမဵဝ်း ဢီႉသရေႇလႃႉ တင်းလၢႆ တူၵ်းတီႈတူၵ်းလႅၼ်ၵႃႈၼႂ်းဝၢၼ်ႈၼႂ်းဝဵင်း တီႈယူႇၶဝ်ယဝ်ႉၼၼ်ႉၸိုင်၊ ၵူၼ်းတင်းလၢႆ ဢွၼ်ၵၼ်မႃးၸူႉၵၼ်တုမ်ၵၼ် ၵႃႈတီႈဝဵင်း ယေႇရူႉသလႅမ်ႇ မိူၼ်ၸိူဝ်ႉၼင်ႇဢၼ်ပဵၼ်တူဝ်လဵဝ်ၸႂ်လဵဝ်ၵူၺ်းၼၼ်ႉဢေႃႈ။-

2မိူဝ်ႈၼၼ်ႉ ယေႃးသူႉ လုၵ်ႈၸၢႆး ယေႃးၸတၵ်ႉ ဢိၵ်ႇတင်းယိတ်ႈပရေႃးႁဵၵ်ႈဢၼ်ပဵၼ်ၼွင်ႉၸၢႆးမၼ်းတင်းလၢႆ၊ ၸေႇရူႉပႃႉပေႇလႃႉ လုၵ်ႈၸၢႆး သႃႇလႃႉသေးလႃႉ ဢိၵ်ႇတင်းၼွင်ႉၸၢႆးမၼ်းတင်းလၢႆၸိူဝ်းၼၼ်ႉ ဢွၼ်ၵၼ်လုၵ်ႉလႄႈတႄႇႁဵတ်းယိတ်ႈပလၢင်ႇၽြႃးပဵၼ်ၸဝ်ႈ မဵဝ်း ဢီႉသရေႇလႃႉ ႁႂ်ႈလႆႈဢဝ်ယိတ်ႈဢၼ်တုတ်ႇၽႆးပုၵ်ႈၸေႃႇၵႃႈၼိူဝ်မၼ်း ၸွမ်းၵႃႈၼင်ႇဢၼ်တႅမ်ႈဝႆႉမီးယူႇၵႃႈၼႂ်းၵျၢမ်းလိၵ်ႈပိင်းၺၢပ်ႈတီႉ မူဝ်းသေႇ ၵူၼ်းၽြႃးပဵၼ်ၸဝ်ႈၼၼ်ႉဢေႃႈ။-

3ပိၵ်ႉသမ်ႉၶဝ်ၵူဝ်ႁႄၶဝ်ၸိူဝ်းဢၼ်ယူႇၵႃႈၼႂ်းမိူင်းၼၼ်ႉၵူႈတီႈၵူႈလႅၼ်ၸိူဝ်းၼၼ်ႉသေၵေႃႈ၊ ၶဝ်ဢွၼ်ၵၼ်ဢဝ်ယိတ်ႈပလၢင်ႇတႄႇဝႆႉၵႃႈၼိူဝ်ၶူင်ႇႁၢၼ်ႉတိၼ်မၼ်းသေလႄႈ ဢဝ်ယိတ်ႈဢၼ်တုတ်ႇၽႆးဢၼ်ဝႃႈ ယိတ်ႈဢၼ်တုတ်ႇၽႆးၶိင်ႇႁူဝ်ၼႂ် ၶိင်ႇႁူဝ်ၶမ်ႈၼၼ်ႉ ပုၵ်ႈၸေႃႇတီႈထႃႇဝရႃႉၽြႃးယူႇသေႇသေႇဢေႃႈ။-

4ပွႆးႁဵတ်းသုမ်ႉထဵင်ၵေႃႈၶဝ်ဢွၼ်ၵၼ်ၶၢမ်ႇ ၸွမ်းၵႃႈၼင်ႇဢၼ်ၵျၢမ်းလိၵ်ႈမႃးၼၼ်ႉလႄႈ ႁဵတ်းတၢင်းဢၼ်ၼပ်ႉဢၼ်ဢၢၼ်ႇသေလႄႈ ပုၵ်ႈၸေႃႇယိတ်ႈဢၼ်တုတ်ႇၽႆးၵူႈဝၼ်းၵူႈဝၼ်း မႅၼ်ႈၸွမ်းၵႃႈၼင်ႇဢၼ်ထုင်းၽိင်ႈတြႃးမီးလႄႈ ထုၵ်ႇလီႁဵတ်းဝၢတ်ႈယူႇၵူႈဝၼ်းၼၼ်ႉဢေႃႈ။-

5လိုၼ်းၼၼ်ႉၶဝ်ဢွၼ်ၵၼ်ဢဝ်ယိတ်ႈဢၼ်တုတ်ႇၽႆး ဢၼ်လႆႈပုၵ်ႈၸေႃႇသေႇသေႇ၊ ယိတ်ႈဢၼ်လႆႈပုၵ်ႈၸေႃႇဝၼ်းလိူၼ်မႂ်ႇ ဢိၵ်ႇတင်းဝၼ်းပွႆးထမ်ႇမႃႉ ၵႃႈဢၼ်ႁႂ်ႈမူတ်းၸၢင်ႇပုၼ်ႈထႃႇဝရႃႉၽြႃး၊ ယိတ်ႈဢၼ်လႆႈပုၵ်ႈၸေႃႇပုၼ်ႈၶဝ်ၸိူဝ်းဢၼ် မီးၸေႇတၼႃႇသေလႄႈ ဢဝ်ၶိူင်ႈပုၵ်ႈၸေႃႇမႃးတီႈထႃႇဝရႃႉၽြႃး ႁင်းၽႂ်ႁင်းမၼ်းၼၼ်ႉၸိူဝ်းၼၼ်ႉပုၵ်ႈၸေႃႇဢေႃႈ။-

6ပိၵ်ႉသမ်ႉဢမ်ႇပႆႇၶျႃးငဝ်ႈႁၢၵ်ႈတိူၵ်ႈပိၵ်ႈမၢၼ်ႇထႃႇဝရႃႉၽြႃးသေၵေႃႈ၊ ၶဝ်ဢွၼ်ၵၼ်ဢဝ်ယိတ်ႈဢၼ်တုတ်ႇၽႆးပုၵ်ႈၸေႃႇတီႈထႃႇဝရႃႉၽြႃး ၸႃႉၸဵမ်လိူၼ်သတ်ႉတမႃႉဝၼ်းၼိုင်ႈၼၼ်ႉဢေႃႈ။

7ၶဝ်ဢွၼ်ၵၼ်ဢဝ်ငိုၼ်းပၼ်တီႈၶဝ်ၸိူဝ်းဢၼ်မေႃတႄႇမေႃႁဵတ်း၊ ဢိၵ်ႇတင်းလၢၵ်ႈသမႃးတင်းလၢႆလႄႈ ဢွၼ်ၵၼ်ဢဝ်ၸရိပ်ႈတၢင်းၵိၼ်တင်းၼမ်ႉမၼ်း ပၼ်တီႈၵူၼ်းဝဵင်း ၸီႉတုၼ်ႇ တင်းၵူၼ်းဝဵင်း တူႉရူႉ ၸိူဝ်းၼၼ်ႉ ႁႂ်ႈလႆႈဢဝ်မႆႉ ဢႃႇရိတ်ႉ သေၵႃႈၼိူဝ်လွႆ လေႇပၼုၼ်ႇ လူင်းၸူးပၢင်ႇလၢႆႇ သူင်ႇႁွတ်ႈၵႃႈတီႈတႃႈ ယွပ်ႉပႃႉ ၸွမ်းၵႃႈၼင်ႇဢၼ်ၶဝ်လႆႈဢၶႂၢင်ႉတီႈ ၵူႉရူႉ ၶုၼ်ႁေႃၶမ်း ပေႇရသီႉ ၼၼ်ႉဢေႃႈ။-

8ၼႂ်းပီႊတူႉတီႉယႃႉ လိူၼ်တူႉတီႉယႃႉ ဢၼ်ၶဝ်ႁွတ်ႈထိုင်ၵႃႈတီႈႁိူၼ်းၽြႃးပဵၼ်ၸဝ်ႈ ၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉ၊ ၸေႇရူႉပႃႉပေႇလႃႉ လုၵ်ႈၸၢႆး သႃႇလႃႉသေးလႃႉ၊ ယေႃးသူႉ လုၵ်ႈၸၢႆး ယေႃးၸႃႉ တင်းပီႈၼွင်ႉၶဝ်ဢၼ်ၵိုတ်းဢၼ်ၵျၢၼ်ႇဢၼ်ပဵၼ်ယိတ်ႈပရေႃးႁဵၵ်ႈတင်းၵူၼ်းမဵဝ်း လေႇဝီႉ ၶဝ်ၵႃႈဢၼ်ဢွၵ်ႇသေၵႃႈၼႂ်းမုၵ်ႉၸိူဝ်းၶဝ်ၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉသေလႄႈ မႃးၸူးၵႃႈတီႈဝဵင်း ယေႇရူႉသလႅမ်ႇ ၼၼ်ႉၸိူဝ်းၼၼ်ႉ ဢွၼ်ၵၼ်လုၵ်ႉလႄႈၶၢၼ်းၵူၼ်း လေႇဝီႉ ဢၼ်ၸႃႉၸဵမ်ဢသၢၵ်ႈလႆႈသၢဝ်းၼိုင်ႈလႄႈဢသၢၵ်ႈလိူဝ်သၢဝ်းၵႂႃႇၸိူဝ်းၼၼ်ႉဝႆႉ ႁႂ်ႈလႆႈဢုပ်ႉထိင်းၵႃႈၼိူဝ်တၢင်းဢၼ်တႄႇဢၼ်ႁဵတ်းႁိူၼ်းထႃႇဝရႃႉၽြႃးၼၼ်ႉဢေႃႈ။-

9မိူဝ်ႈၼၼ်ႉ ယေႃးသူႉ၊ ယူႉတႃႉ ဢိၵ်ႇတင်းလုၵ်ႈၸၢႆးၼွင်ႉၸၢႆးမၼ်းတင်းလၢႆ၊ ၵတ်ႉမျေႇလႃႉ ဢိၵ်ႇတင်းလုၵ်ႈၸၢႆးမၼ်းတင်းလၢႆ ဢၼ်ပဵၼ်ၵူၼ်းမဵဝ်း ယူႉတႃႉ ၊ ၵူၼ်း ႁေႇၼတပ်ႉ တင်းလၢႆ ဢိၵ်ႇတင်းလုၵ်ႈၸၢႆးၶဝ်ၼွင်ႉၸၢႆးၶဝ်ဢၼ်ပဵၼ်ၵူၼ်းမဵဝ်း လေႇဝီႉ ၸိူဝ်းၼၼ်ႉဢွၼ်ၵၼ်လုၵ်ႉႁႂ်ႈလႆႈဢုပ်ႉလႆႈထိင်းၵႃႈၼိူဝ်ၶဝ်ၸိူဝ်းဢၼ်တႄႇဢၼ်ႁဵတ်း ႁိူၼ်းၽြႃးပဵၼ်ၸဝ်ႈၼၼ်ႉဢေႃႈ။-

10ၶဝ်ၸိူဝ်းဢၼ်တႄႇဢၼ်ႁဵတ်းၼၼ်ႉ၊ မိူဝ်ႈဢၼ်ၶဝ်ၶျႃးငဝ်ႈႁၢၵ်ႈတိူၵ်ႈပိၵ်ႈမၢၼ်ႇထႃႇဝရႃႉၽြႃးၼၼ်ႉၸိုင်၊ ၶဝ်ၶၢၼ်းယိတ်ႈပရေႃးႁဵၵ်ႈဢၼ်ၼုင်ႈမႆႁၢင်ႈၶိူင်ႈတၢင်းၼုင်ႈတၢင်းမႆၶဝ်သေလႄႈ ယိပ်းၵမ်ၼႄးၶရႃႇယူႇ၊ ၵူၼ်း ဢႃႇသပ်ႉ မဵဝ်း လေႇဝီႉ ဢၼ်ယိပ်းၵမ်သႅင်ႇယူႇၸိူဝ်းၼၼ်ႉဝႆႉ ႁႂ်ႈလႆႈယွင်ႈယေႃးမုၼ်ထႃႇဝရႃႉၽြႃး ၸွမ်းၵႃႈၼင်ႇဢၼ် တႃႇဝိတ်ႈ ၶုၼ်ႁေႃၶမ်း ဢီႉသရေႇလႃႉ ၸီႇယၢင်ႇဝႆႉၼၼ်ႉဢေႃႈ။-

11ဢွၼ်ၵၼ်ယွင်ႈယေႃးမုၼ်ၸဝ်ႈယူႇ၊ ႁပ်ႉတုင်းဢဝ်ၵျေးၸူးၸဝ်ႈယူႇသေလႄႈ ၶေႉသဵင်တႅၵ်ႈသဵင်ၵၼ်လႄႈ ႁဵတ်းၵႂၢမ်းပဵၼ်လႄႉပဵၼ်ၵမ်းတီႈထႃႇဝရႃႉၽြႃးလႄႈဝႃႈ၊ မၼ်းၸဝ်ႈမျၢတ်ႈလီဢေႃႈ။ ၵရူႉၼႃႇၸဝ်ႈဢၼ်မၼ်းၸဝ်ႈၼႄပျႃးတီႈမဵဝ်း ဢီႉသရေႇလႃႉ ၼၼ်ႉ တႄႇယူႇတႃႇသေႇမၼ်ႈၶိူင်ႇဢေႃႈ၊ ဝႃႈၼင်ႇၼႆဢေႃႈ။ ၵူၼ်းတင်းသဵင်ႈတင်းလူင် ဢွၼ်ၵၼ်ယွင်ႈယေႃးမုၼ်ထႃႇဝရႃႉၽြႃးယူႇသေလႄႈ ႁဵတ်းတင်းသဵင်ဢၼ်ယႂ်ႇၼႃႇႁွင်ႉႁုၼ်ႉႁွင်ႉသႅၼ်ႇ ၵွပ်ႈပိူဝ်ႈဢၼ်လႆႈၶျႃးငဝ်ႈႁၢၵ်ႈတိူၵ်ႈႁိူၼ်းထႃႇဝရႃႉၽြႃးၼၼ်ႉဢေႃႈ။-

12ၵူၺ်းၵႃႈ ယိတ်ႈပရေႃးႁဵၵ်ႈဢိၵ်ႇတင်းၵူၼ်း လေႇဝီႉ ဢၼ်ပဵၼ်ငဝ်ႈပဵၼ်ႁူဝ် မဵဝ်းပူႇမဵဝ်းပေႃႈၶဝ်ဢၼ်ဝႃႈ ၶဝ်ၸိူဝ်းဢၼ်ဢသၢၵ်ႈထဝ်ႈၵႄႇလႄႈ ယၢမ်ႈလႆႈႁၼ်ပိၵ်ႈမၢၼ်ႇၸဝ်ႈ ဢၼ်ၵမ်းဢွၼ်တၢင်းၼၼ်ႉၸိူဝ်းၼၼ်ႉ ဢွၼ်ၵၼ်ႁဵတ်းတင်းသဵင်ဢၼ်ယႂ်ႇၼႃႇႁွင်ႉႁႆႈၼႂ်းမိူဝ်ႈဢၼ်ၶျႃးငဝ်ႈႁၢၵ်ႈပိၵ်ႈမၢၼ်ႇၸဝ်ႈၼၼ်ႉ သိုဝ်ႈၼႃႈတႂ်ႈတႃၶဝ်ၼၼ်ႉဢေႃႈ။ ၵူၼ်းၼမ်ၼႃႇၵေႃႈ ဢွၼ်ၵၼ်မီးတင်းၸႂ်ဢၼ်ၸူမ်းသိူဝ်းသေလႄႈ ႁွင်ႉႁုၼ်ႉႁွင်ႉသႅၼ်ႇ၊-

13ထၼ်ႈပေႃးၵူၼ်းတင်းလၢႆ ဢမ်ႇၸၵ်းၽႄလႄႈႁူႉသဵင်ဢၼ်မီးၸႂ်ဢၼ်ၸူမ်းသိူဝ်းသေလႄႈႁွင်ႉႁုၼ်ႉႁွင်ႉသႅၼ်ႇ ဢိၵ်ႇတင်းသဵင်ဢၼ်ၵူၼ်းတင်းလၢႆႁႆႈႁွင်ႉၼၼ်ႉလႆႈ။ လွင်ႈမၼ်းၸမ်ႉ ၵူၼ်းတင်းလၢႆႁဵတ်းသဵင်ဢၼ်ယႂ်ႇၼႃႇသေလႄႈ ႁွင်ႉႁုၼ်ႉႁွင်ႉသႅၼ်ႇလႄႈ သဵင်ၼၼ်ႉလႆႈငိၼ်းၵႂႃႇတေႃႇထိုင်ႁွတ်ႈတီႈဢၼ်ၵႆၼႃႇဢေႃႈ။

← Chapter 2 Jump to: Chapter 4 →