Ezra 4

Shan

← Chapter 3 Jump to: Chapter 5 →

1ရၢၼ်ႇသူႇမဵဝ်း ယူႉတႃႉ တင်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉ လႆႈငိၼ်းလွင်ႈဢၼ်ၵူၼ်းမဵဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၸိူဝ်းၼၼ်ႉ ဢွၼ်ၵၼ်တႄႇႁဵတ်းပိၵ်ႈမၢၼ်ႇပုၼ်ႈထႃႇဝရႃႉၽြႃးပဵၼ်ၸဝ်ႈ မဵဝ်း ဢီႉသရေႇလႃႉ ၼၼ်ႉသေယဝ်ႉ၊-

2ဢွၼ်ၵၼ်မႃးၸူးတီႈ ၸေႇရူႉပႃႉပေႇလႃႉ တင်းၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ် မဵဝ်းပူႇမဵဝ်းပေႃႈၸိူဝ်းၼၼ်ႉလႄႈလၢတ်ႈလႄႈဝႃႈ၊ ႁႂ်ႈႁဝ်းလႆႈတႄႇႁဵတ်းလူၺ်ႈၵၼ်တင်းသူသေၵမ်းလူၺ်ႈ။ ႁဝ်းၵေႃႈဢွၼ်ၵၼ်ႁႃၽြႃးပဵၼ်ၸဝ်ႈသူ မိူၼ်ၸိူဝ်ႉၼင်ႇဢၼ်သူႁႃၼၼ်ႉဢေႃႈ။ ႁဝ်းဢွၼ်ၵၼ်ပုၵ်ႈၸေႃႇယိတ်ႈတီႈမၼ်းၸဝ်ႈယူႇ ၸႃႉၸဵမ်ၸူဝ်ႈပၢၼ် ဢေႇသရႃႇႁတ်ႉတုၼ်ႇ ၶုၼ်ႁေႃၶမ်း ဢႃႇသူႉရီႉ ၊ ဢၼ်ဢဝ်ႁဝ်းမႃးၵႃႈတီႈမိူင်းၼႆႉၼၼ်ႉဢေႃႈ။ မိူဝ်ႈဢၼ်ဝႃႈၼင်ႇၼႆၸိုင်၊-

3ၸေႇရူႉပႃႉပေႇလႃႉ ဢိၵ်ႇတင်း ယေႃးသူႉ တင်းၶဝ်ၸိူဝ်းဢၼ် ယင်းၵိုတ်းယင်းၵျၢၼ်ႇလႄႈ ပဵၼ်ငဝ်ႈပဵၼ်ႁူဝ်မဵဝ်းပူႇမဵဝ်းပေႃႈ ဢီႉသရေႇလႃႉ ၸိူဝ်းၼၼ်ႉ ဢွၼ်ၵၼ်ၶိုၼ်းလၢတ်ႈတီႈၶဝ်လႄႈဝႃႈ၊ သူဢမ်ႇလႆႈၽွမ်ႉလႆႈပႃးလူၺ်ႈၵၼ်တင်းႁဝ်းသေလႄႈ တႄႇႁဵတ်းႁိူၼ်းပုၼ်ႈၽြႃးပဵၼ်ၸဝ်ႈႁဝ်း။ တူဝ်ႁဝ်းတၵ်းလႆႈတႄႇႁဵတ်းပုၼ်ႈထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ ၸွမ်းၵႃႈၼင်ႇဢၼ် ၵူႉရူႉ ၶုၼ်ႁေႃၶမ်း ပေႇရသီႉ မီးဢမိင်ႉၼၼ်ႉဢေႃႈ၊ ဝႃႈၼင်ႇၼႆဢေႃႈ။-

4မိူဝ်ႈၼၼ်ႉၵူၼ်းဝၢၼ်ႈၵူၼ်းမိူင်းၸိူဝ်းၼၼ်ႉ ဢွၼ်ၵၼ်ႁႂ်ႈႁႅင်းမိုဝ်းၵူၼ်းမဵဝ်း ယူႉတႃႉ ဢူၼ်ႈၵႂႃႇယွမ်းၵႂႃႇလႄႈ ယႃႉယူၵ်ႉဢမူႉ တၢင်းဢၼ်ၶဝ်တႄႇႁဵတ်းၼၼ်ႉသေလႄႈ၊-

5ၸၢင်ႈငႃဢဝ်ၶဝ်ၸိူဝ်းဢၼ်ဢွၼ်ႁူဝ် လၢတ်ႈဢမူႉႁႂ်ႈလႆႈႁႄႉၶႅၼ်တၢင်းၵျၢမ်ႇတၢင်းပွင်ၶဝ်ၼၼ်ႉဝႆႉ ၸႃႉၸဵမ်ၸူဝ်ႈပၢၼ် ၵူႉရူႉ ၶုၼ်ႁေႃၶမ်း ပေႇရသီႉ ၼၼ်ႉတဵမ်တဵမ်တေႃႇထိုင်ႁွတ်ႈ ၸူဝ်ႈပၢၼ် တႃႇရီႉ ၶုၼ်ႁေႃၶမ်း ပေႇရသီႉ ၼၼ်ႉဢေႃႈ။

6ၼႂ်းမိူဝ်ႈဢၼ် ဢႃႇသူၺ်ႇရူႉ ၸႃႉၸၢမ်ႇႁၢင်ႈၸၢမ်ႇႁေႃၼၼ်ႉ၊ ၶဝ်ၼၼ်ႉဢွၼ်ၵၼ်ဢဝ်လိၵ်ႈဢၼ်လဝ်ႊလၢတ်ႈတၢင်ႇဢပႅတ်ႈ တီႈၵူၼ်းမိူင်း ယူႉတႃႉ တင်းဝဵင်း ယေႇရူႉသလႅမ်ႇ တင်းလၢႆၼၼ်ႉပၼ်ၵႂႃႇဢေႃႈ။-

7ၼႂ်းၸူဝ်ႈပၢၼ် ဢႃႇတၸေႇရိတ်ႉ ၼၼ်ႉ၊ ပီႉသလမ်ႇ၊ မီႉသရေႇတတ်ႉ၊ တပႄႇလႃႉ ဢိၵ်ႇတင်း ၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇလႄႈ ပဵၼ်ၵေႃႉသေႈဢၼ်ႁူမ်ႈပွင်းၵၼ်တင်းၶဝ်ၼၼ်ႉ ဢွၼ်ၵၼ်ဢဝ်လိၵ်ႈဢၼ်လဝ်ႊလၢတ်ႈ ဢၼ်ဢဝ်တင်းတူဝ်လိၵ်ႈဢႅၵ်ႉၶရႃႇ သူႉရီႉ တႅမ်ႈလႄႈ ဢဝ်တင်းၵႂၢမ်းၽႃႇသႃႇ သူႉရီႉ လဝ်ႊလၢတ်ႈၼၼ်ႉ ပၼ်ၵႂႃႇတီႈ ဢႃႇတၸေႇရိတ်ႉ ၶုၼ်ႁေႃၶမ်း ပေႇရသီႉ ၼၼ်ႉဢေႃႈ။-

8ရေႇႁုမ်ႇ ၵေႃႉဢၼ်ဢုပ်ႉၵႃႈၼိူဝ်တိူၵ်ႈလိၵ်ႈ တင်း သီႉမသေး ၸရေးဝဵင်းၸိူဝ်းၼၼ်ႉ ႁဵတ်းရၢၼ်ႇတၢင်းၽိတ်းတီႈဝဵင်း ယေႇရူႉသလႅမ်ႇ သေလႄႈ ပၼ်လိၵ်ႈဢၼ်ၸိူဝ်ႉၼင်ႇၼႆ ၵႂႃႇတီႈၶုၼ်လူင် ဢႃႇတၸေႇရိတ်ႉ ဢေႃႈ။-

9လိၵ်ႈၼၼ်ႉၸိုင်၊ ရေႇႁုမ်ႇ ၵေႃႉဢၼ်ဢုပ်ႉၵႃႈၼိူဝ်တိူၵ်ႈလိၵ်ႈ၊ သီႉမသေး ၸရေးဝဵင်း ဢိၵ်ႇတင်းၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇလႄႈ ပဵၼ်ၵေႃႉသေႈဢၼ်ႁူမ်ႈပွင်းၵၼ်တင်းၶဝ်ၼၼ်ႉ ၵူၼ်းမိူင်း တီႉၼေႇ ၊ ၵူၼ်းမိူင်း ဢၽႃႉသသၢၵ်ႉ ၊ ၵူၼ်းမိူင်း တႃႇပေႇလႃႉ ၊ ၵူၼ်းမိူင်း ဢၽႃႇရႃႇသႃႉ ၊ ၵူၼ်းမိူင်း ဢႃႇၶေးဝႃႉ ၊ ၵူၼ်းမိူင်း ပႃႇပူႉလုၼ်ႇ ၊ ၵူၼ်းမိူင်း သူႉသၼၵ်ႉ ၊ ၵူၼ်းမိူင်း တေႇႁဝႃႉ ၊ ၵူၼ်းမိူင်း ဢေႇလမ်ႇ ၊-

10တင်းၵူၼ်းတၢင်ႇၸိူဝ်ႉတၢင်ႇမဵဝ်း ဢၼ်ၶုၼ် ဢႃႇသၼပ်ႉပႃႇ ဢၼ်ယႂ်ႇမျၢတ်ႈ ဢဝ်မႃးလႄႈၶျႃးတီႈယူႇဝႆႉ ၵႃႈတီႈဝၢၼ်ႈဝဵင်း သမႃႇရီႉ ဢိၵ်ႇတင်းမိူင်းဢၼ်မီးၵႃႈတီႈၽၢႆႇဝၼ်းတူၵ်းၼမ်ႉႁွင်ႈၼၼ်ႉၸိူဝ်းၼၼ်ႉဢွၼ်ၵၼ်တႅမ်ႈဢေႃႈ။-

11လၢၵ်ႈၶၢမ်ႇလိၵ်ႈဢၼ် ၶဝ်ပၼ်ၵႂႃႇတီႈၶုၼ်လူင် ဢႃႇတၸေႇရိတ်ႉ ၼၼ်ႉဝႃႈၸမ်ႉ၊ ၶႃႈၸဝ်ႈႁဝ်းၶဝ်ဢၼ်ယူႇၵႃႈတီႈၽၢႆႇဝၼ်းတူၵ်းၼမ်ႉႁွင်ႈၸိူဝ်းၼႆႉ လဝ်ႊလၢတ်ႈၼႂ်းဝၼ်းဢၼ်ၸိူဝ်းၼႆႉတီႈၶႃႈဢေႃႈ။-

12ၶႅၼ်းတေႃႈႁႂ်ႈၸဝ်ႈၶုၼ်လူင်ႁူႉလွင်ႈဢၼ်ၵူၼ်းမဵဝ်း ယူႉတႃႉ ဢၼ်လုၵ်ႉသေၵႃႈတီႈၸဝ်ႈႁဝ်းႁွတ်ႈမႃးၵႃႈတီႈဝဵင်း ယေႇရူႉသလႅမ်ႇ တီႈဢၼ်ၶႃႈၸဝ်ႈႁဝ်းၶဝ်ယူႇၼႆႉၸိူဝ်းၼၼ်ႉ တႄႇႁဵတ်းဝဵင်းဢၼ်ႁၢႆႉယုတ်ႈလႄႈ ၸၢင်ႈပုင်ႇၵၢၼ်ႇၼၼ်ႉယူႇသေလႄႈ ၶျႃးငဝ်ႈႁၢၵ်ႈလမ်းဝဵင်းလႄႈ ၸမ်တၵ်းယဝ်ႉတၵ်းတူဝ်ႈၼၼ်ႉသေၵမ်းတီႈၶႃႈ၊-

13ၶႅၼ်းတေႃႈႁႂ်ႈၸဝ်ႈၶုၼ်လူင်ႁူႉလွင်ႈဢၼ် ပေႃးသမ်ႉၶိုၼ်းတႄႇႁဵတ်းဝဵင်းၼၼ်ႉလႄႈ လမ်းဝဵင်းယဝ်ႉတူဝ်ႈယဝ်ႉၼၼ်ႉၸိုင်၊ ၶဝ်တၵ်းဢမ်ႇသၢၵ်ႈဢမ်ႇပၼ်ၶွၼ်ႇဝၢၼ်ႈၶွၼ်ႇမိူင်း၊ ၶွၼ်ႇၵႃႉၶွၼ်ႇၶၢႆ၊ ၶွၼ်ႇတႃႈၶွၼ်ႇၵၢင်လႄႈ ဢၵျူဝ်းၶုၼ်ႁေႃၶမ်းၵူႈၸူဝ်ႈၵူႈပၢၼ်တၵ်းလူႉၼၼ်ႉသေၵမ်းတီႈၶႃႈ၊-

14ၵွပ်ႈပိူဝ်ႈဢၼ်ၶႃႈၸဝ်ႈႁဝ်းၶဝ် ပဵၼ်ၵေႃႉဢၼ်လႆႈၶၢမ်ႇတၢင်းဢၼ်လဵင်ႉဢၼ်လူလူၺ်ႈႁေႃၸဝ်ႈယူႇလႄႈ ဢမ်ႇထုၵ်ႇလီႁၼ် တၢင်းဢၼ်မုၼ်ၽုင်းၸဝ်ႈၶုၼ်လူင်သုတ်ႈၵႂႃႇယွမ်းၵႂႃႇၼၼ်ႉလႄႈ၊ ၶႃႈၸဝ်ႈႁဝ်းၶဝ် ပွႆႇၸႂ်ႉလႄႈလဝ်ႊလၢတ်ႈပၼ်ငိၼ်းၵႂႃႇတီႈၸဝ်ႈၶုၼ်လူင်၊-

15ႁႂ်ႈလႆႈၸႅတ်ႈထၢမ်ၸႅတ်ႈတူၺ်း လိၵ်ႈဢၼ်မၢတ်ႈမၢႆလူၺ်ႈလွင်ႈပူႇၸဝ်ႈမွၼ်ႇၸဝ်ႈၼၼ်ႉတီႈၶႃႈဢေႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ၸဝ်ႈၶုၼ်လူင်တၵ်းထူပ်းႁၼ် ၵႃႈၼႂ်းလိၵ်ႈဢၼ်မၢတ်ႈမၢႆဝႆႉၼၼ်ႉလႄႈ ႁူႉလွင်ႈဢၼ်ဝဵင်းၼႆႉပဵၼ်ဝဵင်းဢၼ်ၸၢင်ႈပုင်ႇၵၢၼ်ႇ ဝဵင်းဢၼ်ၸၢင်ႈယႃႉယူၵ်ႉဢၵျူဝ်းၶုၼ်ႁေႃၶမ်းတင်းဢၵျူဝ်းသိုင်ႇၸိုင်ႈဝၢၼ်ႈမိူင်းၸဝ်ႈလႄႈ လုမ်းလႃးတၢင်းၵျၢမ်ႇတၢင်းပွင် ဢၼ်ပုင်ႇၵၢၼ်ႇၵႃႈၼႂ်းမၼ်း ၶိင်ႇၵႃႇလႃႉမိူဝ်ႈၵွၼ်ႇဢွၼ်ၼႆႉၼၼ်ႉလႄႈ လႆႈၶၢမ်ႇတၢင်းဢၼ်တိုၵ်းဢၼ်ယႃႉ ၵွပ်ႈပိူဝ်ႈလွင်ႈတၢင်းၼၼ်ႉၼၼ်ႉတီႈၶႃႈဢေႃႈ။-

16ၶႃႈၸဝ်ႈႁဝ်းၶဝ်လဝ်ႊလၢတ်ႈပၼ်ငိၼ်းလွင်ႈဢၼ်ပေႃးသမ်ႉၶိုၼ်းတႄႇႁဵတ်းဝဵင်းၼၼ်ႉလႄႈ လမ်းဝဵင်းယဝ်ႉတူဝ်ႈယဝ်ႉၸိုင်၊ ၸဝ်ႈႁဝ်းတၵ်းဢမ်ႇလႆႈဢုပ်ႉပိူင်ႇ ၵႃႈတီႈၽၢႆႇဝၼ်းတူၵ်းၼမ်ႉႁွင်ႈၼႆႉၼၼ်ႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။

17လိၵ်ႈဢၼ်ၶုၼ်ႁေႃၶမ်းၶိုၼ်းပၼ်ၵႂႃႇတီႈ ရေႇႁုမ်ႇ ၵေႃႉဢၼ်ဢုပ်ႉၵႃႈၼိူဝ်တိူၵ်ႈလိၵ်ႈတင်း သီႉမသေး ၸရေးဝဵင်း တင်းၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇလႄႈ ပဵၼ်ၵေႃႉသေႈဢၼ်ႁူမ်ႈပွင်းၵၼ် တင်းၶဝ်ၸိူဝ်းဢၼ်ယူႇၵႃႈတီႈဝဵင်း သမႃႇရီႉ ဢိၵ်ႇတင်းၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇလႄႈ ယူႇၵႃႈတီႈၽၢႆႇဝၼ်းတူၵ်းၼမ်ႉႁွင်ႈၼၼ်ႉဝႃႈၸမ်ႉ၊ ႁႂ်ႈသူၵတ်းယဵၼ်ၶျၢမ်းသႃႇသေၵမ်းလူၺ်ႈ။ ၵဝ်တႅမ်ႈဢၼ်ၸိူဝ်းၼႆႉဢေႃႈ။-

18လိၵ်ႈဢၼ်သူပၼ်မႃးတီႈၵဝ်ၼၼ်ႉၸိုင်၊ ၶိုၼ်းပျၢၼ်ႇဢၼၢၵ်ႈမၼ်းသေလႄႈ ၽတ်းၵႃႈတီႈၽၢႆႇၼႃႈၵဝ်ယဝ်ႉ။-

19ၵဝ်မီးဢမိင်ႉသေလႄႈ ဢွၼ်ၵၼ်ၸႅတ်ႈထၢမ်ၸႅတ်ႈတူၺ်းလႄႈ လႆႈႁူႉလွင်ႈဢၼ်ဝဵင်းၼၼ်ႉၸၢင်ႈၶိုၼ်းၽိုၼ်ႉၶိုၼ်းႁဵတ်းတီႈၶုၼ်ႁေႃၶမ်းၼမ်ၼႃႇ မိူဝ်ႈၵွၼ်ႇဢွၼ်ၼႆႉၼၼ်ႉ၊ လွင်ႈဢၼ်ပဵၼ်ဝဵင်းဢၼ်ႁဵတ်းတၢင်းဢၼ်ပုင်ႇၵၢၼ်ႇ၊ တၢင်းဢၼ်ၵျၢမ်ႇပွင်တၢင်းၵျၢမ်ႇတၢင်းပွင် ဢၼ်ၶတ်းၵၼ်တင်းၶုၼ်ၼၼ်ႉၵႃႈၼႂ်းမၼ်း၊-

20လွင်ႈဢၼ်ၶုၼ်ႁေႃၶမ်း ဢၼ်တၼ်းၶူဝ်းယႂ်ႇၼႃႇ ဢၼ်ဢုပ်ႉပိူင်ႇၽၢႆႇဝၼ်းတူၵ်းၼမ်ႉႁွင်ႈတင်းသဵင်ႈတင်းမူတ်းလႄႈ ၶၢမ်ႇဢဝ်ၶွၼ်ႇဝၢၼ်ႈၶွၼ်ႇမိူင်း၊ ၶွၼ်ႇၵႃႉၶွၼ်ႇၶၢႆ၊ ၶွၼ်ႇတႃႈၶွၼ်ႇၵၢင်ၸိူဝ်းၼၼ်ႉယၢမ်ႈယူႇၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉဢေႃႈ။-

21ပိူဝ်ႈၼႆလႄႈ သူဢွၼ်ၵၼ်မီးဢမိင်ႉႁႂ်ႈၶဝ်ၼၼ်ႉ ယႃႇသေဝႆႉသေလႄႈ ယင်းဢမ်ႇတႄႇဢမ်ႇႁဵတ်းဝဵင်းလႄႈ ယူႇတေႃႇထိုင်ႁွတ်ႈၵဝ်မီးဢမိင်ႉၼၼ်ႉတႃႉ။-

22ဢွၼ်ၵၼ်ႁဵတ်းသတီႉႁႂ်ႈဢမ်ႇလႆႈထိူင်းလႆႈၼၢၼ်း ၼႂ်းဢမူႉၼႆႉတႃႉ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ဢၵျူဝ်းၶုၼ်ႁေႃၶမ်းၵူႈၸူဝ်ႈၵူႈပၢၼ်တၵ်းလႆႈလူႉၼင်ႇႁိုဝ်။ ဝႃႈၼင်ႇၼႆဢေႃႈ။-

23ၽတ်းလၢၵ်ႈၶၢမ်ႇလိၵ်ႈၶုၼ်လူင် ဢႃႇတၸေႇရိတ်ႉ ၼၼ်ႉ ၵႃႈတီႈၽၢႆႇၼႃႈ ရေႇႁုမ်ႇ တင်းၸရေးဝဵင်း သီႉမသေး ဢိၵ်ႇတင်းၵေႃႉသေႈဢၼ်ႁူမ်ႈပွင်းၵၼ်တင်းၶဝ်ၼၼ်ႉသေယဝ်ႉ၊ ၶဝ်ၼၼ်ႉဢွၼ်ၵၼ်ၵႂႃႇၸူး ၵႃႈတီႈဝဵင်း ယေႇရူႉသလႅမ်ႇ တီႈဢၼ်ၵူၼ်းမဵဝ်း ယူႉတႃႉ တင်းလၢႆမီးၼၼ်ႉ ၶၼ်ၶၼ်ၽႂ်းၽႂ်းလႄႈ ႁဵတ်းပႄႉႁဵတ်းၼႅင်ႇႁႂ်ႈၶဝ်ယႃႇသေဝႆႉသေဢေႃႈ။-

24ၼင်ႇၼၼ်လႄႈ တၢင်းဢၼ်တႄႇႁဵတ်းႁိူၼ်းၽြႃးပဵၼ်ၸဝ်ႈ ၵႃႈတီႈဝဵင်း ယေႇရူႉသလႅမ်ႇ ၼၼ်ႉ လႆႈထၢတ်ႇၵႂႃႇလႄႈ ဢမ်ႇလႆႈႁဵတ်းလႆႈသၢင်ႈ တေႃႇထိုင်ႁွတ်ႈ တႃႇရီႉ ၶုၼ်ႁေႃၶမ်း ပေႇရသီႉ ၸၢမ်ႇႁၢင်ႈၸၢမ်ႇႁေႃသွင်ပီႊၼၼ်ႉဢေႃႈ။

← Chapter 3 Jump to: Chapter 5 →