Ezra 7

Shan

← Chapter 6 Jump to: Chapter 8 →

1လိုၼ်းၼၼ်ႉ ၼႂ်းၸူဝ်ႈပၢၼ် ဢႃႇတၸေႇရိတ်ႉ ၶုၼ်ႁေႃၶမ်း ပေႇရသီႉ ၼၼ်ႉ၊ ဢေးၸရႃႉ ဢၼ်ပဵၼ်လုၵ်ႈၸၢႆး ၸရႃႇယႃႉ ၊ ဢၼ်ပဵၼ်လုၵ်ႈၸၢႆး ဢႃႇၸရီႉ ၊ ဢၼ်ပဵၼ်လုၵ်ႈၸၢႆး ႁီႉလၶီႉ ၊-

2ဢၼ်ပဵၼ်လုၵ်ႈၸၢႆး သႃႇလုမ်ႇ ၊ ဢၼ်ပဵၼ်လုၵ်ႈၸၢႆး ၸႃႇတုၵ်ႉ ၊ ဢၼ်ပဵၼ်လုၵ်ႈၸၢႆး ဢႁီႉတုပ်ႉ ၊-

3ဢၼ်ပဵၼ်လုၵ်ႈၸၢႆး ဢႃႇမရီႉ ၊ ဢၼ်ပဵၼ်လုၵ်ႈၸၢႆး ဢႃႇၸရီႉ ၊ ဢၼ်ပဵၼ်လုၵ်ႈၸၢႆး မေႇရႃႇယုတ်ႉ ၊-

4ဢၼ်ပဵၼ်လုၵ်ႈၸၢႆး ၸေးရႁီႉ ၊ ဢၼ်ပဵၼ်လုၵ်ႈၸၢႆး ဢေႃႇၸီႉ ၊ ဢၼ်ပဵၼ်လုၵ်ႈၸၢႆး ပုၵ်ႉၵီႉ ၊-

5ဢၼ်ပဵၼ်လုၵ်ႈၸၢႆး ဢၽီႉသႂႃႇ ၊ ဢၼ်ပဵၼ်လုၵ်ႈၸၢႆး ၽီႉၼႁတ်ႉ ၊ ဢၼ်ပဵၼ်လုၵ်ႈၸၢႆး ဢေးလႃႇၸႃႇ ၊ ဢၼ်ပဵၼ်လုၵ်ႈၸၢႆးယိတ်ႈပရေႃးႁဵၵ်ႈလူင် ဢႃႇရုၼ်ႇ ၼၼ်ႉ၊-

6ဢၼ်ဝႃႈ ဢေးၸရႃႉ ၼၼ်ႉ လုၵ်ႉသေၵႃႈတီႈဝဵင်း ပႃႇပူႉလုၼ်ႇ မႃးဢေႃႈ။ မၼ်းၼၼ်ႉပဵၼ်သြႃႇဢၼ်ၸၢင်ႈမေႃလူၺ်ႈၵျၢမ်းလိၵ်ႈပိင်းၺၢပ်ႈတီႉ မူဝ်းသေႇ ဢၼ်ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ပၼ်ဝႆႉၼၼ်ႉဢေႃႈ။ ၶုၼ်ႁေႃၶမ်းဢဵတ်းလူပၼ် ၵႃႈဢၼ်မၼ်းၼၼ်ႉ ယွၼ်းဢဝ်ၼၼ်ႉ ၵွပ်ႈပိူဝ်ႈဢၼ်တၼ်းၶူဝ်းမိုဝ်းထႃႇဝရႃႉၽြႃး ၽြႃးပဵၼ်ၸဝ်ႈမၼ်း မီးယူႇၵႃႈၼိူဝ်မၼ်းၼၼ်ႉဢေႃႈ။-

7ၼႂ်းပီႊဢၼ်ၶုၼ်လူင် ဢႃႇတၸေႇရိတ်ႉ ၸၢမ်ႇႁၢင်ႈၸၢမ်ႇႁေႃၸဵတ်းပီႊၼၼ်ႉ၊ ၼႂ်းၵူၼ်းမဵဝ်း ဢီႉသရေႇလႃႉ ယိတ်ႈပရေႃးႁဵၵ်ႈ ၵူၼ်းမဵဝ်း လေႇဝီႉ ၊ ၶဝ်ၸိူဝ်းဢၼ်မေႃႁဵတ်းၵႂၢမ်း၊ ၶဝ်ၸိူဝ်းဢၼ်ပႂ်ႉၽၵ်းတူ၊ ၶႃႈၽြႃးၸိူဝ်းၼၼ်ႉၵမ်ႈၽွင်ႈၼၼ်ႉၵေႃႈ ဢွၼ်ၵၼ်ၸွမ်းမၼ်းၼၼ်ႉမႃး ၵႃႈတီႈဝဵင်း ယေႇရူႉသလႅမ်ႇ လႄႈ၊-

8ၼႂ်းပီႊဢၼ်ၶုၼ်ႁေႃၶမ်း ၸၢမ်ႇႁၢင်ႈၸၢမ်ႇႁေႃၸဵတ်းပီႊ လိူၼ်ပိၼ်ႇၸမႃႉၼၼ်ႉ မၼ်းၼၼ်ႉႁွတ်ႈထိုင်ၵႃႈတီႈဝဵင်း ယေႇရူႉသလႅမ်ႇ ဢေႃႈ။-

9ၼႂ်းလိူၼ်ပထမႃႉဝၼ်းၼိုင်ႈၼၼ်ႉ မၼ်းဢွၵ်ႇသေၵႃႈၼႂ်းဝဵင်း ပႃႇပူႉလုၼ်ႇ လႄႈ ၼႂ်းလိူၼ်ပိၼ်ႇၸမႃႉဝၼ်းၼိုင်ႈၼၼ်ႉ ႁွတ်ႈထိုင်ၵႃႈတီႈဝဵင်း ယေႇရူႉသလႅမ်ႇ ၵွပ်ႈပိူဝ်ႈဢၼ်ၵျေးၸူးတၼ်းၶူဝ်းမိုဝ်းၽြႃးပဵၼ်ၸဝ်ႈမၼ်း မီးယူႇၵႃႈၼိူဝ်မၼ်းဢေႃႈ။-

10လွင်ႈမၼ်းၸမ်ႉ ဢေးၸရႃႉ ၼၼ်ႉ ပဵၼ်ၵေႃႉဢၼ်ဝႆႉၸႂ်ၶျႃးၸႂ် ႁႂ်ႈလႆႈႁႃဢဝ်တြႃးထႃႇဝရႃႉၽြႃးသေလႄႈ ပႂ်ႉၵမ်ပႂ်ႉၸွမ်း ဢိၵ်ႇတင်းႁႂ်ႈလႆႈဢဝ်ထုင်းၽိင်ႈတြႃးဢိၵ်ႇတင်းလွင်ႈတၢင်းဢၼ် မၼ်းၸဝ်ႈၸီႇယၢင်ႇဝႆႉၼၼ်ႉၸိူဝ်းၼၼ်ႉ သင်ႇပၼ်သွၼ်ပၼ်တီႈမဵဝ်း ဢီႉသရေႇလႃႉ ဢေႃႈ။

11လၢၵ်ႈၶၢမ်ႇလိၵ်ႈဢမိင်ႉၸဝ်ႈ ဢၼ်ၶုၼ်လူင် ဢႃႇတၸေႇရိတ်ႉ ပၼ်တီႈ ဢေးၸရႃႉ ယိတ်ႈပရေႃးႁဵၵ်ႈ သြႃႇဢၼ်ၸၢင်ႈမေႃလူၺ်ႈၵႂၢမ်းပိင်းၺၢပ်ႈထႃႇဝရႃႉၽြႃး ဢိၵ်ႇတင်းထုင်းၽိင်ႈတြႃး ဢၼ်မၼ်းၸဝ်ႈၸီႇယၢင်ႇဝႆႉတီႈမဵဝ်း ဢီႉသရေႇလႃႉ ၼၼ်ႉ ၼၼ်ႉဝႃႈၸမ်ႉ၊-

12ဢႃႇတၸေႇရိတ်ႉ ၶုၼ်ႁေႃၶမ်းၼိူဝ်ၶုၼ်ႁေႃၶမ်းတင်းလၢႆၼႆႉ သင်ႇလၢတ်ႈၵႂႃႇတီႈ ဢေးၸရႃႉ ယိတ်ႈပရေႃးႁဵၵ်ႈ သြႃႇဢၼ်ၸၢင်ႈမေႃတြႃးၽြႃးပဵၼ်ၸဝ်ႈ ၸဝ်ႈၽုင်ႇၵၢင်ႁၢဝ်ၼၼ်ႉ ၼႂ်းၶိင်ႇဢၼ်ၸိူဝ်ႉၼင်ႇၼႆၼၼ်ႉလႄႈဝႃႈ၊ ႁႂ်ႈမီးတၢင်းလီမင်ႇၵလႃႇ ဢၼ်ၸေးၸုမ်ႇသေၵမ်းလူၺ်ႈ၊ ဝႃႈၼင်ႇၼႆဢေႃႈ။-

13ၵဝ်မီးဢမိင်ႉလူၺ်ႈလွင်ႈ ဢၼ်ၼႂ်းၵူၼ်းမဵဝ်း ဢီႉသရေႇလႃႉ ယိတ်ႈပရေႃးႁဵၵ်ႈ၊ ၵူၼ်းမဵဝ်း လေႇဝီႉ ဢၼ်မီးၵႃႈၼႂ်းသိုင်ႇၸိုင်ႈဝၢၼ်ႈမိူင်းၵဝ်ၼႆႉၸိူဝ်းၼၼ်ႉ၊ ၶဝ်ၵႃႈဢၼ်ၸွမ်းဢလူဝ်ႇတူဝ်ၸဝ်ႈၵဝ်ႇသေလႄႈ ၶၢႆႉၵႂႃႇၵႃႈတီႈဝဵင်း ယေႇရူႉသလႅမ်ႇ ၼၼ်ႉတၵ်းလႆႈၸွမ်းမႂ်းၵႂႃႇဢေႃႈ။-

14လွင်ႈမၼ်းၸမ်ႉ ၶုၼ်ႁေႃၶမ်း ဢိၵ်ႇတင်းဢတႂၢင်းဝုၼ်ႇၸဵတ်းပႃး ပွႆႇၸႂ်ႉမႂ်းၵႂႃႇ ႁႂ်ႈမႂ်းလႆႈတွင်ႈထၢမ်ၸႅတ်ႈတူၺ်း လူၺ်ႈလွင်ႈမိူင်း ယူႉတႃႉ တင်းဝဵင်း ယေႇရူႉသလႅမ်ႇ ၸွမ်းလူၺ်ႈတြႃးၽြႃးပဵၼ်ၸဝ်ႈမႂ်း ဢၼ်မီးၵႃႈၼႂ်းမိုဝ်းမႂ်းၼၼ်ႉ၊-

15ဢိၵ်ႇတင်းႁႂ်ႈလႆႈဢဝ်ငိုၼ်းၶမ်း ဢၼ်ၶုၼ်ႁေႃၶမ်း ဢိၵ်ႇတင်းဢတႂၢင်းဝုၼ်ႇတင်းလၢႆ မီးတၢင်းၸႂ်ၸေႇတၼႃႇသေလႄႈ ပုၵ်ႈၸေႃႇတီႈၽြႃးပဵၼ်ၸဝ်ႈ မဵဝ်း ဢီႉသရေႇလႃႉ ဢၼ်ၵိင်းဝၢပ်ႈယူႇၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉ၊-

16ဢိၵ်ႇတင်းငိုၼ်းၶမ်း ၵႃႈဢၼ်မႂ်းလႆႈဢဝ်ၵႃႈၼႂ်းမိူင်း ပႃႇပူႉလုၼ်ႇ ၼႆႉ တင်းတႃႇၼႃႉတၢင်းလူႇ ဢၼ်မီးၸႂ်ၸေႇတၼႃႇသေလႄႈလူႇ၊ ဢၼ်ၵူၼ်းတင်းလၢႆ တင်းယိတ်ႈပရေႃးႁဵၵ်ႈၸိူဝ်းၼၼ်ႉ မီးၸႂ်ၸေႇတၼႃႇသေလႄႈလူႇတၢၼ်း ပုၼ်ႈႁိူၼ်းၽြႃးပဵၼ်ၸဝ်ႈ ၶဝ်ဢၼ်မီးၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉ ၸိူဝ်းၼၼ်ႉၵႂႃႇဢေႃႈ။-

17ပိူဝ်ႈၼႆလႄႈ မႂ်းတၵ်းလႆႈဢဝ်ငိုၼ်းၶမ်းၼၼ်ႉ သိုဝ်ႉဢဝ်ဝူဝ်းလႂ်၊ သူဝ်းပေႃႈလႂ်၊ သူဝ်းဢွၼ်ႇလႂ် ဢိၵ်ႇတင်းၶိူင်ႈပုၵ်ႈၸေႃႇၽေႃးၸဵၼ်ႇလႂ်၊ ၶိူင်ႈပုၵ်ႈၸေႃႇဢၼ်သွၼ်းလေႃႇလႂ် ၶၼ်ၶၼ်ၽႂ်းၽႂ်းလႄႈ ပုၵ်ႈၸေႃႇၵႃႈၼိူဝ်ယိတ်ႈပလၢင်ႇႁိူၼ်းၽြႃးပဵၼ်ၸဝ်ႈမႂ်း ဢၼ်မီးၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉဢေႃႈ။-

18ၵႃႈဢၼ်မႂ်း တင်းပီႈၼွင်ႉမႂ်းထၢင်ႇလီဢဝ်ငိုၼ်းၶမ်း ဢၼ်ၵိုတ်းဢၼ်ၵျၢၼ်ႇၼၼ်ႉႁဵတ်းၼၼ်ႉၸိုင် ႁဵတ်းႁႂ်ႈမႅၼ်ႈၸွမ်းၼင်ႇ ဢလူဝ်ႇၽြႃးပဵၼ်ၸဝ်ႈသူတႃႉ။-

19ၶိူင်ႈပိူင်ဢၼ်ဢၢပ်ႈပၼ်တီႈမႂ်း ပုၼ်ႈဢၼ်တၵ်းႁဵတ်းဝၢတ်ႈ ႁိူၼ်းၽြႃးပဵၼ်ၸဝ်ႈမႂ်းၵႃႈမီးၼၼ်ႉၵေႃႈ ဢဝ်ဝႆႉၵႃႈတီႈၽၢႆႇၼႃႈၽြႃးပဵၼ်ၸဝ်ႈ ဝဵင်း ယေႇရူႉသလႅမ်ႇ တႃႉ။-

20ၵႃႈဢၼ်ယင်းလူဝ်ႇထႅင်ႈပုၼ်ႈႁိူၼ်းၽြႃးပဵၼ်ၸဝ်ႈမႂ်း၊ ဢၼ်မႂ်းမီးတီႈတၵ်းသုင်းၼၼ်ႉၸိုင် ထုတ်ႇဢဝ်ၵႃႈၼႂ်းတိူၵ်ႈၽၼ်ႇတႃႇ ၶုၼ်ႁေႃၶမ်းလႄႈသုင်းတႃႉ။-

21ၵဝ်ဢၼ်ဝႃႈ ၵဝ်ၶုၼ်ႁေႃၶမ်း ဢႃႇတၸေႇရိတ်ႉ ၼႆႉ မီးဢမိင်ႉတီႈဝုၼ်ႇၵဵပ်းၶွၼ်ႇၵႃႈမီး ၵႃႈတီႈၽၢႆႇဝၼ်းတူၵ်းၼမ်ႉၸိူဝ်းၼၼ်ႉ ႁႂ်ႈၶဝ်ပၼ်ၵႃႈဢၼ် ဢေးၸရႃႉ ယိတ်ႈပရေႃးႁဵၵ်ႈသြႃႇဢၼ်ၸၢင်ႈမေႃလူၺ်ႈတြႃး ၽြႃးပဵၼ်ၸဝ်ႈ ၸဝ်ႈၽုင်ႇၵၢင်ႁၢဝ်ၼၼ်ႉယွၼ်းဢဝ်ၼၼ်ႉ ၶၼ်ၶၼ်ၽႂ်းၽႂ်း၊-

22တေႃႇထိုင်ႁွတ်ႈငိုၼ်းပၢၵ်ႇ တလၢၼ်ႇတၢၼ်ႇ ၊ ၶဝ်ႈသၢၼ်ၵျုင်ႇပၢၵ်ႇ ၵေႃးရႃႉ ၊ ၼမ်ႉၸပိတ်ႈပၢၵ်ႇ ပၢတ်ႈ ၊ ၼမ်ႉမၼ်းပၢၵ်ႇ ပၢတ်ႈ ဢိၵ်ႇတင်းၵိူဝ်ဢၼ်ဢမ်ႇၼပ်ႉဢမ်ႇဢၢၼ်ႇၼၼ်ႉဢေႃႈ။-

23ၵႃႈဢၼ်ၽြႃးပဵၼ်ၸဝ်ႈ ၸဝ်ႈၽုင်ႇၵၢင်ႁၢဝ်သင်ႇလၢတ်ႈဝႆႉၼၼ်ႉ၊ ႁႂ်ႈဢွၼ်ၵၼ်သၢင်ႈႁဵတ်းပုၼ်ႈႁိူၼ်းၽြႃးပဵၼ်ၸဝ်ႈၼၼ်ႉ မၢၼ်ႇမၢၼ်ႇမႅၼ်ႈမႅၼ်ႈသေ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ တၢင်းၸႂ်မႆႈၶႆႈၸႃႉမၼ်းၸဝ်ႈ၊ တၵ်းလႆႈတူၵ်းႁွတ်ႈၵႃႈၼိူဝ်ၶုၼ်ႁေႃၶမ်း တင်းလုၵ်ႈလၢၼ်ၸိူဝ်ႉၶိူဝ်းၸဝ်ႈၼင်ႇႁိုဝ်။-

24ၼွၵ်ႈသေၼၼ်ႉ ၵဝ်သင်ႇလၢတ်ႈလွင်ႈဢၼ် ၽူႈလႂ်ဢမ်ႇလႆႈၵဵပ်းဢဝ်ၶွၼ်ႇဝၢၼ်ႈၶွၼ်ႇမိူင်း၊ ၶွၼ်ႇၵႃႉၶွၼ်ႇၶၢႆ၊ ၶွၼ်ႇတႃႈၶွၼ်ႇၵၢင်တီႈယိတ်ႈပရေႃးႁဵၵ်ႈ၊ ၵူၼ်းမဵဝ်း လေႇဝီႉ ၊ မေႃႁဵတ်းၵႂၢမ်း၊ ၵူၼ်းပႂ်ႉၽၵ်းတူၶႃႈၽြႃး၊ ၶဝ်ၸိူဝ်းဢၼ်ပႂ်ႉဢမူႉႁိူၼ်းၽြႃးပဵၼ်ၸဝ်ႈ ၸိူဝ်းၼၼ်ႉသေၵေႃႉသေၵူၼ်းၼၼ်ႉဢေႃႈ။-

25မႂ်း ဢေးၸရႃႉ ၵေႃႈ ၸွမ်းလူၺ်ႈတၢင်းဢၼ်မႂ်းပျေႉၸုမ်ႇဝႆႉ တင်းၺၢၼ်ႇၽြႃးပဵၼ်ၸဝ်ႈမႂ်း ဢၼ်မီးၵႃႈၼႂ်းမိုဝ်းမႂ်းၼၼ်ႉသေလႄႈၶၢၼ်းၶုၼ်လႂ် ဢိၵ်ႇတင်းၵူၼ်းဢၼ်ၸီႇယၢင်ႇတြႃးလႂ် ဢၼ်တၵ်းလႆႈၸီႇယၢင်ႇဢမူႉတြႃး တီႈၵူၼ်းတင်းလၢႆဢၼ်မီးၵႃႈတီႈၽၢႆႇဝၼ်းတူၵ်းၼမ်ႉႁွင်ႈ ၸိူဝ်းၼၼ်ႉလႄႈ ႁူႉတြႃးၽြႃးပဵၼ်ၸဝ်ႈမႂ်းၼၼ်ႉ ၵႃႈမီးၼၼ်ႉဝႆႉ ဢိၵ်ႇတင်းသင်ႇသွၼ်ပၼ် တီႈၶဝ်ၸိူဝ်းဢၼ်ဢမ်ႇႁူႉၼၼ်ႉတႃႉ။-

26ၵေႃႉဢၼ်တွပ်ႇထဵင်ပူၼ်ႉလိူဝ်တြႃးၽြႃးပဵၼ်ၸဝ်ႈမႂ်း ဢိၵ်ႇတင်းဢမိင်ႉၸဝ်ႈၶုၼ်ႁေႃၶမ်းၼၼ်ႉၸမ်ႉ၊ ႁႂ်ႈမၼ်းၶၢမ်ႇရႃႇၸဝူတ်ႈသေၸိူဝ်ႉသေပိူင် ဢၼ်ဝႃႈတၢင်းဢၼ်ဢဝ်တၢႆ၊ တၢင်းဢၼ်ႁေႃႈဢဝ်ဢွၵ်ႇပႅတ်ႈ၊ တၢင်းဢၼ်သိမ်းဢဝ်ဢုၵ်ႉၸႃႇမၼ်း၊ တၢင်းဢၼ်ဢဝ်မၼ်းၶင်ဝႆႉၵႃႈၼႂ်းထွင်ႇၼၼ်ႉၶၼ်ၶၼ်ၽႂ်းၽႂ်းသေ၊ ဝႃႈၼင်ႇၼႆဢေႃႈ။

27ႁႂ်ႈထႃႇဝရႃႉၽြႃး ၽြႃးပဵၼ်ၸဝ်ႈပူႇႁဝ်းမွၼ်ႇႁဝ်း ဢၼ်ဢဝ်တၢင်းၵျၢမ်ႇတၢင်းပွင် ဢၼ်တၵ်းႁႂ်ႈႁိူၼ်းထႃႇဝရႃႉၽြႃး ၵႃႈၼႂ်းဝဵင်း ယေႇရူႉသလႅမ်ႇ ႁၢင်ႈလီႁၢင်ႈငၢမ်းၼႆႉ သႂၢင်းသႂ်ႇပၼ် ၵႃႈၼႂ်းႁူဝ်ၸႂ်ၶုၼ်ႁေႃၶမ်းသေလႄႈ၊-

28ႁဵတ်းၵျေးၸူးပၼ်ဢၶႂၢင်ႉတီႈၵဝ် ၵႃႈတီႈၽၢႆႇၼႃႈၶုၼ်ႁေႃၶမ်း ဢိၵ်ႇတင်းဢတႂၢင်းဝုၼ်ႇမၼ်းတင်းလၢႆ တင်းၶုၼ်ပူဝ်ႇမၼ်း တင်းသဵင်ႈတင်းလူင်ၼၼ်ႉၼၼ်ႉ မီးမင်ႇၵလႃႇသေၵမ်းလူၺ်ႈ။ ၼင်ႇၼၼ်လႄႈ ၵဝ်လႆႈႁႅင်းမီးႁႅင်း ၵွပ်ႈပိူဝ်ႈတၼ်းၶူဝ်းမိုဝ်းထႃႇဝရႃႉၽြႃး ၽြႃးပဵၼ်ၸဝ်ႈၵဝ် ဢၼ်မီးယူႇၵႃႈၼိူဝ်ၵဝ်ၼၼ်ႉလႄႈ ဢဝ်ၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ် ၵမ်ႈၽွင်ႈဢွၵ်ႇသေၵႃႈၼႂ်း ၵူၼ်းမဵဝ်း ဢီႉသရေႇလႃႉ တင်းလၢႆ ၸူႉၵၼ်တုမ်ၵၼ်ႁႂ်ႈလႆႈၸွမ်းလူၺ်ႈၵၼ်တင်းၵဝ်ၵႂႃႇဢေႃႈ။

← Chapter 6 Jump to: Chapter 8 →