Ezra 8 — Shan

1ၸရၢင်းၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ် မဵဝ်းပူႇမဵဝ်းပေႃႈၶဝ် ဢၼ်ဝႃႈၸရၢင်းၸိူဝ်ႉၶိူဝ်းၶဝ်ၸိူဝ်းဢၼ် လုၵ်ႉသေၵႃႈတီႈ ဝဵင်း ပႃႇပူႉလုၼ်ႇ လူၺ်ႈၵၼ်တင်းၵဝ်မႃးၼႂ်းၸူဝ်ႈပၢၼ် ၶုၼ်လူင် ဢႃႇတၸေႇရိတ်ႉ ၼၼ်ႉၸိူဝ်းၼၼ်ႉၸမ်ႉ၊-

13ဢေးလီႉၽလႅတ်ႉ၊ ယေႇယေႇလႃႉ၊ သေႇမႃႇယႃႉ ဢၼ်ပဵၼ်ၶဝ်ၸိူဝ်းဢၼ်တူၵ်းလိုၼ်း ၵႃႈၼႂ်းမဵဝ်းၸိူဝ်ႉၶိူဝ်း ဢတေႃးၼီႉၵမ်ႇ ၼၼ်ႉ ဢိၵ်ႇတင်းၵူၼ်းၸၢႆးဢၼ်ပႃးတီႈၶဝ် ႁူၵ်းသိပ်းၵေႃႉ၊-

14ဢူႉသေႇ တင်း ၸပ်ႉပုတ်ႉ မဵဝ်း ပီႉၵဝေႇ ဢိၵ်ႇတင်းၵူၼ်းၸၢႆးဢၼ်ပႃးတီႈၶဝ် ၸဵတ်းသိပ်းၵေႃႉဢေႃႈ။

15ၶဝ်ၸိူဝ်းၼၼ်ႉၸိုင် ၵဝ်ႁႂ်ႈၸူႉၵၼ်တုမ်ၵၼ် ၵႃႈတီႈႁိမ်းၼမ်ႉႁွင်ႈဢၼ်လႆၵႂႃႇၸူးၵႃႈတီႈဝဵင်း ဢႁႃႇဝႃႉ ၼၼ်ႉလႄႈ ႁဝ်းဢွၼ်ၵၼ်ယူႇၵႃႈၼႂ်းသုမ်ႉထဵင် ၵႃႈတီႈၼၼ်ႈသၢမ်ဝၼ်းတဵမ်တဵမ်ဢေႃႈ။ ၵဝ်ၸႅတ်ႈထၢမ်တီႈၵူၼ်းတင်းလၢႆ ဢိၵ်ႇတင်းယိတ်ႈပရေႃးႁဵၵ်ႈၸိူဝ်းၼၼ်ႉလႄႈ မိူဝ်ႈဢၼ်ဢမ်ႇထူပ်းဢမ်ႇႁၼ် ၵူၼ်းမဵဝ်း လေႇဝီႉ သေၵေႃႉသေၵူၼ်းၼၼ်ႉၸိုင်၊-

16ၵဝ်ႁွင်ႉဢဝ် ဢေးလႃႇၸႃႇ၊ ဢရေႇလႃႉ၊ သေႇမႃႇယႃႉ၊ ဢေးလႃႉၼႃႇသၼ်ႇ၊ ယႃႇရိပ်ႉ၊ ဢေးလႃႉၼႃႇသၼ်ႇ၊ ၼႃႇသၼ်ႇ၊ ၸႃႇၶရီႉ၊ မေႇသူႉလမ်ႇ ဢၼ်ပဵၼ်ငဝ်ႈပဵၼ်ႁူဝ်ၸိူဝ်းၼၼ်ႉ ဢိၵ်ႇတင်း ယေႃးယရိပ်ႉ တင်း ဢေးလႃႉၼႃႇသၼ်ႇ ဢၼ်ပဵၼ်ၵေႃႉဢၼ်မီးပိင်ႇၺႃႇၸိူဝ်းၼၼ်ႉမႃးလႄႈ၊-

17ပွႆႇၸႂ်ႉၶဝ်ၵႂႃႇၸူးၵႃႈတီႈ ဢီႉတေႃႇ ၵေႃႉဢၼ်ပဵၼ်ငဝ်ႈပဵၼ်ႁူဝ် ၵႃႈၼႂ်းဝဵင်း ၵသီႉၽီႉ ၼၼ်ႉသေလႄႈ သင်ႇလၢတ်ႈတီႈၶဝ်လွင်ႈဢၼ်ၶဝ်တၵ်းလႆႈလၢတ်ႈၵႂၢမ်းၸိူဝ်ႉၼင်ႇႁိုဝ် တီႈ ဢီႉတေႃႇ ဢိၵ်ႇတင်းပီႈၼွင်ႉၸိူဝ်ႉၶိူဝ်းမၼ်း ၶႃႈၽြႃးဢၼ်ယူႇၵႃႈတီႈ ဝဵင်း ၵသီႉၽီႉ ၸိူဝ်းၼၼ်ႉ ႁႂ်ႈၶဝ်ၼၼ်ႉပၼ်ၶဝ်ၸိူဝ်းဢၼ် တၵ်းလႆႈပႂ်ႉဢမူႉႁိူၼ်း ၽြႃးပဵၼ်ၸဝ်ႈႁဝ်းၼၼ်ႉဢေႃႈ။-

18ၶဝ်ၼၼ်ႉ ၵွပ်ႈပိူဝ်ႈၵျေးၸူးတၼ်းၶူဝ်းမိုဝ်းၽြႃးပဵၼ်ၸဝ်ႈႁဝ်း ဢၼ်မီးယူႇၵႃႈၼိူဝ်ႁဝ်းၼၼ်ႉလႄႈ ဢွၼ်ၵၼ်ႁွင်ႉဢဝ် ၵေႃႉဢၼ်မီးပိင်ႇၺႃႇ ဢၼ်ပဵၼ်ၵူၼ်းမဵဝ်း မႁႃႇလီႉ ၊ မဵဝ်း လေႇဝီႉ ၊ မဵဝ်း ဢီႉသရေႇလႃႉ ၼၼ်ႉ ၵေႃႉၼိုင်ႈ၊ သေႇရၽီႉ ဢိၵ်ႇတင်း လုၵ်ႈလၢင်းပီႈၼွင်ႉမၼ်းသိပ်းပၢႆပႅတ်ႇၵေႃႉ၊-

19ႁႃႇသၽီႉ တင်း ယေႇသႃႇယႃႉ မဵဝ်း မေႇရႃႇရီႉ ဢိၵ်ႇတင်းပီႈၼွင်ႉမၼ်းတင်းလုၵ်ႈလၢင်းၶဝ် သၢဝ်းၼိုင်ႈ၊-

20ၶႃႈၽြႃးဢၼ် တႃႇဝိတ်ႈ တင်းမူးမၢတ်ႈၽွင်းမိူင်းမၼ်းၸိူဝ်းၼၼ်ႉ ၶၢၼ်းဝႆႉႁႂ်ႈလႆႈၵိုတ်ႉႁၢပ်ႇဢမူႉၵူၼ်းမဵဝ်း လေႇဝီႉ တင်းလၢႆၼၼ်ႉမႃးလႄႈ ၶဝ်တင်းသဵင်ႈတင်းလူင်ၼၼ်ႉ ၸိုဝ်ႈသဵင်ၶဝ်ႈပႃးၼႂ်းၸရၢင်းလႄႈ မီးသွင်ပၢၵ်ႇပၢႆသၢဝ်းၵေႃႉဢေႃႈ။

21မိူဝ်ႈၼၼ်ႉ ၵဝ်မီးဢမိင်ႉမွၵ်ႇလၢတ်ႈၶိင်ႇဢၼ်တၵ်းလႆႈၵမ်တၢင်းၵိၼ်ၼၼ်ႉ ၵႃႈတီႈႁိမ်းၼမ်ႉႁွင်ႈ ဢႁႃႇဝႃႉ ၼၼ်ႉ ႁႂ်ႈႁဝ်းလႆႈၶျႃးတူဝ်ၸဝ်ႈၵဝ်ႇတူၵ်းတီႈတႅမ်ႇ ၵႃႈတီႈၽၢႆႇၼႃႈၽြႃးပဵၼ်ၸဝ်ႈႁဝ်းလႄႈ ႁႃဢဝ်သဵၼ်ႈတၢင်းဢၼ်သိုဝ်ႈဢၼ်လီပုၼ်ႈႁဝ်း ဢိၵ်ႇတင်းလုၵ်ႈဢွၼ်ႇလၢင်းဢွၼ်ႇႁဝ်း တင်းဢုၵ်ႉၸႃႇႁဝ်းၵႃႈမီးၼၼ်ႉ တီႈမၼ်းၸဝ်ႈဢေႃႈ။-

22လွင်ႈမၼ်းၸမ်ႉ ၵဝ်ဢူၵ်းဢၢႆလွင်ႈဢၼ်တၵ်းယွၼ်းဢဝ်တပ်ႉႁူဝ်ႁၢၼ်ၵူၼ်းသိုၵ်း၊ ႁူဝ်ႁၢၼ်ၶီႇမႃႉသေ တပ်ႉဢၼ်လႆႈၸွမ်းသူင်ႇႁဝ်း ႁႂ်ႈလႆႈၸွႆႈထႅမ်ႁၢမ်ႈတၢပ်ႈႁႄႉၶႅၼ်ရၢၼ်ႇသူႇ ၵႃႈတႃႈၵႃႈတၢင်းၼၼ်ႉ တီႈၶုၼ်ႁေႃၶမ်းၵွပ်ႈပိူဝ်ႈဢၼ် ႁဝ်းလႆႈလဝ်ႊလၢတ်ႈတီႈၶုၼ်ႁေႃၶမ်းဝႆႉလႄႈဝႃႈ၊ ၵျေးၸူးတၼ်းၶူဝ်းမိုဝ်းၽြႃးပဵၼ်ၸဝ်ႈႁဝ်းၶႃႈ မီးယူႇၵႃႈၼိူဝ်ၶဝ်ၵႃႈဢၼ်ဢွၼ်ၵၼ်ႁႃဢဝ်မၼ်းၸဝ်ႈ ပုၼ်ႈဢၼ်လီဢၼ်ငၢမ်းၼၼ်ႉတီႈၶႃႈဢေႃႈ။ တၼ်းၶူဝ်းမၼ်းၸဝ်ႈ ဢိၵ်ႇတင်း တၢင်းၸႂ်မႆႈၶႆႈၸႃႉမၼ်းၸဝ်ႈၸိူဝ်းၼၼ်ႉ ယူႇၽၢႆႇၼိုင်ႈတင်းၶဝ် ၵႃႈဢၼ်ၸုၼ်ႉပႅတ်ႈမၼ်းၸဝ်ႈၼၼ်ႉတီႈၶႃႈဢေႃႈ၊ ဝႃႈၼင်ႇၼႆဝႆႉၼၼ်ႉဢေႃႈ။-

23ၼင်ႇၼၼ်လႄႈ ႁဝ်းဢွၼ်ၵၼ်ၵမ်တၢင်းၵိၼ်လႄႈ သူးတွင်းယွၼ်းဢဝ်လွင်ႈတၢင်းၼၼ်ႉ တီႈၽြႃးပဵၼ်ၸဝ်ႈႁဝ်းဢေႃႈ။ မၼ်းၸဝ်ႈၵေႃႈထွမ်ႇဢဝ်ဢေႃႈ။

24မိူဝ်ႈၼၼ်ႉ ၵဝ်လိူၵ်ႈၵဵပ်းဢဝ်ယိတ်ႈပရေႃးႁဵၵ်ႈဢၼ်ယႂ်ႇ သိပ်းပၢႆသွင်ပႃး ဢၼ်ဝႃႈ သေႇရၽီႉ၊ ႁႃႇသၽီႉ ဢိၵ်ႇတင်း ပီႈၶဝ်ၼွင်ႉၶဝ် သိပ်းၼိုင်ႈသေယဝ်ႉ၊-

25ၸင်ႈႁိဝ်ႈငိုၼ်းၶမ်းၶိူင်ႈပိူင်တင်းလၢႆ ဢၼ်ဝႃႈတၢင်းပုၵ်ႈၸေႃႇပုၼ်ႈႁိူၼ်းၽြႃးပဵၼ်ၸဝ်ႈႁဝ်း ဢၼ်ၶုၼ်ႁေႃၶမ်းဢိၵ်ႇတင်း ဢတႂၢင်းဝုၼ်ႇၸဝ်ႈ၊ မူးမၢတ်ႈၽွင်းမိူင်းၸဝ်ႈတင်းလၢႆ၊ ၵူၼ်းမဵဝ်း ဢီႉသရေႇလႃႉ ၵႃႈဢၼ်ၸူႉၵၼ်တုမ်ၵၼ်ၵႃႈတီႈၼၼ်ႈၸိူဝ်းၼၼ်ႉလူႇတၢၼ်းၼၼ်ႉသေလႄႈ ဢၢပ်ႈပၼ်တီႈၶဝ်ၼၼ်ႉဢေႃႈ။-

26ၵဝ်ၸင်ႈႁိဝ်ႈငိုၼ်းဢၼ်မီး ႁူၵ်းပၢၵ်ႇပၢႆႁႃႈသိပ်း တလၢၼ်ႇတၢၼ်ႇ ၊ ၶိူင်ႈငိုၼ်းပၢၵ်ႇ တလၢၼ်ႇတၢၼ်ႇ ၊ ၶိူင်ႈၶမ်းပၢၵ်ႇ တလၢၼ်ႇတၢၼ်ႇ ၊-

27ၵွၵ်းဝၢၼ်ႇၶမ်း ဢၼ်ၶၼ်ၸင်ႈမၼ်းမီးတႅင်းၵႃးၶမ်း တရႅၵ်ႉ ႁဵင်ၼိုင်ႈၼၼ်ႉ သၢဝ်းလုၵ်ႈ၊ ၵွၵ်းတွင်းလိူင်ၸႅတ်ႈၸႅတ်ႈ ဢၼ်မျၢတ်ႈပဵင်းတၢၼ်ႇၶမ်းၼၼ်ႉသွင်လုၵ်ႈၸိူဝ်းၼၼ်ႉသေလႄႈ ဢၢပ်ႈပၼ်ၵႃႈၼႂ်းမိုဝ်းၶဝ်ၼၼ်ႉသေယဝ်ႉ၊ သင်ႇလၢတ်ႈလႄႈဝႃႈ၊-

28သူၼႆႉပဵၼ်ဢၼ်မူတ်းၸၢင်ႇပုၼ်ႈထႃႇဝရႃႉၽြႃးဢေႃႈ။ ၶိူင်ႈပိူင်ၸိူဝ်းၼႆႉၵေႃႈ ပဵၼ်ဢၼ်မူတ်းၸၢင်ႇဢေႃႈ။ ငိုၼ်းၼႆႉဢိၵ်ႇတင်းၶမ်းၼႆႉၵေႃႈ ပဵၼ်တၢင်းပုၵ်ႈၸေႃႇဢၼ်မီးၸႂ်ၸေႇတၼႃႇသေလႄႈ လူႇတၢၼ်းတီႈၽြႃးပဵၼ်ၸဝ်ႈပူႇႁဝ်းမွၼ်ႇႁဝ်းၼၼ်ႉဢေႃႈ။-

29သူဢွၼ်ၵၼ်ဢဝ်ၸိူဝ်းၼႆႉ ပႂ်ႉဝႆႉလႄႈလူတူၺ်းဝႆႉယူႇ တေႃႇထိုင်ႁွတ်ႈလႆႈဢဝ်ၸင်ႈႁိဝ်ႈၵႃႈတီႈၽၢႆႇၼႃႈၶဝ်ၸိူဝ်းဢၼ် ပဵၼ်ငဝ်ႈပဵၼ်ႁူဝ်ၼႂ်းယိတ်ႈပရေႃးႁဵၵ်ႈ ဢိၵ်ႇတင်းၵူၼ်းမဵဝ်း လေႇဝီႉ တင်းလၢႆ တင်းၶဝ်ၸိူဝ်းဢၼ်ပဵၼ်ၶုၼ် မဵဝ်းပူႇမဵဝ်းပေႃႈ ဢီႉသရေႇလႃႉ ၵႃႈတီႈဝဵင်း ယေႇရူႉသလႅမ်ႇ ၵႃႈၼႂ်းလုၵ်းႁိူၼ်းထႃႇဝရႃႉၽြႃးၸိူဝ်းၼၼ်ႉတႃႉ၊ ဝႃႈၼင်ႇၼႆဢေႃႈ။-

30ၼင်ႇၼၼ်လႄႈယိတ်ႈပရေႃးႁဵၵ်ႈ ဢိၵ်ႇတင်းၵူၼ်းမဵဝ်း လေႇဝီႉ ၸိူဝ်းၼၼ်ႉ ဢွၼ်ၵၼ်ႁပ်ႉတုင်းဢဝ်ငိုၼ်းၶမ်း၊ ၶိူင်ႈပိူင်ဢၼ်ၸင်ႈႁိဝ်ႈၸိူဝ်းၼၼ်ႉ ႁႂ်ႈလႆႈဢဝ်သူင်ႇၵႃႈတီႈဝဵင်း ယေႇရူႉသလႅမ်ႇ ၵႃႈၼႂ်းႁိူၼ်းၽြႃးပဵၼ်ၸဝ်ႈႁဝ်းဢေႃႈ။

31ၼႂ်းလိူၼ်ပထမႃႉ သိပ်းသွင်ဝၼ်းၼၼ်ႉ ႁဝ်းဢွၼ်ၵၼ်ဢွၵ်ႇသေၵႃႈတီႈႁွင်ႈ ဢႁႃႇဝႃႉ လႄႈၵႂႃႇတၢင်းပႆတၢင်းၸူးၵႃႈတီႈဝဵင်း ယေႇရူႉသလႅမ်ႇ ဢေႃႈ။ တၼ်းၶူဝ်းမိုဝ်းၽြႃးပဵၼ်ၸဝ်ႈႁဝ်း မီးယူႇၵႃႈၼိူဝ်ႁဝ်းလႄႈ မၼ်းၸဝ်ႈၵႄႇသႄႇဢဝ်ႁဝ်းလွတ်ႈသေၵႃႈၼႂ်းမိုဝ်းရၢၼ်ႇသူႇ ဢိၵ်ႇတင်းၵေႃႉဢၼ်လွမ်ပႂ်ႉယူႇ ၵႃႈတႃႈၵႃႈတၢင်းၼၼ်ႉသေလႄႈ၊-

32ႁဝ်းႁွတ်ႈထိုင်ၵႃႈတီႈဝဵင်း ယေႇရူႉသလႅမ်ႇ လႄႈ ယူႇသၢမ်ဝၼ်းသေယဝ်ႉ၊-

33ၼႂ်းဝၼ်းၸတုၵ်ႉထႃႉၼၼ်ႉ၊ ၶဝ်ၼၼ်ႉဢွၼ်ၵၼ် ၸင်ႈႁိဝ်ႈငိုၼ်း၊ ၶမ်း၊ ၶိူင်ႈပိူင်ၸိူဝ်းၼၼ်ႉၵႃႈၼႂ်းႁိူၼ်းၽြႃးပဵၼ်ၸဝ်ႈႁဝ်းသေလႄႈ ဢၢပ်ႈပၼ်ၵႃႈၼႂ်းမိုဝ်း မေႇရမုတ်ႉ လုၵ်ႈၸၢႆးယိတ်ႈပရေႃးႁဵၵ်ႈ ဢူႉရီႉယႃႉ ၼၼ်ႉလႄႈ ဢေးလႃႇၸႃႇ လုၵ်ႈၸၢႆး ၽီႉၼႁတ်ႉ ၵေႃႈ မီးယူႇလူၺ်ႈၵၼ်တင်းမၼ်းလႄႈ ယေႃးၸပတ်ႉ လုၵ်ႈၸၢႆး ယေႃးသူႉ ဢိၵ်ႇတင်း ၼေႃႇတီႉ လုၵ်ႈၸၢႆး ပီႉၼုၺ်ႇ ၵူၼ်း လေႇဝီႉ ၸိူဝ်းၼၼ်ႉ ၽွမ်ႉလူၺ်ႈၵၼ်တင်းၶဝ်ၼၼ်ႉသေလႄႈ၊-

34ဢဝ်ၼပ်ႉဢၢၼ်ႇၸင်ႈႁိဝ်ႈတင်းသဵင်ႈတင်းလူင်ၸိူဝ်းၼၼ်ႉလႄႈ မၢတ်ႈမၢႆတႅမ်ႈဝႆႉ ၶၼ်ၸင်ႈၼမ်ႉၼၵ်းမၼ်းတင်းသဵင်ႈတင်းလူင်ဝႆႉၼႂ်းဝၼ်းၼၼ်ႉၵမ်းလဵဝ်ဢေႃႈ။-

35ၶဝ်ၸိူဝ်းဢၼ်ဢွၵ်ႇသေၵႃႈၼႂ်းမုၵ်ႉၸိူဝ်းၶဝ်ၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉမႃးၸိူဝ်းၼၼ်ႉၵေႃႈ ဢွၼ်ၵၼ်ဢဝ်ယိတ်ႈဢၼ်တုတ်ႇၽႆး ဢၼ်ဝႃႈဝူဝ်းသိပ်းသွင်တူဝ် ပုၼ်ႈၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်၊ သူဝ်းပေႃႈ ၵဝ်ႈသိပ်းပၢႆႁူၵ်းတူဝ်၊ သူဝ်းဢွၼ်ႇ ၸဵတ်းသိပ်းပၢႆၸဵတ်းတူဝ်၊ ပႄႉပေႃႈ သိပ်းသွင်တူဝ် ပုၼ်ႈယိတ်ႈဢၼ်ၽေႇဢပႅတ်ႈၼၼ်ႉၸိူဝ်းၼၼ်ႉ ပုၵ်ႈၸေႃႇတီႈၽြႃးပဵၼ်ၸဝ်ႈ မဵဝ်း ဢီႉသရေႇလႃႉ ဢေႃႈ။ တင်းသဵင်ႈတင်းမူတ်းၼႆႉၸမ်ႉ၊ ပဵၼ်ယိတ်ႈဢၼ်တုတ်ႇၽႆး တီႈထႃႇဝရႃႉၽြႃးဢေႃႈ။

36ၶဝ်ဢဝ်ဢမိင်ႉဢၼ်ၶုၼ်ႁေႃၶမ်းသင်ႇလၢတ်ႈဝႆႉၸိူဝ်းၼၼ်ႉ ဢၢပ်ႈပၼ်တီႈၸဝ်ႈၽႃႉလႂ် တင်းမဵဝ်ႉဝုၼ်ႇၵႃႈတီႈၽၢႆႇဝၼ်းတူၵ်းၼမ်ႉႁွင်ႈလႂ် ၸိူဝ်းၼၼ်ႉလႄႈ ၶဝ်ၼၼ်ႉဢွၼ်ၵၼ်လူတူၺ်း ၸွႆႈၵမ်ႉၸွႆႈထွၵ်ႈၵူၼ်းတင်းလၢႆ ဢိၵ်ႇတင်းႁိူၼ်းၽြႃးပဵၼ်ၸဝ်ႈဢေႃႈ။