Ezra 5

Shan

← Chapter 4 Jump to: Chapter 6 →

1မိူဝ်ႈၼၼ်ႉ ပရေႃးၽႅတ်ႈဢၼ်ဝႃႈ ပရေႃးၽႅတ်ႈ ႁၵ်ႉၵႄး တင်းပရေႃးၽႅတ်ႈ ၸႃႇၶရီႉ လုၵ်ႈၸၢႆး ဢီႉတေႃႇ ၸိူဝ်းၼၼ်ႉဢိင်ပိုင်ႈၼႃႇမႃႉၸိုဝ်ႈသဵင်ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ သေလႄႈ ႁေႃးလၢတ်ႈတီႈၵူၼ်း ယူႉတႃႉ တင်းလၢႆဢၼ်မီးၵႃႈၼႂ်းမိူင်း ယူႉတႃႉ တင်းဝဵင်း ယေႇရူႉသလႅမ်ႇ ၼၼ်ႉဢေႃႈ။-

2ၵမ်းၼၼ်ႉ ၸေႇရူႉပႃႉပေႇလႃႉ လုၵ်ႈၸၢႆး သႃႇလႃႉသေးလႃႉ ဢိၵ်ႇတင်း ယေႃးသူႉ လုၵ်ႈၸၢႆး ယေႃးၸႃႉ ၼၼ်ႉဢွၼ်ၵၼ်လုၵ်ႉလႄႈ သမ်ႉၶိုၼ်းၸႃႉတႄႇႁဵတ်းႁိူၼ်းၽြႃးပဵၼ်ၸဝ်ႈ ၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉလႄႈ ပရေႃးၽႅတ်ႈၽြႃးပဵၼ်ၸဝ်ႈၸိူဝ်းၼၼ်ႉၵေႃႈ ၽွမ်ႉၵၼ်ၸွႆႈၵၼ်တင်းၶဝ်ယူႇဢေႃႈ။

3မိူဝ်ႈၼၼ်ႉ တႃႇတၼေး မဵဝ်ႉဝုၼ်ႇၽၢႆႇဝၼ်းတူၵ်းၼမ်ႉႁွင်ႈ တင်း သေးသႃႇပေႃးၸၼေး ဢိၵ်ႇတင်းၵေႃႉသေႈဢၼ်ႁူမ်ႈပွင်းၵၼ်တင်းၶဝ်ၸိူဝ်းၼၼ်ႉ ဢွၼ်ၵၼ်မႃးလႄႈထၢမ်တီႈၶဝ်လႄႈဝႃႈ၊ ၽူႈလႂ်မီးဢမိင်ႉႁႂ်ႈသူလႆႈတႄႇႁဵတ်းႁိူၼ်းၼႆႉလႄႈ ႁႂ်ႈလမ်းဝဵင်းၼႆႉယဝ်ႉတူဝ်ႈ၊ ဝႃႈၼင်ႇၼႆလႄႈ၊-

4သမ်ႉထၢမ်လႄႈဝႃႈ၊ ၸိုဝ်ႈသဵင်ၶဝ်ၸိူဝ်းဢၼ်တႄႇႁဵတ်းႁိူၼ်းၼႆႉၸမ်ႉ၊ ၸိုဝ်ႈၵႃႈသင်၊ ဝႃႈၼင်ႇၼႆသေၵေႃႈ၊-

5တႃၽြႃးပဵၼ်ၸဝ်ႈၶဝ် လူတူၺ်းၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ် ၵူၼ်း ယူႉတႃႉ တင်းလၢႆၸိူဝ်းၼၼ်ႉယူႇလႄႈ ၶဝ်ၼၼ်ႉဢမ်ႇလႆႈႁႂ်ႈတၢင်းႁဵတ်းတၢင်းသၢင်ႈၶဝ်ၼၼ်ႉ လႆႈထၢတ်ႇၵႂႃႇၵိုတ်းၵႂႃႇၼႂ်းၸူဝ်ႈဢၼ်ဢမူႉၼၼ်ႉ ဢမ်ႇပႆႇႁွတ်ႈပႆႇထိုင်တီႈ တႃႇရီႉ လႄႈ လိၵ်ႈဢၼ်ၶိုၼ်းဢိူဝ်ၶိုၼ်းလၢတ်ႈလွင်ႈမၼ်းၼၼ်ႉ ဢမ်ႇပႆႇၶိုၼ်းႁွတ်ႈၶိုၼ်းမႃးၼၼ်ႉဢေႃႈ။

6လၢၵ်ႈၶၢမ်ႇလိၵ်ႈဢၼ် တႃႇတၼေး မဵဝ်ႉဝုၼ်ႇၽၢႆႇဝၼ်းတူၵ်းၼမ်ႉႁွင်ႈ တင်း သေးသႃႇပေႃးၸၼေး ဢိၵ်ႇတင်းၵေႃႉသေႈ ဢၼ်ႁူမ်ႈပွင်းၵၼ်တင်းၶဝ်ဢၼ်ဝႃႈ ၵူၼ်း ဢၽႃႇသသၢၵ်ႉ ဢၼ်ယူႇၵႃႈတီႈၽၢႆႇဝၼ်းတူၵ်းၼမ်ႉႁွင်ႈၸိူဝ်းၼၼ်ႉ ပၼ်ၵႂႃႇတီႈၶုၼ်လူင် တႃႇရီႉ ၼၼ်ႉ၊-

7ဢၼ်ဝႃႈလိၵ်ႈဢၼ်ၶဝ်ပၼ်ၵႂႃႇတီႈၶုၼ်ၼၼ်ႉလႄႈ ပႃးတၢင်းဢၼ်တႅမ်ႈဝႆႉၸိူဝ်ႉၼင်ႇၼႆၼၼ်ႉလႄႈဝႃႈၸမ်ႉ၊ ႁႂ်ႈၵတ်းယဵၼ်ၶျၢမ်းသႃႇမီးတီႈၶုၼ်လူင် တႃႇရီႉ သေႇသေႇ သေၵမ်းလူၺ်ႈ။-

8ၶႅၼ်းတေႃႈႁႂ်ႈၸဝ်ႈၶုၼ်လူင်ႁူႉလွင်ႈဢၼ်ၶႃႈၸဝ်ႈႁဝ်းၶဝ် ႁွတ်ႈထိုင်ၵႃႈတီႈဢိူင်ႇ ယူႉတႃႉ ၵႃႈတီႈႁိူၼ်းၽြႃးပဵၼ်ၸဝ်ႈဢၼ်ယႂ်ႇမျၢတ်ႈၼႃႇ ဢၼ်မီးတၢင်းဢၼ်ဢဝ်မၢၵ်ႇႁိၼ်လူင်တႄႇႁဵတ်းယူႇ၊ ဢဝ်မႆႉတၢင်ႇသႂ်ႇၵႃႈၼိူဝ်ၽႃႁိၼ်ယူႇသေလႄႈ တၢင်းဢၼ်ပွင်ဢၼ်ႁဵတ်းမၼ်းၼၼ်ႉ ပဵၼ်ဢၼ်ၶၼ်ဢၼ်ၽႂ်းၼႃႇလႄႈ တၢင်းၵျၢမ်ႇတၢင်းပွင်ၶဝ်ၼၼ်ႉပဵၼ်ၼၼ်ႉသေၵမ်းတီႈၶႃႈ။-

9ၶႃႈၸဝ်ႈႁဝ်းၶဝ်တွင်ႈထၢမ်တီႈၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၸိူဝ်းၼၼ်ႉလႄႈဝႃႈ၊ ၽူႈလႂ်မီးဢမိင်ႉ ႁႂ်ႈသူလႆႈတႄႇႁဵတ်းႁိူၼ်းၼႆႉလႄႈ ႁႂ်ႈလမ်းဝဵင်းၼႆႉယဝ်ႉတူဝ်ႈ၊ ဝႃႈၼင်ႇၼႆလႄႈ၊-

10သမ်ႉထၢမ်ၸိုဝ်ႈသဵင်ၶဝ် ႁႂ်ႈလႆႈဢဝ်ၸိုဝ်ႈဢဝ်သဵင်ၶဝ်ၸိူဝ်းဢၼ် ပဵၼ်ငဝ်ႈပဵၼ်ႁူဝ်ၶဝ်ၼၼ်ႉလႄႈ ပၼ်မႃးတီႈၸဝ်ႈႁဝ်းၼၼ်ႉသေယဝ်ႉ၊-

11ၶဝ်ၼၼ်ႉဢွၼ်ၵၼ်ၶိုၼ်းလၢတ်ႈလႄႈဝႃႈ၊ ႁဝ်းၼႆႉပဵၼ်ၶႃႈၽြႃးပဵၼ်ၸဝ်ႈ၊ ၸဝ်ႈၽုင်ႇၵၢင်ႁၢဝ်တင်းလိၼ်မိူင်းၼၼ်ႉလႄႈ ဢွၼ်ၵၼ်မႄးၵုမ်းမႄးႁဵတ်းႁိူၼ်းၸဝ်ႈဢၼ်တႄႇႁဵတ်းမိူဝ်ႈၵွၼ်ႇဢွၼ်ၼႆႉၼၼ်ႉ ဢၼ်ၶုၼ်ႁေႃၶမ်း ဢီႉသရေႇလႃႉ ပႃးၼိုင်ႈဢၼ် ယႂ်ႇမျၢတ်ႈၼႃႇလူင်လၢင်ၼၼ်ႉ တႄႇႁဵတ်းႁႂ်ႈယဝ်ႉႁႂ်ႈတူဝ်ႈၼၼ်ႉဢေႃႈ။-

12လိၼ်ၼၼ်ႉ၊ ၵွပ်ႈပိူဝ်ႈဢၼ်ပူႇႁဝ်းမွၼ်ႇႁဝ်းတိုၵ်းယူင်းတၢင်းၸႂ်မႆႈၶႆႈၸႃႉၽြႃးပဵၼ်ၸဝ်ႈ ၸဝ်ႈၽုင်ႇၵၢင်ႁၢဝ်ၼၼ်ႉလႄႈ မၼ်းၸဝ်ႈဢဝ်ၶဝ်ဢၢပ်ႈပၼ် ၵႃႈၼႂ်းမိုဝ်း ၼေႇပူႉၶတ်ႉၼေႇၸႃႇ ၶုၼ်ႁေႃၶမ်း ပႃႇပူႉလုၼ်ႇ ၶုၼ် ၶႃႇလတေး ဢၼ်ယႃႉၽဵဝ်ႈႁိူၼ်းၸဝ်ႈၼႆႉပႅတ်ႈလႄႈ သိမ်းဢဝ်ၵူၼ်းဝၢၼ်ႈၵူၼ်းမိူင်းတင်းလၢႆ ၵႂႃႇၵႃႈတီႈမိူင်း ပႃႇပူႉလုၼ်ႇ ပုၼ်ႉၼၼ်ႉဢေႃႈ။-

13ၼႂ်းပီႊဢၼ် ၵူႉရူႉ ၶုၼ်ႁေႃၶမ်း ပႃႇပူႉလုၼ်ႇ ၸၢမ်ႇႁၢင်ႈၸၢမ်ႇႁေႃပီႊပထမႃႉၼၼ်ႉ၊ ၶုၼ်လူင် ၵူႉရူႉ ၼၼ်ႉ မီးဢမိင်ႉႁႂ်ႈမႄးၵုမ်းမႄးႁဵတ်းႁိူၼ်းၽြႃးပဵၼ်ၸဝ်ႈၼႆႉဢေႃႈ။-

14ၶိူင်ႈငိုၼ်းၶိူင်ႈၶမ်း ဢၼ်ၸၢပ်ႈသႅင်ႇၵၼ်တင်းႁိူၼ်းၽြႃးပဵၼ်ၸဝ်ႈ ဢၼ် ၼေႇပူႉၶတ်ႉၼေႇၸႃႇ ဢဝ်ဢွၵ်ႇသေၵႃႈၼႂ်းပိၵ်ႈမၢၼ်ႇၸဝ်ႈ ဢၼ်မီးၵႃႈတီႈဝဵင်း ယေႇရူႉသလႅမ်ႇ ၼၼ်ႉလႄႈ ဢဝ်ၵႂႃႇဝႆႉၵႃႈတီႈပိၵ်ႈမၢၼ်ႇဝဵင်း ပႃႇပူႉလုၼ်ႇ ၸိူဝ်းၼၼ်ႉၸိုင် ၶုၼ်လူင် ၵူႉရူႉ ၼၼ်ႉ သမ်ႉဢဝ်ဢွၵ်ႇသေ ၵႃႈၼႂ်းပိၵ်ႈမၢၼ်ႇဝဵင်း ပႃႇပူႉလုၼ်ႇ ၼၼ်ႉလႄႈ ဢၢပ်ႈပၼ်ၵႃႈၼႂ်းမိုဝ်းၵေႃႉဢၼ်လႆႈၸိုဝ်ႈလႆႈသဵင် သေႇသႃႉပႃႇၸႃႇ လႄႈ ၶုၼ်ၼၼ်ႉၶၢၼ်းဝႆႉၼႂ်းဢရႃႇမဵဝ်ႉဝုၼ်ႇၼၼ်ႉသေလႄႈ မီးဢမိင်ႉတီႈမၼ်းလႄႈဝႃႈ၊-

15ဢဝ်ၶိူင်ႈပိူင်ၸိူဝ်းၼႆႉသေလႄႈ ၵႂႃႇဝႆႉၵႃႈၼႂ်းပိၵ်ႈမၢၼ်ႇၸဝ်ႈ ဢၼ်မီးၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉလႄႈ ႁႂ်ႈၶိုၼ်းတႄႇၶိုၼ်းႁဵတ်းႁိူၼ်းၽြႃးပဵၼ်ၸဝ်ႈ ၵႃႈၼႂ်းတီႈၵဝ်ႇမၼ်းၼၼ်ႉသေ၊ ဝႃႈၼင်ႇၼႆလႄႈ၊-

16သေႇသႃႉပႃႇၸႃႇ ၼၼ်ႉမႃးလႄႈ ၶျႃးဝႆႉငဝ်ႈႁၢၵ်ႈတိူၵ်ႈၽြႃးပဵၼ်ၸဝ်ႈ ဢၼ်မီးၵႃႈၼႂ်းဝဵင်း ယေႇရူႉသလႅမ်ႇ ၼႆႉသေယဝ်ႉ၊ ၸႃႉၸဵမ်မိူဝ်ႈၶိင်ႇၼၼ်ႉလႄႈတေႃႇထိုင်ႁွတ်ႈမိူဝ်ႈလဵဝ်ၼႆႉ တႄႇႁဵတ်းယူႇသေလႄႈဢမ်ႇပႆႇယဝ်ႉပႆႇတူဝ်ႈၵူၺ်ႉ၊ ဝႃႈၼင်ႇၼႆတီႈၶႃႈဢေႃႈ။-

17ပိူဝ်ႈၼႆလႄႈ ပေႃးၸဝ်ႈၶုၼ်လူင်မီးဢလူဝ်ႇၸိုင်၊ ၶႅၼ်းတေႃႈႁႂ်ႈႁႃဢဝ်ၵႃႈၼႂ်းတိူၵ်ႈၽၼ်ႇတႃႇၸဝ်ႈၶုၼ်လူင် ဢၼ်မီးၵႃႈၼႂ်းဝဵင်း ပႃႇပူႉလုၼ်ႇ ၼၼ်ႉ ႁႂ်ႈလႆႈႁူႉလွင်ႈဢၼ်ၶုၼ်လူင် ၵူႉရူႉ ၼၼ်ႉ လႆႈမီးဢမိင်ႉလွင်ႈဢၼ်တၵ်းလႆႈတႄႇႁဵတ်းႁိူၼ်းၽြႃးပဵၼ်ၸဝ်ႈ ဢၼ်မီးၵႃႈတီႈဝဵင်း ယေႇရူႉသလႅမ်ႇ ၼၼ်ႉႁိုဝ် ဢမ်ႇမီးႁိုဝ်ၼၼ်ႉသေၵမ်းတီႈၶႃႈ။ ၵမ်းလိုၼ်းၸဝ်ႈၶုၼ်လူင် ၶႅၼ်းတေႃႈပူင်ဢမိင်ႉၸဝ်ႈႁဝ်းမႃးတီႈၶႃႈၸဝ်ႈႁဝ်းၶဝ် ၸွမ်းၵႃႈၼင်ႇဢၼ်ၸဝ်ႈၶုၼ်လူင်မီးဢလူဝ်ႇၼၼ်ႉသေၵမ်းတီႈၶႃႈ၊ ဝႃႈၼင်ႇၼႆဢေႃႈ။

← Chapter 4 Jump to: Chapter 6 →