Judges 20 — Sukuma 2019

1A Baisilaeli bibilinga Mispa pye a bose; biza pye mu būsangī bumò, kūfuma Dani kūshisha Beeli-sheba, nū kūfuma ū kū sī ya Gileadi.

2A batongeeji ba ng'anda ja Baisilaeli ī jose būlī ng'wene wīmīīla hipandī lyakwe ū mu kwibilinga kwa banhū ba ng'wa Mulungu; baalī bashilikale shihūmbī magana anè na makūmi ataano, baakoolī ba kūlwīīla shū.

3(A banhū ba lūganda lwa Benjamini bigwa ī gīkī a Baisilaeli bajaga Mispa.) Hūna a Baisilaeli būbawīla, “Bing'we tūwīlagi ūmo yajīlile nose mhayo gwamalofu gīkī gwilonga.”

4Ū Nnawī ū ngoshi wa nkīma ūyo walī wabūlagwa ūhaya, “Naalī mu lūgendo nū nke wane; aho nashika Gibea ya mu sī ya banhū ba lūganda lwa ng'wa Benjamini nūūbona nalaale.

5Ū mu būjikū a banhū ba Gibea biza bīpīndya ī numba, baalī na ng'hūmbū ja kūnibūlaga ū nene; hūna būng'wiguusīja ū nke wane kūshisha ūcha.

6Na lūūlū nūnsola ū nke wane nūmutagūla mapingili mapingili; nūūtwaala ipingili līmò līmò hose pye ū mu sī ja wingīji wa Baisilaeli, nguno bīītile mhayo gwabūbi na gwamalofu ū mu Isilaeli.

7Alilūūlū Baisilaeli īkī pye mulīho aha, gūhooyelagi mufunye ū būlamuji wing'we.”

8Pye a banhū ūmo baalī bagelelile bīīmīīla, būhaya gīkī, “Atīho nūūlū ūmò wise ū wa kūshoka kwiheema; nūūlū atizilonga munhū ose ose wa kūja kū ng'wakwe.

9Ū mhayo gwa kwīyīītīla ī Gibea gūlī gīkī, tūkwīdumīla wa ndīīma ja kūsolwa wa kūtūlīja mbale.

10Tūkūyūsola banhū ikūmi kūfuma mu būlī igana lya banhū ba ng'anda jose ja Baisilaeli; hama ū kūfuma ū mu banhū shihūmbī, tūkūsola mo igana līmò; ū mu banhū shihūmbī ikūmi ū ng'weene tūkūsola banhū shihūmbī shimò. A benabo bakūbiza batwaji ba shilīwa na shiigunaanīlo shingī ū kū bashilikale. A bashilikale ūlū balashike ī Gibea ū kū banhū ba lūganda lwa ng'wa Benjamini, bakūbinha īyo ībiigeleelilwe kūlwa mhayo gwamalofu ūyo baagwītile mu sī ya Isilaeli.”

11Na lūūlū pye gete a Baisilaeli a bagosha bibilinga mu būsangī būmò kwilwisha nū nzengo gwenūyo.

12Ī ng'anda ja Baisilaeli jūūtūma banhū hose pyī ū mu sī ya banhū ba lūganda lwa Benjamini būja bakūhayaga, “Ni yajile kinehe nose mhayo gwamalofu gīkī gwītwa ū mu bing'we?

13Alilūūlū, bafunyagi a banhū ba nhūngwa ja būbi gīko, abo balī ū mu Gibea tūbabūlage, tūwīnje ū būbi wenūbū ū mu Baisilaeli.” Alīyo a banhū ba lūganda lwa ng'wa Benjamini batabadegelekile a badūgū babo a Baisilaeli.

14Bikobya dūhū nabo kūfuma hose pyī ū mu mizengo yabo, biza bibilingīla Gibea kwilwisha būlūgū na a Baisilaeli.

15A banhū ba lūganda lwa ng'wa Benjamini bitana bashilikale kūfuma ū mu mizengo yabo, ū lūshikū lwenūlo bigela shihūmbī makūmi abīlī na shitandatū; bamani ba kūlwīīla shū, kūleka kūbabala abo magana mpungatī a ba mu nzengo gwa Gibea.

16Ū mu bashilikale benabo baalīmo bagosha basolwa magana mpungatī ba lūmoso, būlī ng'wene walī ndeeba no, atūūfuuja shikolo shose shose, nūūlū lūkabiza lūywīīlī lūmò ūlū ūlūluuta iwe bo kūtūmamīla lūtaago.

17A Baisilaeli abo bakikuminga, kūleka kūbabala a ba lūganda lwa Benjamini, baalī bagosha shihūmbī magana anè, pye banhū ba būlūgū, bamani ba kūlwīīla shū.

18Na lūūlū a Baisilaeli būja Beeseli kūbūūja kūlī SEEBA. Būūhaya gīkī, “Ūmo tūlī ng'wenūmu, nani atonge ū kūja kwilwisha na a banhū ba lūganda lwa Benjamini?” Ū SEEBA ūhaya, “Yuda ni atongage ū kūja.”

19Ha ntondo yaho, a Baisilaeli būmisha dilū, beegeela ī Gibea būūkakoma ng'hambī yabo.

20Hūna a Baisilaeli būbasanga ī Gibea a banhū ba lūganda lwa ng'wa Benjamini, bamba būlūgū kwilwisha nabo.

21A banbū ba lūganda lwa ng'wa Benjamini aho baapuluka ū mu nzengo gwa Gibea, būbahūlūla Baisilaeli shihūmbī makūmi abīlī na shibīlī ū lūshikū lwenūlo.

22Alīyo a Baisilaeli bitimbya ng'holò, gīkī balaaje hangī ū kwipandī lyenīlo īlo baalī ū lūshikū lwa kwandya, bakambe hangī ū būlūgū.

23Gwike a Baisilaeli būja kūnīlīīla ū SEEBA taame; būnīlīīla na kūmūūja balīhaya, “Tūje hangī ū kū būlūgū tūkilwishe na a badūgū bise a banhū ba lūganda lwa ng'wa Benjamini?” Nang'hwe ū SEEBA ūbawīla, “Jagi ko mukalwe nabo.”

24Na ng'hana nū mu lūshikū lwa kabīlī lwaho a Baisilaeli beegeela ko kwamba būlūgū, gīkī balwe na a banhū ba lūganda lwa ng'wa Benjamini.

25Ū lūkangala lwenūlū a banhū ba lūganda lwa ng'wa Benjamini aho baafuma ū mu Gibea gīkī bilwishe nabo, būbabūlaga Baisilaeli shihūmbī ikūmi na shinaane, bose bamani baakūlwīīla shū.

26Hūna pyī ī libità lya bashilikale ba Baisilaeli būlinha bajile Beeseli; būshika bigaasha kū būtongi bo ng'wa SEEBA bakūlīlaga. Ū lūshikū lwenūūlo būfunga, būfunya na shitambò sha kūpemva hamò na shakwinha sha būsangī kūlwa nguno ya ng'wa SEEBA.

27Hanuma būmūūja a Baisilaeli ū SEEBA, (ū mu shikū jenījo ī lisandīko lya būlagane bo ng'wa SEEBA lyalī kwenūko;

28nū Finehasi ū ng'witūnja o ng'wa Elieza, ng'witūnja o ng'wa Alooni, wikalaga kwenūko akūtūmamaga kū būtongi walyo.) Na lūūlū būbūūja balīhaya gīkī, “Tūje hangī ū kwilwisha būlūgū na a badūgū bise a banhū ba lūganda lwa Benjamini, nūūlū hamo tooye lūūlū?” Ū SEEBA ūbawīla, “Jaagi nguno ī ntondo nakūbatūūla mu makono ging'we.”

29Hūna a Baisilaeli būsola banhū ba kwibanda mu masaka kūgūpīndīlīja ū nzengo gwa Gibea.

30Ū mu lūshikū lwa kadatū lwaho būja hangī ū kūbadumīla a banhū ba lūganda lwa ng'wa Benjamini; bamba ū būlūgū kwilwisha nū nzengo gwa Gibea gīt'ūmo bīītīlaga na kale.

31A banhū ba lūganda lwa ng'wa Benjamini būdutwa kūgūsegenela ū nzengo. Bandya kūbatūla na kūbabūlaga bamò ba banhū aho bakūpeelaga ū mu matogolo nū mu makūūwa; līmò lya makūūwa genayo lyaalī ya kūja Beeseli, līngī Gibea; būbūlaga Baisilaeli ba kūshika gītī makūmi adatū gīko.

32A banhū ba lūganda lwa ng'wa Benjamini būyiwīla gīkī, “Nī lelo twabapyena gīt'ūmo tūkwītīlaga na kale.” Alīyo a Baisilaeli biwīlaga gīkī, “Tūbapeelagi tūbadute kūja kū makūūwa bagūsegenele ū nzengo.”

33Pye a Baisilaeli bīnga ū mu mapandī gabo ūmo baalī bihela, būja būūkashika Baali-tamali; hūna a bibandīīji būpuluka ū mu masaka ayo baalī bibanda, ū kwiza kūgūdumīla ū nzengo gwa Gibea būgūfumīīla mu ng'weli.

34Banhū shihūmbī ikūmi ba būdūla mu kalwīīle ka būlūgū ū mu Baisilaeli, būgūsanga ū nzengo gwa Gibea kwilwisha nago būlūgū. Ū būlūgū wenūbo būkabiza wa kalwīīle kabūbi no; alīyo a banhū ba lūganda lwa ng'wa Benjamini baalī batīdeebaga ī mibi īyo yaalī hihī kūbilongela.

35Ū SEEBA ūbapyena a banhū ba lūganda lwa ng'wa Benjamini ū kū būtongi wa Baisilaeli; ū lūshikū lwenūlo a Baisilaeli būbūlaga banhū shihūmbī makūmi abīlī na shitaano na igana līmò, ū kūfuma ū mu banhū ba lūganda lwa Benjamini; bose baalī banhū ba kūlwīīla shū.

36A banhū ba lūganda lwa ng'wa Benjamini būbona hape gīkī baaheewa. A Baisilaeli bakandya kūbapeela a banhū ba lūgūnda lwa ng'wa Benjamini, nguno baalī bamanile gīkī balīho bibandīīji abo baalī baabatūūla hihī nū nzengo gwa Gibea.

37Na ng'hana a banhū abo baalī bibanda bakīīta kaja kaja, būpeela kūja ū mu nzengo gwa Gibea, būshika būgūsaambaalīla wangū wangū, būbamala shū pye a banhū ba mu nzengo gwenūyo.

38A Baisilaeli baalī baagūsha na a bibandīīji gīkī balaagūpembe ū nzengo gūdundumūke lyochi itaale.

39Hūna a Baisilaeli ūlū būbona gīko bakūgalūka bandye būlūgū. Ū ng'wikanza lyenīlo a banhū ba lūganda lwa Benjamini bilembaga balīhaya, “Nī lelo twabapyena gīt'ūmo twalīītīlaga ū mu kalwīīle a ka shikū ījo jaabītile;” na ng'hana būbatūla na kūbabūlaga Baisilaeli (ba kūshika gītī makūmi adatū.)

40Alīyo ī lyochi lya kūfuma ū mu nzengo aho lyadundumūka, a banhū ba lūganda lwa ng'wa Benjamini bahayūgalūka, būgūbona ū nzengo ū gose gūkūdundumūkaga lyochi lījile kwigūlya kwilunde.

41Hū a henaho a Baisilaeli būbagalūkīla; a banhū ba lūganda lwa ng'wa Benjamini bakogoha no, nguno bakabona gīkī yababipīla ī mihayo.

42Bandya kūbapeela a Baisilaeli bajile kwitogolo; alīyo batabūshigile ū būlūgū. A Baisilaeli abo baafumaga ū mu mizengo būbakūūbya būja bakūbabūlagaga.

43Būūbanyamanīja ha gatī a banhū ba lūganda lwa ng'wa Benjamini būbapeeja, būbapandīkīla bbihī dūhū; kīya ya Gibea, būbabūlagīla henaho.

44Būūgwa banhū shihūmbī ikūmi na shinaane ba mu lūganda lwa ng'wa Benjamini; bose bamani ba kūlwa mu būlūgū.

45Aho baagalūka gīkī bapeele kūja kwitogolo bakapīlīle kwiwe lya Limoni, a Baisilaeli būbabūlaga shihūmbī shitanò aho balī ū mu makūūwa ga nzīla. Bongeja kūbakūūbya kūja Gidomu, būbabūlaga hangī bangī shihūmbī shibīlī.

46Na lūūlū ū lūshikū lwenūlo būbiza baashila banhū shihūmbī makūmi abīlī na shitaano ū mu lūganda lwa ng'wa Benjamini; a bose bamani ba mihayo ya būlūgū.

47Alīyo banhū magana atandatū būnyamuka; būpeelela kwitogolo, būūkapīlīla kwiwe lya Limoni; bikala kwenūko myeji īnè.

48A Baisilaeli būshoka ū kū sī ya banhū ba lūganda lwa ng'wa Benjamini, būūkabamala shū pye a banhū nī mitugo, na būlī shose shose īsho baashibonaga. Nī minzengo ī yose īyo bīībonaga bīīpemba moto.