bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
Judges 9
Judges 9
Sukuma 2019
← Chapter 8
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 10 →
1
Ū Abimeleki ū ng'witūnja o ng'wa Yelubaa ūhooya na baamamiye ū mu Shekemu ng'wenūmo, a basīzaye ba ng'wa nina. Ūbawīla a benabo, na a bangī a ba lūdūgū lwa ng'wa nina a bose; ūhaya,
2
“Bing'we babūūjagi a banhū ba mu Shekemu gīkī, ‘Angū ūyo gūlī hambū hambū gūlī kinehe ū kū bing'we, kūsugwa na bitūnja bose makūmi mpungatī a ba ng'wa Yelubaa, nūūlū kūsugwa na munhū ūmò dūhū?’ Hama nīyo a bing'we izūkagwi gīkī, ū nene nalī mīlī gwing'we, na mininga ging'we.”
3
A baamamiye bīhaya ī yenīyī ū mu matū ga bana Shekemu, nabo būbona gīkī īlī hambū hambū abasuge ū wei; būhaya, “Nīyo ū ng'wenūyū ndūgū wise gete a bise.”
4
Būūsola na feza kūfuma mu hekalu ya ng'wa mulungu wabo Baali-beliti, ja būdito wa kūkīla a ha kilo īmò; būng'winha. Ū Abimeleki ūjitūmamīla kwega banhū bahūnga būbiza balondeeji bakwe.
5
Ūja ī Ofla ū kū ng'wa ise, ūūkababūlaga a badūgūye; a bitūnja ba ng'wa Yelubaa abo makūmi mpungatī, a bose pyī ūbabūlaga ng'wikanza līmò lyenīlo; Yotamu dūhū ū ng'witūnja wa kūmalīīja o ng'wa Yelubaa h'ūyo ūpūlūgūka, ūpeela ūūkibisa.
6
Hanuma ya henaho pye a banhū ba Shekemu na a ba Beti-milo bikuminga kū ntī ntaale gwalī hihī na ng'hambī ya balang'hani ū mu Shekemu ng'wenūmo; būntūūla ū Abimeleki kūbiza ntemi wabo.
7
Ū Yotamu aho wawīlwa ū mhayo gweenūyo, ūja ūūkalinha kwigūlya ya lūgūlū lwa Gelizimu, ūbahamukīla na ilaka lya higūlya alīhaya, “Nidegelekagi bing'we bana Shekemu, hūna ū Mulungu nang'hwe akūmudegeleka na a bing'we.
8
Lwise lūmò ī mitī yalī ītogilwe kūtūūla ntemi wayo; hūna yūūgūwīla nzeituni gīkī, ‘Bebe bizaga ntemi wise.’
9
Alīyo ū nzeituni gwenūyo gūshosha gūlīhaya, ‘Ū nene gete nooye kūkenena maguta, ayo gakabinhaga baamulungu na banhū kūkumīlījiwa, naje kū nīmo gwa kwikala nakūyeengeelaga kū būtongi wa mitī dūhū?’
10
Ī mitī yīnga aheneho yūja kū ntiini; yūūgūwīla, ‘Nzugu ūbize ntemi wise.’
11
Ū ntiini nago gūshosha gūlīhaya, ‘Ū nene gete nooye kūtwaaja shisuumo shawiza na shinonu gīko, naje kū nīmo gwa kwikala nakūyeengeelaga kū būtongi wa mitī dūhū?’
12
Ī mitī yīnga a henaho yūūkagūwīla nzabibu gīkī, ‘Nzugu ūbize ntemi wise.’
13
Alīyo ū nzabibu gūshosha gūlīhaya, ‘Ū nene gete nooye kūfunya divai īyo īkayejaga baamulungu na banhū, naje kū nīmo gwa kwikala nakūyeengeelaga kū būtongi wa mitī dūhū?’
14
Hūna ī mitī ī yose yūnoga nose yūlīwīla līntī ly'igwaata gīkī, ‘Nzugu ū bebe ī gete ūbize ntemi wise.’
15
Ū ntī gwa magwaata gwīwīīla ī mitī ī yīngī gīkī, ‘Ūlū ng'hana mutogilwe kūnīīta nabize ntemi wing'we, nzūgi mulembeele mu mbeho yaane namulang'hane; alīyo ūlū ītī chene, ni gwizage moto kūfuma ū mu ntī gw'igwaata gwīpembe ī mitī ya Lebanoni.’
16
Na lūūlū, a bing'we ūlū ng'wītile mhayo gwawiza ū kūng'wīta Abimeleki abize ntemi wing'we, nūūlū ng'wang'wītīlile yawiza ū Yelubaa nī kaya yakwe, ūlū mulībona gīkī īyo ng'wang'wītīlile yigeleelile mung'wītīle; lolagi chiza.
17
Nguno mumanile gīkī ū baba walī wifunya kūcha na kūpīla kūlwa kūmulwīlīīla, ūweega gete ū būpanga wakwe kūlwa kūmupīja mu nkono gwa Bamidiani,
18
(alīyo ī lelo yenīyī ng'wīgomelaga ī kaya ya ng'wa baba, ng'ūbabūlaga bitūnja bakwe makūmi mpungatī ng'wikanza līmò dūhū, ng'ūng'wīta Abimeleki kūbiza ntemi wa banhū ba Shekemu, ū ng'witūnja wa nkīma ūyo walī atī nke o ng'wa baba; shitange īkī alī ndūgū wing'we).
19
Na lūūlū ūlū ng'wang'wītīlaga ū Yelubaa nī kaya yakwe ī mihayo yenīyī ng'wikūjo na ng'holò ngoloku, ī lelo yenīyī ū Abimeleki ni abizage wa kūmuyeja, na a bing'we mubize gīko ū kūlī we!
20
Alīyo ūlū ītī chene, leki moto gūfume ū mulī Abimeleki gūmukenaagūle a bing'we bana Shekemu na a bana Beti-milo; hama moto gūfume ū mu bing'we bana Shekemu na a bana Beti-milo, gūnkenaagūle ū Abimeleki!”
21
Ū Yotamu ūpeela wīnga ūūkiikala Beeli, nguno akang'ogoha ū ndūgūye ū Abimeleki.
22
Ū Abimeleki aho washisha myaka idatū ayīsugile ī Isilaeli,
23
ū Mulungu ūtūma ng'holò yabūbi a ha gatī ya ng'wa Abimeleki na a biikaji ba mu nzengo gwa mu Shekemu; bandya kwīta mihayo ya kūbūyuuga ū būsugi wakwe.
24
Ū Mulungu akīīta gīko kūlwa kūlīpa shiilī ya mininga ga bitūnja ba ng'wa Yelubaa abo makūmi mpungatī, abo bakabūlagwa. Ū Abimeleki alīpīlwe īyo akīyīīta, na a bana Shekemu abo bakangunanha ū kūbabūlaga a baana ba ba ng'wawe ū Abimeleki.
25
Na lūūlū a bana Shekemu būtūūla banhū ba kūng'witegeela ū Abimeleki gīkī bankenaagūle; a banhū benabo būlinha kū ngūlū kūng'wibandīīla. Hama būyūbiboneela a bashimīzi babataaja ī shikolo shabo; ū mhayo gweenūyo ūwīlwa ū Abimeleki.
26
Akigela munhū ūmò lina lyakwe Gaali, ng'witūnja o ng'wa Ebedi, ūsaamīla ū mu nzengo gwa Shekemu hamò na baana ba ng'wawe; a bana Shekemu būnsanya.
27
Aho lyashika ikanza lya kūhūlūla matwajo ga mizabibu, a banhū būja kū malaale gabo būūkahūlūla, biza bīīpandagīla ī mizabibu būbeeja divai; hūna būja mu numba ya ng'wa mulungu wabo būūkīīta shigukulu. Aho balīīlya na kūng'wa, bandya kūnzuma ū Abimeleki.
28
Kwitūlwa ū Gaali ū ng'witūnja o ng'wa Ebedi wahaya gīkī, “Ī gete ū Abimeleki ng'wenūyū ni naani? Nū Shekemu nang'hwe naani, nose a bise tūbize ha sīlīlī yakwe? Angū, atī ng'witūnja o ng'wa Yelubaa, hama ū Zebu atī ngunanhi wakwe? Hambū hambū ntūmamīlagi Hamooli, ū ise o ng'wa Shekemu! Ī gīsī īlīho nguno kī ī ya kūntūmamīla Abimeleki?
29
Nīyo gītī ūlū ni nalī ntongeeji wabo nene a banhū benaba, ninampamile wīnga ho. Ni nang'wīlile ū Abimeleki gīkī, ‘Bakobyage pye a bashilikale bako ūfumīle aha!’”
30
Ū nsugi wa nzengo gwenūyo walī Zebu; akapelana no aho wigwa īyo akīīhaya Gaali ng'witūnja o ng'wa Ebedi.
31
Ūtūma banhū mu mbisīla kūja Aaluma, būūkang'wīla ū Abimeleki gīkī, “Alīho munhū ūmò, Gaali ng'witūnja o ng'wa Ebedi, wizile ī Shekemu hamò na baana ba ng'wawe, balīgūyuuga noi ū nzengo, gīkī gūkūleme ū bebe.”
32
Alilūūlū ū bebe na a banhū bako nzūgi makanza ga būjikū ng'wibande kū masaka.
33
Hūna ī dilū ūlū wela mupuluke ū mu masaka, ng'wize ū kū nzengo; ū Gaali na a banhū bakwe ūlū būfuma kūmanhya nang'ho, ītaga īyo nkono gwako gūlaadūle kwīta.
34
Ng'hana ū Abimeleki na bashilikale bakwe pye a bose būbūūka būjikū, bigabanhya mu magele anè, būja būūkibanda bbīhi nī Shekemu, būlī ng'wene wikala aho akahelelwa.
35
Ū Gaali ng'wana Ebedi akafuma hanze ī dilū, aho alī ha mita gwa nzengo īmīīlile, ū Abimeleki nang'hwe nī libità lyakwe būsangwa bandya kūpuluka ū mu masaka ūmo baalī bibanda.
36
Wahayūbabona ū Gaali ūng'wīla ū Zebu gīkī, “Bebe nalībona banhū balika kūfuma mu ngūlū!” Nang'hwe ū Zebu ūnshokeja alīhaya, “Genayo maamyengeleji ga mu lūgūlū ūlīgikolanīja na banhū.”
37
Kwitulwa ū Gaali wahaya hangī, “Bebe ngosha, banhū gete a benabo, nīyo bangī baayūpulukīla na a ha gatī gatī aho; hama n'igele līngī līīlo lyashika līlīfumīīla kū līntī lya mfumu.”
38
Hūna ū Zebu ūng'wīla, “Hama yaaja he lūūlū īyo walikalaga wīhaya gīkī, ‘Ū Abimeleki nani nose atūsuge a bise?’ Batī bene a banhū abo walūbadalahaga aba? Jaaga ko lūūlū ūkalwe nabo!”
39
Ng'hana ū Gaali ūfuma ūbatongeela a bana Shekemu kūkilwisha nū Abimeleki.
40
Ū Abimeleki ūng'heeba ū Gaali ūmpeeja; ū mu būlūgū wenūbo bingī no bakaminyiwa, baaja bakūgwaaga nzīla ngima, kūshisha kū mita gwa kwingīla mu nzengo.
41
Ū Abimeleki ūshoka Aaluma ūūkikala kwenūko; ū Zebu nang'hwe ūmpeeja ū Gaali na a baana ba ng'wawe bīnga ī Shekemu.
42
Alīyo ū kū ntondo yaho a bana Shekemu būfuma hangī kūja ū kū masaka, ūwīlwa ū mhayo gwenūyo ū Abimeleki.
43
Nang'hwe ūbasola a banhū bakwe ūja nabo, ūbagabanhya mu magele adatū, būūkibanda kū masaka kūlindīīla; aho wababona a banhū balīfuma ū mu nzengo, ūpuluka ū mu masaka wandya kūbatūla.
44
Ū Abimeleki na a banhū abo walī nabo būpeela bajile ū kū mita gwa nzengo būūkanyama ho. Hūna a magele ayo abīlī gūūbihoolekela abo baalī ū kū masaka, būbatūla būbabūlaga.
45
Ū lūshikū ū lose lwenūlo ū Abimeleki wilwisha nago ū nzengo gwenūyo kūshisha ūgūdima, ūbabūlaga a biikaji ba ng'wene; lelo ū nzengo ūgūkenaagūla gete, hūna ūgwitīīla na mamunhu.
46
Ī yenīyo aho īlīītwa, a banhū ba mu nzengo abo bikalaga mu numba ndīhu ya balang'hani ba Shekemu būpeelela mu hekalu ya ng'wa Eli-beliti, būūkingīla mu numba ya kūbūngīlà, bilugalīla ng'wenūmo.
47
Ū Abimeleki ūwīlwa gīkī pye a banhū abo bakiikalaga bbihī nī numba ya balang'hani ba Shekemu bingīlaga ng'wenūūmo,
48
ūsola mbasa ūja nabo a banhū bakwe kū lūgūlū lwa Zalimoni, ūūkaseenha ng'hwi, ūjisesela ha mabega. Hūna ūbalagīla a banhū abo walī nabo alīhaya, “Ītagi wangū ūmo ng'wanibona nalīītīla ū nene!”
49
Pye a banhū benabo nabo būseenha ng'hwi, hūna būnondeela ū Abimeleki; būūkajitūlīīla kwīpīndīlīja ī numba ya kūbūngīlà yenīyo, hūna bītiima moto, būboocha pye a banhū abo baalī ng'wenūmo. A banhū abo baalī baapeelela ū mu numba yenīyo baalī gītī shihūmbī shimò bagosha na bakīma; būshila kūcha pye a bose.
50
Ū Abimeleki wīnga a henaho ūja Tebezi, ūūkagūpīndīlīja mabità ū nzengo gwenūyo ūgūdumīla kūshisha ūgūdima.
51
Ū mu gatī ya nzengo gwenūyo yalīmo numba ya kūbūngīlà; na lūūlū pye a banhū ba mu nzengo gwenūyo, bagosha na bakīma, būpeelela mo. Bilugalīla ng'wenūmo, būlinha kū kaano.
52
Ū Abimeleki ūja ū kū numba yenīyo gīkī akīīdumīle nayo, alīyo aho washika a ha nyango gwa kwingīla ū mu ngītīli yaayo gīkī aje akīīpembe moto,
53
nkīma ūmò walī kwigūlya ūng'holomokeja sho ya kūsheela; yūngwīla ha ntwe lūūpaanuka ū lūpanga.
54
Ūng'witana wangū wangū sūmba wamūūkījaga shilanga; ūng'wīla, “Dutaga wangū ū lūshū lwako ū mu shilaalo ūnimalīīje, batizūhaya gīkī, ‘Wabūlagagwa na nkīma.’” Ū ntūmami wakwe ūnchima lūshū ng'hana ūcha.
55
A Baisilaeli aho baabona gīkī waacha ū Abimeleki, bīnga hoi; būlī munhū ūja kaya.
56
Ū Mulungu ūbiza wanīpa ū Abimeleki ū būbi ūbo akang'wītīla ise kūlwa kūbabūlaga baana ba ng'wawe makūmi mpungatī.
57
Nīyo ū Mulungu ūbalīpa na a bana Shekemu kūlwa būbi wabo bose. Ī lizumo lya ng'wa Yotamu ū ng'witūnja o ng'wa Yelubaa lyūbapandīka.
← Chapter 8
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 10 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21