1 Corinthians 11

Tswana (BAEBELE e e Boitshepo) 1992

← Chapter 10 Jump to: Chapter 12 →

1Nnang baetsi ba me, jaaka le nna ke le moetsi wa ga Keresete.

2Jaana ke a lo baka ka lo tle lo nkgopole mo dilong tsotlhe, mme lo tshegeditse ditao, fela jaaka ke di lo neetse.

3Mme ke rata gore lo itse fa tlhogo ya monna mongwe le mongwe e le Keresete; le tlhogo ya mosadi ke monna; le tlhogo ya ga Keresete ke Modimo.

4Monna mongwe le mongwe yo o rapelang, kgotsa a ruta a rwele mo tlhogong, o tlotlolola tlhogo ya gagwe.

5Mosadi mongwe le mongwe yo o rapelang, kgotsa a ruta, tlhogo ya gagwe e bipologile o tlotlolola tlhogo ya gagwe, gonne go tshwana fela jaaka a ka bo a beotswe.

6Gonne fa mosadi a sa ipipe tlhogo, le gone a kutwe; mme fa e le ditlhong mo mosading go kutwa, le fa e le go beolwa, a ipipe tlhogo.

7Le gale monna ga a a tshwanela go ipipa tlhogo, ka e le ene setshwano le kgalalelo ya Modimo, mosadi ke kgalelelo ya monna.

8Gonne monna ga a a ntshiwa mo mosading, mme mosadi o ntshitswe mo monneng:

9le gone monna ga a a bopelwa mosadi, mme mosadi o bopetswe monna.

10Ke gone ka moo mosadi o tshwanetseng go dirana le sesupo sa go nna mo taolong mo tlhogong ya gagwe, ka ntlha ya baengele.

11Le fa go ntse jalo mo Moreneng, mosadi ga a kwa ntle ga monna, le monna ga a kwa ntle ga mosadi.

12Gonne jaaka mosadi a ntshitswe mo monneng, monna le ene o belegwe ke mosadi; mme dilo tsotlhe di tswa mo Modimong.

13Lo sekasekeng ka losi; a go gontle fa mosadi a rapela Modimo a sa ipipa tlhogo?

14A le tlholego ya batho ga e lo rute, gore fa monna a na le moriri o moleele, ke ditlhong mo go ene?

15Mme fa mosadi a na le moriri o moleele, ke kgalalelo mo go ene; gonne moriri wa gagwe o o neilwe gore o nne seipipo.

16Mme fa motho a rata go nna kgang, rona ga re na mokgwa o o ntseng jalo, le fa e le diphuthego tsa Modimo ga di na nao.

17Fa ke lo naya tao e, ke be ke sa lo bake, ka gobo go phuthega ga lona go sa dirane le molemo, fa e se bosula bogolo.

18Gonne sa ntlha, ke utlwa fa e a re fa lo tla mmogo mo phuthegong, go bo go nne le dikgaogano mo go lona; ka ntlha nngwe ke a go dumela.

19Gonne le gone go tshwanetse fa go ka nna le makoko mo go lona, gore ba ba lebosegang ba bonatshege mo go lona.

20Ke gone e a re fa lo phuthega, go bo go retele go ja selalelo sa Morena.

21Gonne mo go jeng ga lona, mongwe le mongwe o tle a ijele selalelo sa gagwe pele ga yo mongwe; mme mongwe a tle a bolailwe ke tlala; yo mongwe a tle a tagilwe.

22Ao! A ga lo na matlo a go jela le go nwela mo go one? Kgotsa a lo nyatsa phuthego ya Modimo, lo ba lo tlhabisa ba ba se nang sepe ditlhong? Ke tlaa lo raya ke reng? A ke ke lo bake mo go se? Ga ke lo bake.

23Gonne ke amogetse mo Moreneng se le sone ke se lo neileng, go re: E rile mo sigong jo o okilweng ka jone, Morena Jesu a tsaya senkgwe;

24mme ya re a sena go leboga, a se ngathoganya a re: “Se ke mmele wa me, o o robelwang lona; dirang mo lo nkgopole ka gone.”

25Senwelo le sone a se tsaya ka mokgwa o o ntseng jalo, morago ga selalelo, a re: “Senwelo se ke kgolagano e ntšha mo mading a me. Dirang mo ka gale fa lo se nwa, go nkgopola ka gone.”

26Gonne ka gale e a re lo ja senkgwe se, le go nwa senwelo, lo bo lo bolela loso lwa Morena a tsamaye a tle.

27Ke gone, yo o jang senkgwe, a ba a nwa senwelo sa Morena, a sa tshwanela, o tlaa bo a leofela mmele le madi a Morena.

28A motho a ipotsise, jalo a itse go ja senkgwe le go nwa senwelo.

29Gonne yo o jang a nwa, mme a sa lemoge mmele, o ijela a inwela tshekiso fela.

30Batho ba bantsi mo go lona ba bokoa, ba bile ba botlhoko ka ntlha ya gone moo, mme ba bangwe ba robetse ba le bantsi.

31Fa re ne re ka itemoga, re ne re se ketla re sekisiwa.

32Mme e a re fa re sekisiwa, re otlhaiwa ke Morena, gore re se ka ra sekisiwa le lefatshe.

33Ke gone, bagaetsho, fa lo phuthegela go ja, lo letane.

34Fa mongwe a bolailwe ke tlala, a a je kwa ga gagwe; gore go phuthega ga lona go se ka ga dirana le tshekiso. Dilo tse di setseng, ke tlaa di rulaganya mogang ke fitlhang koo go lona.

← Chapter 10 Jump to: Chapter 12 →