1 Corinthians 4

Tswana (BAEBELE e e Boitshepo) 1992

← Chapter 3 Jump to: Chapter 5 →

1A motho a re kaye, jaaka re le badiredi ba ga Keresete, le balebalebedi ba masaitseweng a Modimo.

2Mono go bile go lopiwa ka ga balebalebi, gore motho a fitlhelwe a le boikanngo.

3Mme mo go nna ke selo se sennyennye fa ke ka sekasekwa ke lona, le fa e le ka tshekaseko ya motho; ee, le nna ga ke itshekaseke.

4Gonne ga ke ikitse boatla bope, le fa go ntse jalo ga ke siamisiwe ka gone moo; mme yo o ntshekasekang ke Morena.

5Ke gone, se sekiseng sepe e ise e nne motlha, go tle go tsamaye Morena a tle, yo o tlaa senolang dilo tsa lefifi tse di fitlhilweng, a ba a bonatsa dikgakologelo tsa dipelo; foo motho mongwe le mongwe o tlaa bona pako ya gagwe mo Modimong.

6Jaana bagaetsho, dilo tse, ke di beile mo go nna le mo go Apolose ka setshwantsho ka ntlha ya lona; gore lo ithute ka rona, gore lo se ka lwa fetela kwa pele ga dilo tse di kwadilweng; gore go se nne ope wa lona yo o belafalang ka yo mongwe, mme a nyatse yo mongwe.

7Gonne mang yo o go tshwanolotseng le yo mongwe? Mme o na le eng se o se kang wa se newa fela? Mme fa o se neilwe, o belafalelang, jaaka e kete ga o a se newa?

8Lo setse lo kgotshe, lo setse lo humile lo busitse re seyo mo go lona; ee, ke rata lwa bo lo busa, gore le rona re tle re buse le lona.

9Gonne ke gopola gore Modimo o ntshitse rona baaposetole go bonwa kwa morago ga botlhe, jaaka batho ba ba laoletsweng go swa; gonne re dirilwe segakgamalelo sa lefatshe, le sa baengele, le sa batho.

10Rona re dieleele ka ntlha ya ga Keresete, mme lona lo botlhale mo go Keresete, rona re bokoa, lona lo thata; lona lo na le kgalalelo, mme rona re na le tlotlologo.

11Nako e sa ntse e le eno, re ntse re bolawa ke tlala, le lenyora, ga re a tswala, re a tlhanyakwa, ga re na bonno bope jo bo tlhomameng,

12re ikgokgolela, re dira ka diatla tsa rona: e re re gobololwa, re segofatse; e re re bogisiwa, re itshoke;

13e re re kgalwa, re rapele; re dirwa matlakala a lefatshe, le makgobolo a dilo tsotlhe, le gompieno.

14Ga ke lo kwalele dilo tse go lo tlhabisa ditlhong, mme e le go lo laya jaaka bana ba me ba ba rategang.

15Gonne le fa lo ka bo lo na le baruti ba le 10 000 mo go Keresete, le fa go ntse jalo borraeno ga ba bantsi; gonne mo go Keresete Jesu, ke nna ke lo tsetseng ka Mafoko a a Molemo.

16Ke gone, ke a lo rapela ka re, lo nne baetsi ba me.

17Ke gone ka moo ke romileng Timotheo kwa go lona, yo e leng ngwanake mo Moreneng, yo o rategang le yo o boikanngo, yo o tlaa lo gopodisang mekgwa ya me e e mo go Keresete, fela jaaka ke ruta gotlhe mo diphuthegong tsotlhe fela.

18Jaana bangwe ba ikgogomositse, jaaka e kete ga ke na go ya koo go lona.

19Mme ke tlaa akofa ke ya koo go lona, fa Morena a rata; mme ke tlaa itse e e seng puo ya ba ba ikgogomositseng, mme e leng nonofo ya bone.

20Gonne bogosi jwa Modimo ga bo mo puong, bo mo nonofong.

21Lo eletsang? A ke ke ye koo go lona ka thupa, kgotsa ka lorato le ka mowa wa bonolo?

← Chapter 3 Jump to: Chapter 5 →