1 Kings 5

Tswana (BAEBELE e e Boitshepo) 1992

← Chapter 4 Jump to: Chapter 6 →

1Hirame kgosi ya Ture a roma batlhanka ba gagwe kwa go Solomone; gonne a utlwile fa ba mo tloditse go nna kgosi mo boemong jwa ga rraagwe, ka gobo Hirame e ne e ntse e le morati wa ga Dafite gale.

2Solomone a roma kwa go Hirame, a re:

3“O a itse jaaka Dafite rre a ne a retelelwa ke go agela leina la ga Jehofa Modimo wa gagwe ntlo ka ntlha ya dintwa tse di neng di le ntlheng tsotlhe tikologong ya gagwe, ga tsamaya Jehofa a di baya fa tlase ga dinao tsa gagwe.

4Gompieno Jehofa Modimo wa me o nneile boikhutso mo ntlheng tsotlhe; ga go na moganetsi, le fa e le tirafalo epe e e bosula.

5Mme bona, ke ikaeletse go agela leina la ga Jehofa Modimo wa me ntlo, jaaka Jehofa a ne a bua le rre Dafite, a re: ‘Morwao yo ke tlaa mmayang mo setulong sa gago sa bogosi mo boemong jwa gago, o tlaa agela leina la me ntlo.’

6Ke gone jaana, a ko o laole gore ba nthemele ditlhare tsa masetara mo Lebanone; batlhanka ba me ba tlaa nna le batlhanka ba gago; mme ke tlaa go naya tuelo ya batlhanka ba gago ka fa o tlaa buang ka gone fela; gonne o a itse fa go se na ope mo go rona yo o nang le botlhale jwa go rema ditlhare jaaka Basitone.”

7Ga dirala ya re Hirame a utlwa mafoko a ga Solomone, a itumela thata, mme a re: “A go bakweng Jehofa gompieno, yo o neileng Dafite ngwana wa mosimane yo o botlhale go busa sešaba se segolo se.”

8Hirame a roma kwa go Solomone a re: “Ke utlwile taetso e o e rometseng kwa go nna; ke tlaa dira keletso yotlhe ya gago ka ga ditlhare tsa masetara, le ka ga ditlhare tsa mafira.

9Batlhanka ba me ba tlaa di folosa kwa Lebanone ba di isa kwa lewatleng; ke tlaa di dira makawe a a tlaa tsamayang a kokobetse mo lewatleng a ya kwa o tlaa go ntaolelang, ke tlaa laola, gore di bofololwe gone, o itse go di amogela; mme o tlaa diratsa keletso ya me ka go naya ba ntlo ya me dijo.”

10Hirame a naya Solomone ditlhare tsa masetara, le ditlhare tsa mafira ka fa keletsong yotlhe ya gagwe.

11Solomone a naya ba ntlo ya ga Hirame dijo e le dikgetse tsa boupe di le 20 000, le dilekanyo di le 20 tsa lookwane lo lo kgobilweng; Solomone a naya Hirame jalo ka ngwaga le ngwaga.

12Jehofa a naya Solomone botlhale jaaka a mmoleletse; mme go ne go le kagiso gare ga Hirame le Solomone; ba dira kgolagano mmogo boo babedi.

13Kgosi Solomone a kgetha batho mo Iseraele; kgetho eo e ne e le batho ba le 30 000.

14A ba roma kwa Lebanone, ba le 10 000 ka kgwedi ka go rulagana; ba nna kgwedi e le nngwe mo Lebanone le dikgwedi di le pedi kwa gae; Atonirame e ne e le molaodi wa ba ba kgethilweng.

15Solomone o ne a na le batho ba le 70 000 ba ba rwalang merwalo, le batho ba le 80 000 ba ba remang mo dithabeng;

16kwa ntle ga maotlana a magolo a ga Solomone e le ba ba laolang tiro, ba le 3 300, ba ba laolang batho ba ba dirang.

17Kgosi ya laola, mme ba epolola maje a magolo, maje a a thata go rekwa, go tla go thaya motheo wa ntlo ka maje a a betlilweng.

18Baagedi ba ga Solomone le baagedi ba ga Hirame le Bagebale ba a betla, ba baakanya dikgong le maje go tla ba aga ntlo.

← Chapter 4 Jump to: Chapter 6 →