2 Corinthians 2

Tswana (BAEBELE e e Boitshepo) 1992

← Chapter 1 Jump to: Chapter 3 →

1Ke ne ka ikaelela se, ka re, ga nketla ke ba ke ya koo go lona gape ka bohutsana,

2gonne fa ke hutsafatsa lona, e be e le mang yo o tlaa intumedisang, fa e se ene yo o hutsafadiwang ke nna?

3Mme ka kwala sone seo fela, gore e se ka ya re ke fitlha, ka ba ka bona bohutsana mo go bone ba ke tshwanetseng go itumela ka ga bone; ka ke lo ikantse lotlhe, ka re boitumelo jwa me ke boitumelo jwa lona lotlhe.

4Gonne ke lo kwaletse ka dikeledi di le dintsi, ke le mo pitlaganong e kgolo, le mo tlalelong e e mahehe ya pelo; e seng gore lo hutsafadiwe, mme e le gore lo itse botlalo jwa lorato lo ke lo ratang ka lone.

5Fa mongwe a tsositse bohutsana, o tsositse bohutsana e seng mo go nna ke le nosi fela, mme e be e le, le mo go lona lotlhe ka ntlha e nngwe, ke raya ka ke sa rate go patika.

6Go yo o ntseng jalo, petso e, e o e diretsweng ke bontsi, e lekanye;

7jalo, bogolo lo ka mo itshwarela lo mo gomotsa, e se re kgotsa yo o ntseng jalo a ba a nyelediwa ke bogolo jwa bohutsana.

8Ke gone, ke a lo rapela gore lo mo tlhomamisetse go mo rata ga lona.

9Gonne e ne e le gone ka fa ke lo kwaletseng ka teng, ka re ke tle ke itse go lekwa ga lona, bo lo na le kutlo mo dilong tsotlhe.

10Yo lo mo itshwarelang sengwe, le nna ke a mo itshwarela; gonne le se ke se itshwaretseng, fa ke itshwaretse sengwe, ke se itshwaretse ka ntlha ya lona, mo ponong ya ga Keresete,

11gore Satane a se bone phenyo epe mo go rona; gonne ga re mo lefifing ka ga maano a gagwe.

12Jaana e rile ke fitlha kwa Teroase ka ga Mafoko a a Molemo a ga Keresete, ke bulelwa kgoro mo Moreneng,

13mme ga ke a ka ka bona boiketlo mo moweng wa me, ka ke se ka ka fitlhela Tito mokaulengwe wa me, mme ya re ke sena go kgaogana nabo ka tswela kwa Maketonia.

14A Modimo o lebogwe, o o ntseng o re etelela pele ka phenyo mo go Keresete, o bile o utlwatsa ka rona lonko lwa kitso ya gagwe mo mafelong otlhe.

15Gonne re lonko lo lo monate lwa ga Keresete mo Modimong, mo go ba ba bolokwang, le mo go ba ba latlhegang;

16mo go ba bangwe e le lonko lwa loso, lo isa losong; mme mo go ba bangwe e le lonko lwa botshelo, lo isa botshelong. E mang yo o lekanyeng dilo tse?

17Gonne ga re etse ba bantsi, ba ba bapalang ka lefoko la Modimo; re bua mo go Keresete jaaka e le ka bopeloephepa, jaaka e le ka Modimo, jaaka e le mo ponong ya Modimo.

← Chapter 1 Jump to: Chapter 3 →