2 Corinthians 9

Tswana (BAEBELE e e Boitshepo) 1992

← Chapter 8 Jump to: Chapter 10 →

1Gonne ka ga go direla baitshepi, fa ke lo kwalela e tlaa bo e le go golola puo fela;

2gonne ke a go itse go iketleetsa ga lona, mo ke ipelafatsang ka gone ka lona mo go ba Maketonia, ka ke rile ba lefatshe la Akaia ba sa le ba ipaakanya ngogola; mme tlhoafalo ya lona e tlhotlheleditse bontsi jwa bone.

3Ke romile bakaulengwe, gore go ipelafatsa ga rona ka ga lona mo tirong e, go se ka ga nna lefela; ka re, lo tle lo etleetsege fela jaaka ke buile;

4gore e se re kgotsa motlha mongwe, fa ke tla le bangwe ba Maketonia, ka fitlhela lo sa etleetsega, rona re sa reye lona, ra tla ra tlhabisiwa ditlhong ke go lo ikanya jaana.

5Ke gone ke itheileng ka re, ke tshwanetse go rapela bakaulengwe gore ba ye koo go lona pele ga me, ba baakanyetse ruri mpho e lo e re solofeditseng gale, gore e tle e baakanyesege, e le mpho fela, e seng se se ntshiwang ka patiko.

6Ke bua jaana ka re: Yo o jalang ka bongoma, o tlaa roba ga bongoma, yo o jalang ka bogolo, o tlaa roba ga bogolo.

7A motho mongwe le mongwe a dire ka fa o ikaeletseng mo pelong ya gagwe ka teng; e seng ka go ngongorega, le fa e le ka patelelo, gonne Modimo o rata yo o abang ka pelotshweu fela.

8Modimo o nonofile go lo totafaletsa tshegofatso yotlhe; gore e tle e re lo ntse lo na le mo go lekanyeng ga dilo tsotlhe, lo bo lo totafalele tiro nngwe le nngwe e e molemo.

9Jaaka go kwadilwe ga twe: “O gasitse, o abetse bahumanegi; tshiamo ya gagwe e eme ka bosakhutleng.”

10Yo nayang mojadi peo le senkgwe sa go jewa, o tlaa lo naya a ba a ntsifatsa peo ya lona e e jalwang, a ba a totisa maungo a tshiamo ya lona;

11ka lo humisitswe dilo tsotlhe, gore lo ntshe mpho e kgolo, e e tlaa tsosang tebogo e e lebogang Modimo ka rona.

12Gonne go abiwa ga thuso e, ga se gore go tlaa tlatsa go tlhoka ga baitshepi go le gosi; mme le gone go tlaa totafalela Modimo ka malebogo a le mantsi;

13ka e re ka ba bona lo lekilwe ka tirelo e, bo ba galaletsa Modimo ka ga kutlo ya boipolelo jwa lona mo Mafokong a a Molemo a ga Keresete, le ka ga mpho e kgolo e lo e ntshetsang bone le botlhe fela;

14le mororo bone ka bosi, ka ba ntse ba lo rapelela, ba lo tlhologeletswe ka ntlha ya tshegofatso e kgolo ya Modimo e e mo go lona.

15A Modimo o lebogelwe neo ya one e e sa ka keng ya swediwa go bolelwa.

← Chapter 8 Jump to: Chapter 10 →