Leviticus 18

Tswana (BAEBELE e e Boitshepo) 1992

← Chapter 17 Jump to: Chapter 19 →

1Jehofa a bua le Moše, a re:

2“Bua le bana ba Iseraele o ba reye o re: Ke nna Jehofa Modimo wa lona.

3Lo se ka lwa dira ka fa ditirong tsa lefatshe la Egepeto, le lo kileng lwa nna mo go lone; le fa e le ka fa ditirong tsa lefatshe la Kanana le ke lo isang kwa go lone, lo se ka lwa dira, le gone lo se ka lwa sepela mo melaong ya bone.

4Lo tlaa dira dikatlholo tsa me, le melao ya me lo tlaa e boloka, go sepela mo go yone; ke nna Jehofa Modimo wa lona.

5Ke gone lo tlaa boloka melao ya me, le dikatlholo tsa me, tse e tlaa reng fa motho a di dira, o tlaa tshela ka tsone; ke nna Jehofa.

6“Ga go na ope wa lona yo o tlaa atamelang kwa go mongwe yo o gaufi nae ka go tsalwa, go tla a bipolola bosaikatega jwa gagwe; ke nna Jehofa.

7Bosaikatega jwa ga rraago, e bong bosaikatega jwa ga mmaago, o se ka wa bo bipolola, ke mmaago; o se ka wa bipolola bosaikatega jwa gagwe.

8Bosaikatega jwa ga mogatsa rraago, o se ka wa bo bipolola; ke bosaikatega jwa ga rraago.

9Bosaikatega jwa ga kgaitsadio, morwadia rraago, kgotsa morwadia mmaago, le fa ba tsaletswe mo gae kgotsa ba tsaletswe kwa kgakala, bosaikatega jwa bone, o se ka wa bo bipolola.

10Bosaikatega jwa ga morwadia morwao, kgotsa jwa ga morwadia morwadio, bosaikatega jwa bone o se ka wa bo bipolola, gonne bosaikatega jwa bone ke jwa gago tota.

11Bosaikatega jwa ga morwadia mogatsa rraago, yo o tsetsweng ke rraago, ka e le kgaitsadio, o se ka wa bipolola bosaikatega jwa gagwe.

12O se ka wa bipolola bosaikatega jwa ga kgaitsadia rraago; ke mosadi yo o gaufi le rraago ka go tsalwa.

13O se ka wa bipolola bosaikatega jwa ga ngwanaarraagwe maago; ke mosadi yo o gaufi le maago ka go tsalwa.

14O se ka wa bipolola bosaikatega jwa ga rangwanaago; o se ka wa atamela mosadi wa gagwe, ke mogatsa rangwanaago.

15O se ka wa bipolola bosaikatega jwa ngwetsi wa gago, ke mogatsa morwao, o se ka wa bipolola bosaikatega jwa gagwe.

16O se ka wa bipolola bosaikatega jwa ga mogatsa morwa rraago; ke bosaikatega jwa ga morwa rraago.

17O se ka wa bipolola bosaikatega jwa mosadi le morwadie; o se ka wa tsaya morwadia morwawe, kgotsa morwadia morwadie, go bipolola bosaikatega jwa gagwe, ke basadi ba ba gaufi ka go tsalwa; ke tshiamololo.

18O se ka wa re o tsaya mosadi wa mo tsaya le ngwana yo mongwe wa ga rraagwe; go nna lefufa nae, go bipolola bosaikatega jwa gagwe, go mo pataganya le yo mongwe a sa ntse a tshedile.

19“O se ka wa atamela mosadi go bipolola bosaikatega jwa gagwe fa a itshekologile ka medibela ya gagwe.

20O se ka wa lala le mosadi wa mongwe ka wena, go iitshekolola ka ene.

21O se ka wa ntsha ope wa losika lwa gago go ya go mo ralaletsa Moleke molelo; le gone o se ka wa tlhapatsa leina la Modimo wa gago; ke nna Jehofa.

22O se ka wa lala le banna, go ba etsa basadi; ke makgapha.

23O se ka wa lala le setshedi sepe go iitshekolola ka sone, le gone a go se nne mosadi ope yo o tlaa emang fa pele ga setshedi gore a lale naso; ke maferetsoko.

24“Lo se ka lwa iitshekolola ka sepe sa dilo tse, gonne merafe e ke e lelekileng fa pele ga lona e itshekolotswe ka dilo tsotlhe tse.

25Le lefatshe le itshekolotswe, ke gone ka moo tshiamololo ya lone ke bo busetsang mo go lone, mme lefatshe le tlhatsa banni ba lone.

26Ke gone lona lo bolokeng melao ya me, le dikatlholo tsa me, lo se ka lwa dira sepe sa dilo tse, tse di makgapha; le fa e le yo o tsaletsweng mo gae, kgotsa moeng yo o jakileng mo go lona.

27Gonne dilo tsotlhe tse di makgapha tse, banna ba lefatshe ba ba neng ba le pele ga lona ba di dirile, ka moo lefatshe le itshekolotswe,

28gore lefatshe le se ka la lo tlhatsa le lona, fa lo le itshekolotse, jaaka le tlhatsitse morafe o o neng o le gone pele ga lona.

29Gonne le fa e le mang yo o tlaa dirang sengwe sa dilo tse di makgapha tse, e bong bone batho ba ba di dirang ba tlaa kgaolwa mo bathong ba ga bone.

30“Ke gone ka moo lo tlaa bolokang tao ya me, gore lo se dire sepe sa mekgwa e e makgapha e, e e neng e dirwa pele ga lona, le gore lo se iitshekolole ka yone, ke nna Jehofa Modimo wa lona.”

← Chapter 17 Jump to: Chapter 19 →