Leviticus 21

Tswana (BAEBELE e e Boitshepo) 1992

← Chapter 20 Jump to: Chapter 22 →

1Jehofa a raya Moše, a re: “Bua le baperesiti bomorwa Arone, o ba reye o re: Ope a se ka a iitshekolola ka ga baswi mo bathong ba gagwe.

2Fa e se ka ga ditsala tsa gagwe tse di gaufi nae mo go tsalweng, ka ga mmaagwe, le ka ga rraagwe, le ka ga morwawe, le ka ga morwadie, le ka ga ngwana wa ga rraagwe;

3le ka ga kgaitsadie wa kgarebana yo o gaufi nae, yo o iseng a dire le monna gope, o ka iitshekolola ka ga gagwe.

4A se ka a iitshekolola a le mogolwane mo bathong ba ga gabo, go tla a tlhapatsa.

5“Ba se ka ba itira logatadima, le gone ba se ka ba ipeola ditedu ka ntlha nngwe, le fa e le go itshega mmele.

6Ba nne boitshepelo Modimo wa bone, ba se tlhapatse leina la Modimo wa bone; gonne bone ba isa ditshupelo tsa ga Jehofa tse di dirwang ka molelo; le dijo tsa Modimo wa bone; ke gone ka moo a ba nneng boitshepo.

7Ba se tseye mosadi yo e leng seaka, kgotsa yo o sentsweng; le gone ba se tseye mosadi yo o tlhadilweng ke monna wa gagwe, gonne moperesiti o boitshepelo Modimo wa gagwe.

8Ke gone o mo itshepise; gonne ene o isa dijo tsa Modimo wa gago; a a nne boitshepo go wena; gonne nna Jehofa yo ke lo itshepisang ke boitshepo.

9Morwadia moperesiti fa a itshentse ka go nna seaka, o tlhapatsa rraagwe, a a fisiwe ka molelo.

10“Yo o leng moperesiti yo mogolo mo baneng ba ga rraagwe, yo lookwane lo lo tlolwang lo thetsweng mo tlhogong ya gagwe, a bile a lomolotswe go tla a apara diaparo, a a se bipolole tlhogo ya gagwe le fa e le go ikgagola diaparo,

11le gone a se ka a tsena kwa go nang le setoto gone, le fa e le go iitshekolola ka ga rraagwe, kgotsa ka ga mmaagwe.

12Le gone a se ka a tswa mo felong ga boitshepo, le fa e le go tlhapatsa felo ga boitshepo ga Modimo wa gagwe, gonne serwalo sa lookwane lo lo tlolwang, lwa Modimo wa gagwe, se mo go ene; ke nna Jehofa.

13Mme a tseye mosadi yo o sa ntseng a le mo bokgarebaneng jwa gagwe.

14Moswagadi le fa e le mosadi yo o tlhadilweng, le fa e le mosadi yo o itshentseng, seaka, bao a a se ba tseye; a tseye kgarebana ya batho ba ga gabo go nna mosadi wa gagwe.

15A se ka a tlhapatsa losika lwa gagwe mo bathong ba ga gabo; gonne ke nna Jehofa yo ke mo itshepisang.”

16Jehofa a bua le Moše, a re:

17“Bua le Arone, o re: Le fa e ka nna mang wa losika lwa gago mo dikokomaneng tsotlhe tsa bone, yo o nang le bogole, a a se atamele a ya go isa dijo tsa Modimo wa gagwe,

18gonne le fa e ka nna motho ofe yo o nang le bogole a se ka a atamela; sefofu kgotsa yo o tlhotsang, kgotsa yo o mmopo o phatlogileng, kgotsa yo o nang le nama nngwe e e seele,

19kgotsa motho yo o dinao di robegileng, kgotsa yo o mabogo a robegileng,

20kgotsa yo o lorutle, kgotsa yo o kgwatlafetseng, kgotsa yo o nang le tlhaka mo leitlhong, kgotsa yo o sebadi, kgotsa yo o dikgotho, kgotsa yo o thubegileng dinama tsa senna;

21a go se nne motho ope moperesiti wa losika lwa ga Arone yo o nang le bogole bongwe, yo o tlaa atamelang a isa ditshupelo tsa ga Jehofa tse di dirwang ka molelo; o na le bogole, a a se atamele a ya go isa dijo tsa Modimo wa gagwe.

22O ka ja dijo tsa Modimo wa gagwe, tsone tse di boitshepo jo bo itshepileng, le tsone tse di boitshepo fela.

23Fa e se gore a se tsenele kwa sesirong, le fa ele go atamela kwa sebesong, gonne o na le bogole, gore a se tlhapatse mafelo a me a a boitshepo, gonne ke nna Jehofa yo ke ba itshepisang.”

24Jalo Moše a bua le Arone, le bomorwawe, le bana botlhe ba Iseraele jalo.

← Chapter 20 Jump to: Chapter 22 →