Leviticus 23

Tswana (BAEBELE e e Boitshepo) 1992

← Chapter 22 Jump to: Chapter 24 →

1Jehofa a bua le Moše, a re:

2“Bua le bana ba Iseraele, o ba reye, o re: Mediro ya ga Jehofa e e laotsweng, e lo tlaa e bolelang go re, ke diphuthego tse di itshepileng, ke yone e e leng mediro ya me e e tlhomilweng.

3Tiro e dirwe ka malatsi a le marataro, mme ka letsatsi la bosupa go Sabata wa boikhutso jo bo masisi, phuthego e e itshepileng; lo se ka lwa dira tiro epe; ke Sabata yo o nnelang Jehofa mo mannong otlhe a lona.

4“E ke yone mediro e e tlhomilweng ya ga Jehofa, e bong diphuthego tse di itshepileng, tse lo tlaa di opelang mokgosi mo metlheng ya yone e e tlhomilweng.

5“E re kgwedi ya ntlha ka letsatsi la 14 la kgwedi, go le maitseboa, e be e nna tlolaganyo ya ga Jehofa.

6E re ka letsatsi la 15 la kgwedi eo, go bo go nna modiro wa senkgwe se se sa bedisiwang; lo je senkgwe se se sa bedisiwang ka malatsi a supa.

7E re ka letsatsi la ntlha lo dire phuthego e e itshepileng, lo se ka lwa dira tiro epe e e leng ya setlhanka fela.

8Lo ise tshupelo e e direlwang Jehofa ka molelo ka malatsi a supa, e re ka letsatsi la bosupa go bo go nna phuthego e e itshepileng, lo se ka lwa dira tiro epe e e leng ya setlhanka fela.”

9Jehofa a bua le Moše, a re:

10“Bua le bana ba Iseraele, o ba reye, o re: E tlaa re lo sena go fitlha mo lefatsheng le ke le lo nayang, mme lo roba thobo ya lone, foo lo ise ngata ya mabutswapele a thobo ya lone kwa moperesiting.

11Ene o tlaa fokisa ngata fa pele ga Jehofa, go tla e amogelwa ka ga lona; moperesiti o tlaa e fokisa ka moso morago ga Sabata.

12E re ka letsatsi le lo fokisang ngata ka lone, lo isetse Jehofa kwanyana e tonanyana e e se nang bogole, ya ngwaga wa ntlha, e le tshupelo e e fisiwang.

13Tshupelo ya yone ya boupe e tlaa nna emere ya setou, e e reng e kgaogantswe sesome go tsewe dikgaogano di le pedi go tlhakanye le lookwane, e le tshupelo e e direlwang Jehofa ka molelo, go nna monko o o monate, mme tshupelo ya yone e e nowang e nne bojalwa jwa mofine, e le nkgwana e e lekanyang, e e reng e kgaogantswe sene go tsewe kgaogano e le nngwe fela.

14Lo se ka lwa ja, le fa e le senkgwe, le fa e le mabele a a gadikilweng, le fa e le diako tse dintšha, go ya go fitlha mo tsatsing leo, go tsamaya lo isetsa Modimo tshupelo ya lona; ke molao o o sa khutleng mo dikokomaneng tsotlhe tsa lona, mo mannong otlhe a lona.

15“E re ka moso morago ga Sabata, e bong ka letsatsi le o lerileng ngata ya tshupelo e e fokisiwang ka lone, lo simolole go bala; lo bale boSabata ba supa ba ba tletseng,

16go ya go fitlha kwa letsatsing la ka moso morago ga Sabata wa bosupa, lo bale malatsi a le 50, mme lo isetse Jehofa tshupelo ya boupe jo boša.

17Mo mannong a lone lo ntshe dinkgwe di le pedi tse di fokisiwang, e le tsa emere e e reng e kgaogantswe sesome go bo go tsewe dikgaogano di le pedi, a e nne tsa setou, a di besiwe di bedisitswe, go tla di nna mabutswapele tse di nnelang Jehofa.

18Lo supe senkgwe lo se patagantse le dikwanyana di supa, di se na bogole, tsa ngwaga wa ntlha, le kgongwana e le nngwe fela, le diphelefu di le pedi; a di nne tshupelo e e fisediwang Jehofa, di na le tshupelo ya tsone ya boupe le ditshupelo tsa tsone tse di nowang, ke gore tshupelo e e dirwang ka molelo, e e nnelang Jehofa monko o o monate.

19Podi e le nngwe fela e le e tonanyana lo e ise tshupelelo ya boleo, le dikwanyana di le pedi tse ditonanyana tsa ngwaga wa ntlha, di nne setlhabelo sa ditshupelo tsa kagiso.

20Moperesiti o tlaa di fokisa di na le senkgwe sa mabutswapele e le tshupelo ya mofoko fa pele ga Jehofa, di na le dikwanyana tse pedi, di tlaa nna tsa gagwe moperesiti, e le tse di itshepetseng Jehofa.

21Lo dire kitsiso ka lone tsatsi leo fela; go tlaa nna phuthego e e itshepileng go lona; lo se ka lwa dira tiro epe e e leng ya setlhanka fela; ke molao o o sa khutleng mo mannong otlhe a lona, go ya dikokomaneng tsotlhe tsa lona.

22“E tlaa re fa lo roba thobo ya lefatshe la lona, o se ka wa robela ruri ditlhofi tsa tshimo ya gago, le gone o se ka wa phutha maronopo a thobo ya gago, o a siele mohumanegi le moeng; ke nna Jehofa Modimo wa lona.”

23Jehofa a bua le Moše a re:

24“Bua le bana ba Iseraele, o re: E re ka kgwedi ya bosupa, ka letsatsi la ntlha la kgwedi, a go nne boikhutso jo bo masisi go lona, e le boikgakololo ka go letsa dinaka, phuthego e e itshepileng.

25Lo se ka lwa dira tiro epe e e leng ya setlhanka; lo isetse Jehofa tshupelo e e dirwang ka molelo.”

26Jehofa a bua le Moše, a re:

27“Le fa go ntse jalo ka letsatsi la lesome la kgwedi eo, go bo go le letsatsi la tetlanyo, e nne phuthego e e itshepileng go lona, mme lo ipatike mewa; lo bo lo isetse Jehofa tshupelo e e dirwang ka molelo.

28Lo se ka lwa dira tiro epe ka letsatsi leo, gonne ke letsatsi la tetlanyo, la go lo direla tetlanyo fa pele ga Jehofa Modimo wa lona.

29Gonne le fa e ka nna motho ofe yo o sa ipatikeng mowa ka letsatsi leo, o tlaa kgaolwa mo bathong ba ga gabo,

30le gone le fa e ka nna motho ofe yo o dirang tiro nngwe ka letsatsi leo, yoo, ke tlaa mo senya mo bathong ba ga gabo.

31Lo se ka lwa dira tiro epe, ke molao o o sa khutleng go ya dikokomaneng tsotlhe tsa lona mo mannong otlhe a lona.

32E tlaa lo nnela Sabata wa boikhutso jo bo masisi, mme lo tlaa ipatika mewa; ka letsatsi la bo 9 go le maitseboa, go tswa maitseboeng go ya maitseboeng, lo ilele Sabata wa lona.”

33Jehofa a bua le Moše, a re:

34“Bua le bana ba Iseraele, o re ka letsatsi la 15 la kgwedi eo ya bosupa, go bo go le modiro wa metlaagana ka malatsi a supa, modiro o o nnelang Jehofa.

35E re ka letsatsi la ntlha go nne phuthego e e itshepileng, lo se ka lwa dira tiro epe e e leng ya setlhanka.

36Lo tlaa isetsa Jehofa tshupelo e e dirwang ka molelo ka malatsi a supa, ka letsatsi la bo 8 go nne phuthego e e itshepileng go lona; lo isetse Jehofa tshupelo e e dirwang ka molelo; ke phuthego e e masisi; lo se ka lwa dira tiro epe e e leng ya setlhanka.

37“Mediro e e tlhomilweng ya ga Jehofa ke e, e lo tlaa e bolelang go re ke diphuthego tse di itshepileng tsa go isetsa Jehofa tshupelo e e dirwang ka molelo, tshupelo e e fisiwang, le tshupelo ya boupe, le setlhabelo, le ditshupelo tse di nowang, nngwe le nngwe ka letsatsi la yone,

38kwa ntle go boSabata ba ga Jehofa, le kwa ntle ga dineo tsa lona, le kwa ntle ga maikano otlhe a lona, le kwa ntle ga ditshupelo tsotlhe tsa lona tsa peleego tse lo di ntshetsang Jehofa.

39“Le fa go ntse jalo e re ka letsatsi la 15 la kgwedi ya bosupa, fa lo sena go phutha maungo a lefatshe, lo tlaa direla Jehofa modiro ka malatsi a supa; e re ka letsatsi la ntlha go nne boikhutso jo bo masisi, le ka letsatsi la bo 8 go nne boikhutso jo bo masisi.

40Ka letsatsi la ntlha lo tseye loungo lwa ditlhare tse dintle, dikala tsa makolane, le dikala tsa ditlhare tse dikima, le madibonoka a nokana; lo itumele fa pele ga Jehofa Modimo wa lona ka malatsi a supa.

41Lo tlaa o dira, e le modiro wa ga Jehofa, ka malatsi a supa mo ngwageng; ke molao o o sa khutleng mo dikokomaneng tsa lona; lo o dire ka kgwedi ya bosupa.

42Lo nne mo diobong ka malatsi a supa; botlhe ba ba tsaletsweng mo gae, a ba nne mo diobong,

43gore dikokomana tsa lona di itse fa bana ba Iseraele ba kile ba nna mo diobong ka taolo ya me, jale ka ke ba ntsha mo lefatsheng la Egepeto, ke nna Jehofa Modimo wa lona.”

44Moše a bolelela bana ba Iseraele mediro e e tlhomilweng ya ga Jehofa.

← Chapter 22 Jump to: Chapter 24 →