Romans 14

Tswana (BAEBELE e e Boitshepo) 1992

← Chapter 13 Jump to: Chapter 15 →

1Yo o bokoa mo tumelong lo mo amogele, e seng go tsena mo dikgannyeng tse di belaesegang.

2Motho mongwe o na le tumelo ya go ja dilo tsotlhe; mme yo o bokoa a je merogo fela.

3Yo o jang fela, a a se nyatse yo o sa jeng; le yo o sa jeng, a se ka a sekisa yo o jang fela; gonne Modimo o mo tshotse.

4O mang wena yo o sekisang motlhanka wa yo mongwe? Go ema le go wa ga gagwe, e ntse ke ga morena wa gagwe. Ee, o tlaa emisiwa; gonne Morena o na le nonofo ya go mo emisa.

5Motho mongwe o tlotla letsatsi lengwe bogolo go le lengwe; yo mongwe a tlotle malatsi otlhe, a tshwane fela. A motho mongwe le mongwe a ikutlwele ruri mo pelong ya gagwe.

6Yo o tlotlang letsatsi, o le tlotlela Morena; le yo o jang fela, o jela Morena, gonne o leboga Modimo; le yo o sa jeng, o a ba a sa jele Morena, mme a leboge Modimo.

7Gonne ga go ope wa rona yo o itshelelang fela, e bile ga go ope yo o itshwelang fela.

8Gonne le fa re tshela, re tshelela Morena; mme le fa re swa, re swela Morena; ke gone, le fa re tshela, kgotsa re swa, re ntse re le ba Morena fela.

9Gonne Kereste o swetse gone moo, a ba a tloga a tshela, gore a tle a nne Morena wa baswi le wa batshedi.

10Mme wena, ana o sekisetsang wa gaeno? E bile o nyaletsang wa gaeno e ntse e le wena fela? Gonne rotlhe re tlaa ema fa pele ga senno sa tshekelo sa Modimo.

11Gonne go kwadilwe ga twe: “Jaaka ke tshedile,” go bua Morena, “mangole otlhe a tlaa nkhubamela, le diteme tsotlhe di tlaa ipolelela Modimo.”

12Ke gone jalo, mongwe le mongwe wa rona o tlaa ikarabela Modimo.

13Ke gone, a re se tlholeng re sekisanya, mme bogolo lo akanye mo, gore: Motho ope a se ka a baya sekgopi mo tseleng ya wa ga gabo, le fa e le se se ka mo digang.

14Ke a itse, ke bile ke a tlhomamisa ka Morena Jesu, fa go se sepe se se itshekologileng ka sosi; fa e se go re yo o kayang sengwe fa se itshekologile, mo go ene se itshekologile.

15Gonne fa wa gaeno a hutsafala ka ntlha ya dijo, ga o tlhole o sepela mo loratong. O se ka wa senya ka dijo tsa gago ene yo Keresete o mo swetseng.

16Ka re, a molemo wa lona o se bolelwe ka bosula;

17gonne bogosi jwa Modimo ga se go ja le go nwa, mme ka tshiamo, le kagiso, le boitumelo mo Moweng o o Boitshepo.

18Gonne ene yo o direlang Keresete mo go ntseng jalo, o kgatlha Modimo, o bile o lebosega mo bathong.

19Jalo a re lateleng dilo tse di diranang le kagiso, le dilo tse re ka agelelanang ka tsone.

20Lo se ka lwa rutlolola tiro ya Modimo ka ntlha ya dijo. Le gale dilo tsotlhe di itshekile; le fa go ntse jalo go bosula mo mothong yo o jang ka go kgopisa yo mongwe.

21Go le go ja nama, go le go nwa bojalwa jwa mofine, le gotlhe mo wa gaeno o kgopiwang ka gone, go molemo go kgaogana nago.

22Tumelo e o nang nayo, a e nne ya gago fela fa pele ga Modimo. Go sego motho yo o sa itshekiseng mo go se o dumalanang naso.

23Yo o jang a belaela, o a sekisiwa, ka a sa je ka tumelo, mme le fa e le eng se e seng sa tumelo, ke boleo.

← Chapter 13 Jump to: Chapter 15 →