Romans 16

Tswana (BAEBELE e e Boitshepo) 1992

← Chapter 15 Jump to:

1Ke lo kaela Febe kgaitsadia rona, yo e leng modiredi mongwe wa phuthego e e mo Kenkerea;

2gore lo mo tshole mo Moreneng, ka mokgwa o o tshwanetseng baitshepi; le gore lo mo thuse mo go sengwe fela se o tlaa se lo lopang, gonne le ene e ne e ntse e le mothusi wa batho ba le bantsi, le wa me ka nosi.

3Dumedisang Perisila le Akwila, badiredi ka nna mo go Keresete Jesu,

4e le ba ba kileng ba baya dithamo tsa bone fa fatshe, gore ba mpoloke; ba ke sa ba lebogeng ke le nosi, mme le tsone diphuthego tsotlhe tsa Baditšhaba di a ba leboga.

5Lo dumedise phuthego e e mo ntlong ya bone. Dumedisang Epaeneto moratwi wa me, yo e leng lebutswapele la Asia mo go Keresete.

6Dumedisang Maria, yo o lo diretseng ka thata e kgolo.

7Dumedisang Anteroniko le Juniase, ba losika lwa me, le bagolegwi ka nna, ba ba itsegeng mo baaposetoleng, e bile e le ba ba dumetseng mo go Keresete pele ga me.

8Dumedisang Ampeliato moratwi wa me mo Moreneng.

9Dumedisang Urebano modiri ka rona mo tirong ya ga Keresete, le Setakuse moratwi wa me.

10Dumedisang Apelese molebosegi wa ga Keresete. Dumedisang ba e leng ba ntlo ya ga Arisetobulo.

11Dumedisang Herotione wa losika lwa me. Dumedisang ba ntlo ya ga Narekiso, ba ba mo Moreneng.

12Dumedisang Terufena le Terufosa, e le basadi ba ba dirang mo Moreneng. Dumedisang Peresise moratwi, yo o kileng a dira thata mo Moreneng.

13Dumedisang Rufuse moitshenkedwi wa Morena, le yo e leng mmaagwe, le mme.

14Dumedisang Asunekerito, le Felegone, le Heremese, le Paterobase, le Heremase, le bakaulengwe ba ba nang nabo.

15Dumedisang Filologo le Julia, le Nereo le kgaitsadie, le Olumpase, le baitshepi botlhe ba ba nang nabo.

16Lo dumedisanye ka katlo e e boitshepo. Diphuthego tsotlhe tsa ga Keresete di a lo dumedisa.

17Jaana ke a lo rapela, bagaetsho, ka re, lepang ba ba tsosang dikgaogano le dikgopiso tse di fapaanyeng, le thuto e lo e ithutileng; mme lo kgaogane nabo.

18Gonne ba ba ntseng jalo ga ba direle Morena wa rona Keresete, fa e se dimpa tsa bone fela; ba tle ba tsietse dipelo tsa ba ba bopegileng senyana, ka puo ya bone e e borethe, e e ntle.

19Gonne go utlwa ga lona go utlwaletse kwa bathong botlhe. Ke gone ke a itumela ka ga lona; mme ke rata gore lo nne botlhale mo go se se molemo, lo nne masisi mo go se se bosula.

20Modimo wa kagiso o tlaa akofa o tapetela Satane fa tlase ga dinao tsa lona.

21Timotheo modiri ka nna, o a lo dumedisa; le Lukio le Jasone le Sosipatere, ba losika lwa me.

22Nna Teretio, yo ke kwalang lokwalo lo, ke a lo dumedisa mo Moreneng.

23Gaio, yo ke nnang mo ga gagwe, e bile e le mothusi wa phuthego yotlhe, o a lo dumedisa. Eraseto modisa wa dikhumo tsa motse, o a lo dumedisa, le Kwareto wa mokaulengwe.

24A tshegofatso ya Morena wa rona Jesu Keresete e nne le lona lotlhe.

25Jaana ene yo o nonofileng go lo tlhomamisa ka fa Mafokong a a Molemo a me, le ka fa go rerweng ga Jesu Keresete, ka fa tshenolong ya bosaitsiweng jo bo sa leng bo boloketswe mo tuulalong ka metlha e e sa leng e tlholega e tswa Tsose;

26jaanong bo senotswe bo bile bo itsisiwe merafe yotlhe ka dikwalo tsa baperofeti, ka fa taolong ya Modimo o o sa tlholegang, gore e tle mo khutlong ya tumelo;

27go Modimo o o botlhale o le osi, ka Jesu Keresete, a go nne kgalalelo ka bosaengkae. Amen.

← Chapter 15 Jump to: