Zechariah 13

Tswana (BAEBELE e e Boitshepo) 1992

← Chapter 12 Jump to: Chapter 14 →

1“Mo motlheng oo motswedi o tlaa phunyediwa ba ntlo ya ga Dafite le banni ba Jerusalema, o o tlosang boleo le o o tlosang boitshekologo.

2“Go tlaa dirala mo motlheng oo,” go bua Jehofa wa masomosomo, “go re, ke tlaa kgaola maina a medimo ya disetwa a tswa mo lefatsheng, ga a ketla a tlhola a gakologelwa; gape, ke tlaa dira gore baperofeti le ba mowa o o maswe ba tswe mo lefatsheng.

3Go tlaa dirala go re e tlaa re fa mongwe a sa ntse a tlaa perofesa, foo rraagwe le mmaagwe ba ba mo tsetseng ba tlaa mo raya, ba re: ‘Ga o ketla o tshela; gonne o bua maaka ka leina la ga Jehofa;’ mme rraagwe le mmaagwe ba ba mo tsetseng, ba tlaa mo phololetsa mogang o perofesang.

4“Go tlaa dirala mo motlheng oo, go re, baperofeti, mongwe le mongwe wa bone, o tlaa tlhajwa ke ditlhong ka ga ponatshegelo ya gagwe, mogang o perofesang, le gone ga ba ketla ba apara kobo e e bobowa go tsietsa.

5Mme o tlaa re: ‘Ga ke moperofeti wa sepe, ke molemi fela wa mmu, gonne e sa le ke le lekau, ka dirwa motlhanka.’

6Mongwe o tlaa mo raya a re: ‘Dintho tse ke dife tse di mo mabogong a gago?’ Foo o tlaa fetola a re: ‘Ke tse ke di ntshitsweng mo ntlong ya ditsala tsa me.’

7“Kubuga wena tšhaka, o kubugele modisa wa me, le motho yo e leng monkana wa me,” go bua Jehofa wa masomosomo; “Itaya modisa, mme dinku di tlaa faladiwa; seatla sa me ke tlaa se retololela mo go tse dipotlana.

8Go tlaa dirala go re, mo lefatsheng lotlhe, go bua Jehofa, dintlha di le pedi di tlaa kgaolwa di swa; mme ya boraro e tlaa tlogelwa mo go lone.

9Kgaogano ya boraro ke tlaa e ralatsa molelo, ke tlaa ba itshekisa jaaka selefera se tle se itshekisiwe, ke tlaa ba leka jaaka gouta e tle e lekwe, ba tlaa bitsa leina la me, mme ke tlaa ba utlwa; ke tlaa re: ‘Ke batho ba me;’ le bone ba tlaa re: ‘Jehofa ke Modimo wa me.’ ”

← Chapter 12 Jump to: Chapter 14 →