Deuteronomy 16

Tsonga Xitsonga (Bibele) 1929

← Chapter 15 Jump to: Chapter 17 →

1“U ta hlayisa n'hweti ya Abibi, u endlela Yehovha, Xikwembu xa wena, Paseka, hikuva Yehovha, Xikwembu xa wena, u ku humesile eEgipta nivusiku hi n'hweti ya Abibi.

2U ta tlhavela Yehovha, Xikwembu xa wena, Paseka, swi ri swifuwo leswikulu ni leswitsongo, exivandleni lexi Yehovha a nga ta xi hlawula ku akisa vito ra yena kona.

3U nga tshuki u yi dya ni xinkwa lexi nga ni comela, u ta yi dya hi masiku ya ntlhanu na mambirhi ni xinkwa lexo kala comela, swi ri xinkwa xa khombo, â€” hikuva u humile hi ku hatlisa etikweni ra Egipta.

4U ta tsundzuka hi masiku hinkwawo ya ku hanyaka wena siku leri u humeke etikweni ra Egipta ha rona. Ku nga tshuki ku voniwa comela endyangweni wa wena emindzilekaneni hinkwayo ya wena, hi masiku ya ntlhanu na mambirhi; loko yi ri nyama ya gandzelo leri u nga ta ri humesa nimadyambu ya siku ro rhanga, yi nga tshuki yi salela nimixo.

5U nga ka u nga tlhavi Paseka emitini leyi Yehovha, Xikwembu xa wena, a ku nyikaka; yona,

6u ta yi tlhava ntsena exivandleni lexi Yehovha, Xikwembu xa wena, a nga ta xi hlawula ku akisa vito ra xona kona: u ta yi tlhava nimadyambu loko dyambu ri pela, hi nkarhi lowu u humeke eEgipta ha wona.

7U ta yi oxa, u dya exivandleni lexi Yehovha, Xikwembu xa wena, a nga ta xi hlawula, kutani, nimixo, u ta tlhelela emitsongeni ya wena.

8Hi masiku ya ntlhanu na rin'we u ta dya xinkwa lexo kala comela; hi siku ra ntlhanu na mambirhi, ku ta va ni nhlengeletano leyi hlawuleriweke Yehovha, Xikwembu xa wena: u nga tshuki u tirha ntirho ni wun'we lowo tika.

9“U ta hlaya mavhiki ya ntlhanu na mambirhi; u ta sungula ku hlaya mavhiki lawa ya ntlhanu na mambirhi, hi nkarhi lowu va sungulaka ku tsema koro hi sikela; kutani u ta endlela Yehovha, Xikwembu xa wena, nkhuvo.

10Mihlengo leyi u nga ta yi humesa yi ta huma eku tirhandzeleni ka mbilu ya wena, hilaha Yehovha, Xikwembu xa wena, xi ku katekiseke hakona.

11U ta titsakela emahlweni ka Yehovha, Xikwembu xa wena, u ri ni n'wana wa wena wa wanuna, ni wa wansati, ni nandza wa wena wa wanuna ni wa wansati, ni Mulevhi la nga emindyangwini ya wena, ni xisiwana, ni noni, va ri lava nga ta tshama exikarhi ka n'wina, exivandleni lexi Yehovha, Xikwembu xa wena, a nga ta xi hlawula ku akisa vito ra xona kona;

12u ta tsundzuka leswaku a wu ri khumbi eEgipta kutani u ta hlayisa ni ku endla ku lerisa loku.

13“U ta va ni nkhuvo wa mitsonga hi masiku ya ntlhanu na mambirhi; kutakuloko u hlengeletile mihandzu ya xivuya xa wena, ni ya xikhuvuto xa wena,

14u ta titsakela enkhubyeni lowu, u ri wena, ni n'wana wa wena wa wanuna, ni wa wansati, ni nandza wa wena wa wanuna, ni wa wansati, ni Mulevhi, ni muluveri ni xisiwana, ni noni lava nga emitini ni ya wena.

15Hi masiku ya ntlhanu na mambirhi, u ta endlela Yehovha, Xikwembu xa wena, nkhuvo exivandleni lexi Yehovha a nga ta xi hlawula, hikuva Yehovha, Xikwembu xa wena, u ta ku katekisa eku tshoveleni hinkwako ka wena, ni le mitirhweni hinkwayo ya mavoko ya wena, hi kona u nga ta tsaka swinene.

16“Kanharhu hi lembe, wanuna un'wana ni un'wana u ta humelela emahlweni ka Yehovha, Xikwembu xa wena, exivandleni lexi a nga ta xi hlawula; hileswaku enkhubyeni wa xinkwa lexo kala comela, ni le nkhubyeni wa mavhiki, ni le nkhubyeni wa mitsonga kambe va nga ka va nga humeleli emahlweni ka Yehovha va nga tamelanga nchumu:

17Un'wana ni un'wana u ta tisa nhlengo wa yena hilaha Yehovha, Xikwembu xa wena, a nga ta ku katekisa hakona.

18“U ta veka vaavanyisi ni vatsari emitini hinkwayo leyi Yehovha, Xikwembu xa wena, a nga ta ku nyika yona, hi tinxaka ta wena; va ta avanyisa tiko hi ku avanyisa loko lulama.

19U nga tshuki u voyamisa ku lulama; u nga tshuki u ya hi nghohe ya vanhu, kambe u nga tshuki u amukela tinyiko, hikuva nyiko yi phumerisa mahlo ya tintlhari, kambe yi onha timhaka ta lavo lulama.

20U ta lavisisa ku lulama ntsena leswaku u hanya, ni leswaku u fuma tiko leri Yehovha, Xikwembu xa wena, a ku nyikaka rona.

21“U nga tshuki u byala murhi, hambi wu ri wihi, ku endla Axera (rihlampfu) ekusuhi ni alitari leyi u nga ta yi akela Yehovha, Xikwembu xa wena;

22kambe u nga tshuki u tiyimisela swifaniso leswi Yehovha, Xikwembu xa wena, a swi vengaka.

← Chapter 15 Jump to: Chapter 17 →