Deuteronomy 6

Tsonga Xitsonga (Bibele) 1929

← Chapter 5 Jump to: Chapter 7 →

1“Hi wona nawu, ni timhaka, ni ku lerisa, leswi Yehovha Xikwembu xa n'wina, xi leriseke ku mi dyondzisa swona, mi ta swi endla etikweni leri mi nga ta nghena eka rona ku ri fuma;

2u ta chava Yehovha, Xikwembu xa wena, u ri karhi u hlayisa milawu hinkwayo ya xona, ni ku lerisa hinkwako ka xona loku ndzi ku byelaka; u ta swi hlayisa hi masiku hinkwawo ya ku hanyaka wena, u ri wena, ni n'wana wa wena, ni n'wana wa n'wana wa wena, leswaku masiku ya wena ma ta lehisiwa.

3“Oho Israele! U ta swi yingisa, u ta chivirikela ku swi endla leswaku u tsaka, kutani mi ta andza ngopfu etikweni leri kulukeke hi ntswamba ni vulombe, hilaha Yehovha, Xikwembu xa vatata wa wena, a ku byeleke hakona.

4“Yingisa, Israele! Yehovha, Xikwembu xa hina, hi xona Xikwembu lexi hanyaka ntsena.

5“U ta rhandza Yehovha, Xikwembu xa wena, hi mbilu hinkwayo ya wena, ni moya hinkwawo wa wena, ni matimba hinkwawo ya wena.

6Milawu leyi ndzi ku nyikaka namuntlha yi ta va embilwini ya wena.

7U ta yi dyondzisa vana va wena, u yi vula endlwini ya wena, ni le ku endzeni ka wena, ni loko u ya etlela, ni loko u pfuka.

8U ta yi bohelela evokweni ra wena, xi va xitsundzuxo xa wena, ni xikombiso exikarhi ka mahlo ya wena,

9u ta yi tsala etimhandzeni ta yindlu ya wena, ni le timbantini ta wena.

10“Kutakuloko Yehovha, Xikwembu xa wena, xi ku nghenisile etikweni leri xi hlambanyeleke Abrahama, na Isaka, na Yakobo ku ku nyika rona (yi nga miti leyikulu, leyinene leyi u nga ka u nga yi aki,

11ni tindlu leti teleke hi rifuwo lero tala, leti u nga ti tatangiki, ni swihlovo leswi ceriweke, leswi u nga swi celangiki, ni tivhinya ni mitlhwari leyi u nga yi byalangiki), kutani kutakuloko u dya, u xurha,

12u ta chava ku rivala Yehovha la ku humeseke etikweni ra Egipta, endlwini ya vukhumbi.

13“U ta chava Yehovha, Xikwembu xa wena, u xi tirhela, ni ku hlambanya hi vito ra xona.

14Mi nga tshuki mi landza swikwembu swin'wanyana exikarhi ka swikwembu swa matiko lama nga ta mi rhendzela;

15hikuva Yehovha, Xikwembu xa wena, la nga exikarhi ka n'wina, i Xikwembu xa rilondzo. Vukari bya Yehovha, Xikwembu xa wena, byi nga ku pfurhela kutani a nga ku herisa emisaveni.

16“Mi nga tshuki mi ringa Yehovha, Xikwembu xa n'wina, kukotisa leswi mi nga xi ringa eMasa;

17kambe mi ta hlayisa swinene milawu ya Yehovha, Xikwembu xa n'wina, ni vumbhoni bya xona, ni ku lerisa loku xi mi leriseke kona.

18U ta endla leswo lulama ni leswinene emahlweni ka Yehovha leswaku u tsaka, ni leswaku u ya nghena etikweni lerinene, leri Yehovha a ri hlambanyeleke vatata wa wena, u va u ri fuma,

19a va a hlongola valala va wena hinkwavo emahlweni ka wena, hilaha Yehovha a nga vula hakona.

20“Kungakuloko n'wana wa wena a ku vutisa mundzuku, a ku: ‘Xana vumbhoni lebyi, ni milawu leyi, ni ku lerisa loku, leswi Yehovha Xikwembu xa hina, xi mi leriseke swona, i yini xana?’

21U ta ku eka n'wana wa wena: ‘A hi ri makhumbi ya Faro etikweni ra Egipta, kambe Yehovha u hi humesile eEgipta hi voko ra matimba.

22Kutani Yehovha u endlile emahlweni ka hina swikombiso ni masingita lamakulu, lama chavisaka ku ba Egipta na Faro, ni yindlu ya yena hinkwayo.

23Kutani u hi humesile kona ku hi fikisa halenu, ni ku hi nyika tiko leri a ri hlambanyeleke vatata wa hina.

24Yehovha u hi lerisile ku hlayisa hinkwayo milawu leyi ni ku endla hakona, hi ri karhi hi chava Yehovha, Xikwembu xa hina, leswaku hi tsaka hi mikarhi hinkwayo, ni leswaku xi hi hanyisa kukotisa namuntlha.

25Ku ta va ku lulama eka hina loko hi hlayisa hi ku chivirika milawu hinkwayo leyi, emahlweni ka Yehovha, Xikwembu xa hina, hilaha xi nga hi lerisa hakona.’

← Chapter 5 Jump to: Chapter 7 →