Deuteronomy 27

Tsonga Xitsonga (Bibele) 1929

← Chapter 26 Jump to: Chapter 28 →

1Muxe a ri ni vakulukumba va Israele, a lerisa tiko, a ku: “Mi ta hlayisa nawu hinkwawo lowu ndzi mi nyikaka wona namuntlha.

2“Siku mi nga ta pela Yordani, ku nghena etikweni leri Yehovha, Xikwembu xa wena, a ku nyikaka rona, u ta yimisa maribye lamakulu, u ma tota hi mhemba;

3kutani u tsala ehenhla ka wona marito hinkwawo ya nawu lowu, loko u perile ku nghena emisaveni leyi Yehovha, Xikwembu xa wena, a ku nyikaka yona, tiko leri khulukaka ntswamba ni vulombe, hilaha Yehovha, Xikwembu xa vatata wa wena, a ku byeleke hakona.

4Kutakuloko mi perile Yordani, mi ta yimisa entshaveni ya Ebali maribye lawa hilaha ndzi mi lerisaka hakona namuntlha, kutani u ma tota hi mhemba.

5Kona u ta akela Yehovha, Xikwembu xa wena alitari ya maribye; u nga ka u nga yisi nsimbhi henhla ka wona;

6u ta akela Yehovha alitari hi maribye lama nga vatliwangiki, kutani u ta humesela Yehovha, Xikwembu xa wena, tiholokosta ealitarini leyi.

7U ta humesa ni timhamba ta ku khensa, u dya kona, u titsakela emahlweni ka Yehovha, Xikwembu xa wena.

8U ta tsala emaribyeni lawa, marito hinkwawo ya nawu lowu; u ma tsala swinene.”

9Muxe a ri ni vaprista va Valevhi a byela Vaisraele hinkwavo, a ku: “O! Israele! Miyela, u yingisa; namuntlha u tiko ra Yehovha, Xikwembu xa wena.

10U ta yingisa rito ra Yehovha, Xikwembu xa wena, u va u hlayisa milawu ya yena ni ku lerisa ka yena leswi ndzi ku lerisaka namuntlha.”

11Hi siku rolero, Muxe a lerisa tiko, a ku:

12“Kutakuloko mi perile Yordani, lava nga ta yima entshaveni ya Gerizimi ku katekisa tiko, hi lava: va Simiyoni, ni Valevhi, ni va Yuda, ni va Isakara, ni va Yosefa, ni va Benjamini.

13Lava nga ta yima entshaveni ya Ebali ku rhukana, hi lava: va Rhuveni, ni va Gadi, ni va Asere, ni va Zebuloni, ni va Dani, ni va Neftali.

14Kutani Valevhi va ta vulavula hi rito leri tlakukeke va ku eka vanhu hinkwavo Vaisraele:

15“ ‘A ku rhukaniwe munhu la endlaka xifaniso lexi vatliweke, hambi xi ri lexi chuluriweke, xi ri xilo lexi yilaka eka Yehovha, wu ri ntirho wa mavoko ya mutirhi, kutani a xi veka endhawini leyi fihliweke!’ Kavaloko tiko hinkwaro ri ta hlamula ri ku: ‘Amen!’

16“ ‘A ku rhukaniwe la sandzaka tata wa yena, hambi a ri mana wa yena!’ Kutani tiko hinkwaro ri ta hlamula, ri ku: ‘Amen!’

17“ ‘A ku rhukaniwe la tshinetaka ndzilakana wa warikwavo!’ Kutani tiko hinkwaro ri ta hlamula, ri ku: ‘Amen!’

18“ ‘A ku rhukaniwe la hambukisaka lowo fa mahlo endleleni ya yena!’ Kutani tiko hinkwaro ri ta hlamula, ri ku: ‘Amen!’

19“ ‘A ku rhukaniwe la voyamisaka ku lulama ka muluveri, ni ka xisiwana, ni ka noni!’ Kutani tiko hinkwaro ri ta hlamula, ri ku: ‘Amen!’

20“ ‘A ku rhukaniwe la etlelaka ni nsati wa tata wa yena, hikuva u funungule nguvu ya tata wa yena!’ Kutani tiko hinkwaro ri ta hlamula, ri ku: ‘Amen!’

21“ ‘A ku rhukaniwe la etlelaka ni xifuwo xihi ni xihi!’ Kutani tiko hinkwaro ri ta hlamula ri ku: ‘Amen!’

22“ ‘A ku rhukaniwe la etlelaka ni makwavo, a nga n'wana wa tata wa yena, hambi n'wana wa mana wa yena!’ Kutani tiko hinkwaro ri ta hlamula, ri ku: ‘Amen!’

23“ ‘A ku rhukaniwe la etlelaka ni mukon'wana wa yena!’ Kutani tiko hinkwaro ri ta hlamula, ri ku: ‘Amen!’

24“ ‘A ku rhukaniwe la baka warikwavo exihundleni!’ Kutani tiko hinkwaro ri ta hlamula, ri ku: ‘Amen!’

25“ ‘A ku rhukaniwe la amukelaka nyiko ku dlaya munhu la nga riki na nandzu!’ Kutani tiko hinkwaro ri ta hlamula, ri ku: ‘Amen!’

26“ ‘A ku rhukaniwe mani na mani la nga tiyiseriki marito ya nawu lowu hi ku endla ha wona!’ Kutani tiko hinkwaro ri ta hlamula ri ku: ‘Amen!’

← Chapter 26 Jump to: Chapter 28 →