Deuteronomy 21

Tsonga Xitsonga (Bibele) 1929

← Chapter 20 Jump to: Chapter 22 →

1“Kungakuloko va kuma emisaveni leyi Yehovha, Xikwembu xa wena, a ku nyikaka yona ku yi fuma, munhu la dlayiweke; u wile emasin'wini, ku nga tiviwi mudlayi wa yena;

2vakulukumba va wena, ni vaavanyisi va wena va ta huma, va ya pima vukule hi ku suka ka la dlayiweke ku ya fika emitini leyi n'wi rhendzeleke.

3“Kutani vakulukumba va muti lowu nga ekusuhi ni la dlayiweke, va ta teka thokazi leri nga siki tirhisiwaka, leri nga siki rhwalaka joko.

4Vakulukumba va muti lowu va ta yisa thokazi enambyeni lowu khulukaka hi masiku, laha ku nga rimiwiki, ni laha ku nga byariwiki kona, hi kona va nga ta ri tshova nhamu enambyeni.

5Vaprista, vana va Levhi, va ta tshinela, hikuva hi vona lava Yehovha, Xikwembu xa wena, a va hlawuleke ku tirha ntirho wa yena, ni ku katekisa hi vito ra Yehovha, kutani milomu ya vona yi ta avanyisa ku tengisana hinkwako, ni timhaka hinkwato ta timbanga.

6Vakulukumba hinkwavo va muti lowu, va ri lava nga ekusuhi ni ntsumbu, va ta hlamba mavoko ehenhla ka thokazi leri va ri tshoveke nhamu enambyeni.

7Kavaloko va ta vulavula, va ku: ‘Mavoko ya hina a ma halatanga ngati leyi, kambe mahlo ya hina a ma vonangi nchumu.

8Oho Yehovha! Wa nga rivalela tiko ra wena ra Israele, leri u ri kutsuleke, kambe u nga vekeli ngati leyi pfumaleke nandzu exikarhi ka tiko ra wena ra Israele! Hi kona ku nga ta phahleriwa vona mhamba hikwalaho ka ngati.’

9Kutani wena u ta susa ngati leyi pfumaleke nandzu exikarhi ka wena, hikuva u ta endla leswi lulameke emahlweni ka Yehovha.

10“Kutakuloko u huma nyimpi ku ya hlasela valala va wena, loko Yehovha, Xikwembu xa wena, a va neha emavokweni ya wena u va u teka vakhomiwa,

11kungakuloko u vona exikarhi ka vakhomiwa wansati la sasekeke, ni loko u n'wi rhandza u ehleketa ku n'wi endla nsati wa wena,

12u ta n'wi nghenisa endlwini ya wena, a byewula misisi enhlokweni, a titsemela min'wala;

13kutani u ta hluvula tinguvu leti a ti ambaleke evukhumbini bya yena, a tshama endlwini ya wena, a ri karhi a rilela tata wa yena ni mana wa yena n'hweti yin'we; kavaloko u ta nghena eka yena, u va nuna wa yena, na yena a va nsati wa wena.

14Kungakuloko u nga ha n'wi rhandzi, u ta n'wi tshika a tifambela, kambe u nga n'wi xavisi hi mali, u nga n'wi endli khumbi, hikuva u n'wi endle nsati wa wena.

15“Kutakuloko wanuna a tekile vasati vambirhi, un'wana loko a rhandziwa, kambe un'wana a vengiwa; loko va n'wi velekele vana va vavanuna havambirhi, hambi a ri la rhandziwaka, hambi la vengiwaka, loko mativula a ri n'wana wa loyi a vengiwaka,

16siku a nga ta nyika vana va yena rifuwo ra yena leswaku yi va ndzhaka ya vona, a nga ka a nga veki hosi n'wana wa loyi a rhandziwaka emahlweni ka n'wana wa loyi a vengiwaka, a nga mativula.

17Kambe u ta veka hosi n'wana wa la vengiwaka ku n'wi nyika ku averiwa kambirhi ka hinkwaswo leswi a nga na swona; hikuva hi xona xirhangana xa matimba ya yena; hi yena hosi.

18“Kungakuloko munhu a ri ni n'wana la nga yingisiki, la tiarisaka, la nga yingisiki rito ra tata wa yena ni rito ra mana wa yena; ni loko ingi va n'wi layile, kambe a nga va yingisanga;

19tata wa yena ni mana wa yena va ta n'wi khoma, va n'wi yisa emahlweni ka vakulukumba va muti wa yena, enyangweni ya vuako bya yena;

20kutani va ta ku eka vakulukumba va muti: ‘N'wana wa hina loyi a tiarisaka, a nga yingisi rito ra hina, i muoswi ni munwi.’

21Vavanuna hinkwavo va muti wa yena va ta n'wi khandla hi maribye leswaku a fa, hi mukhuva wolowo u ta susa lowo biha exikarhi ka wena kutani Vaisraele hinkwavo va ta swi yingisa, va ta chava.

22“Kungakuloko munhu a endlile leswo biha leswi fanelaka hi rifu kutani u n'wi dlayile hi ku n'wi hayeka emurhini,

23ntsumbu wa yena wu nga tshuki wu hundza vusiku wu ri emutini; u ta n'wi lahla hi siku rolero, hikuva la hayekiweke, wa yila eka Xikwembu, kambe u nga tshuki u nyamisa tiko ra wena leri Yehovha, Xikwembu xa wena, a ku nyikaka rona leswaku yi va ndzhaka ya wena.

← Chapter 20 Jump to: Chapter 22 →