Deuteronomy 32

Tsonga Xitsonga (Bibele) 1929

← Chapter 31 Jump to: Chapter 33 →

1“N'wina matilo! Yingisani, ndzi ta vulavula; Na wena misava! Yingisa marito ya nomu wa mina!

2Dyondzo ya mina yi ta swama kukota mpfula, Rito ra mina ri ta xiririka kukotisa mberha; Kukota mpfula erihlazeni, Kukota mberha leyo tala ebyanyini!

3Hikuva ndzi ta vula vito ra Yehovha: Dzunisani Xikwembu xa hina!

4“Yehovha i Ribye lero tiya; mitirho ya yena yi hetisekile; Hikuva tindlela hinkwato ta yena ti lulamile! I Xikwembu xo tshembeka, a xi na nandzu; Xi ni vunene, xi lulamile,

5Leswi va tionheke, a nga na nandzu ka vona, Tingana ti ni vana va yena, I rixaka ro homboloka ni ro hemba.

6Xana mi tlherisela Yehovha leswo tano xana? N'wina mi nga tiko ro hunguka, leri pfumalaka vutlhari A hi yena tata wa wena, ni muendli wa wena La ku endleke, ni la ku tiyiseke xana?

7“Anakanya masiku ya khale; Tsundzukani malembe ya tixaka leti hundzeke, Vutisa tata wa wena, u ta ku dyondzisa, Ni vakulukumba va wena, va ta ku byela.

8La nge henhla loko a nyikile matiko ndzhaka ya wona, Ni loko a avanyisile vana va vanhu, U tsarile mindzilekana ya matiko Hi ntsengo wa vana va Israele,

9Hikuva ku averiwa ka Yehovha, i tiko ra yena; Yakobo, i ku averiwa ka ndzhaka ya yena. U n'wi kumile mananga, Emananga ya ku huwelela loku chavisaka.

10“U n'wi biyerile, u n'wi wundlile, U n'wi hlayisile kukota xanga ya tihlo ra yena,

11Kukotisa gama loko ri pfuxa mavondlo ya rona, Loko ri hahela ehenhla ka vana va rona, Ri tlharamula timpapa, ri va teka, Ri va veleka etinsiveni ta rona.

12I Yehovha ntsena la fambiseke tiko ra yena, Xikwembu xin'wana a xi nga ri na yena.

13“U n'wi khandziyisile etintshaveni ta misava, Israele u dyile mihandzu ya nhova; U n'wi an'wisile hi vulombe bya le ribyeni, Hi mafurha lama humaka emaribyeni yo nonon'hwa;

14Hi mafurha ya tihomu, ni ntswamba wa timbuti, Hi mafurha ya swinyimpfana, Ni ya makhuna la tswariweke Baxani, ni ya swiphongo, Hi mapa ya ku saseka ya koro. U nwile vhinyo yo nandziha, yi ri ngati ya xidzumba.

15“Yexuruni (Israele) u tinonisile, kambe u khadlanyile. U nonile, u kule miri, u tele mafurha, Kambe u tshikile Xikwembu lexi n'wi vumbeke, U sandzile Ribye ra ku hayiseka ka yena.

16Va pfuxile vukwele bya xona hi swikwembu swin'wana, Va xi karihisile hi manyala.

17Va gandzerile mademona ku nga ri Xikwembu, Ni swikwembu leswi va nga swi tivangiki, Swi ri leswintshwa, leswi fikeke sweswi, Leswi vatata wa n'wina va nga swi chavangiki.

18U tshikile Ribye leri ku velekeke, U rivele Xikwembu lexi ku tumbuluxeke.

19“Yehovha u swi vonile, kutani a kariha, U holovele vana va yena va xinuna ni va xisati,

20U te: ‘Ndzi ta va fihlela mombo wa mina, Ndzi ta vona leswi nga ta va humelela; Hikuva i rixaka ro homboloka, I vana lava nga tshembekiki.

21Vona va ndzi pfuxele vukwele hi leswi nga riki Xikwembu, Va ndzi karihisa hi swahava swa vona; Kambe mina ndzi ta va pfuxela vukwele hi lexi nga riki tiko, Ndzi va karihisa hi tiko leri hungukeke.

22Hikuva ndzilo wa vukari bya mina wu tshiveriwile, Wu ta pfurha ku fikela endhawini ya lava feke, Wu ta hisa misava ni mihandzu ya yona, Wu hisa ni masungulo ya tintshava.

23“ ‘Ndzi ta va andzisela makhombo. Ndzi heta miseve ya mina ehenhla ka vona.

24Va ta oma hi ndlala, va dyiwa hi ku hisa ka miri Ni ntungu lowo leva ngopfu; Ndzi ta va rhumela meno ya swivandzana, Ni vuxungu bya leswi kokovaka entshurini.

25Ehandle va ta dlawa hi tlhari, Endzeni, va ta fa hi nchavo: Jaha ri ta lova kukotisa wanhwanyana, La an'waka, kukota nkulukumba.

26Ingi ndzi ta ku: “Ndzi ta va kukula; Ndzi ta hlangula xitsundzuxo xa vona exikarhi ka vanhu,”

27Kambe ndza chava ku pfuka ka nala, Ni leswaku valala va vona va ta tikanganyisa, Va ku: “Mavoko ya hina ma tlakusiwile,” Kambe a hi Yehovha la swi endleke hinkwaswo.’

28“Hikuva i tiko leri pfumalaka ku anakanya, A ku na ku twisisa ka vona.

29Ingi loko va tlharihile va ta swi twa, Va ta anakanya ku hela ka vona.

30Xana munhu a nga hlongorisa ku yini va 1 000 xana? Ni vambirhi va nga hlongorisa va 10 000 xana? Loko ngi ribye ra vona ri nga va xavisanga, Ni loko Yehovha a nga va nyiketanga xana?

31Hikuva Ribye ra vona a ri fani ni Ribye ra hina, Valala va hina va ta avanyisa mhaka leyi,

32Hikuva vhinya ya vona yi hume ensinyeni wa Sodoma, Ni le masin'wini ya Gomora; Mavhinya ya vona i mavhinya ya vuxungu, Swidzumba swa vona swa bava.

33Vhinyo ya vona i vuxungu bya dragona, Ni vuxungu lebyo leva bya mhiri.

34“Xana timhaka leti a ti hlayisiwanga ka mina, A ti vekiwangi exumeni xa mina xana?

35Ku tirihisela ni ku hakela, i ka mina, Siku nenge wa vona wu nga ta tsekatseka; Hikuva siku ra khombo ra vona ri tshinele, Lexi va xi lunghiseriweke xa hatlisa.

36Hikuva Yehovha u ta avanyisa tiko ra yena, Kambe u ta tsetselela malandza ya yena. Loko a vona leswaku matimba ya vona ma herile, Ni leswaku ku nga sali la fuyiweke ni la nga fuyiwangiki.

37Kutani u ta ku: ‘Swikwembu swa vona swi kwihi xana? Ni ribye ra vuchavelo bya vona?

38Swikwembu leswi dyeke mafurha ya magandzelo ya vona, Leswi nweke vhinyo ya ku xuva ka vona. A swi pfuki, a swi mi lamuleri. A swi mi funengeti hi mavoko ya swona!’

39“Vonani sweswi leswaku hi mina, mina ntsena, Ni leswaku a ku na xikwembu xin'wana ehandle ka mina. Hi mina la dlayaka, naswona hi mina la hanyisaka; Ndzi boxile mbanga, kambe ndzi ta ongola, A ku na munhu la kutsulaka evokweni ra mina.

40Hikuva ndzi tlakusa voko ra mina etilweni, Ndzi ku: ‘Ndzi loyi a hanyaka hi masiku:

41Loko ndzi ta lota rihati hi tlhari ra mina, Ni loko voko ra mina ri khoma ku avanyisa, Ndzi ta tirihisela henhla ka valala va mina, Ndzi ta hakela lava ndzi vengaka;

42Ndzi ta pyopyisa miseve ya mina hi ngati, Tlhari ra mina ri ta xurha hi nyama, Hi ngati ya lava tlhaviweke, ni ya vakhomiwa, Ni tinhloko ta tihosi ta valala.’

43“N'wina matiko, yimbelelani hi ku tsaka kun'we ni tiko ra xona, Hikuva Xikwembu xi rihisela ngati ya malandza ya xona, Xi ta tirihisela ehenhla ka valala va xona Xi phahlela misava ya xona, ni tiko ra xona mhamba.”

44Muxe a ta, kutani a byela tiko marito hinkwawo ya risimu leri, a ri na Yoxuwa, n'wana Nuni.

45Kuteloko Muxe a hetile ku byela Vaisraele hinkwavo marito lawa hinkwawo, a ku eka vona:

46Hlayisani etimbilwini ta n'wina marito lawa hinkwawo, lawa ndzi endlaka vumbhoni namuntlha ha wona emahlweni ka n'wina; mi ta ma lerisela vana va n'wina, va ta yingisa ni ku endla hi marito hinkwawo ya nawu lowu.

47Hikuva a hi rito ro hava eka n'wina kambe i vutomi bya n'wina; kutani mi ta lehisa ha rona masiku ya n'wina emisaveni leyi mi nga ta yi teka loko mi perile Yordani.

48Hi siku rolero, Yehovha a byela Muxe, a ku:

49“Khandziya entshaveni leyi ya Abarimi, enhlohlorhini ya Nebo, leyi nga etikweni ra Mowabu, ku langutene na Yeriko; kutani u languta tiko ra Kanana leri ndzi ri fumisaka vana va Israele.

50Kavaloko u ta fa entshaveni leyi u nga ta khandziya ka yona, kutani u ta amukeriwa karikwenu, kukotisa Aroni, makwenu, la feke entshaveni ya Hori, kutani u amukeriwile karikwavo;

51hikuva mi ndzi dyohele xikarhi ka vana va Israele emhakeni ya mati ya Meriba wa Kadexe, emananga ya Sini; hikuva a mi ndzi kwetsimisanga xikarhi ka vana va Israele.

52Hikuva u ta vona tiko emahlweni ka wena, kambe u nga ka u nga ngheni eka rona, ri nga tiko leri ndzi ri nyikaka vana va Israele.”

← Chapter 31 Jump to: Chapter 33 →