Deuteronomy 26

Tsonga Xitsonga (Bibele) 1929

← Chapter 25 Jump to: Chapter 27 →

1“Kutakuloko u nghenile etikweni leri Yehovha, Xikwembu xa wena, a ku nyikaka leswaku yi va ndzhaka ya wena, ni loko u ri tekile, u va u akile eka rona,

2u ta teka swirhangana swa mihandzu hinkwayo leyi u yi hlengeleteke etikweni leri Yehovha, Xikwembu xa wena, a ku nyikeke rona, u ta yi veka exirhundzwini, kutani u ya exivandleni lexi Yehovha, Xikwembu xa wena, a nga ta hlawula ku akisa vito ra yena kona.

3U ta ya eka muprista la nga ta va kona hi masiku lawa, u ku eka yena: ‘Namuntlha ndzi tivisa Yehovha, Xikwembu xa wena leswaku ndzi nghenile etikweni leri Yehovha a hlambanyeleke vatatana ku hi nyika rona.’

4Muprista u ta teka xirhundzu emavokweni ya wena, kutani u ta xi veka emahlweni ka alitari ya Yehovha, Xikwembu xa wena.

5Kutani u ta vulavula emahlweni ka Yehovha, Xikwembu xa wena, u ku: ‘Tatana a a ri Muaramu, a lave ku fa, kutani a xikela eEgipta a ri ni vanhu lava nga talangiki, a tshama kona a ri muluveri; kambe a hundzukela kona tiko lerikulu, leri nga ni matimba, ni vanhu lavo tala.

6Vaegipta va hi xanisile va hi tsongahatile, ni ku hi tirhisa hi vukhumbi lebyo nonon'hwa.

7Kambe hi huwelele eka Yehovha, Xikwembu xa vatata wa hina, kutani Yehovha u yingisile rito ra hina, a vona ku tsongahatiwa ka hina, ni mitirho ya hina, ni ku xaniseka ka hina.

8Kutani Yehovha u hi humesile eEgipta hi xandla xa matimba ni voko leri tlakukeke, ni xichavo lexikulu, ni swikombiso ni mahlori.

9U hi fikisile exivandleni lexi, kambe u hi nyikile tiko leri, tiko leri khulukaka ntswamba ni vulombe.

10Oho! Yehovha, waswivo sweswi ndzi tisile swirhangana swa mihandzu ya misava leyi u ndzi nyikeke yona!’ U ta yi veka emahlweni ka Yehovha, Xikwembu xa wena, kutani u ta khinsama emahlweni ka Yehovha, Xikwembu xa wena.

11U ta titsakela u ri ni Mulevhi, ni muluveri la nga ta va exikarhi ka wena, hi rifuwo hinkwaro leri Yehovha, Xikwembu xa wena, a ku nyikeke rona ni yindlu ya wena.

12“Kutakuloko u hetile ku pambula swa vukhume hinkwaswo swa ku tshovela ka wena hi lembe ra vunharhu, ri nga lembe ra swa vukhume, u va u swi nyikile Mulevhi, ni muluveri, ni xisiwana, ni noni, vona va ta dya, va xurha emitini ya wena;

13hi kona u nga ta vulavula emahlweni ka Yehovha, Xikwembu xa wena, u ku: ‘Ndzi humesile endlwini ya mina swilo leswi hlawuriweke, ndzi swi nyikile Mulevhi, ni muluveri, ni xisiwana, ni noni hilaha u ndzi leriseke hakona; a ndzi tlulanga ni wun'we wa milawu ya wena, na swona a ndzi yi rivalanga.

14A ndzi dyangi swilo leswi enhlomulweni wa mina, a ndzi swi hungutanga ndzi ri la nga tengangiki, a ndzi nyikanga nchumu wa swona hikwalaho ka mufi; ndzi yingisile rito ra Yehovha, Xikwembu xa mina, kambe ndzi endlile hinkwaswo hilaha u ndzi leriseke hakona.

15Languta u ri etilweni, endlwini leyo kwetsima ya wena, u katekisa tiko ra wena ra Israele, ni misava leyi u hi nyikeke yona, u yi endla misava leyi khulukaka ntswamba ni vulombe, hilaha u hlambanyeke hakona eka vatata wa hina.’

16“Namuntlha Yehovha, Xikwembu xa wena, a ku lerisa ku endla hi milawu leyi, ni ku lerisa loku. U ta swi hlayisa, ni ku swi endla hi mbilu hinkwayo ya wena, ni moya hinkwawo wa wena.

17Namuntlha u endlile leswaku Yehovha a tivula Xikwembu xa wena, kambe wena u tibohile ku famba etindleleni ta yena, ni ku hlayisa ku vula ka yena, ni ku lerisa ka yena, ni milawu ya yena, ni ku yingisa rito ra yena.

18Yehovha kambe u endlile hilaha u nga tivula hakona namuntlha leswaku u va eka yena tiko ra xiviri, hilaha a ku byeleke hakona u ri karhi u yingisa milawu hinkwayo ya yena;

19yena kambe u ta ku tlakusa ehenhla ka matiko hinkwawo lawa a ma endleke, a ku nyika ku dzuna, ni ku twala, ni ku kwetsima, u va tiko leri hlawuleriweke Yehovha, Xikwembu xa wena, hilaha a ku byeleke hakona.”

← Chapter 25 Jump to: Chapter 27 →