Deuteronomy 25

Tsonga Xitsonga (Bibele) 1929

← Chapter 24 Jump to: Chapter 26 →

1“Kutakuloko vanhu va tengisana kutani va humelela emahlweni ka vaavanyisi leswaku va ta avanyisiwa, la nga riki na nandzu u ta vuriwa la lulameke, kambe la nga na nandzu u ta vuriwa lowo biha.

2Lowo biha, loko a fanele ku biwa, muavanyisi u ta n'wi etlerisa ehansi, kutani u ta biwa emahlweni ka yena hi ku ringana vukulu bya nandzu wa yena.

3A nga ka a nga n'wi bi hi mikhavi leyi tlulaka 40, leswaku kumbe loko a tlula mpimo lowu, makwenu a nga sandziwa emahlweni ka wena.

4“U nga tshuki u siva nomu wa homu loko yi hula.

5“Kungakuloko vamakwavo va akile swin'we, kutani ku fa un'wana a nga siyanga n'wana, nsati wa loyi a feke a nga ka a nga tekiwi ehandle hi nuna wa rixaka rin'wana, namu wa yena u ta ya eka yena, a n'wi teka, a va nsati wa yena, u ta n'wi endlela hi mfanelo ya yena ya namu.

6Kutani mativula ya yena loyi a nga ta n'wi veleka, u ta pfuxa vito ra makwavo la feke; hi sweswo, vito leri ri nga ka ri nga hlanguriwi eIsraeleni.

7Kambe loko munhu loyi a nga swi rhandzi ku teka namu wa yena, yeloyi u ta ya ehubyeni eka vakulukumba, u ta ku: ‘Namu wanga u ala ku pfuxa vito ra makwavo eIsraeleni; a nga rhandzi ku ndzi teka hi mfanelo ya namu.’

8Kavaloko vakulukumba va muti wa yena va ta vita wanuna, va vulavula na yena.

9Kutani loko a phikelela, a ku: ‘A ndzi swi rhandzi ku n'wi teka,’ namu wa yena u ta n'wi tshinelela emahlweni ka vakulukumba, a n'wi tshunxela ntanghu enengeni, kutani a n'wi tshwutela marhi emahlweni; hi kona a nga ta vulavula, a ku: ‘Ku ta endlisiwa sweswo eka munhu loyi a nga akiki yindlu ya makwavo.’

10Kutani vito ra yindlu leyi, eIsraeleni, yi ta vuriwa yindlu ya la susiweke ntanghu.

11“Kutakuloko vavanuna va lwa, a ri wanuna ni makwavo, kutani nsati wa un'wana loko a tshinela ku ta ponisa nuna wa yena emavokweni ya loyi a n'wi baka, kutani a tshambuluta voko ra yena, a khoma lowun'wana hi swa tingana ta yena,

12u ta n'wi tsema voko; tihlo ra wena ri nga ka ri nga n'wi tsetseleri.

13“U nga tshuki u va ni maribye mambirhi ya mpimo enkwameni wa wena, ri ri lerikulu ni leritsongo.

14U nga tshuki u va ni tiefa timbirhi endlwini ya wena, leyikulu ni leyitsongo.

15U ta va ni ribye ra mpimo lowo lulama, ni efa ya mpimo lowo lulama, leswaku masiku ya wena ma ta lehisiwa emisaveni leyi Yehovha, Xikwembu xa wena, a ku nyikaka yona.

16Hikuva mani na mani la endlaka swilo leswi, na mani na mani la hombolokaka, wa yila eka Yehovha, Xikwembu xa wena.

17“Tsundzuka leswi Amaleke a ku endleke endleleni loko mi huma eEgipta,

18hilaha a ku pfukeke endleleni, a wela ehenhla ka lava saleke endzhaku; loko u ri wena a u karhele, u herile matimba, kambe a nga chavangi Xikwembu.

19Kutakuloko Yehovha, Xikwembu xa wena, a ku nyikile ku wisa, a ku ponisa eka valala hinkwavo lava ku rhendzelaka exikarhi, etikweni leri Yehovha, Xikwembu xa wena, a ku nyikaka leswaku yi va ndzhaka ya wena u ri fuma, u ta hlangula ku tsundzukiwa ka Amaleke ehansi ka matilo, mi nga va rivali.

← Chapter 24 Jump to: Chapter 26 →